مرزا غالب

گر نگاہِ گرم فرماتی رہی تعلیمِ ضبط
شعلہ خس میں، جیسے خوں رگ میں، نہاں ہو جائے گا
لوگوں کو ہے خورشید جہاں تاب کا دھوکا
ہر روز دکھاتا ہوں میں اک داغ نہاں اور
یہ کہہ سکتے ہو ’’ہم دل میں نہیں ہیں‘‘ پر یہ بتلاؤ
کہ جب دل میں تمہیں تم ہو تو آنکھوں سے نہاں کیوں ہو

امام بخش ناسخ

دل میں پوشیدہ تپ عشقِ بتاں رکھتے ہیں
آگ ہم سنگ کی مانند نہاں رکھتے ہیں

حیدر علی آتش

دہن اس روئے کتابی میں ہے پر نا پیدا
اسمِ اعظم وہی قرآں میں نہاں ہے کہ جو تھا
سنا جو ذکر الٰہی تو اس صنم نے کہا
عیاں کو جانتے ہیں ہم نہاں نہیں معلوم

داغ دہلوی

تحمل کر سکے کیا حسن نازک ان نگاہوں کا
اسے میں نے چھپایا ہے وگرنہ وہ نہاں کیوں ہو
کھلتے نہیں ہیں راز جو سوزِ نہاں کے ہیں
کیا پھوٹنے کے واسطے چھالے زباں کے ہیں

مصحفی غلام ہمدانی

یعنی کہ برنگِ نکہتِ گل
پردے میں ہیں اور نہاں نہیں ہم
میں دیکھا تمہیں خوب پردے میں اب
ذرا اور ہو کر نہاں بیٹھیے

مصطفٰی خان شیفتہ

کہوں میں کیا کہ کیا دردِ نہاں ہے
تمہارے پوچھنے ہی سے عیاں ہے
ہم آج تک چھپاتے ہیں یاروں سے رازِ عشق
حالاں کہ دشمنوں سے یہ قصہ نہاں نہیں
جو بات میکدے میں ہے اک اک زبان پر
افسوس مدرسے میں ہے بالکل نہاں ہنوز

میر مہدی مجروح

میرے دل میں تو ہر زماں ہو تم
چشم ظاہر سے کیوں نہاں ہو تم

مرزا رفیع سودا

دل پر خوں کو مرے غنچۂ تصویر کی طرح
لب وا شد نہ کبھی رازِ نہاں پر آیا

باقی صدیقی

کیا جرات بے باک ہے یہ دل، یہ محبت
قطرے میں سمندر کو نہاں دیکھ رہے ہیں

جگر مراد آبادی

راز جو سینۂ فطرت میں نہاں ہوتا ہے
سب سے پہلے دل شاعر پہ عیاں ہوتا ہے

خواجہ میر درد

نہ ملا ہمیں کوئی نکتہ داں یہ بپت سنا دیں بھلا کہاں
نہ ہوا سبھوں پہ وہی عیاں جو کسو سے یاں تو نہاں نہیں

عبدالحمید عدم

نظر کی حد تک محیط تھا سلسلہ مہکتے ہوئے گلوں کا
گلوں میں پریوں کے گھر نہاں تھے حضور کو کچھ تو یاد ہو گا

شکیب جلالی

آئینۂ جذباتِ نہاں ہیں تری آنکھیں
اک کارگہ شیشہ گراں ہیں تری آنکھیں

عرفان صدیقی

تم جو عرفانؔ یہ سب دردِ نہاں لکھتے ہو
کون ہے جس کے لیے نامۂ جاں لکھتے ہو
پوچھنے والو، مرا رازِ نہاں کیسے کھلے
انگلیاں ہونٹوں پہ رکھی ہیں زباں کیسے کھلے

مصطفی زیدی

کسی اور غم میں اتنی خلش نہاں نہیں ہے
غمِ دل مرے رفیقو غم رائگاں نہیں ہے

الطاف حسین حالی

کوئی دن بوالہوس بھی شاد ہو لیں
دھرا کیا ہے اشارات نہاں میں
حالیؔ کے بعد کوئی نہ ہمدرد پھر ملا
کچھ راز تھے کہ دل میں ہمارے نہاں رہے

اختر شیرانی

سما کر دل میں نظروں سے نہاں ہے
مجھے یاد آنے والے تو کہاں ہے

اسرار الحق مجاز

آہ بے اثر کس کی نالہ نارسا کس کا
کام بارہا آیا جذبۂ نہاں اپنا

تلوک چند محروم

نہیں ہے شکوۂ خوبان آتشیں رخسار
ازل سے وقف ہے دل سوزش نہاں کے لیے
دل اگر شائستۂ دردِ نہاں پیدا کریں
ہر غمِ جاں کاہ سے آرام جاں پیدا کریں

حفیظ ہوشیارپوری

کس کا دل ہے کہ سنے قصۂ فرقت میرا
کون ہے جو مرے اندوہ نہاں تک پہنچے

خاطر غزنوی

نہ دل میں اب وہ خلش ہے نہ زندگی میں تڑپ
یہ کہہ دو پھر مرے دردِ نہاں سے لوٹ آئے

سیماب اکبر آبادی

چھپاتا ہوں مگر چھپتا نہیں دردِ نہاں پھر بھی
نگاہِ یاس ہو جاتی ہے دل کی ترجماں پھر بھی

شکیل بدایونی

نہ وہ مرے دل سے با خبر تھے نہ ان کو احساس آرزو تھا
مگر نظام وفا تھا قائم کشود رازِ نہاں سے پہلے
شرح الم دراز ہے القصہ اے شکیلؔ
اک داغ اپنے دل میں نہاں دیکھتا ہوں میں
وہ تو یہ کہیے محبت نے ہی آنکھیں کھول دیں
زندگی کو ورنہ اک رازِ نہاں سمجھا تھا میں

فانی بدایونی

عالم جز اعتبار نہاں و عیاں نہ تھا
یعنی کہ تو عیاں نہ ہوا اور نہاں نہ تھا

فراق گورکھپوری

عشق افسردہ نہیں آج بھی افسردہ بہت
وہی کم کم اثر سوزِ نہاں ہے کہ جو تھا
عشق افسردہ نہیں آج بھی افسردہ بہت
وہی کم کم اثر سوزِ نہاں ہے کہ جو تھا
جو مرحلۂ قربت و دوری سے گزر جائے
سنتے ہیں کہ وہ جذب نہاں اور ہی کچھ ہے

قابل اجمیری

حیرتوں کے سلسلے سوزِ نہاں تک آ گئے
ہم نظر تک چاہتے تھے تم تو جاں تک آ گئے

کلیم عاجز

میرے اشعار میں ہے حسن معانی کی تلاش
لوگ اب تک نہ مرے دردِ نہاں تک پہنچے
زخمِ دل کے نہیں آثار بظاہر لیکن
چارہ گر سے گلۂ دردِ نہاں آج بھی ہے

ناصر کاظمی

ہم نے ایجاد کیا تیشۂ عشق
شعلہ پتھر میں نہاں تھا پہلے
قصے ہیں خموشی میں نہاں اور طرح کے
ہوتے ہیں غمِ دل کے بیاں اور طرح کے