مرزا غالب

مژدہ ، اے ذوقِ اسیری ! کہ نظر آتا ہے
دام خالی ، قفسِ مرغِ گرفتار کے پاس
دل کے ہاتھوں سے ، کہ ہے دشمنِ جانی اپنا
ہوں اک آفت میں گرفتار، کہوں یا نہ کہوں
ڈر نالہ ہائے زار سے میرے ، خدا کو مان
آخر نوائے مرغِ گرفتار بھی نہیں
الفتِ گل سے غلط ہے دعوی وارستگی
سرو ہے باوصف آزادی گرفتارِ چمن

امام بخش ناسخ

کہا حضرت دردؔ نے خوب ناسخؔ
یہ زلفِ بتاں کا گرفتار میں ہوں

انشاء اللہ خان انشا

صیاد لے خبر کہ دیا چاہتے ہیں جان
کنجِ قفس میں تازہ گرفتار چار پانچ

بہادر شاہ ظفر

کیا چھوڑیں اسیران محبت کو وہ جس نے
صدقے میں نہ اک مرغِ گرفتار بھی چھوڑا

حیدر علی آتش

آنکھوں کو بند کر کے تصور میں باغ کے
گلشن قفس کو مرغِ گرفتار نے کیا
سودا زدہ زلفوں کا نہ تھا اپنے سوا ایک
آزاد دو عالم تھا گرفتار ہمیں تھے

داغ دہلوی

صدقے میں تم نے چھوڑ دیے ہیں بہت اسیر
میں بھی رہا ہوا کہ گرفتار ہی رہا
دام بلائے عشق کی وہ کشمکش رہی
ایک اک پھڑک پھڑک کے گرفتار مر گیا

مصحفی غلام ہمدانی

صیاد کو تو خواب تغافل سے کام ہے
احوال طائران گرفتار ہو سو ہو
صیاد تجھ کو کس نے کہا تھا کہ فصلِ گل
مجھ کو قفس میں کر کے گرفتار مار ڈال
رات کرتا تھا وہ اک مرغِ گرفتار سے بحث
میں بھی تا صبح رکھی بلبل گل زار سے بحث
کیا فصلِ گل پھر آئی جو کرتے ہیں زمزمہ
دام قفس میں مرغِ گرفتار ہر طرف

مصطفٰیٰ خان شیفتہ

آتی ہیں یاد کاکل و دل کی حکایتیں
روتا ہوں دام و مرغِ گرفتار دیکھ کر

فیض احمد فیض

فکر دلداریء گلزار کروں یا نہ کروں
ذکرِ مرغانِ گرفتار کروں یا نہ کروں

مرزا رفیع سودا

آزاد کرتے تم ہمیں قیدِ حیات سے
اس کے عوض جو دل کو گرفتار کر چلے
خاموش عندلیب چمن تجھ سے کیا ہے بحث
اپنا سخن تو مرغِ گرفتار ساتھ ہے

جون ایلیا

کیا ہو گیا ہے گیسوئے خم دار کو ترے
آزاد کر رہے ہیں گرفتار کو ترے

عرفان صدیقی

تجھ سے ملے تو ہم نے یہ جانا کہ آجکل
آہو شکاریوں کو گرفتار کرتے ہیں
صید کرتا ہے کسی اور کی مرضی سے مجھے
خود بھی صیاد گرفتار ہے میں کیا جانوں
جشنِ مہتاب گرفتار بھی کر سکتے ہیں
روشنی روزنِ دیوار بھی کر سکتے ہیں
صید کرتا ہے کسی اور کی مرضی سے مجھے
خود بھی صیاد گرفتار ہے خاکم بدہن
خواہشیں توڑ نہ ڈالیں ترے سینے کا قفس
اتنے شہ زور پرندوں کو گرفتار نہ رکھ
میرے اندر کا ہرن شیوۂ رم بھول گیا
کیسے وحشی کو گرفتار کیا ہے اس نے
جنگل میں بھی بستی کے سے آثار نکل آئے
کس سمت رہا ہو کے گرفتار نکل آئے

علی سردار جعفری

ترچھی نظروں میں وہ الجھی ہوئی سورج کی کرن
اپنے دزدیدہ اشاروں میں گرفتار آنکھیں

ثروت حسین

یہ میرا دل ہے مرا آئینہ ہے شہزادی
اور آئینے میں گرفتار اک سمندر ہے

جوش ملیح آبادی

یا رب یہ بھید کیا ہے کہ راحت کی فکر نے
انساں کو اور غم میں گرفتار کر دیا
للہ الحمد کہ گلزار میں ہنگام صبوح
حکم آزادئ مرغان گرفتار آیا

سیف الدین سیف

واہ کیا ڈھنگ ہیں صیادوں کے
لوگ پھرتے ہیں گرفتار کھلے

شکیل بدایونی

مجھے تو قید محبت عزیز تھی لیکن
کسی نے مجھ کو گرفتار کر کے چھوڑ دیا

فانی بدایونی

ہاں ابھی بے خبر لذتِ آزار ہیں ہم
مژدہ اے مشقِ ستم تازہ گرفتار ہیں ہم

افضل منہاس

مجرم بری ہوا تو کئی قتل ہو گئے
بستی کا اک غریب گرفتار ہو گیا

احمد فراز

لوگ کہتے تھے فقط ایک ہی پاگل ہے فراز
ایسے ایسے ہیں محبت میں گرفتار کہ بس
یہ برقِ نشیمن پہ گری تھی کہ قفس پر
مرغان گرفتار بڑی دیر سے چپ ہیں
فراز اسیر ہے اس کا کہ وہ فراز کا ہے
ہے کون کس کا گرفتار؟ چل کے دیکھتے ہیں

قتیل شفائی

مشہورِ زمانہ ہیں قتیلؔ اس کی اڑانیں
وہ دام محبت میں گرفتار ہی کب تھا

مجروح سلطان پوری

برق طپیدہ بادِ صبا شعلہ اور ہم
ہیں کیسے کیسے اس کے گرفتار دیکھیے
پھر بھی کہلاؤں گا آوارۂ گیسوئے بہار
میں ترا دام خزاں لاکھ گرفتار سہی