مرزا غالب

بقدرِ ظرف ہے ساقی! خمارِ تشنہ کامی بھی
جوتو دریائے مے ہے ، تو میں خمیازہ ہوں ساحل کا
نہ بندھے تشنگی ذوق کے مضموں، غالب
گرچہ دل کھول کے دریا کو بھی ساحل باندھا
ان کو کیا علم کہ کشتی پہ مری کیا گزری
دوست جو ساتھ مرے تا لبِ ساحل آئے

امام بخش ناسخ

دھوئے ہیں دھوبی نے دریا میں جو کپڑے یار کے
آج کوسوں تک معطر دامن ساحل ہوا

بہادر شاہ ظفر

دریا میں گر پڑا جو مرا اشک ایک گرم
بت خانے لب پہ ہو گئے ساحل کے چار پانچ

داغ دہلوی

محیط عشق کی ہر موجِ طوفاں خیز ایسی ہے
وہ ہیں گرداب میں جو دامن ساحل میں رہتے ہیں

مصحفی غلام ہمدانی

وہ بحر ہے دریائے سرشک اپنا کہ جس کا
پہنا ہی نظر آوے ہے ساحل نہیں معلوم
سمجھ نہ موج مرے منہ میں ہیں ہزاروں زباں
میں بحر ہوں لبِ ساحل سے بات کرتا ہوں
حال اس غریق کا ہے جائے ترحم اے دل
رہ جائے ہے جو زیر ساحل تڑپ تڑپ کر

مصطفٰی خان شیفتہ

اشک باری ہم کناری کی ہوس میں رات تھی
قلزمِ گریہ کو اس کا دھیان ساحل ہو گیا

فیض احمد فیض

ہماری خامشی بس دل سے لب تک ایک وقفہ ہے
یہ طوفاں ہے جو پل بھر بر لبِ ساحل ٹھہر جائے

یگانہ چنگیزی

ابھرنے کے نہیں بحر فنا میں ڈوبنے والے
درِ مقصود ہی غم ہے تو پھر کیا کام ساحل سے
مے خانے کو دیکھے کوئی ان آنکھوں سے غافل
اک نور کا دریا ہے کہ ساحل نہیں رکھتا
کوثر بھی کھنچ آئے تو یہ نیت نہیں بھرتی
دریائے ہوس وہ ہے کہ ساحل نہیں رکھتا

باقی صدیقی

موج آتی ے لٹ جاتی ہے
کون سی بات نہیں ساحل میں
لاؤ طوفاں میں ڈال دیں کشتی
کون کھائے فریب ساحل کے
باقیؔ وہ بادباں کھلے وہ کشتیاں چلیں
وہ ایک موج جانب ساحل گئی ہے پھر

جگر مراد آبادی

کیسا قطرہ کیسا دریا کس کا طوفاں کس کی موج
تو جو چاہے تو ڈبو دے خشکی ساحل مجھے
یہ نرم و ناتواں موجیں خودی کا راز کیا جانیں
قدم لیتے ہیں طوفاں عظمت ساحل سمجھتے ہیں

قمر جلالوی

روکتا تھا نا خدا کشتی کہ طوفاں آ گیا
تم جہاں پر ہو بس اتنی دور تھے ساحل سے ہم
ڈب جانے کی خبر لائی تھیں موجیں تم نہ تھے
یہ گوآ ہی بھی دلا دیں گے لبِ ساحل سے ہم
کیسی دریا کی شکایت کیسا طوفاں گلہ
اپنی کشتی آپ لے کر آئے تھے ساحل سے ہم
ہم کو دریا برد کرنے والے وہ دن یاد کر
تجھ کو طوفاں میں بچانے آئے تھے ساحل سے ہم
ہی نہ کہیے غم ہوا کشتی کا یوں فرمائیے
اک تماشہ تھا جسے دیکھا کیے ساحل سے ہم
موجِ طوفاں سے بچا لانے پہ اتنا خوش نہ ہو
اور اگر اے ناخدا ٹکرا گئے ساحل سے ہم
ہم اس مشکل سے بچنا ناخدا مشکل سمجھتے ہیں
ادھر طوفان ہوتا ہے جدھر ساحل سمجھتے ہیں
خشکی و تری پر قادر ہے آسان مری مشکل کر دے
ساحل کی طرف کشتی نہ سہی کشتی کی طرف ساحل کر دے
لحد والے امیدِ فاتحہ اور تجھ کو قاتل سے
کہیں ڈوبی ہوئی کشتی ملا کرتی ہے ساحل سے
صدا سن کر نہ طوفاں میں کسی نے دستگیری کی
کھڑے دیکھا کیے سب ڈوبنے والے کو ساحل سے
چھوٹ سکتے ہیں نہیں طوفاں کی شکل سے ہم
جاؤ بس اب مل چکے کشتی سے تم ساحل سے ہم
سکوں بہر محبت میں ہمیں حاصل تو کیا ہو گا
کوئی طوفاں ہو گا ناخدا ساحل تو کیا ہو گا
غرورِ نا خدائی سامنے آ جائے گا اک دن
یہ کشتی یک بہ یک ٹکرا کے جب ساحل سے ٹوٹے گی
دیکھا خدا پہ چھوڑ کہ کشتی کو نا خدا
جیسے خود آ گیا کوئی ساحل لیے ہوئے

عرفان صدیقی

تیز دھاروں نے حدیں توڑ کے رکھ دیں ساری
اب یہ عالم کہ جو دریا ہے ، وہی ساحل ہے