مرزا غالب

ضعف میں طعنۂِ اغیار کا شکوہ کیا ہے
بات کچھ سر تو نہیں ہے کہ اٹھا بھی نہ سکوں

حیدر علی آتش

دیوانگی نے کیا کیا عالم دکھا دیے ہیں
پریوں نے کھڑکیوں کے پردے اٹھا دیے ہیں
ہستی کو مثل نقشِ کفِ پا مٹا چکے
عاشق نقاب شاہد مقصود اٹھا چکے

داغ دہلوی

کبھی غش میں رہا شبِ وعدہ
کبھی گردن اٹھا کے دیکھ لیا
ادھر آئینہ ہے ادھر دل ہے
جس کو چاہا اٹھا کے دیکھ لیا
کہیں مشتاق سے حجاب ہوا
کہیں پردہ اٹھا دیا تو نے

شیخ ابراہیم ذوق

ناتوانی ہم کو ہاتھوں ہاتھ اٹھا کر لے گئی
چیونٹی سے چیونٹی دانہ چھڑا کر لے گئی
جو شہیدِ ناز کوچے میں تمہارے تھا پڑا
کیا کہوں تقدیر اسے کیونکر اٹھا کر لے گئی
داغِ دل پر مرے پھاہا نہیں ہے انگارا
چارہ گر لیجو نہ چٹکی سے اٹھا یاد رہے

مصحفی غلام ہمدانی

ناتوانی کے سبب یاں کس سے اٹھا جائے ہے
آہ اٹھنے کی کہیں کیا دم ہی بیٹھا جائے ہے

مومن خان مومن

غیروں سے ہو وہ پردہ نشیں کیوں نہ بے حجاب
دم ہائے بے اثر مرے پردہ اٹھا گئے

میر مہدی مجروح

یہ کہیے کہ دھیان اس کو آتا ہی نہیں ورنہ
محشر سے تو سو فتنے وہ دم میں اٹھا جاتا
ایذائیں یہ پائی ہیں مقدور اگر ہوتا
میں رسم تعشق کو دنیا سے اٹھا جاتا
اک شب نہ اسے لائے کچھ رنگ نہ دکھلائے
اک شورِ قیامت ہی نالوں نے اٹھا جانا

فیض احمد فیض

مٹ جائے گی مخلوق تو انصاف کرو گے
منصف ہو تو اب حشر اٹھا کیوں نہیں دیتے
صبح پھوٹی تو وہ پہلو سے اٹھا آخرِ شب
وہ جو اک عمر سے آیا نہ گیا آخرِ شب

میر انیس

گنہ کا بوجھ جو گردن پہ ہم اٹھا کے چلے
خدا کے آگے خجالت سے سر جھکا کے چلے
ملا جنہیں انہیں افتادگی سے اوج ملا
انہیں نے کھائی ہے ٹھوکر جو سر اٹھا کے چلے

یگانہ چنگیزی

دل بعد فنا بھی ہے گراں بارِ امانت
دنیا سے سبک دوش اٹھا بھی نہیں جاتا

باقی صدیقی

دل و نگاہ کا پردہ کبھی اٹھا تو سہی
تو اپنی ذات کے مدفن سے باہر آ تو سہی
پہلے ہر بات پہ ہم سوچتے تھے
اب فقط ہاتھ اٹھا دیتے ہیں
ہم نے خون میں لت پت گلشن دیکھا ہے
کس جانب سے شور اٹھا معلوم نہیں
کچھ تو ہو باقیؔ جہاں کی چیرہ دستی کا علاج
زندگی اب اور بارِ غم اٹھا سکتی نہیں
آپ ہی آپ سامنے تھے ہم
ایک پردہ اٹھا تھا پہلے بھی
رسم سجدہ بھی اٹھا دی ہم نے
عظمت عشق بڑھا دی ہم نے

جون ایلیا

ابھی اک شور سا اٹھا ہے کہیں
کوئی خاموش ہو گیا ہے کہیں
ہے فصیلیں اٹھا رہا مجھ میں
جانے یہ کون آ رہا مجھ میں

خواجہ میر درد

میں وہ فتادہ ہوں کہ بغیر از فنا مجھے
نقشِ قدم کی طرح نہ کوئی اٹھا سکے
گو بحث کر کے بات بٹھائی بھی کیا حصول
دل سے اٹھا غلاف اگر تو اٹھا سکے

سراج الدین ظفر

حسرتِ دید میں جو ہے دید میں وہ مزہ نہیں
پردۂ روئے دوست اٹھا اور اٹھا کے بھول جا

عبدالحمید عدم

کہتے ہیں عمرِ رفتہ کبھی لوٹتی نہیں
جا مے کدے سے میری جوانی اٹھا کے لا
دیکھی نہیں ہے تو نے کبھی زندگی کی لہر
اچھا تو جا عدمؔ کی صراحی اٹھا کے لا
جسے بھی میں نے زیادہ تپاک سے دیکھا
اسی حسین نے پتھر اٹھا کے مار دیا
تعینات کی حد تک تو جی رہا تھا عدمؔ
تعینات کے پردے اٹھا کے مار دیا
ساقی شراب لا کہ طبیعت اداس ہے
مطرب رباب اٹھا کہ طبیعت اداس ہے
ہے حسن کا فسوں بھی علاج فسردگی
رخ سے نقاب اٹھا کہ طبیعت اداس ہے

قمر جلالوی

اس حشر میں کچھ داد نہ فریاد کسی کی
جو حشر کے ظالم ترے کوچے سے اٹھا ہو

عرفان صدیقی

درد کیا جرم تھا کوئی کہ چھپایا جاتا
ضبط کی رسم ہی دنیا سے اٹھا دی ہم نے
درد کیا جرم تھا کوئی کہ چھپایا جاتا
ضبط کی رسم بہرحال اٹھا دی ہم نے
ایک اور دن شہید ہوا، ہو گئی ہے شام
لشکر سے شب کے شور اٹھا ہو گئی ہے شام
ابھی کھلنے کے لیے بندِ قبا رکھا ہے
ہم نے ہر فکر کو فردا پہ اٹھا رکھا ہے

مجید امجد

وہ راستے خبر نہیں کس سمت کھو گئے
نکلے تھے جن پہ رختِ غمِ دل اٹھا کے ہم

جمال احسانی

جنبشِ لب نہ سہی تیرے خلاف
ہاتھ کو ہم نے اٹھا رکھا ہے
کام کچھ اتنے ہیں کرنے کو جمالؔ
نام کو کل پہ اٹھا رکھا ہے

رئیس فروغؔ

رات مہکی تو پھر آنکھیں مل کے
کوئی سوتے سے اٹھا ہے مجھ میں

احسان دانش

زمین و چرخ نے انکار کر دیا جس سے
وہ بار دوش وفا پر اٹھا رہا ہے کوئی

اختر شیرانی

زندگی بن کے مرے دل میں سما جا سلمیٰ
موت اک پردہ ہے یہ پردہ اٹھا دے آ کر

بشیر بدر

دن نہ پا جائے کہیں شب کا راز
صبح سے پہلے اٹھا لو ہم کو

بیان میرٹھی

یہ زور حرمان و یاس کا ہے اثر کہاں کا مری فغاں کو
پٹک پٹک خاک پر دیا ہے فلک سے اونچا اٹھا اٹھا کر
فلک ہوا مہرباں پھرے دن شب وصال آ گئی تو اس نے
بہار‌ لطف‌ و کرم دکھا کر نقاب شرم و حیا اٹھا کر

ضیا جالندھری

جسے بھلا کے یہ دل مطمئن تھا مدت سے
کل اس کے ذکر پہ اک عہد بول اٹھا کہ میں ہوں

عبید اللہ علیم

باغ کا باغ آپ کی دسترس ہوس میں ہے
ایک غریب نے اگر پھول اٹھا لیا تو کیا

فارغ بخاری

یادوں کا عجیب سلسلہ ہے
سویا ہوا درد جاگ اٹھا ہے
کس شعلہ بدن کی یاد آئی
دامان خیال جل اٹھا ہے
کس قیامت کا ہے دیدار ترا وعدہ شکن
دل بے تاب نے اک حشر اٹھا رکھا ہے

ماجد صدیقی

کر دیں یہ کس نے ذہن پہ عریاں حقیقتیں
کہرام سا یہ کس نے نظر میں اٹھا دیا
اک بات یہ بھی مان کہ ماجدؔ غم و الم
پیروں کی خاک میں نہ انہیں سر پہ تو اٹھا
کیوں نام ترا نہ لیں کسی سے
اب قید یہ ہم سے تو اٹھا بھی

جلیل مانک پوری

نقاب کہتی ہے میں پردۂ قیامت ہوں
اگر یقین نہ ہو دیکھ لو اٹھا کے مجھے
تمہارے واسطے اس دل کا مول ہی کیا ہے
ادا سے دیکھ لو اک دن نظر اٹھا کے مجھے

جوش ملیح آبادی

کروٹوں کے گرائے تکیوں کو
کسمسا کر اٹھا رہا ہے یہ کون

حسرت موہانی

محفلِ یار میں بہ ذوق نگاہ
لطف کیا کیا اٹھا گئیں آنکھیں

حفیظ جالندھری

ہوش میں آ چکے تھے ہم جوش میں آ چکے تھے ہم
بزم کا رنگ دیکھ کر سر نہ مگر اٹھا سکے
آپ بیتاب نمائش نہ کریں جلووں کو
ہم نے دیدار قیامت پہ اٹھا رکھا ہے

رسا چغتائی

نہیں آزار جاں کوئی تو مرزا
کسی دیوار کا سایہ اٹھا لو
زخم ہو تو کوئی دہائی دے
تیر ہو تو کوئی اٹھا لے جائے

سیماب اکبر آبادی

ابھی نقاب کشائی حسن ہے دشوار
وہی اٹھے ہوئے پردے اٹھا رہا ہے کوئی

شاد عظیم آبادی

زمیں پہ جام کو رکھ دے ذرا ٹھہر ساقی
میں تجھ پہ ہوں لوں تصدق تو پھر اٹھا کے پیوں
نگاہِ ناز سے ساقی کا دیکھنا مجھ کو
مرا وہ ہاتھ میں ساغر اٹھا کے رہ جانا

شکیل بدایونی

سر اہلِ عشق کے اکثر جھکا نہیں کرتے
اگر جھکے بھی کہیں پھر اٹھا نہیں کرتے

فانی بدایونی

جینے بھی نہیں دیتے مرنے بھی نہیں دیتے
کیا تم نے محبت کی ہر رسم اٹھا ڈالی
جینے میں نہ اب فانیؔ مرنے میں شمار اپنا
ماتم کی بساط اس نے کیا کہہ کے اٹھا ڈالی
دل کی طرف حجاب تکلف اٹھا کے دیکھ
آئینہ دیکھ اور ذرا مسکرا کے دیکھ
اس شورش حیات کو حد سے بڑھا کے دیکھ
یہ فتنہ اور حشر سے پہلے اٹھا کے دیکھ

احمد فراز

مقامِ سود و زیاں آ گیا ہے پھر جاناں
یہ زخم میرے سہی، تیر تو اٹھا لے جا
تمہارے بام سے اب کم نہیں ہے رفعت دار
جو دیکھنا ہو تو دیکھو نظر اٹھا کے مجھے

امیر مینائی

وصل ہو جائے یہیں حشر، حشر میں کیا رکھا ہے
آج کی بات کو کیوں کل پہ اٹھا رکھا ہے

شاذ تمکنت

آج تو شکوۂ محرومی دیدار نہیں
ہم نے کل کے لیے اس غم کو اٹھا رکھا ہے
کیا تہمتیں دنیا نے اے شاذؔ اٹھائی ہیں
اک تہمت ہستی تھی سوچا تھا اٹھا لوں گا
ہم برس پڑتے تھے شاذؔ اپنی ہی تنہائی پر
ابر کی طرح کسی در سے اٹھا کرتے تھے
تلاش کر اسے دیوار و در کے چہروں میں
عجب نہیں تری محفل سے وہ اٹھا ہی نہ ہو

فراق گورکھپوری

لگاوٹیں وہ ترے حسنِ بے نیاز کی آہ
میں تیری بزم سے جب ناامید اٹھا تھا
تجھے ہم اے دل درد آشنا کہاں ڈھونڈیں
ہم اپنے ہوش میں کب تھے کوئی جب اٹھا تھا
یاد کچھ آئیں اس طرح بھولی ہوئی کہانیاں
کھوے ہوئے دلوں میں آج درد اٹھا کے رہ گئیں

قابل اجمیری

کوئے محبوب سے چپ چاپ گزرنے والے
عرصۂ زیست میں اک حشر اٹھا دیتے ہیں

قیوم نظر

شعلوں سے ہوا تھا باغ خالی
پھر سینۂ گل بھڑک اٹھا ہے
گرد رہ بن کے جو یوں بیٹھا ہوں
صورت شعلہ اٹھا کرتا تھا

کیفی اعظمی

ہاتھ آ کر لگا گیا کوئی
میرا چھپر اٹھا گیا کوئی

محسن نقوی

دریا کا انتقام ڈبو دے نہ گھر ترا
ساحل سے روز روز نہ کنکر اٹھا کے لا
گر سوچنا ہیں اہل مشیت کے حوصلے
میداں سے گھر میں ایک تو میت اٹھا کے لا

ناصر کاظمی

ان اندھیروں میں کرن ہے کوئی
شب زدو آنکھ اٹھا کر دیکھو
کعبہ سنسان ہے کیوں اے واعظ
ہاتھ کانوں سے اٹھا غور سے سن
رات گئے سویا تھا لیکن
تجھ سے پہلے جاگ اٹھا تھا
تیری آہٹ سنتے ہی میں
کچی نیند سے چونک اٹھا تھا
گئے دنوں کی خوشبو پا کر
میں دو بارہ جی اٹھا تھا
آنگن میں پھر چڑیاں بولیں
تو اب سو کر اٹھا ہو گا