مرزا غالب

آرائشِ جمال سے فارغ نہیں ہنوز
پیشِ نظر ہے آئینہ دائم نقاب میں
ہے تیوری چڑھی ہوئی اندر نقاب کے
ہے اک شکن پڑی ہوئی طرفِ نقاب میں
نظارہ کیا حریف ہو اس برقِ حسن کا
جوشِ بہار جلوے کو جس کے نقاب ہے

حیدر علی آتش

چمن میں شب کو جو وہ شوخ بے نقاب آیا
یقین ہو گیا شبنم کو آفتاب آیا

مصحفی غلام ہمدانی

جو پھرا کے اس نے منہ کو بہ قفا نقاب الٹا
ادھر آسمان الٹا ادھر آفتاب الٹا
ہے ماہ کہ آفتاب کیا ہے
دیکھو تو تہ نقاب کیا ہے
یہ نقاب پوش ظالم کوئی زور ہے کہ جس نے
کیے خون سیکڑوں اور نہ ذرا نقاب الٹا
معشوقۂِ گل نقاب میں ہے
محجوبہ ابھی حجاب میں ہے
آئے ہو تو یہ حجاب کیا ہے
منہ کھول دو نقاب کیا ہے
رخ زلف میں بے نقاب دیکھا
میں تیرہ شب آفتاب دیکھا
سرِ شام اس نے منہ سے جو رخ نقاب الٹا
نہ غروب ہونے پایا وہیں آفتاب الٹا
تا یہ شبِ فراق کی دیجور دور ہو
اے رشکِ ماہ گھر میں مرے بے نقاب آ
منہ چھپاؤ نہ تم نقاب میں جان
یوں ہی عاشق کی ہے عذاب میں جان

مصطفٰی خان شیفتہ

شوخی نے تیری لطف نہ رکھا حجاب میں
جلوے نے تیرے آگ لگائی نقاب میں

مومن خان مومن

چینِ جبیں کو دیکھ کے دل بستہ تر ہوا
کیسی کشود کار کشاد نقاب میں

فیض احمد فیض

ہر رگِ خوں میں پھر چراغاں ہو
سامنے پھر وہ بے نقاب آئے

مرزا رفیع سودا

چہرے پہ نہ یہ نقاب دیکھا
پردے میں تھا آفتاب دیکھا

جون ایلیا

جانِ من تیری بے نقابی نے
آج کتنے نقاب بیچے ہیں

جگر مراد آبادی

عشق کو بے نقاب ہونا تھا
آپ اپنا جواب ہونا تھا
گو سراپا حجاب ہیں پھر بھی
تیرے رخ کی نقاب ہیں ہم لوگ
دل کی ہر چیز جگمگا اٹھی
آج شاید وہ بے نقاب ہوا
نہ دیکھا رخِ بے نقاب محبت
محبت ہے شاید حجاب محبت

سراج الدین ظفر

شاید رخ حیات سے سرکے نقاب اور
بھر دو مرے سبو میں شراب گلاب اور

قمر جلالوی

جلوے ہوئے نہ جذب رخِ بے نقاب میں
کرنیں سمٹ کے آ نہ سکیں آفتاب میں
اس وقت تک رہے گی قیامت رکی ہوئی
جب تک رہے گا آپ کا چہرہ نقاب میں

احسان دانش

مرے مٹانے کی تدبیر تھی حجاب نہ تھا
وگرنہ کون سے دن حسنِ بے نقاب نہ تھا
جب رخ حسن سے نقاب اٹھا
بن کے ہر ذرہ آفتاب اٹھا
ہم تو آنکھوں کا نور کھو بیٹھے
ان کے چہرے سے کیا نقاب اٹھا
کہاں کے دیر و حرم جستجوئے جلوہ گر
یہی نقاب ہے آنکھوں سے یہ نقاب اٹھا

اختر شیرانی

اگر وہ اپنے حسین چہرے کو بھول کر بے نقاب کر دے
تو ذرے کو ماہتاب اور ماہتاب کو آفتاب کر دے
نظر نا آنے پہ ہے یہ حالت کہ جنگ ہے شیخ و برہمن میں
خبر نہیں کیا سے کیا ہو دنیا جو خود کو وہ بے نقاب کر دے
غم و الم رنج و یاس و حسرت اٹھاؤں گا سب کے رخ سے پردے
تمہیں قسم ہے دل حزیں کی اٹھاؤ تو تم نقاب پہلے

اسرار الحق مجاز

مری نگاہ میں جلوے ہیں جلوے ہی جلوے
یہاں حجاب نہیں ہے یہاں نقاب نہیں

ماجد صدیقی

اقرار مدعا پہ ٹھٹکتے ہوئے سے ہونٹ
آنکھوں پہ کھنچ رہا تھا حیا کا نقاب سا

جلیل مانک پوری

بہار دیتا ہے چھن چھن کے نور چہرے کا
سر نقاب ہے جو کچھ تہ نقاب نہیں
بتوں سے پردہ اٹھانے کی بحث ہے بے کار
کھلی دلیل ہے کعبہ بھی بے نقاب نہیں
کسی کو تاب کہاں ہے کہ تجھ کو دیکھ سکے
جو نور ہے ترے رخ پر وہی نقاب بھی ہے
کسی میں تاب کہاں تھی کہ دیکھتا ان کو
اٹھی نقاب تو حیرت نقاب ہو کے رہی

جوش ملیح آبادی

بھلا ہوا جوشؔ نے ہٹایا نگاہ کا چشم تر سے پردہ
بلا سے جاتی رہیں گر آنکھیں کھلا تو بند نقاب تیرا

حفیظ جالندھری

یہ خواب کیا ہے یہ زشت کیا ہے جہاں کی اصلی سرشت کیا ہے
بڑا مزا ہو تمام چہرے اگر کوئی بے نقاب کر دے

شکیل بدایونی

اب تو آنکھوں پر غمِ ہستی کے پردے پڑ گئے
اب کوئی حسنِ مجسم بے نقاب آیا تو کیا
شکیلؔ اپنے مذاق دید کی تکمیل کیا ہو گی
ادھر نظروں نے ہمت کی ادھر رخ پر نقاب آیا
اپنی ہی لطافت نظر کی
اس رخ پہ نقاب چاہتا ہوں

فانی بدایونی

دید آخر ہے الٹ دیجیے چہرے سے نقاب
آج مشتاق کے چہرے پہ نقاب آتا ہے
نظارۂ جمال کی یاں تاب ہی نہیں
اے برقِ حسن چاہیے تجھ کو نقاب کیا
قبر پر کس شان سے وہ بے نقاب آنے کو ہے
آفتاب صبح محشر ہم رکاب آنے کو ہے

امیر مینائی

کہا جو میں نے کہ یوسف کو یہ حجاب نہ تھا
تو ہنس کے بولے وہ منہ قابل نقاب نہ تھا
شبِ وصال بھی وہ شوخ بے حجاب نہ تھا
نقاب الٹ کے بھی دیکھا تو بے نقاب نہ تھا
میں روئے یار کا مشتاق ہو کے آیا تھا
ترے جمال کا شیدا تو اے نقاب نہ تھا
کلیم شکر کرو حشر تک نہ ہوش آتا
ہوئی یہ خیر کہ وہ شوق بے نقاب نہ تھا
جب خوبرو چھپاتے ہیں عارض نقاب میں
کہتا ہے حسن میں نہ رہوں گا حجاب میں
جا پائی خط نے اس کے رخِ بے نقاب میں
سورج گہن پڑا شرفِ آفتاب میں
اللٰہ رے تیز دستیِ مژگانِ رخنہ گر
بے کار بند ہو گئے ان کی نقاب میں
سرکتی جائے ہے رخ سے نقاب آہستہ آہستہ
نکلتا آ رہا ہے آفتاب آہستہ آہستہ

شاذ تمکنت

ہمارے عہد میں ارزانی نقاب نہ پوچھ
میں کور چشموں کی خاطر نقاب کیا لیتا

فراق گورکھپوری

دلوں کا سوز ترے روئے بے نقاب کی آنچ
تمام گرمی محفل ترے شباب کی آنچ

ناصر کاظمی

گل کدوں کے طلسم بھول گئے
وہ تماشا نقاب میں دیکھا