مرزا غالب

تھی خبر گرم کہ غالب کے اڑیں گے پرزے
دیکھنے ہم بھی گئے تھے ، پہ تماشا نہ ہوا
مجھ سے تمہیں نفرت سہی، نیر سے لڑائی
بچوں کا بھی دیکھا نہ تماشا کوئی دن اور
حسد سے دل اگر افسردہ ہے ، گرمِ تماشا ہو
کہ چشمِ تنگ شاید کثرتِ نظارہ سے وا ہو
ناکامی نگاہ ہے برقِ نظارہ سوز
تو وہ نہیں کہ تجھ کو تماشا کرے کوئی
آئینہ کیوں نہ دوں کہ تماشا کہیں جسے
ایسا کہاں سے لاؤں کہ تجھ سا کہیں جسے
بازیچۂِ اطفال ہے دنیا مرے آگے
ہوتا ہے شب و روز تماشا مرے آگے

حیدر علی آتش

صاف دل ہو تو جلوہ گر ہو یار
آئنہ ہو تو ہو تماشا لوٹ
بینا ہوں جو آنکھیں تو رخِ یار کو دیکھیں
نظارہ کے قابل جو تماشا ہے تو یہ ہے
قدرتِ حق ہے صباحت سے تماشا ہے وہ رخ
خال مشکیں دل فرعوں یدِ بیضا ہے وہ رخ
تا کجا شرح کروں حسن کے اس کے آتشؔ
مہر ہے ماہ ہے جو کچھ ہے تماشا ہے وہ رخ

داغ دہلوی

ان آنکھوں نے کیا کیا تماشا نہ دیکھا
حقیقت میں جو دیکھنا تھا نہ دیکھا

مصحفی غلام ہمدانی

دیکھ کر اک جلوے کو تیرے گر ہی پڑا بے خود ہو موسیٰ
ان آنکھوں کے صدقے جاؤں جو ہیں ہر دم محوِ تماشا
جب آئی خزاں ہم کو کہا ''باغ چلو ہو''
پوچھا نہ کبھی سیر و تماشا کے دنوں میں

مصطفٰی خان شیفتہ

شیفتہ آیا ہوں میں کس کا تماشا دیکھ کر
رہ گئے حیران مجھ کو سب خود آرا دیکھ کر
یار کو محرومِ تماشا کیا
مرگِ مفاجات نے یہ کیا کیا

مومن خان مومن

دیدۂ حیراں نے تماشا کیا
دیر تلک وہ مجھے دیکھا کیا

یگانہ چنگیزی

کیا سہل ہے کہ ترک تماشا کرے کوئی
دل سے نہ ہو تو آنکھ سے توبہ کرے کوئی

باقی صدیقی

انتہائے غمِ دنیا معلوم
اب نظر محوِ تماشا بھی نہیں
ہے حقیقت کی حقیقت دنیا
اور تماشے کا تماشا کہیے
غم بنا دے نہ تماشا ہم کو
ہنسنا آیا ہے نہ رونا ہم کو
تاب نظارا نہیں ہے باقیؔ
پھر بھی ہم طرفہ تماشا مانگیں
ان کا یا اپنا تماشا دیکھو
جو دکھاتا ہے زمانہ دیکھو
تو دوش ہوا پر ہے تری بات ہے کیا
جو حادثہ ہو اس کو تماشا کہہ دے
کٹ رہا ہے رشتہ قلب و نظر
ہو رہا ہے اک تماشا سامنے
آنکھوں میں ہے کھچی ہوئی تصویر خونِ دل
ہم دیکھتے نہیں وہ تماشا ہے سامنے

جون ایلیا

اپنا خاکہ لگتا ہوں
ایک تماشا لگتا ہوں
اے قاتلوں کے شہر بس اتنی ہی عرض ہے
میں ہوں نہ قتل کوئی تماشا کیے بغیر

جگر مراد آبادی

کثرت میں بھی وحدت کا تماشا نظر آیا
جس رنگ میں دیکھا تجھے یکتا نظر آیا
ہر حقیقت کو بانداز تماشا دیکھا
خوب دیکھا ترے جلووں کو مگر کیا دیکھا
آئینہ خانۂ عالم میں کہیں کیا دیکھا
تیرے دھوکے میں خود اپنا ہی تماشا دیکھا

خواجہ میر درد

کیا مج کو داغوں نے سروِ چراغاں
کبھو تو نے آ کر تماشا نہ دیکھا

قمر جلالوی

پیشِ ساحل اک ہجوم موجِ دریا ہو گیا
وہ نہانے کیا چلے آئے تماشا ہو گیا

عرفان صدیقی

جدھر بھی دیکھئے دل کی حریف دنیا ہے
یہ کون شعبدہ گر ہے ، یہ کیا تماشا ہے
کوئی میرے دل حیراں کا سراپا دیکھے
جیسے بچہ کسی میلے میں تماشا دیکھے
ویسے میرے خس و خاشاک میں کیا رکھا ہے
آگ دکھلاؤ تو نکلے گا تماشا مجھ میں
مصافِ دشت تماشا نہیں ٹھہر جاؤ
اور اس کے آگے بھی دریا نہیں ٹھہر جاؤ

مجید امجد

آنکھ کی پتلی، سانس کی ڈوری، دل کی تھاپ، اک پل کی نرت کا تماشا ہے
گلتی کھوپڑیوں سے چنی دیواروں پر اک جلتی جوت کی جھل جھل ہے

جمال احسانی

کیسے کیسے موڑ آئے راہ میں
ساتھ چلتے تو تماشا دیکھتے

رئیس فروغؔ

گلیوں میں آزار بہت ہیں گھر میں جی گھبراتا ہے
ہنگامے سے سناٹے تک اپنا حال تماشا ہے
کوئی دریا ہے نہ صحرا اپنا
اپنے گھر میں ہے تماشا اپنا

احسان دانش

رنگ تہذیب و تمدن کے شناسا ہم بھی ہیں
صورت آئینہ مرہون تماشا ہم بھی ہیں
مدت سے گرچہ جلوہ‌‌ گہِ طور سے خموش
آنکھیں ہیں اب بھی ذوقِ تماشا لیے ہوئے

بہزاد لکھنوی

کیا یہ بھی میں بتلا دوں تو کون ہے میں کیا ہوں
تو جان تماشا ہے میں محوِ تماشا ہوں
اب کیا خبر کہ دل میں ہے کیا کیا جگر میں ہے
اب تو تری نظر کا تماشا نظر میں ہے
دو قطرہ ہائے خوں سرِ مژگاں ہیں منتظر
بہزادؔ دو جہاں کا تماشا نظر میں ہے

بشیر بدر

شہرت کی بلندی بھی پل بھر کا تماشا ہے
جس ڈال پہ بیٹھے ہو وہ ٹوٹ بھی سکتی ہے

زہرا نگاہ

وحشت میں بھی منت کش صحرا نہیں ہوتے
کچھ لوگ بکھر کر بھی تماشا نہیں ہوتے

ظہیر کاشمیری

اک دن تھا کہ ساحل پر بیٹھے طوفاں پہ تبسم کرتے تھے
اب مایوسی کے عالم میں ساحل کا تماشا کرتے ہیں
جب نادانی کا عالم تھا حاصل کی تمنا کرتے تھے
اب دل میں آگ لگاتے ہیں شعلوں کا تماشا کرتے ہیں
اپنے میں رہے تو رسوائی اپنے سے گئے تو سودائی
ہم مدت سے دیوانگی دنیا کا تماشا کرتے ہیں
نہ کوئی موج رعنائی نہ کوئی سیل زیبائی
کوئی طوفاں بھی اب چشمِ تماشا میں نہیں رہتا

عالم تاب تشنہ

آئنہ خانہ بھی اندوہ تمنا نکلا
غور سے دیکھا تو اپنا ہی تماشا نکلا

عبید اللہ علیم

بولتا ہے کوئی ہر آن لہو میں میرے
پر دکھائی نہیں دیتا یہ تماشا کیا ہے
گزرو نہ اس طرح کہ تماشا نہیں ہوں میں
سمجھو کہ اب ہوں اور دو بارہ نہیں ہوں میں

فارغ بخاری

کوئی منظر بھی سہانا نہیں رہنے دیتے
آنکھ میں رنگِ تماشا نہیں رہنے دیتے

اختر امام رضوی

دل وہ پیاسا ہے کہ دریا کا تماشا دیکھے
اور پھر لہر نہ دیکھے کف دریا دیکھے

تلوک چند محروم

آنکھوں سے دیکھنے کو تو اب بھی ہیں دیکھتے
تھی اور چیز ذوقِ تماشا کہیں جسے

حسرت موہانی

جرم نظارہ پہ کون اتنی خوشامد کرتا
اب وہ روٹھے ہیں لو اور تماشا دیکھو
کثرت حسن کی یہ شان نہ دیکھی نہ سنی
برق لرزاں ہے کوئی گرمِ تماشا کیا ہو

سیماب اکبر آبادی

آ اپنے دل میں میری تمنا لیے ہوئے
شوق کلام و ذوقِ تماشا لیے ہوئے

شاد عظیم آبادی

اپنے سمند ناز کو اے شہسوار آ چھیڑ کر
صف بستہ حاضر کب سے ہیں محوِ تماشا اک طرف

شان الحق حقی

روشن تھے جو کبھی وہ نظارے کدھر گئے
برپا تھا جو کبھی وہ تماشا کہاں سے لائیں

شکیل بدایونی

منہ جادۂ وفا سے نہ موڑ اے وفا شعار
لیکن حدود چشمِ تماشا سے بچ کے چل

عزیز حامد مدنی

مجنوں کے سوا کس سے اٹھی منت دیدار
آخر رخ لیلیٰ تھا تماشا بھی نہیں تھا

فانی بدایونی

بے ذوقِ نظر بزم تماشا نہ رہے گی
منہ پھیر لیا ہم نے تو دنیا نہ رہے گی

اکبر حمیدی

مجھے لکھو وہاں کیا ہو رہا ہے
یہاں تو پھر تماشا ہو رہا ہے

شاذ تمکنت

ہوس جلوہ نہیں ذوقِ تماشا بھی نہیں
کسی چہرے پہ ترے چہرے کا دھوکا بھی نہیں
ہر شخص اپنے آپ تعاقب میں ہے رواں
عالم تمام ایک تماشا دکھائی دے

ناصر کاظمی

عشق جب زمزمہ پیرا ہو گا
حسنِ خود محوِ تماشا ہو گا