مرزا غالب

چھوڑا نہ رشک نے کہ ترے گھر کا نام لوں
ہر اک سے پو چھتا ہوں کہ جاؤں کدھر کو میں
مارا زمانے نے اسدؔاللہ خاں تمہیں
وہ ولولے کہاں وہ جوانی کدھر گئی

انشاء اللہ خان انشا

نیند مستوں کو کہاں اور کدھر کا تکیہ
خشت خم خانہ ہے یاں اپنے تو سر کا تکیہ
زمیں سے اٹھی ہے یا چرخ پر سے اتری ہے
یہ آگ عشق کی یا رب کدھر سے اتری ہے

حیدر علی آتش

کوئے جاناں میں بھی اب اس کا پتہ ملتا نہیں
دل مرا گھبرا کے کیا جانے کدھر جاتا رہا

داغ دہلوی

میں داغؔ ہوں مرتا ہوں ادھر دیکھیے مجھ کو
منہ پھیر کے یہ آپ کدھر دیکھ رہے ہیں
دلِ بیتاب سینے سے نکل کر
چلا ہے تو کدھر جاتا کہاں ہے
کہوں کس منہ سے میں تیرے دہن ہے
جو ہوتا تو کدھر جاتا کہاں ہے

شیخ ابراہیم ذوق

وہ دیکھیں بزم میں پہلے کدھر کو دیکھتے ہیں
محبت آج ترے ہم اثر کو دیکھتے ہیں
کھلتا نہیں دل بند ہی رہتا ہے ہمیشہ
کیا جانے کہ آ جائے ہے تو اس میں کدھر سے
ہاتھ سینہ پہ مرے رکھ کے کدھر دیکھتے ہو
اک نظر دل سے ادھر دیکھ لو گر دیکھتے ہو
ہے دم باز پسیں دیکھ لو گر دیکھتے ہو
آئینہ منہ پہ مرے رکھ کے کدھر دیکھتے ہو
شوقِ دیدار مری نعش پہ آ کر بولا
کس کی ہو دیکھتے راہ اور کدھر دیکھتے ہو
اب تو گھبرا کے یہ کہتے ہیں کہ مر جائیں گے
مر کے بھی چین نہ پایا تو کدھر جائیں گے

مصحفی غلام ہمدانی

لوگ کہتے ہیں محبت میں اثر ہوتا ہے
کون سے شہر میں ہوتا ہے کدھر ہوتا ہے
جیتا رہوں کہ ہجر میں مر جاؤں کیا کروں
تو ہی بتا مجھے میں کدھر جاؤں کیا کروں
جو ہو جاتے ہیں دیوانے ترے اتنے نقابوں پر
خدا جانے کہ وہ تجھ کو کدھر سے دیکھ لیتے ہیں

میر مہدی مجروح

ہوئی ہے ان کے مشتاقوں سے رہ بند
وہ میرے گھر بھلا آئیں کدھر سے

فیض احمد فیض

صحرا پہ لگے پہرے اور قفل پڑے بن پر
اب شہر بدر ہو کر دیوانہ کدھر جائے

مرزا رفیع سودا

ہو گی نہ کسی کو یہ خبر بھی
اس مجلس سے کدھر گئے ہم

باقی صدیقی

کون کس سے الجھا ہے ، ایک شور برپا ہے
جا رہاہے دیکھو تو قافلہ کدھر اپنا
اے دشت حیات کے بگولو
ڈھونڈو تو سہی کدھر گئے ہم
آئی نہ پھر نظر کہیں جانے کدھر گئی
ان تک و ساتھ گردشِ شام و سحر گئی
خود سے ملتے تھے جس جگہ ہم
وہ گوشۂ عافیت کدھر ہے
اٹھ کر مری نظر ترے رخ پہ ٹھر گئی
وہ سیر رنگ و بو کی تمنا کدھر گئی
اپنی حالت نہیں دیکھی جاتی
ہم کو حالات کدھر لے آئے

خواجہ میر درد

چمن میں صبح یہ کہتی تھی ہو کر چشمِ تر شبنم
بہار باغ گو یوں ہی رہی لیکن کدھر شبنم

قمر جلالوی

کوسوں دکھائی دیتی نہیں رہگزر مجھے
لے جا رہی ہے آج یہ وحشت کدھر مجھے

شکیب جلالی

کس دشت کی صدا ہو‘ اتنا مجھے بتا دو
ہر سو بچھے ہیں رستے ‘ آؤں تو میں کدھر سے

عرفان صدیقی

بے سروکار فلک بے در و دیوار زمیں
سر میں سودا ہے مری جان کدھر جانے کا
جان و دل کب کے گئے ناقہ سواروں کی طرف
یہ بدن گرد اڑانے کو کدھر آ گئے ہیں

احسان دانش

کعبہ میں خاموشی ہے صنم خانے میں سکوت
صورت پرست اب ترے سجدہ کدھر کریں

اختر شیرانی

پرسش دل تو کجا یہ بھی نہ پوچھا اس نے
ہم مسافر کدھر آئے تھے کدھر جاتے ہیں

اسرار الحق مجاز

یہ تو کیا کہیے چلا تھا میں کہاں سے ہم دم
مجھ کو یہ بھی نہ تھا معلوم کدھر جانا تھا

علی سردار جعفری

الجھے کانٹوں سے کہ کھیلے گلِ تر سے پہلے
فکر یہ ہے کہ صبا آئے کدھر سے پہلے

ماجد صدیقی

جن کے چمن کو تو نے بہار خیال دی
ماجدؔ ترے وہ دوست کہاں تھے کدھر گئے

اختر امام رضوی

اک اماوس کا نصیبہ ہوں میں
آج یہ چاند کدھر سے نکلا

جوش ملیح آبادی

جو موقع مل گیا تو خضر سے یہ بات پوچھیں گے
جسے ہو جستجو اپنی وہ بیچارہ کدھر جائے

حفیظ ہوشیارپوری

وہ ایک جلوۂ صد رنگ اک ہجوم بہار
نہ جانے کون تھا جانے کدھر گیا کوئی

رسا چغتائی

جا رہے ہو کدھر رساؔ مرزا
دیکھتے ہو ہوا کدھر کی ہے

سیماب اکبر آبادی

سب اپنے دل میں اک تیرِ نظر محسوس کرتے ہیں
مگر کوئی بتا سکتا نہیں اس نے کدھر دیکھا

شاد عظیم آبادی

بہت دنوں پہ مری چشم میں نظر آیا
اے اشک خیر تو ہے ، تو کدھر کدھر آیا

شکیل بدایونی

جتنے بھی ملے رنگ وہ سب بھر دیے تجھ میں
اک رنگ وفا اور ہے لاؤں وہ کدھر سے
تم ہی سمجھ لو تم ہو مسیحا
میں کیا جانوں درد کدھر ہے
مے کدہ بند مقفل ہیں در دیر و حرم
دیکھنا ہے کہ شکیلؔ آج کدھر جاتے ہیں
میرے غم خانے کے چاروں سمت ہیں دولت کدے
زندگی کی بھیک ملتی ہے کدھر سے دیکھیے

فانی بدایونی

ہاں سچ تو ہے شکایت زخمِ جگر غلط
دل سے گزر کے تیر تمہارا کدھر گیا

اختر ہوشیارپوری

گلیاں بھی ہیں سنسان دریچے بھی ہیں خاموش
قدموں کی یہ آواز در آئی ہے کدھر سے

اکبر حمیدی

شرار سنگ جو اس شور و شر سے نکلے گا
جلوس لالہ و نسریں کدھر سے نکلے گا

احمد فراز

اب شوق سے کہ جاں سے گزر جانا چاہیے
بول اے ہوائے شہر کدھر جانا چاہیے
عجب جنونِ مسافت میں گھر سے نکلا تھا
خبر نہیں ہے کہ سورج کدھر سے نکلا تھا

شاذ تمکنت

سمٹ سمٹ سی گئی تھی زمیں کدھر جاتا
میں اس کو بھولتا جاتا ہوں ورنہ مر جاتا
تو حصار در و دیوار لیے جائے کدھر
میرا کیا ہے کہ میں ہوں دشت بہ دلِ خانہ بہ سر

کلیم عاجز

رسن و دار ادھر کاکل و رخسار ادھر
دل بتا تیرا کدھر جانے کو جی چاہے ہے
اک گھر بھی سلامت نہیں اب شہرِ وفا میں
تو آگ لگانے کو کدھر جائے ہے پیارے

کیف بھوپالی

تم سے نہ مل کے خوش ہیں وہ دعویٰ کدھر گیا
دو روز میں گلاب سا چہرہ اتر گیا

کیفی اعظمی

کیا جانے کس کی پیاس بجھانے کدھر گئیں
اس سر پہ جھوم کے جو گھٹائیں گزر گئیں
دیوانہ پوچھتا ہے یہ لہروں سے بار بار
کچھ بستیاں یہاں تھیں بتاؤ کدھر گئیں

ناصر کاظمی

شہر سنسان ہے کدھر جائیں
خاک ہو کر کہیں بکھر جائیں
گئے دنوں کا سراغ لے کر کدھر سے آیا کدھر گیا وہ
عجیب مانوس اجنبی تھا مجھے تو حیران کر گیا وہ
وہ رات کا بے نوا مسافر وہ تیرا شاعر وہ تیرا ناصر
تری گلی تک تو ہم نے دیکھا تھا پھر نہ جانے کدھر گیا وہ