مرزا غالب

رنجِ رہ کیوں کھینچیے ؟ واماندگی کو عشق ہے
اٹھ نہیں سکتا ہمارا جو قدم منزل میں ہے
وہ نہیں ہم، کہ چلے جائیں حرم کو، اے شیخ!
ساتھ حجاج کے اکثر کئی منزل آئے

بہادر شاہ ظفر

اب کی جو راہِ محبت میں اٹھائی تکلیف
سخت ہوتی ہمیں منزل کبھی ایسی تو نہ تھی
راہیں ہیں دو مجاز و حقیقت ہے جن کا نام
رستے نہیں ہیں عشق کی منزل کے چار پانچ

داغ دہلوی

ہر اک کے واسطے کب عشق کی دشوار منزل ہے
جسے آساں ہے آساں ہے جسے مشکل ہے مشکل ہے
عدم میں لے چلا ہے رہنمائے عشق کیا مجھ کو
یہی کہتا ہے آ پہنچے ہیں تھوڑی دور منزل ہے
اڑاتے ہیں مزے دنیا کے ہم اے داغؔ گھر بیٹھے
دکن میں اب تو افضل گنج اپنی عیش منزل ہے
بتان ماہ وش اجڑی ہوئی منزل میں رہتے ہیں
کہ جس کی جان جاتی ہے اسی کے دل میں رہتے ہیں
زمیں پر پاؤں نفرت سے نہیں رکھتے پری پیکر
یہ گویا اس مکاں کی دوسری منزل میں رہتے ہیں
فلک دشمن ہوا گردش زدوں کو جب ملی راحت
زیادہ راہ سے کھٹکے مجھے منزل میں رہتے ہیں
عدم کی جو حقیقت ہے وہ پوچھو اہل ہستی سے
مسافر کو تو منزل کا پتا منزل سے ملتا ہے

مصحفی غلام ہمدانی

درپیش ہے جوں اشک سفر ہم کو تری کا
دن رات چلے جاتے ہیں منزل نہیں معلوم
کس راہ گیا لیلیٰ کا محمل نہیں معلوم
ہے بادیہ ریگ اور ہمیں منزل نہیں معلوم
گو مرغ نامہ بر کو بسمل کیا ہے اس نے
طے کر رہے گا آخر منزل تڑپ تڑپ کر

فیض احمد فیض

سب قتل ہو کے تیرے مقابل سے آئے ہیں
ہم لوگ سرخرو ہیں کہ منزل سے آئے ہیں
کہیں تو کاروانِ درد کی منزل ٹھہر جائے
کنارے آ لگے عمرِ رواں یا دل ٹھہر جائے

یگانہ چنگیزی

لپٹتی ہے بہت یادِ وطن جب دامنِ دل سے
پلٹ کر اک سلامِ شوق کر لیتا ہوں منزل سے
نہ سنگِ میل نہ نقشِ قدم نہ بانگ جرس
بھٹک نہ جائیں مسافر عدم کی منزل کے
خوشی کے مارے زمیں پر قدم نہیں رکھتے
جب آئے قافلے والے قریب منزل کے
ہوں ریگ کے مانند شب و روز سفر میں
آوارہ وحشت کوئی منزل نہیں رکھتا

باقی صدیقی

کیا ہے اس اجڑی ہوئی منزل میں
یرے دشمن رہیں میرے دل میں
وہم آنے لگے کیا کیا دل میں
رک گیا قافلہ کس منزل میں
اڑ رہا ہے غبار سا باقیؔ
چھپ نہ جائیں چراغ منزل کے
ٹوٹا ہے پھر غبارِ سرراہ کا طلسم
ہر راہرو کے سامنے منزل گئی ہے پھر

جگر مراد آبادی

فکر منزل ہے نہ ہوش جادۂ منزل مجھے
جا رہا ہوں جس طرف لے جا رہا ہے دل مجھے
روک سکتی ہو تو بڑھ کر روک لے منزل مجھے
ہر طرف سے آج آتی ہے صدائے دل مجھے
توڑ کر بیٹھا ہوں راہِ شوق میں پائے طلب
دیکھنا ہے جذبۂ بے تابی منزل مجھے
یہ بھی کیا منظر ہے بڑھتے ہیں نہ رکتے ہیں قدم
تک رہا ہوں دور سے منزل کو میں منزل مجھے
یہ ذرے جن کو ہم خاکِ رہِ منزل سمجھتے ہیں
زبانِ حال رکھتے ہیں زبان دل سمجھتے ہیں
جسے سب لوگ حسن و عشق کی منزل سمجھتے ہیں
بلند اس سے بھی ہم اپنا مقام دل سمجھتے ہیں
حقیقت میں جو راز دوریِ منزل سمجھتے ہیں
انہیں کو ہم سلوک عشق میں کامل سمجھتے ہیں

قمر جلالوی

اب نہ آوازِ جرس ہے اور نہ گردِ کارواں
یا تو منزل رہ گئی یا رہ گئے منزل سے ہم
شکریہ اے قمر تک پہنچانے والو شکریہ
اب اکیلے ہی چلے جائیں گے اس منزل سے ہم
متفق کیونکر ہوں ایسے مشورے پر دل سے ہم
راہبر تو لوٹ لے شکوہ کریں منزل سے ہم
راہبر کا ہو بھلا پہلے ہی گھر لٹو دیے
لوٹ کر جائیں تو جائیں بھی کہاں منزل سے ہم
ہماری وضع داری ہے جو ہم خاموش ہیں ورنہ
یہ رہزن ہی جنہیں ہم رہبرِ منزل سمجھتے ہیں
اس رہروِ راہِ الفت کو دیکھے کوئی شام کے عالم میں
جب اٹھ کے غبارِ راہگذر نظروں سے نہاں منزل کر دے
گر ذوقِ طلب ہی دیکھنا ہے منظور تجھے دیوانے کا
ہر نقش بنے زنجیرِ قدم اتنی تو کڑی منزل کر دے
بگولا جب اٹھا میں راہ گم کردہ یہی سمجھا
کوئی رستہ بتانے آ رہا ہے مجھ کو منزل سے
ہم اہلِ عشق آساں عشق کی منزل سمجھتے ہیں
نہ جب مشکل سمجھتے تھے نہ اب شکل سمجھتے ہیں
تمھیں رستے میں رہبر چھوڑ دیں گے قافلے والو
اگر ہمت تمھاری دوریِ منزل سے ٹوٹے گی
بیٹھا جو دل تو چاند دکھا کر کہا قمر!
وہ سامنے چراغ ہے منزل لیے ہوئے

احسان دانش

اپنا رستہ اپنی دھن اپنا تصور اپنا شوق
کوئی بھی رہبرو یہاں بیگانۂ منزل نہیں
جب بجز محبوب ہو جاتی ہے اوجھل کائنات
اک مقام ایسا بھی جذب شوق کی منزل میں ہے
اب کوئی شایان‌ جلوہ ہے نہ شایان کلام
تو اسی منزل میں بہتر ہے کہ جس منزل میں ہے
اپنے مرکز سے ستاروں پر جو کرتا ہوں نظر
جس کو جس منزل میں چھوڑا تھا اسی منزل میں ہے
امیرِ کارواں جس روشنی کے بل پہ بڑھتا ہے
نکلتا ہے وہ تارا صبح ہوتے خاک منزل سے
ابھی تحقیق بہتر ہے کہ پھر شکوہ عبث ہو گا
کہ میرِ کارواں واقف نہیں آداب منزل سے
مجھے احسانؔ میرے قافلے والوں نے اب سمجھا
کہ یہ ذرہ ستارا بن گیا تقدیر منزل سے
جستجو رہرو‌ الفت کی جو کامل ہو جائے
شوقِ منزل ہی چراغِ رہِ منزل ہو جائے
جستجو شرط ہے منزل نہیں مشروط طلب
گم ہو اس طرح کہ گرد رہِ منزل ہو جائے
جنابِ خضر ہم کو خاک رستے پر لگائیں گے
کہ منزل بے خودوں کی ہے معرا قید منزل سے
ہر اک ذرہ ہے دل اے جانے والے دیکھ کر چلنا
ہزاروں ہستیاں لپٹی پڑی ہیں خاک منزل سے
ہزاروں غم ہیں اس منزل میں منزل دیکھنے والے
کلیجا تھام لے اپنا مرا دل دیکھنے والے
مٹاتا جا رہا ہوں نقشِ پا صحرا نوردی میں
کہاں ڈھونڈیں گے مجھ کو میری منزل دیکھنے والے

اسرار الحق مجاز

شکستہ پا کو مژدہ خستگان راہ کو مژدہ
کہ رہبر کو سراغ جادۂ منزل نہیں ملتا
جہاں منزل کا امکاں ہی نہیں ہے
وہاں آثار منزل دیکھتا ہوں
کہاں کا رہنما اور کیسی راہیں
جدھر بڑھتا ہوں منزل دیکھتا ہوں
محبت ہی محبت ہے جہاں پر
محبت کی وہ منزل دیکھتا ہوں

بہزاد لکھنوی

اے جذبۂ دل گر میں چاہوں ہر چیز مقابل آ جائے
منزل کے لیے دو گام چلوں اور سامنے منزل آ جائے
اے رہبر کامل چلنے کو تیار تو ہوں پر یاد رہے
اس وقت مجھے بھٹکا دینا جب سامنے منزل آ جائے
اس لیے چل کے ہر اک گام پہ رک جاتا ہوں
تا نہ بے کیف غم دوریِ منزل ہو جائے

عالم تاب تشنہ

درد میں ڈوبی ہوئی آتی ہے آوازِ جرس
گریۂ گم گشتگی سنتا ہوں منزل کے قریب
ہے ابھی واماندگی کو اک سفر درپیش اور
ہے ابھی افتاد منزل اور منزل کے قریب
ہیں وہ سب تشنہؔ سرِ منزل امیرِ کارواں
جو ملے تھے کارواں سے آ کے منزل کے قریب

علی سردار جعفری

باعث رشک ہے تنہا روی رہ رو شوق
ہم سفر کوئی نہیں دوریِ منزل کے سوا