مرزا غالب

کہاں سے لاکے دکھائے گی عمرِ کم مایہ
سیہ نصیب کو وہ دن کہ جس میں رات نہیں
مے سے غرض نشاط ہے کس رو سیاہ کو
اک گونہ بیخودی مجھے دن رات چاہیے

انشاء اللہ خان انشا

آنے اٹک اٹک کے لگی سانس رات سے
اب ہے امید صرف خدا ہی کی ذات سے
ماہ گزشتہ کا حال انشاؔ کہوں سو کیوں کر
مر مر بسر کیے ہیں دن اور رات تیسوں

حیدر علی آتش

کوئی اندھا ہی تجھے ماہ کہے اے خورشید
فرق ہوتا نہیں انسان سے دن رات میں کیا
دل لگی اپنی ترے ذکر سے کس رات نہ تھی
صبح تک شام سے یاہو کے سوا بات نہ تھی
ان دنوں ہوتا تھا تو گھر میں ہمارے شب باش
روزِ روشن سے کم اے مہرِ لقا رات نہ تھی

مصحفی غلام ہمدانی

بولا نہ مرغ صبح نہ آئی صدائے آہ
یارب شبِ فراق کی کیا رات بڑھ گئی
ہے آج کی شب وعدۂِ وصل اس کا مرے ساتھ
یارب کہ شتابی سے یہ دن رات کہیں ہو
ظلمات شبِ ہجر کی آفات ہے اور تو
جو دم ہے غنیمت ہے کہ پھر رات ہے اور تو
ہر روز کا ملنا ہے جو دشوار تو پیارے
اتنا تو کرو قصد کہ اک رات کی ٹھہرے
وہ چاندنی رات اور وہ ملاقات کا عالم
کیا لطف میں گزرا ہے غرض رات کا عالم
شبِ ہجر صحرائے ظلمات نکلی
میں جب آنکھ کھولی بہت رات نکلی

مصطفٰی خان شیفتہ

ایسے کے آگے شیفتہ کیا چل سکے جہاں
احسان ایک عمر رہے ، ایک رات کا

فیض احمد فیض

کب یاد میں تیرا ساتھ نہیں، کب ہات میں تیرا ہات نہیں
صد شکر کہ اپنی راتوں میں اب ہجر کی کوئی رات نہیں
پھر وہ پروانے جنہیں اذنِ شہادت نہ ملا
پھر وہ شمعیں کہ جنہیں رات نہ ہونے پائی

مرزا رفیع سودا

تجھ بن بہت ہی کٹتی ہے اوقات بے طرح
جوں توں کے دن تو گزرے ہے پر رات بے طرح

باقی صدیقی

یاد آئی کیا تیری بات
نیند نہ آئی ساری رات
کہاں حقیقت جلوہ، کہاں فریب شرار
ہزار شمعیں جلیں رات رات ہے پھر بھی
وہ پو پھٹی، وہ سحر آئی، رات ختم ہوئی
پھر ایک بات چھڑی، ایک بات ختم ہوئی
شمع بجھتی ہے ، زلف کھلتی ہے
تب کہیں رات، رات ہوتی ہے

جگر مراد آبادی

دن کا کیا ذکر تیرہ بختوں میں
ایک رات آئی ایک رات گئی
ہاں مزے لوٹ لے جوانی کے
پھر نہ آئے گی یہ جو رات گئی
ہاں یہ سرشاریاں جوانی کی
آنکھ جھپکی ہی تھی کہ رات گئی

عبدالحمید عدم

نکلے تھے مرے ساتھ وہ جب بزم ازل سے
کچھ صبح کے آثار تھے کچھ رات کا عالم
شبنم اسی جنوں میں ازل سے ہے سینہ کوب
خورشید کس مقام پہ ملتا ہے رات سے
کھلی وہ زلف تو پہلی حسین رات ہوئی
اٹھی وہ آنکھ تو تخلیق کائنات ہوئی
کل قطع تعلق کر لینا اس وقت تو دنیا میری ہے
یہ رات کی قسمیں جھوٹی ہیں یہ رات کی نیت ٹھیک نہیں
حشر میں لے کے چلو مطرب و معشوق و سبو
غیر کے گھر میں کبھی رات بھی ہو جاتی ہے
مے خانے میں ہے شب کے گزرنے کا یہ عالم
محسوس یہ ہوتا ہے ابھی رات ہوئی ہے

قمر جلالوی

قمر وہ رات کو بہرِ عیادت آئیں گے
مگر مریض کی قسمت میں آج، رات کہاں
وفائے وعدہ میں اچھا تمھاری بات سہی
نہیں دن کو جو فرصت تمھیں تو رات سہی
رقیب چھائے ہوئے ہیں مثالِ ابر ان پر
قمر نہ آئیں گے وہ لاکھ چاند رات سہی

شکیب جلالی

اب میسر نہیں فرصت کے وہ دن رات ہمیں
لے اڑی جانے کہاں صرصرِ حالات ہمیں
کیسے اڑتے ہوئے لمحوں کا تعاقب کیجے
دوستو! اب تو یہی فکر ہے دن رات ہمیں

عرفان صدیقی

تیرے بغیر بھی غمِ جاں ہے وہی کہ نئیں
نکلا نہ ماہتاب تو کیا رات نئیں ہوئی

مجید امجد

چراغ بجھ چکے ، پتنگے جل چکے ، سحر ہوئی
مگر ابھی مری جدائیوں کی رات رات ہے
دل سے ہر گزری بات گزری ہے
کس قیامت کی رات گزری ہے
چاندنی، نیم وا دریچہ، سکوت
آنکھوں آنکھوں میں رات گزری ہے
بجھتے جاتے ہیں دکھتی پلکوں پہ دیپ
نیند آئی ہے ، رات گزری ہے

مصطفی زیدی

ہر طرف انبساط ہے اے دل
اور ترے گھر میں رات ہے اے دل
خود اپنی آنچ میں جلتا ہے چاندنی کا بدن
کسی کے نرم خنک گیسوؤں کی رات تو دیکھ

الطاف حسین حالی

ذرہ ذرہ ہے مظہر خورشید
جاگ اے آنکھ دن ہے رات نہیں

جمال احسانی

سویرا ہو بھی چکا اور رات باقی ہے
ضرور دل میں ابھی کوئی بات باقی ہے

اختر شیرانی

آوارگان عشق کا مسکن نہ پوچھئے
پڑ رہتے ہیں وہیں پہ جہاں رات ہو گئی
بے چین رکھنے والے پریشاں ہوں خود نہ کیوں
آخر کو تیری زلف مری رات ہو گئی

بشیر بدر

کئی سال سے کچھ خبر ہی نہیں
کہاں دن گزارا کہاں رات کی
کیسا فلک ہوں جس پہ سمندر سوار ہے
سورج بھی میرے سر پہ ہے میں کیسی رات ہوں
اک پری کے ساتھ موجوں پر ٹہلتا رات کو
اب بھی یہ قدرت کہاں ہے آدمی کی ذات کو
جن کا سارا جسم ہوتا ہے ہماری ہی طرح
پھول کچھ ایسے بھی کھلتے ہیں ہمیشہ رات کو
پیچھے پیچھے رات تھی تاروں کا اک لشکر لئے
ریل کی پٹری پہ سورج چل رہا تھا رات کو
صبح بستر بند ہے جس میں لپٹ جاتے ہیں ہم
اک سفر کے بعد پھر کھلتے ہیں آدھی رات کو
چراغوں کو آنکھوں میں محفوظ رکھنا
بڑی دور تک رات ہی رات ہوگی
چراغوں کی لو سے ستاروں کی ضو تک
تمہیں میں ملوں گا جہاں رات ہوگی

زہرا نگاہ

کیوں اے غمِ فراق یہ کیا بات ہو گئی
ہم انتظارِ صبح میں تھے رات ہو گئی

ضیا جالندھری

دن آئے گئے جیسے سرائے میں مسافر
ٹھہری رہی آنکھوں میں جو اک رات وہ تم ہو

عبید اللہ علیم

اب تو فراق صبح میں بجھنے لگی حیات
بار الٰہ کتنے پہر رہ گئی ہے رات
ایسی تیز ہوا اور ایسی رات نہیں دیکھی
لیکن ہم نے مولا جیسی ذات نہیں دیکھی
اس کی شان عجیب کا منظر دیکھنے والا ہے
اک ایسا خورشید کہ جس نے رات نہیں دیکھی

غلام محمد قاصر

اکیلا دن ہے کوئی اور نہ تنہا رات ہوتی ہے
میں جس پل سے گزرتا ہوں محبت ساتھ ہوتی ہے
کہیں چڑیاں چہکتی ہیں کہیں کلیاں چٹکتی ہیں
مگر میرے مکاں سے آسماں تک رات ہوتی ہے
غم کا سورج وہ دے گیا تجھ کو
چاہے اب دن بنا کہ رات بنا

احمد راہی

دن کو رہتے جھیل پر دریا کنارے رات کو
یاد رکھنا چاند تارو اس ہماری بات کو
دن گزرتا ہے کہاں رات کہاں ہوتی ہے
درد کے ماروں سے اب بات کہاں ہوتی ہے

ماجد صدیقی

تجھ سے کہنے کی بس اب یہی بات ہے
آج پھر چاند کی چودہویں رات ہے

تلوک چند محروم

صورت کوئی قرار کی دن رات میں نہیں
یہ چیز وہ ہے جو مرے اوقات میں نہیں

جوش ملیح آبادی

دیکھیے صبح جنوں ذہن میں کب طالع ہو
عقل سنتا ہوں کہ ہے اک ابدی رات اے جوشؔ

حسرت موہانی

حیرت حسن نے مجبور کیا ہے حسرتؔ
وصل جاناں کی یوں ہی رات چلی جاتی ہے

حفیظ جالندھری

بے رزم دن گزار لیا رتجگا مناؤ
اے اہلِ بزم جاگ اٹھو رات ہو گئی
ہجر تنہائی ہے سورج ہے سوا نیزے پر
دن ہی رہتا ہے یہاں رات نہیں ہوتی ہے

سید ضمیر جعفری

خلاصہ یہ مرے حالات کا ہے
کہ اپنا سب سفر ہی رات کا ہے
گا رہا ہوں خامشی میں درد کے نغمات میں
بن گیا اک ساحل ویراں کی تنہا رات میں

سیف الدین سیف

چاندنی رات بڑی دیر کے بعد آئی ہے
لب پہ اک بات بڑی دیر کے بعد آئی ہے
آج کی رات وہ آئے ہیں بڑی دیر کے بعد
آج کی رات بڑی دیر کے بعد آئی ہے
کیسے مر مر کے گزاری ہے تمہیں کیا معلوم
رات بھر تاروں بھری رات پہ رونا آیا
وصل کی بات اور ہی کچھ تھی
ان دنوں رات اور ہی کچھ تھی
آپ آئے تھے زندگی میری
رات کی رات اور ہی کچھ تھی

سلام مچھلی شہری

یہ ابر و باد یہ طوفان یہ اندھیری رات
اب ایک موڑ پہ آ جا رفیقِ راہ حیات
مرے رفیق محبت کے دن بھی آئیں گے
وہی حسین سویرا وہی کنواری رات

شکیل بدایونی

حالِ دل پوچھنے والے تری دنیا میں کبھی
دن تو ہوتا ہے مگر رات نہیں ہوتی ہے
روشنی سایۂ ظلمات سے آگے نہ بڑھی
زندگی شمع کی اک رات سے آگے نہ بڑھی
زلف بردوش وہ اک بار تو آئے تھے شکیلؔ
پھر کوئی رات بھی اس رات سے آگے نہ بڑھی

اختر ہوشیارپوری

یہی دن میں ڈھلے گی رات اخترؔ
یہی دن کا اجالا رات ہوگا

احمد فراز

تم تو ازل کے دیوانے اور دیوانوں کا شیوہ ہے
اپنے گھر کو آگ لگا کر روشن شہر کی رات کرو

فراق گورکھپوری

جب دل کی وفات ہو گئی ہے
ہر چیز کی رات ہو گئی ہے
اب ہو مجھے دیکھیے کہاں صبح
ان زلفوں میں رات ہو گئی ہے
اس دور میں زندگی بشر کی
بیمار کی رات ہو گئی ہے
وہ چاہیں تو وقت بھی بدل جائے
جب آئے ہیں رات ہو گئی ہے
اکا دکا صدائے زنجیر
زنداں میں رات ہو گئی ہے
وقت غروب آج کرامات ہو گئی
زلفوں کو اس نے کھول دیا رات ہو گئی
اب دور آسماں ہے نہ دور حیات ہے
اے دردِ ہجر تو ہی بتا کتنی رات ہے
ہر کائنات سے یہ الگ کائنات ہے
حیرت سرائے عشق میں دن ہے نہ رات ہے
کیوں انتہائے ہوش کو کہتے ہیں بے خودی
خورشید ہی کی آخری منزل تو رات ہے
گردوں شرار برق دل بے قرار دیکھ
جن سے یہ تیری تاروں بھری رات رات ہے
عنوان غفلتوں کے ہیں قربت ہو یا وصال
بس فرصت حیات فراقؔ ایک رات ہے
یہ نکہتوں کی نرم روی یہ ہوا یہ رات
یاد آ رہے ہیں عشق کو ٹوٹے تعلقات
اک عمر کٹ گئی ہے ترے انتظار میں
ایسے بھی ہیں کہ کٹ نہ سکی جن سے ایک رات
ہم اہل انتظار کے آہٹ پہ کان تھے
ٹھنڈی ہوا تھی غم تھا ترا ڈھل چلی تھی رات
کیا نیند آئے اس کو جسے جاگنا نہ آئے
جو دن کو دن کرے وہ کرے رات کو بھی رات
تری نگاہ کی صبحیں نگاہ کی شامیں
حریمِ راز یہ دنیا جہاں نہ دن ہیں نہ رات
تمام خستگی و ماندگی ہے عالم ہجر
تھکے تھکے سے یہ تارے تھکی تھکی سی یہ رات

قتیل شفائی

ختم ہوا میرا فسانہ اب یہ آنسو پونچھ بھی لو
جس میں کوئی تارا چمکے آج کی رات وہ رات نہیں
ہاتھ دیا اس نے مرے ہاتھ میں
میں تو ولی بن گیا اک رات میں
گنگناتی سی کوئی رات بھی آ جاتی ہے
آپ آتے ہیں تو برسات بھی آ جاتی ہے

کلیم عاجز

دن ایک ستم ایک ستم رات کرو ہو
وہ دوست ہو دشمن کو بھی تم مات کرو ہو

کیف بھوپالی

گردش ارض و سماوات نے جینے نہ دیا
کٹ گیا دن تو ہمیں رات نے جینے نہ دیا

محبوب خزاں

یہ جو ہم کبھی کبھی سوچتے ہیں رات کو
رات کیا سمجھ سکے ان معاملات کو

مجروح سلطان پوری

دیار شام نہیں منزلِ سحر بھی نہیں
عجب نگر ہے یہاں دن چلے نہ رات چلے
ستون دار پہ رکھتے چلو سروں کے چراغ
جہاں تلک یہ ستم کی سیاہ رات چلے

ناصر کاظمی

جب سے دیکھا ہے ترے ہات کا چاند
میں نے دیکھا ہی نہیں رات کا چاند

نوح ناروی

سحر تک حال کیا ہو گا ہمارا
خدا جانے ابھی ہے رات کتنی
جفا والے حساب اس کا لگا لیں
وفا کرتا ہوں میں دن رات کتنی