مرزا غالب

روک لو گر غلط چلے کوئی
بخش دو گر خطا کرے کوئی
کیوں نہ ٹھہریں ہدفِ ناوکِ بیداد کہ ہم
آپ اٹھا لاتے ہیں گر تیر خطا ہوتا ہے

بہادر شاہ ظفر

میں ہوں عاصی کہ پر خطا کچھ ہوں
تیرا بندہ ہوں اے خدا کچھ ہوں
بے خودی میں لے لیا بوسہ خطا کیجے معاف
یہ دل بے تاب کی ساری خطا تھی میں نہ تھا

حیدر علی آتش

کہاں وہ زلف کہاں خون نافۂ آہو
جو مشک سمجھے ہیں وہ لوگ ہیں خطا کی طرف

داغ دہلوی

کہتے ہیں ہم نہیں خدائے کریم
کیوں ہماری خطا کرے کوئی
ہے عبث جرمِ عشقِ پر الزام
جب خطاوار بھی خطا جانے
پار ہوتی ہیں‌کلیجے سے نگاہیں ان کی
قدر انداز کے کب تیر خطا ہوتے ہیں

شیخ ابراہیم ذوق

خط بھی لکھتے ہیں تو لیتے ہیں خطائی کاغذ
دیکھیے کب تک انہیں میری خطا یاد رہے

مصحفی غلام ہمدانی

عشوہ و ناز ترا ہم سے یہی کہتا ہے
نہیں کرتے جو کبھی تیر خطا ہم ہی ہیں

مصطفٰیٰ خان شیفتہ

کبھی بے جرم یہ آزردہ ہونا
کہ کیا طاقت جو پوچھوں میں خطا کیا
نفرین بے شمار ہے اس عمد و سہو پر
گر ایک میں صواب کروں سو خطا کروں

یگانہ چنگیزی

زہے سہو کاتب کہ سارا زمانہ
مجھی کو سراپا خطا جانتا ہے

باقی صدیقی

تیری رحمت پہ اس قدر ہے یقین
جب خیال آئے اک خطا ہو جائے

عبدالحمید عدم

کتنی بے ساختہ خطا ہوں میں
آپ کی رغبت و رضا ہوں میں

قمر جلالوی

تمھارے تیرِ نظر نے غریب کی نہ سنی
ہزار دل نے پکارا کہ بے خطا ہوں میں
رخ ادھر آنکھ ادھر آپ یہ کیا کرتے ہیں
پھر نہ کہنا مرے تیر خطا کرتے ہیں

عرفان صدیقی

حشر برپا تھا کہ سبط مصطفی مارا گیا
بے وطن جنگل میں بے جرم و خطا مارا گیا
لگتا نہیں ہے دل کو جفا کا کوئی جواز
نامہرباں، یہ تیر خطا ہونے والے ہیں
مرے عدو، ترے ترکش میں آخری ہے یہ تیر
تو دیکھ، اب کے نشانہ خطا نہ ہونے پائے

الطاف حسین حالی

حق نے احساں نہ کی اور میں نے کفراں میں کمی
وہ عطا کرتا رہا اور میں خطا کرتا رہا
طاعنوں کی زد سے بچ بچ کر چلا راہ خطا
وار ان کا اس لیے اکثر خطا کرتا رہا
جو کرینگے بھرینگے خود واعظ
تم کو میری خطا سے کیا مطلب
دیدہ و دل کو خیانت سے نہیں رکھ سکتے باز
گرچہ دست و پا کو اکثر بے خطا پاتے ہیں ہم

احسان دانش

جتا کے مجبوری محبت امید مہر و وفا کے معنی
میں خود ہوں اپنا سکون دشمن کسی کی کوئی خطا نہیں ہے

ادا جعفری

شدت رقص آرزو اپنا جواز آپ تھی
میری نگاہ پر اداؔ میری خطا بھی کیوں کھلے

اسرار الحق مجاز

حسن کو کر نہ دے یہ شرمندہ
عشق سے یہ خطا بھی ہوتی ہے
سخت جاں ہی نہیں ہم خودِ سر و خود دار بھی ہیں
ناوکِ ناز خطا ہے تو خطا ہو ساقی

بشیر بدر

سوچا تجھے دیکھا تجھے چاہا تجھے پوجا تجھے
میری خطا میری وفا تیری خطا کچھ بھی نہیں
پھول کی آنکھ میں شبنم کیوں ہے
سب ہماری ہی خطا ہو جیسے

سدرشن فاکر

کچھ دیر ٹھہر جائیے اے بندۂ انصاف
ہم اپنے گناہوں میں خطا ڈھونڈ رہے ہیں

حسرت موہانی

گنہ گارو چلو عفو الٰہی
بہت مشتاق ہے عرض خطا کا
نہ اثر آہ میں کچھ ہے نہ دعا میں تاثیر
تیر ہم جتنے چلاتے ہیں خطا ہوتے ہیں

حفیظ جالندھری

دوستوں کے یہ مخلصانہ تیر
کچھ نہیں میری ہی خطا کے سوا
تیر چلے پہ نہ آنا کہ خطا ہو جانا
لب تک آتے ہوئے شکوے کا دعا ہو جانا

شاد عظیم آبادی

مالک دل ہیں جب وہی جب ہے انہیں کا اختیار
مرتکب گناہ کیوں جرم و خطا کی وجہ کیا

شکیل بدایونی

ہر اک جرم محبت اس نگاہِ لطف کے صدقے
نوید عافیت لے کر خطا کرنے کا وقت آیا
حسرت عفو کیا ہوئی جرم و خطا کو کیا ہوا
سامنے ہے در کرم دستِ دعا کو کیا ہوا
جلوۂ حسن کرم کا آسرا کرتا ہوں میں
جو خطا ممکن ہے مجھ سے بے خطا کرتا ہوں میں

فانی بدایونی

خطا ڈھونڈتا ہوں عطاؤں کے قابل
عطا چاہتے ہیں خطا چاہتا ہوں

امیر مینائی

رسوا ہوئے جو آپ تو میرا قصور کیا؟
جو کچھ کیا وہ دل نے کیا، بے خطا ہوں میں

شاذ تمکنت

وفا کا ذکر ہی کیا ہے جفا بھی راس آئے
وہ مسکرائے تو جرم خطا بھی راس آئے
جانے کیا قیمت ارباب وفا ٹھہرے گی
میں اگر عرض کروں گا تو خطا ٹھہرے گی
کس کو حاصل ہو تری چشم سیہ کے آگے
منصب سلسلۂ جرم و خطا میری طرح

فراق گورکھپوری

مجھ کو مارا ہے ہر اک درد و دوا سے پہلے
دی سزا عشق نے ہر جرم و خطا سے پہلے

کلیم عاجز

ہم کو معلوم نہ تھا پہلے یہ آئینِ جہاں
اس کو دیتے ہیں سزا جس کی خطا کچھ بھی نہیں

کیف بھوپالی

سچ ہے کہ محبت میں ہمیں موت نے مارا
کچھ اس میں تمہاری بھی خطا ہے کہ نہیں ہے

کیفی اعظمی

کی ہے کوئی حسین خطا ہر خطا کے ساتھ
تھوڑا سا پیار بھی مجھے دے دو سزا کے ساتھ

ناصر کاظمی

زندگی بھر وفا ہمیں سے ہوئی
سچ ہے یارو خطا ہمیں سے ہوئی