مرزا غالب

جو یہ کہے کہ ریختہ کیوں کر ہو رشکِ فارسی
گفتۂِ غالب ایک بار پڑھ کے اسے سنا کہ یوں
بات پر واں زبان کٹتی ہے
وہ کہیں اور سنا کرے کوئی
غالب تمہیں کہو کہ ملے گا جواب کیا
مانا کہ تم کہا کیے اور وہ سنا کیے

انشاء اللہ خان انشا

ہم نشیں تو جو یہ کہتا ہے کہ قدغن ہے بہت
اب وہ آواز بھی کب تجھ کو سنا سکتے ہیں
ایک ڈھب کے جو قوافی ہیں ہم ان میں انشاؔ
اک غزل اور بھی چاہیں تو سنا سکتے ہیں

داغ دہلوی

لوگ کہتے ہیں چپ لگی ہے تجھے
حالِ دل بھی سنا کے دیکھ لیا

مصطفٰی خان شیفتہ

ڈر ہے کہ ہو نہ شوقِ مزامیر شیفتہ
ورنہ کبھی سماعِ مجرد سنا کروں

میر مہدی مجروح

اچھا ہوا محفل میں مجروحؔ نہ کچھ بولا
وہ حال اگر کہتا تو کس سے سنا جاتا
لعل کو اس کے لب سے کیا نسبت
یہ بھی اک بات ہے سنا کیجے

مرزا رفیع سودا

دخل کیا راہِ محبت میں نکو نامی کو
آیا اس کوچے میں جو ان نے سنا کیا کیا کچھ
خیال اپنے میں گو ہوں ترانہ سنجاں مست
کراہنے کے دلوں کو کبھی سنا بھی ہے

میر انیس

طلب سے عار ہے اللہ سے فقیروں کو
کہیں جو ہو گیا پھیرا صدا سنا کے چلے

یگانہ چنگیزی

پیام زیرِ لب ایسا کہ کچھ سنا نہ گیا
اشارہ پاتے ہی انگڑائی لی رہا نہ گیا

باقی صدیقی

ختم ہوتی نہیں دل کی باتیں
اپنا قصہ تو سنا بیٹھے ہیں
اب تو ہر بات پہ ہوتا ہے گماں
واقعہ کوئی سنا ہے اپنا
اپنا قصہ سنا رہا ہوں
سامنے تیرے آ رہا ہوں
دل میں جب بات نہیں رہ سکتی
کسی پتھر کو سنا دیتے ہیں
جانے کیا مستی میں اس نے بات کہی
نشے میں کیا ہم نے سنا معلوم نہیں
زیست کے ان فسانہ خوانوں سے
اک فسانہ سنا تھا پہلے بھی
حال جب پوچھا کسی نے باقیؔ
اک غزل اپنی سنا دی ہم نے

خواجہ میر درد

ہم بھی جرس کی طرح تو اس قافلے کے ساتھ
نالے جو کچھ بساط میں تھے سو سنا چلے
ان نے قصداً بھی میرے نالے کو
نہ سنا ہو گا گر سنا ہو گا
وہ مرے چاہنے کو کیا جانے
یہ سندیسا سنا دیا کن نے

عبدالحمید عدم

کیفیت سکوت سے بڑھتا ہے اور غم
قصہ کوئی سنا کہ طبیعت اداس ہے

قمر جلالوی

مرا خاموش رہ کر بھی انہیں سب کچھ سنا دینا
زباں سے کچھ نہ کہنا دیکھ کر آنسو بہا دینا
نزع کی اور بھی تکلیف بڑھا دی تو نے
کچھ نہ بن آیا تو آواز سنا دی تو نے

عرفان صدیقی

وہ سمجھتا ہے یہ اندازِ تخاطب کہ نہیں
یہ غزل اس غزل آراء کو سناکر دیکھیں