مرزا غالب

نغمہ ہائے غم کو ہی اے دل غنیمت جانیے
بے صدا ہو جائے گا یہ سازِ زندگی ایک دن
کثرت آرای خیالِ ما سوا کی وہم تھی
مرگ پر غافل گمانِ زندگی کرتے رہے

داغ دہلوی

کہا جو میں نے کہ مر جاؤں گا تو کہتے ہیں
ہمارے زائچے میں زندگی نکلتی ہے
جیتے ہیں کسی کی آس پر ہم
احسان ہے ایسی زندگی کا
ہم تری آرزو پہ جیتے ہیں
یہ نہیں ہے تو زندگی ہی نہیں
مزے عشق کے کچھ وہی جانتے ہیں
کہ جو موت کو زندگی جانتے ہیں

مصحفی غلام ہمدانی

سراسر خجلت و شرمندگی ہے
ہماری بھی بھلا کیا زندگی ہے

فیض احمد فیض

سہل یوں راہِ زندگی کی ہے
ہر قدم ہم نے عاشقی کی ہے

جون ایلیا

حالت حال کے سبب حالت حال ہی گئی
شوق میں کچھ نہیں گیا شوق کی زندگی گئی
کام کی بات میں نے کی ہی نہیں
یہ مرا طور زندگی ہی نہیں
خون تھوکے گی زندگی کب تک
یاد آئے گی اب تری کب تک
پڑے ہیں ایک گوش میں گماں کے
بھلا ہم کیا ہماری زندگی کیا
اب مری کوئی زندگی ہی نہیں
اب بھی تم میری زندگی ہو کیا
قہقہہ مارتے ہی دیوانہ
ہر غمِ زندگی کو بھول گیا
گنوائی کس کی تمنا میں زندگی میں نے
وہ کون ہے جسے دیکھا نہیں کبھی میں نے
نہ ہم رہے نہ وہ خوابوں کی زندگی ہی رہی
گماں گماں سی مہک خود کو ڈھونڈتی ہی رہی
رنگ رس ہے میری رگوں میں رواں
بخدا میری زندگی ہے شراب

جگر مراد آبادی

تری خوشی سے اگر غم میں بھی خوشی نہ ہوئی
وہ زندگی تو محبت کی زندگی نہ ہوئی

عبدالحمید عدم

گیسوؤں کے سائے میں آرام کش
سر برہنہ زندگی تھی میں نہ تھا

قمر جلالوی

ہر صبح آ کے گلچیں گلشن کو دیکھتا ہے
یہ وقت بھی ہے نازک پھولوں کی زندگی میں
پیش آئے لاکھ رنج اگر اک خوشی ہوئی
پروردگار یہ بھی کوئی زندگی ہوئی
اچھا تو دونوں وقت ملے کو سئے حضور
پھر بھی مریضِ غم کی اگر زندگی ہوئی
تمھاری فرقت میں تنگ آ کر یہ مرنے والوں کا فیصلہ ہے
قضا سے جو ہمکنار ہو گا اسے نئی زندگی ملے گی

شکیب جلالی

نہ سوچیے تو بہت مختصر ہے سیلِ حیات
جو سوچیے تو یہی زندگی سمندر ہے

مجید امجد

آخر کوئی کنارا اس سیلِ بے کراں کا؟
آخر کوئی مداوا اس دردِ زندگی کا؟

احسان دانش

پرستش غم کا شکریہ کیا تجھے آ گہی نہیں
تیرے بغیر زندگی درد ہے زندگی نہیں
لاکھ زمانہ ظلم ڈھائے وقت نہ وہ خدا دکھائے
جب مجھے ہو یقیں کہ تو حاصل زندگی نہیں
صرف اشک و تبسم میں الجھے رہے
ہم نے دیکھا نہیں زندگی کی طرف
موت کی راہ آسان ہو جائے گی
پیار سے دیکھیے زندگی کی طرف
جانے آنکھوں نے آنکھوں سے کیا کچھ کہا
زندگی جھک گئی زندگی کی طرف
بہت مشکل ہے اس معیار کی رندی زمانے میں
جو لغزش کو گنہ اور بے خودی کو زندگی سمجھے
جنوں اک منزل بے نام کو طے کرتا جاتا ہے
کسے فرصت ہے جو سود‌‌ و زیان زندگی سمجھے
ہمیں تو مدتوں سے جستجو ہے ایسے انساں کی
ہماری زندگی کو بھی جو اپنی زندگی سمجھے
بچھڑ کر ان سے یوں غم میں گزاری زندگی ہم نے
سحر تاریک دیکھی سرخ پائی چاندنی ہم نے
تمہیں ہو گے نگاہِ شوق کا مرکز تمہیں ہو گے
اگر اس زندگی کے بعد پائی زندگی ہم نے

بہزاد لکھنوی

مسرور بھی ہوں خوش بھی ہوں لیکن خوشی نہیں
تیرے بغیر زیست تو ہے زندگی نہیں

بیخود بدایونی

طالع بد وہاں بھی ساتھ نہ دے
موت بھی زندگی نہ ہو جائے

زہرا نگاہ

کہاں کے عشق و محبت کدھر کے ہجر و وصال
ابھی تو لوگ ترستے ہیں زندگی کے لیے
سحر آغاز شب اتمامِ حجت
عجب زہراؔ کی وضع زندگی تھی

ضیا جالندھری

موت کی آرزو بھی کر دیکھو
کیا امیدیں تھیں زندگی سے مجھے

ظہیر کاشمیری

شبِ مہتاب بھی اپنی بھری برسات بھی اپنی
تمہارے دم قدم سے زندگی تھی زندگی اپنی
مجھے شادابی صحنِ چمن سے خوف آتا ہے
یہی انداز تھے جب لوٹ گئی تھی زندگی اپنی
تمہارا غم اسے آشوب صرصر بچائے گا
ہواؤں سے بھڑک اٹھی ہے شمع زندگی اپنی

عبید اللہ علیم

میں جس میں کھو گیا ہوں مرا خواب ہی تو ہے
یک دو نفس نمود سہی زندگی تو ہے

علی سردار جعفری

ہے اور ہی کاروبار مستی
جی لینا تو زندگی نہیں ہے

فارغ بخاری

یہی ہے دور غم عاشقی تو کیا ہو گا
اسی طرح سے کٹی زندگی تو کیا ہو گا

جلیل مانک پوری

ہر وقت ہیں موت کی دعائیں
اللٰہ رے لطف زندگی کا
سمجھے تھے نہ ہم کہ تم پہ مرنا
ہو جائے گا روگ زندگی کا
ہر وقت ہیں موت کی دعائیں
اللٰہ رے لطف زندگی کا
سمجھے تھے نہ ہم کو تم پہ مرنا
ہو جائے گا روگ زندگی کا
ہاں جسے عاشقی نہیں آتی
لذت زندگی نہیں آتی

حفیظ جالندھری

بے تعلق زندگی اچھی نہیں
زندگی کیا موت بھی اچھی نہیں

سلام مچھلی شہری

سرحد فنا تک بھی تیرگی نہیں آئی
یوں بھی راس اندھیروں کی زندگی نہیں آئی

سیماب اکبر آبادی

بڑی دلچسپیوں سے صبح شامِ زندگی ہو گی
میں دیکھوں گا انہیں اور ساری دنیا دیکھتی ہو گی

شکیل بدایونی

اب تو خوشی کا غم ہے نہ غم کی خوشی مجھے
بے حس بنا چکی ہے بہت زندگی مجھے
یوں دیجیے فریب محبت کہ عمر بھر
میں زندگی کو یاد کروں زندگی مجھے
ہم ہیں اور ان کی خوشی ہے آج کل
زندگی ہی زندگی ہے آج کل
جو جی رہے ہیں انہی کے لیے ہر اک غم ہے
زہے نصیب کہ پھولوں کی زندگی کم ہے

اختر ہوشیارپوری

تھی تتلیوں کے تعاقب میں زندگی میری
وہ شہر کیا ہوا جس کی تھی ہر گلی میری
اخترؔ گزرتے لمحوں کی آہٹ پہ یوں نہ چونک
اس ماتمی جلوس میں اک زندگی بھی ہے

شاذ تمکنت

اجالا چھن رہا ہے روشنی تقسیم ہوتی ہے
تری آواز ہے یا زندگی تقسیم ہوتی ہے
تری نظر سبب تشنگی نہ بن جائے
کہیں شراب مری زندگی نہ بن جائے

فراق گورکھپوری

زمیں بدلی فلک بدلا مذاق زندگی بدلا
تمدن کے قدیم اقدار بدلے آدمی بدلا
ستارے جاگتے ہیں رات لٹ چھٹکائے سوتی ہے
دبے پاؤں کسی نے آ کے خواب زندگی بدلا
تیز احساس خودی درکار ہے
زندگی کو زندگی درکار ہے
عقل نے کل میرے کانوں میں کہا
مجھ کو تیری زندگی درکار ہے

قابل اجمیری

مقام عاشقی دنیا نے سمجھا ہی نہیں ورنہ
جہاں تک تیرا غم ہوتا وہیں تک زندگی ہوتی
یہ سب رنگینیاں خونِ تمنا سے عبارت ہیں
شکستِ دل نہ ہوتی تو شکست زندگی ہوتی
اجل بھی اس کی بلندی کو چھو نہیں سکتی
وہ زندگی جسے احساس زندگی ہو جائے
اجل کی گود میں قابلؔ ہوئی ہے عمر تمام
عجب نہیں جو مری موت زندگی ہو جائے

قتیل شفائی

کیا ہے پیار جسے ہم نے زندگی کی طرح
وہ آشنا بھی ملا ہم سے اجنبی کی طرح
نگاہوں میں چمک دل میں خوشی محسوس کرتا ہوں
کہ تیرے بس میں اپنی زندگی محسوس کرتا ہوں

کیفی اعظمی

جو وہ مرے نہ رہے میں بھی کب کسی کا رہا
بچھڑ کے ان سے سلیقہ نہ زندگی کا رہا

محسن احسان

تیرگی ہے صحن میں تابندگی دیوار پر
آئنے جڑتی رہی ہے زندگی دیوار پر
عمر بھر ہم نے کیے ہیں جمع مردہ تجربے
اور سمجھتے ہیں کہ لکھ دی زندگی دیوار پر

محسن نقوی

بھلا دے مجھ کو کہ بے وفائی بجا ہے لیکن
گنوا نہ مجھ کو کہ میں تری زندگی رہا ہوں

ناصر کاظمی

ناصر بہت سی خواہشیں دل میں ہیں بے قرار
لیکن کہاں سے لاؤں وہ بے فکر زندگی
غم ہے یا خوشی ہے تو
میری زندگی ہے تو

نوح ناروی

میں کسی شوخ کی گلی میں نہیں
زندگی میری زندگی میں نہیں