مرزا غالب

تماشا کر اے محو آئینہ داری
تجھے کس تمنا سے ہم دیکھتے ہیں
واں پہنچ کر جو غش آتا پئے ہم ہے ہم کو
صد رہ آہنگ زمیں بوسِ قدم ہے ہم کو
دل کو میں اور مجھے دل محوِ وفا رکھتا ہے
کس قدر ذوقِ گرفتاریِ ہم ہے ہم کو
اس جور و جفا پر بھی بدظن نہیں ہم تجھ سے
کیا طرفہ تمنا ہے امیدِ کرم تجھ سے
یہ جور و جفا سہنا پھر ترکِ وفا کرنا
اے ہرزہ پژوہی بس عاجز ہوئے ہم تجھ سے
غالب کی وفا کیشی اور تیری ستم رانی
مشہورِ زمانہ ہے اب کیا کہیں ہم تجھ سے
عجب نشاط سے جلاد کے چلے ہیں ہم آگے
کہ اپنے سائے سے سر پاؤں سے ہے دو قدم آگے
خدا کے واسطے داد اس جنونِ شوق کی دینا
کہ اس کے در پہ پہنچتے ہیں نامہ بر سے ہم آگے
تمھاری طرز و روش جانتے ہیں ہم، کیا ہے
رقیب پر ہے اگر لطف تو ستم کیا ہے
بے اعتدالیوں سے سبک سب میں ہم ہوئے
جتنے زیادہ ہو گئے اتنے ہی کم ہوئے
پنہاں تھا دام سخت قریب آشیان کے
اڑنے نہ پائے تھے کہ گرفتار ہم ہوئے
اللہ ری تیری تندی خو جس کے بیم سے
اجزائے نالہِ دل میں مرے رزقِ ہم ہوئے

انشاء اللہ خان انشا

گالیاں کھانے کو اس شوخ سے ملتے ہیں ہاں
کوئی کرتا نہیں جو کام سو ہم کرتے ہیں
حضرت عشق ادھر کیجے کرم یا معبود
بال گوپال ہیں یاں آپ کے ہم یا معبود
آپ ہی آپ ہیں وہ آپ نے سچ فرمایا
یوں بھی کچھ دھوکے سے تھے نام کو ہم یا معبود
مشغول کیا چاہیے اس دل کو کسی طور
لے لیویں گے ڈھونڈ اور کوئی یار ہم اچھا

بہادر شاہ ظفر

نہیں ڈرتے اگر ہوں لاکھ زنداں یار زنداں سے
جنون اب تو مثال نالۂ زنجیر ہم نکلے
واقف ہیں ہم کہ حضرت غم ایسے شخص ہیں
اور پھر ہم ان کے یار ہیں ہم ایسے شخص ہیں
آزردہ ہوں عدو کے جو کہنے پہ اے ظفرؔ
نے ایسے شخص وہ ہیں نہ ہم ایسے شخص ہیں
ہم یہ تو نہیں کہتے کہ غم کہہ نہیں سکتے
پر جو سبب غم ہے وہ ہم کہہ نہیں سکتے

حیدر علی آتش

فراق انجام کام آغاز وصلت کا بلا شک ہے
بہت رویا میں روح و تن کو جب مشتاق ہم پایا
روز مولود سے ساتھ اپنے ہوا غم پیدا
لالہ ساں داغ اٹھانے کو ہوئے ہم پیدا

داغ دہلوی

تماشائے دیر و حرم دیکھتے ہیں
تجھے ہر بہانے سے ہم دیکھتے ہیں
ہماری طرف اب وہ کم دیکھتے ہیں
وہ نظریں نہیں جن کو ہم دیکھتے ہیں
زمانے کے کیا کیا ستم دیکھتے ہیں
ہمیں جانتے ہیں جو ہم دیکھتے ہیں
ادھر شرم حائل ادھر خوف مانع
نہ وہ دیکھتے ہیں نہ ہم دیکھتے ہیں
دل گیا تم نے لیا ہم کیا کریں
جانے والی چیز کا غم کیا کریں
معرکہ ہے آج حسن و عشق کا
دیکھیے وہ کیا کریں ہم کیا کریں
کہتے ہیں اہل سفارش مجھ سے داغؔ
تیری قسمت ہے بری ہم کیا کریں
گلے شکوے کہاں تک ہوں گے آدھی رات تو گزری
پریشاں تم بھی ہوتے ہو پریشاں ہم بھی ہوتے ہیں
بظاہر رہنما ہیں اور دل میں بد گمانی ہے
ترے کوچے میں جو جاتا ہے آگے ہم بھی ہوتے ہیں
کسی کا وعدۂِ دیدار تو اے داغؔ برحق ہے
مگر یہ دیکھیے دل شاد اس دن ہم بھی ہوتے ہیں

شیخ ابراہیم ذوق

ہوئے کیوں اس پہ عاشق ہم ابھی سے
لگایا جی کو ناحق غم ابھی سے
دلا ربط اس سے رکھنا کم ابھی سے
جتا دیتے ہیں تجھ کو ہم ابھی سے

مصطفٰی خان شیفتہ

ٹھیرے کیا دل کہ تری شوخی سے
اضطرابِ پئے ہم یاد آیا

فیض احمد فیض

یہ عجب قیامتیں ہیں تری رہگزر میں گزراں
نہ ہوا کہ مر مٹیں ہم، نہ ہوا کہ جی اٹھیں ہم

مرزا رفیع سودا

نہ دیکھا جو کچھ جام میں جم نے اپنے
سو یک قطرۂ مے میں ہم دیکھتے ہیں
خدا دشمنوں کو نہ وہ کچھ دکھائے
جو کچھ دوست سے اپنے ہم دیکھتے ہیں

باقی صدیقی

پی کے تلخابۂ غم جاتے ہیں
لے تری بزم سے ہم جاتے ہیں
جانے اس راہ میں کیا کھو آئے
روز کچھ ڈھونڈنے ہم جاتے ہیں
جب سے ٹوٹا ہے سفینہ باقیؔ
ساتھ ہر موج کے ہم جاتے ہیں
آپ ہیں دور کہ ہم دیکھتے ہیں
چل کے دو چار قدم دیکھتے ہیں
ریگِ ساحل ہے مقدر اپنا
کیا ہر اک موج میں ہم دیکھتے ہیں
رک گئی برسات، ساغر تھم گئے
تھامنا اے ضبط الفت ہم گئے
اس کے آگے کیا ہوا باقیؔ نہ پوچھ
بارگاہ حسن تک تو ہم گئے
اس طرح ہو گئے جدا جیسے
راہ میں یوں ہی مل گئے تھے ہم
پستیاں بھی گریز کرنے لگیں
کس بلندی سے گر رہے ہیں ہم
نئے خیال نئے فاصلوں کے ساتھ آئے
نہمل سکیں گے کسی راستے پہ ہم اب تو
پاس حالات بجا ہے لیکن
ہو نہ جائیں کہیں ہم دیوانے
آج ہی آئے سینکڑوں الزام
آج ہی انجمن میں ہم نہ ہوئے

جون ایلیا

دل کی تکلیف کم نہیں کرتے
اب کوئی شکوہ ہم نہیں کرتے
شرمندگی ہے ہم کو بہت ہم ملے تمہیں
تم سر بہ سر خوشی تھے مگر غم ملے تمہیں

جگر مراد آبادی

ہم کو مٹا سکے یہ زمانے میں دم نہیں
ہم سے زمانہ خود ہے زمانے سے ہم نہیں
خوشا یہ نسبت حسن و محبت
جہاں بیٹھے نظر آئے ہمیں ہم

قمر جلالوی

ہے وعدہ خلافی کے علاوہ بھی ستم اور
گر تم نہ خفا ہو تو بتا دیں تمھیں ہم اور
وہ پوچھتے ہیں دیکھئے یہ طرفہ ستم اور
کس کس نے ستایا ہے تجھے ایک تو ہم اور
یہ بات ابھی کل کی ہے جو کچھ تھے ہمیں تھے
اللہ تری شان کہ اب ہو گئے ہم اور
کیا آپ سا کوئی نہیں ہے جہاں میں
اچھا حضور آئینہ لاتے ہیں ہم ابھی

شکیب جلالی

ایک تارہ بھی نہ پامال ہوا
ایسے گزرے رہِ افلاک سے ہم

عرفان صدیقی

سخت ہے مرحلۂ رزق بھی ہم جانتے ہیں
پر اسے معرکۂ عشق سے کم جانتے ہیں
ذرا سا رقصِ شرر کر کے خاک ہو جائیں
جو رفتگاں نے کیا ہے وہ ہم کریں دونوں
چاہے جس شہر میں رہ آئیں، مگر رہتے ہیں
زندگی دلی کی، دل دلی کا، ہم دلی کے