مرزا غالب

پائے افگار پہ جب سے تجھے رحم آیا ہے
خارِ رہ کو ترے ہم مہرِ گیا کہتے ہیں

امام بخش ناسخ

کیوں دوست نہ خوش ہوں جائے ماتم
سیماب کی طرح مر گیا ہوں
جب ہجر میں باغ کو گیا ہوں
میں آتشِ گل میں جل بجھا ہوں

بہادر شاہ ظفر

چشم الطاف فخر دیں سے ہوں
اے ظفرؔ کچھ سے ہو گیا کچھ ہوں

مصحفی غلام ہمدانی

ترے خاکساروں نے اپنا سر نہیں پیٹا دشت میں اس قدر
کہ بگولہ واں سے غبار کا طرف آسماں کے گیا نہیں
وہ جو کہلاتے تھے زیں پیش ترے یاروں میں
جانِ من اب تو ہمیں بھول گیا ہم ہی ہیں
یہ کیا غضب ہوا کہ نہ خنجر لگا نہ تیر
پہلو سے آپھی آپ مرا دل گیا سرک
گھورتا ہے مجھے وہ دل کی مرے
میری نظروں سے پا گیا ہو گا
جس گھڑی تجھ کو کنج خلوت میں
پا کے تنہا وہ آ گیا ہو گا
مصحفیؔ اس گھڑی میں حیراں ہوں
تجھ سے کیوں کر رہا گیا ہو گا
شوخی کہوں کیا تیرے تصور کی کہ ہے ہے
شب سامنے آ کر مرے آگے سے گیا بھاگ

مومن خان مومن

اس وسعت کلام سے جی تنگ آ گیا
ناصح تو میری جان نہ لے دل گیا گیا

میر مہدی مجروح

وہ اگر آ ملیں تو کیا ہے عجب
غم سے کچھ اور ہو گیا ہوں میں
شارح حالِ دل سمجھ مجھ کو
درد ہی درد ہو گیا ہوں میں

فیض احمد فیض

صبح پھوٹی تو وہ پہلو سے اٹھا آخرِ شب
وہ جو اک عمر سے آیا نہ گیا آخرِ شب

مرزا رفیع سودا

عزت و آبرو و حرمت و دین و ایماں
روؤں کس کس کو میں یارو کہ گیا کیا کیا کچھ
شادی آنے کی نہ کر یار نہ جانے کا غم
آیا کیا کیا نہ کچھ اس جا نہ گیا کیا کیا کچھ

باقی صدیقی

ہم چھپائیں گے بھید کیا دل کا
رنگ آنکھوں میں آ گیا دل کا
رہنے دو کہ اب تم بھی مجھے پڑھ نہ سکو گے
برسات میں کاغذ کی طرح بھیگ گیا ہوں
اب تصور بھی ساتھ دے نہ سکے
دور اتنا نکل گیا کوئی
آس ٹوٹی کچھ اسطرح باقیؔ
جیسے پردہ سا اٹھ گیا کوئی
ہر بگولے کو ہینسبت ہم سے
دشت تک سایہ گیا ہے اپنا
قدموں کی آہٹ پر کان رہے اپنے
کون آیا اور کون گیا معلوم نہیں

جون ایلیا

جانیے میں چلا گیا ہوں کہاں
میں تو خود سے کہیں گیا بھی نہیں
آج میں خود سے ہو گیا مایوس
آج اک یار مر گیا میرا
کیا ہے جو بدل گئی ہے دنیا
میں بھی تو بہت بدل گیا ہوں
میں جرم کا اعتراف کر کے
کچھ اور ہے جو چھپا گیا ہوں
اے شخص میں تیری جستجو سے
بیزار نہیں ہوں تھک گیا ہوں
ابھی اک شور‌ ہائے و ہو سنا ہے ساربانوں نے
وہ پاگل قافلے کی ضد میں پیچھے رہ گیا ہو گا
ہے نصف شب وہ دیوانہ ابھی تک گھر نہیں آیا
کسی سے چاندنی راتوں کا قصہ چھڑ گیا ہو گا
ہے تیری جدائی اور میں ہوں
ملتے ہی کہیں بچھڑ گیا تو
ابھی اک شور سا اٹھا ہے کہیں
کوئی خاموش ہو گیا ہے کہیں
جو یہاں سے کہیں نہ جاتا تھا
وہ یہاں سے چلا گیا ہے کہیں
تو مجھے ڈھونڈ میں تجھے ڈھونڈوں
کوئی ہم میں سے رہ گیا ہے کہیں
اسی کمرے سے کوئی ہو کے وداع
اسی کمرے میں چھپ گیا ہے کہیں

خواجہ میر درد

دل زمانے کے ہاتھ سے سالم
کوئی ہو گا جو رہ گیا ہو گا
یک بہ یک نام لے اٹھا میرا
جی میں کیا اس کے آ گیا ہو گا

عبدالحمید عدم

محتاط و ہوشیار تو بے انتہا ہوں میں
عمداً ترا فریبِ نظر کھا گیا ہوں میں
ایسے گرا ہوں تیری خدائی کے سامنے
محسوس ہو رہا ہے خدا ہو گیا ہوں میں

شکیب جلالی

درخت راہ بتائیں ہلا ہلا کر ہاتھ
کہ قافلے سے مسافر بچھڑ گیا ہے کوئی
فصیلِ جسم پہ تازہ لہو کے چھینٹے ہیں
حدودِ وقت سے آگے نکل گیا ہے کوئی

مجید امجد

کون یاد آ گیا تھا، یاد نہیں
دل بھی اک ضرب بھول بھول گیا

جمال احسانی

پھر ایک سایہ در و بام پر اتر آیا
دل و نگاہ میں پھر ذکر چھڑ گیا اس کا
جمالؔ اس نے تو ٹھانی تھی عمر بھر کے لیے
یہ چار روز میں کیا حال ہو گیا اس کا

رئیس فروغؔ

عشق تو اک الزام ہے اس کا وصل کا تو بس نام ہوا
وہ آیا تھا قاتل بن کے قتل ہی کرکے گیا بھی ہے
جہاں مری کشتیاں نہیں تھیں
وہاں بھی سیلاب آ گیا ہے
ایسا لگتا ہے کہ جیسے کوئی
آئینہ ٹوٹ گیا ہے مجھ میں

احسان دانش

کرتی نہیں عبور تمہیں میری جستجو
کیا کر دیا ہے تم نے یہ کیا ہو گیا مجھے
میری وفا پہ آپ ہی چیں بر جبیں نہیں
میں خود بھی سوچتا ہوں یہ کیا ہو گیا مجھے
لوگ یوں دیکھ کے ہنس دیتے ہیں
تو مجھے بھول گیا ہو جیسے

ادا جعفری

کانٹا سا جو چبھا تھا وہ لو دے گیا ہے کیا
گھلتا ہوا لہو میں یہ خورشید سا ہے کیا
ساگر ہوں اور موج کے ہر دائرے میں ہوں
ساحل پہ کوئی نقشِ قدم کھو گیا ہے کیا

اسرار الحق مجاز

کمال عشق ہے دیوانہ ہو گیا ہوں میں
یہ کس کے ہاتھ سے دامن چھڑا رہا ہوں میں

بشیر بدر

سر راہ کچھ بھی کہا نہیں کبھی اس کے گھر میں گیا نہیں
میں جنم جنم سے اسی کا ہوں اسے آج تک یہ پتا نہیں
کرچیں چبھتی ہیں بہت سینے میں
آئنہ ٹوٹ گیا ہو جیسے
آہوں کے بادل کیوں دل میں بن برسے ہی لوٹ گئے ہیں
اب کے برس ساون کا مہینہ کیسا پیاسا پیاسا گیا ہے
وہ اپنے گھر چلا گیا افسوس مت کرو
اتنا ہی اس کا ساتھ تھا افسوس مت کرو
اس بار تم کو آنے میں کچھ دیر ہو گئی
تھک ہار کے وہ سو گیا افسوس مت کرو
دنیا میں اور چاہنے والے بھی ہیں بہت
جو ہونا تھا وہ ہو گیا افسوس مت کرو

زہرا نگاہ

رک جا ہجومِ گل کہ ابھی حوصلہ نہیں
دل سے خیال تنگی داماں گیا نہیں

ضیا جالندھری

پتھر پگھل کے ریت کے مانند نرم ہے
درد اتنی دیر ساتھ رہا راس آ گیا

ظہیر کاشمیری

اس دور عافیت میں یہ کیا ہو گیا ہمیں
پتہ سمجھ کے لے اڑی وحشی ہوا ہمیں
راہِ طلب سمٹ کے قدم چومنے لگی
جب بھی کوئی حریف‌ سفر مل گیا ہمیں

عالم تاب تشنہ

یہ کہنا مسند شاخ نمو پہ تھا جو کبھی
وہ پھول صورت خوشبو بکھر گیا کہنا

عبید اللہ علیم

یہ کیسی بچھڑنے کی سزا ہے
آئینے میں چہرہ رکھ گیا ہے
رکھا تھا خلا میں پاؤں میں نے
رستے میں ستارہ آ گیا ہے
کچھ تو بتاؤ شاعر بیدار کیا ہوا
کس کی تلاش ہے تمہیں اور کون کھو گیا
آنکھوں میں روشنی بھی ہے ویرانیاں بھی ہیں
اک چاند ساتھ ساتھ ہے اک چاند گہہ گیا
کوئی رفتار ہو گی روشنی کی
مگر وہ اس سے بھی آگے گیا ہے
مجسم ہو گئے سب خواب میرے
مجھے میرا خزانہ مل گیا ہے