مرزا غالب

عرضِ نیازِ عشق کے قابل نہیں رہا
جس دل پہ ناز تھا مجھے وہ دل نہیں رہا
بیدادِ عشق سے نہیں ڈرتا مگر اسدؔ
جس دل پہ ناز تھا مجھے وہ دل نہیں رہا
جب بہ تقریبِ سفر یار نے محمل باندھا
تپشِ شوق نے ہر ذرے پہ اک دل باندھا
شمار سبحہ، ’’مرغوبِ بتِ مشکل‘‘ پسند آیا
تماشائے بہ یک کف بردنِ صد دل، پسند آیا
وہ گل جس گلستاں میں جلوہ فرمائی کرے غالب
چٹکنا غنچۂِ گل کا صدائے خندۂِ دل ہے
سادگی پر اس کی، مر جانے کی حسرتِ دل میں ہے
بس نہیں چلتا کہ پھر خنجر کفِ قاتل میں ہے
دیکھنا تقریر کی لذت کہ جو اس نے کہا
میں نے یہ جانا کہ گویا یہ بھی میرے دل میں ہے
لطفِ نظارۂِ قاتل دمِ بسمل آئے
جان جائے تو بلا سے ، پہ کہیں دل آئے

امام بخش ناسخ

اب کہاں نالے کہ اس لیلیٰ کا مسکن دل ہوا
تھا جرس جو پیش ازیں وہ ان دنوں محمل ہوا
دھیان اس کے بند کرنے کا اگر آتا تجھے
کیوں نہ تیرا رخنۂِ در میرا چاک دل ہوا
ہے یہ غمِ جانکاہ خال ابروئے خم دار کا
کعبے میں کاہیدہ ہو کر سنگ اسود دل ہوا
دلبری کا جب ہوا اس سروِ قامت کو خیال
عضو عضو اپنا وہیں مثل صنوبر دل ہوا
جب تصور یار کا باندھا ہم آپ آئے نظر
سامنے آنکھوں کے آئینہ ہمارا دل ہوا
سر سے پا تک ہر صنوبر ہی فقط کیا دل ہوا
دیکھ کر اس سرو قد کو سرو بھی مائل ہوا

بہادر شاہ ظفر

یوں تو ہے وہ ہی دل عالم کے دل میں اے ظفرؔ
اس کا عالم مرد صاحبِ دل کے دل میں اور ہے
لے گیا چھین کے کون آج ترا صبر و قرار
بے قراری تجھے اے دل کبھی ایسی تو نہ تھی
ٹکڑے نہیں ہیں آنسوؤں میں دل کے چار پانچ
سرخاب بیٹھے پانی میں ہیں مل کے چار پانچ
کہنے ہیں مطلب ان سے ہمیں دل کے چار پانچ
کیا کہیے ایک منہ ہیں وہاں مل کے چار پانچ
رنج و تعب مصیبت و غم یاس و درد و داغ
آہ و فغاں رفیق ہیں یہ دل کے چار پانچ
گر انجم فلک سے بھی تعداد کیجیے
نکلیں زیادہ داغ مرے دل کے چار پانچ

حیدر علی آتش

کعبہ و دیر میں ہے کس کے لیے دل جاتا
یار ملتا ہے تو پہلو ہی میں ہے مل جاتا
راہ بھولے ہوے حاجی ہے بھٹکتا ناحق
کعبۃ اللہ جو جاتا تو سوئے دل جاتا
آمد یار کی کانوں سے سنی ہے جو خبر
چھپ کے پہلو سے ہے آنکھوں کی طرف دل جاتا

داغ دہلوی

قرینے سے عجب آراستہ قاتل کی محفل ہے
جہاں سر چاہیے سر ہے جہاں دل چاہیے دل ہے
مجھے تجھ سے رکاوٹ اور تو غیروں پہ مائل ہے
مرا دل اب ترا دل ہے ترا دل اب مرا دل ہے
بڑھا دل اس قدر فرطِ خوشی سے وصل کی شب کو
مجھے یہ وہم تھا پہلو میں یہ تکیہ ہے یا دل ہے
زبردستی تو دیکھو ہاتھ رکھ کر میرے سینے پر
وہ کس دعوے سے کہتے ہیں ہمارا ہی تو یہ دل ہے
منتوں سے بھی نہ وہ حور شمائل آیا
کس جگہ آنکھ لڑی ہائے کہاں دل آیا
ہم نہ کہتے تھے نہ کر عشق پشیماں ہو گا
جو کیا تو نے وہ آگے ترے اے دل آیا
دین و دنیا سے گیا تو یہ سمجھ لے اے داغؔ
غضب آیا اگر اس بت پہ ترا دل آیا
بتان ماہ وش اجڑی ہوئی منزل میں رہتے ہیں
کہ جس کی جان جاتی ہے اسی کے دل میں رہتے ہیں
ہزاروں داغ پنہاں عاشقوں کے دل میں رہتے ہیں
شرر پتھر کی صورت ان کی آب و گل میں رہتے ہیں
ہزاروں حسرتیں وہ ہیں کہ روکے سے نہیں رکتیں
بہت ارمان ایسے ہیں کہ دل کے دل میں رہتے ہیں
خدا رکھے محبت نے کیے آباد دونوں گھر
میں ان کے دل میں رہتا ہوں وہ میرے دل میں رہتے ہیں
بتوں کو محرمِ اسرار تو نے کیوں کیا یا رب
کہ یہ کافر ہر اک خلوت سرائے دل میں رہتے ہیں
ملاتے ہو اسی کو خاک میں جو دل سے ملتا ہے
مری جاں چاہنے والا بڑی مشکل سے ملتا ہے
جواب اس بات کا اس شوخ کو کیا دے سکے کوئی
جو دل لے کر کہے کم بخت تو کس دل سے ملتا ہے

مصحفی غلام ہمدانی

اے مصحفیؔ جل بھن کے ہوا خاک میں سارا
دکھلاوے گی اب کیا تپشِ دل نہیں معلوم
مر جاؤں کہ جیتا رہوں میں ہجر میں تیرے
کس چیز کا خواہاں ہے مرا دل نہیں معلوم
نصیبوں سے کوئی گر مل گیا ہے
تو پہلے اس پہ اپنا دل گیا ہے
میں پہروں گھر میں پڑا دل سے بات کرتا ہوں
جب اس کے شکل و شمائل سے بات کرتا ہوں
پہلو میں رہ گیا یوں یہ دل تڑپ تڑپ کر
رہ جائے جیسے کوئی بسمل تڑپ تڑپ کر

مصطفٰی خان شیفتہ

یوں بزمِ گل رخاں میں ہے اس دل کو اضطراب
جیسے بہار میں ہو عنادل کو اضطراب
سیماب وار سارے بدن کو ہے یاں تپش
تسکین ہو سکے جو ہو اک دل کو اضطراب

مومن خان مومن

اے آرزوئے قتل ذرا دل کو تھامنا
مشکل پڑا مرا مرے قاتل کو تھامنا
سینہ پہ ہاتھ دھرتے ہی کچھ دم پہ بن گئی
لو جان کا عذاب ہوا دل کو تھامنا

فیض احمد فیض

اٹھ کر تو آ گئے ہیں تری بزم سے مگر
کچھ دل ہی جانتا ہے کہ کس دل سے آئے ہیں
کہیں تو کاروانِ درد کی منزل ٹھہر جائے
کنارے آ لگے عمرِ رواں یا دل ٹھہر جائے

یگانہ چنگیزی

لپٹتی ہے بہت یادِ وطن جب دامنِ دل سے
پلٹ کر اک سلامِ شوق کر لیتا ہوں منزل سے
نظر آئے جب آثار جدائی رنگِ محفل سے
نگاہِ یاس بیگانہ ہوئی یاران یک دل سے
کسی شے میں نہ ہو گی بادۂ عرفاں کی گنجائش
لڑا لے ساغرِ جم کو بھی کوئی شیشۂ دل سے
رہے گی چار دیوارِ عناصر درمیاں کب تک
اٹھے گا زلزلہ اک دن اسی بیٹھے ہوئے دل سے
اداسی چھا گئی چہرے پہ شمعِ محفل کے
نسیمِ صبح سے شعلے بھڑک اٹھے دل کے
شریک حال نہیں ہے کوئی تو کیا پروا
دلیل راہِ محبت ہیں ولولے دل کے
عجب نہیں کہ بپا ہو یہیں سے فتنۂ حشر
زمانے بھر میں ہیں سارے فساد اسی دل کے
مشاہدے کو اک آئینۂ جمال دیا
کمال عشق نے جوہر دکھا دیے دل کے
جو دل نہیں رکھتا کوئی مشکل نہیں رکھتا
مشکل نہیں رکھتا کوئی جو دل نہیں رکھتا
آیا نہ کوئی خواب میں بھی ملکِ عدم سے
افسوس کہ اتنی بھی کشش دل نہیں رکھتا
کیوں یاسؔ قفس میں بھی وہی زمزمہ سنجی
ایسا تو زمانے میں کوئی دل نہیں رکھتا

باقی صدیقی

اک نظر تیری مرا دل بن گئی
میرے سینے میں تو کوئی دل نہ تھا
کیا ہے اس اجڑی ہوئی منزل میں
یرے دشمن رہیں میرے دل میں
وہم آنے لگے کیا کیا دل میں
رک گیا قافلہ کس منزل میں
دیکھ کر رنگ تیری محفل کے
زخم آنکھوں میں آ گئے دل کے
تھے ہی کیا اور مرحلے دل کے
ہم بہت خوش ہیں آپ سے مل کے
چلئے کہیں تو کچھ مجھے اپنی خبر ملے
وہ اک نظر جو لے کے مرا دل گئی ہے پھر

جون ایلیا

بنیاد جہاں پہلے جو تھی وہی اب بھی ہے
یوں حشر تو یاران یک دل نہیں آنے کا

جگر مراد آبادی

لاکھوں میں انتخاب کے قابل بنا دیا
جس دل کو تم نے دیکھ لیا دل بنا دیا
ہر چند کر دیا مجھے برباد عشق نے
لیکن انہیں تو شیفتۂ دل بنا دیا
فکر منزل ہے نہ ہوش جادۂ منزل مجھے
جا رہا ہوں جس طرف لے جا رہا ہے دل مجھے
اب زباں بھی دے ادائے شکر کے قابل مجھے
درد بخشا ہے اگر تو نے بجائے دل مجھے
اب کدھر جاؤں بتا اے جذبۂ کامل مجھے
ہر طرف سے آج آتی ہے صدائے دل مجھے
روک سکتی ہو تو بڑھ کر روک لے منزل مجھے
ہر طرف سے آج آتی ہے صدائے دل مجھے
ہر اشارے پر ہے پھر بھی گردن تسلیمِ خم
جانتا ہوں صاف دھوکے دے رہا ہے دل مجھے
یہ ذرے جن کو ہم خاکِ رہِ منزل سمجھتے ہیں
زبانِ حال رکھتے ہیں زبان دل سمجھتے ہیں
جسے سب لوگ حسن و عشق کی منزل سمجھتے ہیں
بلند اس سے بھی ہم اپنا مقام دل سمجھتے ہیں
ہمیں کیوں وہ جفائے خاص کے قابل سمجھتے ہیں
یہ رازِ دل ہے اس کو محرمان دل سمجھتے ہیں

قمر جلالوی

جا رہے ہیں راہ میں کہتے ہوئے یوں دل سے ہم
تو نہ رہ جانا کہیں اٹھیں اگر محفل سے ہم
وہ سبق آئیں ہیں لے کر اضطرابِ دل سے ہم
یاد رکھیں گے کہ اٹھتے تھے تری محفل سے ہم
وہ نہیں تو اے قمر ان کی نشانی ہی سہی
داغِ فرقت کو لگائے پھر رہے ہیں دل سے ہم
متفق کیونکر ہوں ایسے مشورے پر دل سے ہم
راہبر تو لوٹ لے شکوہ کریں منزل سے ہم
نام تو اپنا چھپا سکتے ہیں لیکن کیا کریں
اے قمر مجبور ہو جاتے ہیں داغِ دل سے ہم
یہ تم نے کیا کہا مجھپر زمانہ ہے فدا دل سے
ہزاروں میں وفا والا ملا کرتا ہے دل سے
نہ تھے جب آپ تو یہ حال تھا بیتابی دل سے
کبھی جاتا تھا محفل میں کبھی آتا تھا محفل سے
نگاہیں ان کو دیکھیں دیکھ کر یہ کہہ دیا دل سے
جو تو بیٹھا تو فتنے سینکڑوں اٹھیں گے محفل سے
دلوں میں آ گئے جب فرق تو جاتے نہیں دل سے
کہ یہ ٹوٹے ہوئے شیشے جڑا کرتے ہیں مشکل سے
دونوں ہیں ان کے ہجر کا حاصل لیے ہوئے
دل کو ہے درد، درد کو ہے دل لیے ہوئے
دیکھ ہمارے صبر کی ہمت نہ ٹوٹ جائے
تم رات دن ستاؤ مگر دل لیے ہوئے
اپنی ضروریات ہیں اپنی ضروریات
آنا پڑا مطلب تمہیں دل لیے ہوئے

عرفان صدیقی

اس بھیڑ میں گم اے دل نہ ہونا
لوگوں سے ملنا شامل نہ ہونا
آنکھ ہر لحظہ تماشائے دگر چاہتی ہے
عکس تیرا ہی سرِ آئینۂ دل ہے تو کیا

احسان دانش

قدر کر دل کی کہ درگاہ خدا میں اے ندیم
دو جہاں کی نعمتیں حاضر ہیں لیکن دل نہیں
آنکھ میں آنسو ہیں احساس مسرت دل میں ہے
ایک فردوس نظارہ آپ کی محفل میں ہے
ہر جفا تیری مناسب ہر ستم تیرا درست
اب وہی میری تمنا ہے جو تیرے دل میں ہے
فصلِ گل میں بے تحاشا ہنسنے والو ہوشیار
اضطرابِ دل کا پہلو بھی سکونِ دل میں ہے
دہر کے ہنگامۂ شیخ و برہمن سے بلند
اور بھی ہنگامہ اک گرداب نوح دل میں ہے
میں تو خود اٹھنے کو ہوں بدلو نہ اندازِ نظر
تم جو کہتے ہچکچاتے ہو وہ میرے دل میں ہے
موم کر دیتی ہے جو فولاد و آہن کا جگر
وہ بھی اک جھنکار آوازِ شکستِ دل میں ہے
کون ہے احسانؔ میری زندگی کا رازدار
کیا کہوں کس طرح مرنے کی تمنا دل میں ہے
مجھے پوچھا ہے آ کر تم نے اس اخلاق کامل سے
کہ میں شرمندہ ہو کر رہ گیا اندازۂ دل سے
نظر کے رخ کو یا تو دل کی جانب پھیر لینے دو
نہیں تو سامنے آ جاؤٔ اٹھ کر پردۂ دل سے
انہیں دنیا اب اشکِ غم کہے یا خون کی بوندیں
محبت نے چراغ آنکھوں میں لا کر رکھ دیے دل سے
ترا جلوہ تو کیا تو خود بھی تفریحِ نظر ہوتا
مری آنکھوں نے اب تک بھیک مانگی ہی نہیں دل سے
ستم کی آخری منزل پہ اظہار پشیمانی
نکل آتے ہیں آنسو یوں تو ہر دکھتے ہوئے دل سے
تہیہ کر لیا تنگ آ کے گو ترکِ تعلق کا
مگر اب فکر ہے یہ خط انہیں لکھیں گے کس دل سے
ضبط بھی صبر بھی امکان میں سب کچھ ہے مگر
پہلے کمبخت مرا دل تو مرا دل ہو جائے
کامراں ہے وہ محبت جو بنے روح گداز
دردِ دل حد سے گزر جائے تو خود دل ہو جائے
جلا ہے ہائے کس جان چمن کی شمعِ محفل سے
مہک پھولوں کی آتی ہے شرار آتشِ دل سے
ٹھہر بھی اے خیال حشر اور اک جام پینے دے
سرکتا ہے ابھی ظلمت کا پردہ خانۂ دل سے
ہے اس کمبخت کو ضد سوز باطن سے پگھل جاؤں
نگاہوں نے تمہاری کہہ دیا ہے کیا مرے دل سے
سپردِ بیخودی کر دے فرائض عقل خود بیں کے
ہٹا دے اس سیہ باطن کا پہرا خانۂ دل سے
ہزاروں غم ہیں اس منزل میں منزل دیکھنے والے
کلیجا تھام لے اپنا مرا دل دیکھنے والے
ہر اک ذرے میں پوشیدہ ہے اک طغیان مدہوشی
سنبھل کر دیکھنا پیمانۂ دل دیکھنے والے

اسرار الحق مجاز

نہیں یہ فکر کوئی رہبر کامل نہیں ملتا
کوئی دنیا میں مانوس مزاج دل نہیں ملتا
یہ آنا کوئی آنا ہے کہ بس رسماً چلے آئے
یہ ملنا خاک ملنا ہے کہ دل سے دل نہیں ملتا
کرشمہ سازی دل دیکھتا ہوں
تمہیں اپنے مقابل دیکھتا ہوں
صدا دی تو نے کیا جانے کہاں سے
مگر میں جانب دل دیکھتا ہوں
ترے ہاتھوں سے جو ٹوٹا تھا اک دن
وہی ٹوٹا ہوا دل دیکھتا ہوں

بہزاد لکھنوی

اس جذبۂ دل کے بارے میں اک مشورہ تم سے لیتا ہوں
اس وقت مجھے کیا لازم ہے جب تجھ پہ مرا دل آ جائے
تیری نظریں جو ذرا مجھ پہ کرم فرمائیں
تیری نظروں کی قسم پھر یہی دل دل ہو جائے

عالم تاب تشنہ

درد کی اک لہر بل کھاتی ہے یوں دل کے قریب
موج سرگشتہ اٹھے جس طرح ساحل کے قریب
ما سوائے کار آہ و اشک کیا ہے عشق میں
ہے سواد آب و آتش دیدہ و دل کے قریب

علی سردار جعفری

کام اب کوئی نہ آئے گا بس اک دل کے سوا
راستے بند ہیں سب کوچۂ قاتل کے سوا
فصلِ گل فصلِ خزاں جو بھی ہو خوش دل رہیے
کوئی موسم ہو ہر اک رنگ میں کامل رہیے