مرزا غالب

کیا ہی رضواں سے لڑائی ہو گی
گھر ترا خلد میں گر یاد آیا
کام اس سے آ پڑا ہے کہ جس کا جہان میں
لیوے نہ کوئی نام ستم گر کہے بغیر
حیراں ہوں، دل کو روؤں کہ پیٹوں جگر کو میں
مقدور ہو تو ساتھ رکھوں نوحہ گر کو میں
خواہش کو احمقوں نے پرستش دیا قرار
کیا پوجتا ہوں اس بت بیداد گر کو میں
کیوں نہ چیخوں کہ یاد کرتے ہیں
میری آواز گر نہیں آتی
داغِ دل گر نظر نہیں آتا
بو بھی اے چارہ گر نہیں آتی
تم کو بھی ہم دکھائیں کہ مجنوں نے کیا کیا
فرصت کشاکش غمِ پنہاں سے گر ملے

بہادر شاہ ظفر

نباہ بات کا اس حیلہ گر سے کچھ نہ ہوا
ادھر سے کیا نہ ہوا پر ادھر سے کچھ نہ ہوا
ہمیشہ فتنے ہی برپا کیے مرے سر پر
ہوا یہ اور تو اس فتنہ گر سے کچھ نہ ہوا
گر اس قید بلا سے اب کی چھوٹیں گے تو پھر ہرگز
نہ ہم دام فریب شوخ غارت گر میں آویں گے
ہو گا کیا گر بول اٹھے غیر باتوں میں مری
پھر طبیعت میری اے بیداد گر بٹ جائے گی

داغ دہلوی

خواب میں بھی نہ کسی شب وہ ستم گر آیا
وعدہ ایسا کوئی جانے کہ مقرر آیا
کسک دل میں پھر چارہ گر ہو گئی
جو تسکیں پہر دوپہر ہو گئی
ناوک و نیشتر تری پلکیں
سحرِ پرداز و فتنہ گر آنکھیں
حالِ دل دیکھنا نہیں آتا
دل کی بنوائیں چارہ گر آنکھیں
فقط نبض سے حال ظاہر نہ ہو گا
مرا دل بھی اے چارہ گر دیکھ لینا
نیرنگ ہے ایک ایک ترا دید کے قابل
ہم اے فلک شعبدہ گر دیکھ رہے ہیں
ہمارے ہاتھ سے دامن بچا کر
ارے بیداد گر جاتا کہاں ہے

شیخ ابراہیم ذوق

رفیق جب مرے زخمِ جگر کو دیکھتے ہیں
تو چارہ گر انہیں وہ چارہ گر کو دیکھتے ہیں
جو رات خواب میں اس فتنہ گر کو دیکھتے ہیں
نہ پوچھ ہم جو قیامت سحر کو دیکھتے ہیں
جہاں کے آئینوں سے دل کا آئینہ ہے جدا
اس آئینے میں ہم آئینہ گر کو دیکھتے ہیں
ہاتھ سینہ پہ مرے رکھ کے کدھر دیکھتے ہو
اک نظر دل سے ادھر دیکھ لو گر دیکھتے ہو
ہے دم باز پسیں دیکھ لو گر دیکھتے ہو
آئینہ منہ پہ مرے رکھ کے کدھر دیکھتے ہو
کسی بیکس کو اے بیداد گر مارا تو کیا مارا
جو آپ ہی مر رہا ہو اس کو گر مارا تو کیا مارا
نہ مارا آپ کو جو خاک ہو اکسیر بن جاتا
اگر پارے کو اے اکسیر گر مارا تو کیا مارا
دل بد خواہ میں تھا مارنا یا چشم بدبیں میں
فلک پر ذوقؔ تیر آہ گر مارا تو کیا مارا
دیتی شربت ہے کسے زہر بھری آنکھ تری
عین احسان ہے وہ زہر بھی گر دیتی ہے

مصحفی غلام ہمدانی

اس بت کو نہیں ہے ڈر خدا سے
بگڑی بندے سے گر خدا سے

مصطفٰیٰ خان شیفتہ

مانا سحر کو یار اسے جلوہ گر کریں
طاقت ہمیں کہاں کہ شبِ غم سحر کریں
آپ مرتے تو ہیں پر جیتے ہی بن آئے گی
شیفتہ ضد پہ جو اپنی وہ ستم گر آیا
فانوس میں نہ شمع، نہ شیشے میں ہے پری
ساغر میں جس بہار سے مے جلوہ گر ہے آج
میری ناکامی سے فلک کو حصول؟
کام ہے یہ اسی ستم گر کا
کیا غیر تھا کہ شب کو نہ تھا جلوہ گر چراغ
رہتا ہے ورنہ گھر میں ترے تا سحر چراغ
تعلیم بد آموز کو ہم کرتے ہیں، یعنی
ہے شکرِ وفا، جورِ ستم گر کی شکایت

مومن خان مومن

مومنؔ ایماں قبول دل سے مجھے
وہ بت آزردہ گر نہ ہو جائے

میر مہدی مجروح

بے خود کیا جہاں کو تری چشمِ مست نے
تھی کیسی اس پیالے میں اے فتنہ گر شراب
چشمِ سیاہ مست نگہ مست آپ مست
پیتا ہے دل لگی کو بت عشوہ گر شراب

یگانہ چنگیزی

شبِ تاریک نے پہلو دبایا روزِ روشن کا
زہے قسمت مرے بالیں پہ تیرا جلوہ گر ہونا
ہوائے تند سے کب تک لڑے گا شعلۂ سرکش
عبث ہے خود نمائی کی ہوس میں جلوہ گر ہونا
صبح محشر ہوئی شبِ تاریک
صورت یار جلوہ گر نہ ہوئی
یاسؔ آپ کی بے جرمی آڑے نہیں آ سکتی
گر بات پر اپنی وہ بیداد گر آ جائے

باقی صدیقی

حالات بتا رہے ہیں باقیؔ
ممنون نہ ہوں گے چارہ گر کے
پوچھتے ہیں جہاں کی ہم باقیؔ
اور کہتا ہے چارہ گر اپنی

جون ایلیا

چاک چاکی دیکھ کر پیراہن پہنائی کی
میں نے اپنے ہر نفس کا بخیہ گر رکھا ہے نام

جگر مراد آبادی

ہر سو دکھائی دیتے ہیں وہ جلوہ گر مجھے
کیا کیا فریب دیتی ہے میری نظر مجھے
ملتی نہیں ہے لذت دردِ جگر مجھے
بھولی ہوئی نہ ہو نگہ فتنہ گر مجھے

قمر جلالوی

دمِ آخر علاج سوزِ غم کہنے کی باتیں ہیں
مرا رستہ نہ روکیں راستہ لیں چارہ گر اپنا
چلو بیٹھو شبِ فرقت کو دعا دو ضبط کو ورنہ
مرے نالوں کو سنتے اور تم دشمن کے گر ہوتے
ہے مرض وہ کون سا جس کا نہیں ہوتا علاج
بس یہ کہیے دردِ دل کو چارہ گر سمجھا نہیں
الٰہی کو نسا وقت آ گیا بیمارِ فرقت پر
کہ اٹھ کر چل دیے سب چارہ گر آہستہ آہستہ
موت آ کر سامنے سے لے گئی بیمار کو
دیکھئے چارہ گروں کو چارہ گر دیکھا کیے

شکیب جلالی

دنیا غریق شعبدہ جامِ جم ہوئی
دیکھے گا کون خونِ دل کو زہ گر کا رنگ

عرفان صدیقی

غزلوں میں تو یوں کہنے کا دستور ہے ورنہ
سچ مچ مرا محبوب ستم گر تو نہیں تھا
کوئی آزار پہلے بھی رہا ہو گا مرے دل کو
رہا ہو گا مگر اے چارہ گر ایسا نہیں ہو گا
کوئی آزار تھا پہلے بھی دل کو
مگر اے چارہ گر، ایسا نہیں تھا
اک ذرا خم ہو کے میں پیش ستم گر بچ گیا
میری پگڑی گر گئی لیکن مرا سر بچ گیا
کبھی جو زحمتِ کارِ رفو نہیں کرتا
ہمارے زخم اسی چارہ گر کے نام تمام
ابھی مرا کوئی پیکر نہ کوئی میری نمود
میں خاک ہوں ہنر کوزہ گر پہ راضی ہوں
ہوں مشتِ خاک مگر کوزہ گر کا میں بھی ہوں
سو منتظر اسی لمس ہنر کا میں بھی ہوں
دیکھ لے ، خاک ہے کاسے میں کہ زر ہے سائیں
دستِ دادار بڑا شعبدہ گر ہے سائیں
اک تشنہ کام ناقۂ جاں اور ہر طرف
باد سموم، دشت ستم گر، علیؑ علیؑ
بہت ہے آئینے جن قیمتوں پہ بک جائیں
یہ پتھروں کا زمانہ ہے ، شیشہ گر میرے
جراحتیں مجھے کارِ رفو سکھاتی ہیں
مرا عدو ہی مرا چارہ گر نکلتا ہے
دست عصائے معجزہ گر بھی اسی کا ہے
گہرے سمندروں کا سفر بھی اسی کا ہے

مجید امجد

ہیں تیری گھات میں امجد جو آسمانوں کے ذہن
ذرا بہ پاسِ وفا ان کے دام میں گر بھی

جمال احسانی

اب کے بہار آنے کے امکان ہیں کہ ہے
ہر پیرہن پہ چشم رفو گر لگی ہوئی

احسان دانش

فرصت کے دن ہیں ساقی میکش نواز اٹھ
کیوں انتظارِ موسمِ دیوانہ گر کریں

ادا جعفری

سلگ اٹھی تو اندھیروں کا رکھ لیا ہے بھرم
جو روشنی ہوں تو کیوں چشم نوحہ گر میں رہوں

اسرار الحق مجاز

حسن پھر فتنہ گر ہے کیا کہیے
دل کی جانب نظر ہے کیا کہیے
یوں ہی بیٹھے رہو بس دردِ دل سے بے خبر ہو کر
بنو کیوں چارہ گر تم کیا کرو گے چارہ گر ہو کر
دکھا دے ایک دن اے حسن رنگیں جلوہ گر ہو کر
وہ نظارہ جو ان آنکھوں میں رہ جائے نظر ہو کر

زہرا نگاہ

اپنا عکس بھی اکثر ساتھ چھوڑ جاتا ہے
یہ مآل خود بینی کاش شیشہ گر جانیں
تار تار کر ڈالیں صبر و ضبط کا دامن
زخم زخم دکھلا دیں ظرف چارہ گر جانیں

سدرشن فاکر

زخمِ تازہ کر رہا ہوں چارہ گر کو دیکھ کر
راستہ میں نے بدل ڈالا خضر کو دیکھ کر

عبید اللہ علیم

جو سایہ ہو تو ڈروں اور دھوپ ہو تو جلوں
کہ ایک نخل نمو خاک نوحہ گر میں ہوں

تلوک چند محروم

مصنوع کو صانع سے جدا کر نہیں سکتا
آئینے میں عکس ہنر آئنہ گر ہے

جلیل مانک پوری

چارہ گر دے مجھے دوا ایسی
درد ہو جائے چارہ گر اپنا
در بدر پھرتے ہی گزری چرخ کو
یہ اسی بیداد گر کا کام ہے

ثروت حسین

ایک رخش سنگ تھا آتش کدے کے سامنے
ایک نیلی موم بتی دست آہن گر میں تھی

رسا چغتائی

کیسے پر اسرار چہرے ہیں رساؔ
خواب گاہ شیشہ گر کے آس پاس

سیماب اکبر آبادی

اہلِ نظر وسیع گر اپنی نظر کریں
ذرے نقاب الٹ کے تجھے جلوہ گر کریں
جو میرے تنگنائے دل میں تجھ کو جلوہ گر دیکھا
مری نظروں نے حیرت سے مجھی کو عمر بھر دیکھا

شکیل بدایونی

ہو چکا جب خاتمہ ساری امیدوں کا تو پھر
جا رہے ہو کیوں شکیلؔ اس فتنہ گر کے سامنے

عزیز حامد مدنی

سرشت گل ہی میں پنہاں ہیں سارے نقش و نگار
ہنر یہی تو کف کوزہ گر میں ہوتے ہیں

فانی بدایونی

خلق سمجھی مجھی کو دیوانہ
چارہ فرمائے چارہ گر نہ ہوئی
قصۂ زیست مختصر کرتے
کچھ تو اپنی سی چارہ گر کرتے

اختر ہوشیارپوری

سائے کی طرح کوئی تعاقب میں رواں ہے
اب بچ کے کہاں جائیں گے اک شعبدہ گر سے
آئنہ ٹوٹ کے بکھرے تو کئی عکس ملے
اب ہتھوڑا ہی کف آئنہ گر میں رکھنا
پتھروں میں ہزار چہرے ہیں
ہاں مگر کوئی تیشہ گر ہے یہاں

احمد فراز

یہ جاں کنی کی گھڑی کیا ٹھہر گئی ہے کہ ہم
کبھی قضا کو کبھی چارہ گر کو دیکھتے ہیں
یہ تیر دل میں مگر بے سبب نہیں اترا
کوئی تو حرف لب چارہ گر سے نکلا تھا
زخم جتنے بھی تھے سب منسوب قاتل سے ہوئے
تیرے ہاتھوں کے نشاں اے چارہ گر دیکھے گا کون
دلِ تباہ تجھے اور کیا تسلی دیں
ترے نصیب ترے چارہ گر نہ تھے ایسے
اب کے نہ انتظار کریں چارہ گر کہ ہم
اب کے گئے تو کوئے ستم گر کے ہو گئے
کسی نے غم تو کسی نے مزاج غم بخشا
سب اپنی اپنی جگہ چارہ گر ہمارے ہوئے

قابل اجمیری

ہائے کس عالم میں چھوڑا ہے تمہارے غم نے ساتھ
جب قضا بھی زندگی کی چارہ گر ہوتی نہیں

محسن احسان

آدمی تاش کے پتے ہیں ترے ہاتھوں میں
اے خدا تو بھی تو ہے شعبدہ گر کی صورت

محسن نقوی

میں اپنے اشک سنبھالوں گا کب تلک محسنؔ
زمانہ سنگ بکف ہے تو شیشہ گر آنکھیں

نوح ناروی

ہمیں ملا بھی تو معشوق کس طرح کا ملا
جفا پسند بد اخلاق فتنہ گر گستاخ