مرزا غالب

شرم اک ادائے ناز ہے اپنے ہی سے سہی
ہیں کتنے بے حجاب کہ ہیں یوں حجاب میں
مجھے بھی تاکہ تمنا سے ہو نہ مایوسی
ملو رقیب سے لیکن ذرا حجاب کے ساتھ

امام بخش ناسخ

ہوا ہے مانع دیدار یار پردۂ چشم
کھلی جو آنکھ تو کچھ درمیاں حجاب نہیں

انشاء اللہ خان انشا

مل گئے پر حجاب باقی ہے
فکر ناز و عتاب باقی ہے

بہادر شاہ ظفر

اے ظفرؔ اٹھ جائے گا جب پردہ شرم و حجاب
سامنے وہ یار میرے بے حجاب آ جائے گا

حیدر علی آتش

ان انکھڑیوں میں اگر نشۂِ شراب آیا
سلام جھک کے کروں گا جو پھر حجاب آیا

داغ دہلوی

پڑے ہوئے تھے ہزاروں پردے کلیم دیکھوں تو جب بھی خوش تھے
ہم اس کی آنکھوں کے صدقے جس نے وہ جلوہ یوں بے حجاب دیکھا
اسے شرمائیں گے ذکر عدو پر
یہ قسمت ہے حجاب آئے نہ آئے

شیخ ابراہیم ذوق

جامِ مے منہ سے تو لگا اپنے
چھوڑ شرم و حجاب کی باتیں

مصحفی غلام ہمدانی

میں نے تجھے تو نے مجھ کو دیکھا
اب مجھ سے تجھے حجاب کیا ہے
معشوقۂِ گل نقاب میں ہے
محجوبہ ابھی حجاب میں ہے
آئے ہو تو یہ حجاب کیا ہے
منہ کھول دو نقاب کیا ہے
اوروں سے تو ہے یہ بے حجابی
مجھ سے ہی تجھے حجاب کیا ہے
باہم ہوئی یوں تو دید وا دید
پر دل کا حجاب کچھ نہ نکلا
ایک دن تم نے کی نہ بات کبھو
مر گئے ہم تو اس حجاب میں جان

مصطفٰی خان شیفتہ

شوخی نے تیری لطف نہ رکھا حجاب میں
جلوے نے تیرے آگ لگائی نقاب میں

مومن خان مومن

بد نام میرے گریۂِ رسوا سے ہو چکے
اب عذر کیا رہا نگہ بے حجاب میں

میر مہدی مجروح

شعلۂِ حسن تیرا کیا کہنا
پھونک دے اس کے پردہ ہائے حجاب

جون ایلیا

منشیان شہود نے تا حال
ذکر غیب و حجاب ہی لکھا

جگر مراد آبادی

اے حسن اپنی حوصلہ افزائیاں تو دیکھ
مانا کہ چشمِ شوق بہت بے حجاب ہے
جذبۂ شوق کام یاب ہوا
آج مجھ سے انہیں حجاب ہوا
اللٰہ اللٰہ وہ امتزاج لطیف
شوخیوں میں حجاب کا عالم
زندگی تھی حجاب کے دم تک
برہمی حجاب نے مارا
خود نظر بن گئی حجاب نظر
ہائے اس بے حجاب نے مارا
بچ رہا جو تری تجلی سے
اس کو تیرے حجاب نے مارا
نہ دیکھا رخِ بے نقاب محبت
محبت ہے شاید حجاب محبت
سبھی اٹھ گئے دیدہ و دل سے پردے
نہ اٹھا مگر اک حجاب محبت

سراج الدین ظفر

عرفان دل نہیں تجھے اے شکوہ سنج دوست
اس آئنے میں راز شہود و حجاب ہے

عبدالحمید عدم

یہ نئی احتیاط دیکھی ہے
آئنے سے حجاب کرتے ہو

عرفان صدیقی

اس ایک شخص کو مجھ سے حجاب کتنا ہے
پڑھا ہوا وہ دلوں کی کتاب کتنا ہے

احسان دانش

مرے مٹانے کی تدبیر تھی حجاب نہ تھا
وگرنہ کون سے دن حسنِ بے نقاب نہ تھا
مرنے والے فنا بھی پردہ ہے
اٹھ سکے گر تو یہ حجاب اٹھا

اختر شیرانی

تلاش معنی ہستی میں فلسفہ نہ خرد
یہ راز آج تلک بے حجاب ہو نہ سکا

اسرار الحق مجاز

حسن کو بے حجاب ہونا تھا
شوق کو کام یاب ہونا تھا
ہو گی مری باتوں سے انہیں اور بھی حیرت
آئے گا انہیں مجھ سے حجاب اور زیادہ

ظہیر کاشمیری

تو کب مآل‌ جور و جفا کو سمجھ سکا
تیرا جمال تیرے لیے بھی حجاب تھا