مرزا غالب

عشق میں بیدادِ رشکِ غیر نے مارا مجھے
کشتۂِ دشمن ہوں آخر، گرچہ تھا بیمارِ دوست
مند گئیں کھولتے ہی کھولتے آنکھیں ہے ہے !
خوب وقت آئے تم اس عاشقِ بیمار کے پاس

امام بخش ناسخ

باغ عالم میں کہاں ہے کوئی مجھ سا رحم دل
روز کرتا ہوں عیادت نرگسِ بیمار کی
آنکھیں خوش چشموں کی تجھ پر ہوئیں اے یار سفید
جس طرح ضعف سے ہو چہرۂِ ِ بیمار سفید
گردش ہے تری نرگسِ بیمار کو دن رات
دیکھی نہیں ایسی کسی بیمار کی رفتار
ہم جور چشمِ یار سے دم مارتے نہیں
یعنی روا ہے کب دلِ بیمار توڑیے

حیدر علی آتش

اے صنم تیری کرنجی آنکھ سے ثابت ہوا
رنگ اڑ جاتا ہے روئے مردم بیمار کا
سرمہ لگایا کیجیے آنکھوں میں مہرباں
اکسیر یہ سفوف ہے بیمار کے لیے
لذت کو ترک کر تو ہو دنیا کا رنج دور
پرہیز بھی دوا ہے جو بیمار نے کیا
اک جنبشِ مژگاں سے غش آتا تھا ہمیں کو
دو نرگسِ بیمار کے بیمار ہمیں تھے

داغ دہلوی

تیری آنکھیں تو بہت اچھی ہیں
سب انہیں کہتے ہیں بیمار یہ کیا
دیکھیں ہزار رشک مسیحا کی صورتیں
اچھا رہا جو عشق کا بیمار ہی رہا

مصحفی غلام ہمدانی

ناتوانی نے کیا اس کو تو نقش قالیں
کیا تری چشم کا بیمار ہنسے اور روئے
اپنی شفا کو اپنے خدا پر تو چھوڑ دے
آخر تو موت ہے دلِ بیمار ہو سو ہو

مصطفٰی خان شیفتہ

دردِ دل سے جو کہا نیند نہ آئی؟ تو کہا
مجھ کو کب نرگسِ بیمار نے سونے نہ دیا

مومن خان مومن

لے تو ہی بھیج دے کوئی پیغام تلخ اب
تجویز زہر ہے ترے بیمار کے لیے
عاشق سے مت بیاں کر قتل عدو کا مژدہ
پیغام مرگ ہے یہ بیمار تک نہ پہنچا

مرزا رفیع سودا

غنچے سے مسکرا کے اسے زار کر چلے
نرگس کو آنکھ مار کے بیمار کر چلے

جون ایلیا

اب رشتۂ مریض و مسیحا ہوا ہے خوار
سب پیشہ ور سمجھتے ہیں بیمار کو ترے
آج کچھ ناساز ہے طبع خرد
نرگسِ بیمار کی باتیں کریں

عبدالحمید عدم

کیا مستقل علاج کیا دل کے درد کا
وہ مسکرا دیے مجھے بیمار دیکھ کر

قمر جلالوی

رخ پہ گیسو ڈال کر کہنا بتِ عیار کا
وقت دونوں مل گئے منہ کھول دو بیمار کا
جاں کنی کا وقت ہے پھرتی نہ دیکھو پتلیاں
تم ذرا ہٹ جاؤ دم نکلے گا اب بیمار کا
بات رہ جائے گی دیکھ آؤ گھڑی بھر کے لیے
لوگ کہتے ہی کے حال اچھا نہیں بیمار کا
شمع گل، ڈوبے ہوئے تارے ، اندھیرا، بے کسی
دیکھ کر چاروں طرف منا ترے بیمار کا
دیکھ بھی آ بات کہنے کے لیے ہو جائے گی
صرف گنتی کی ہیں سانسیں اب ترے بیمار میں

عرفان صدیقی

یہ درد ہی مرا چارہ ہے تم کو کیا معلوم
ہٹاؤ ہاتھ میں بیمار رہنا چاہتا ہوں
ہر طرف کشتوں کا انبار ہے خاکم بدہن
یہ عجب نرگسِ بیمار ہے خاکم بدہن
اے مالکِ کل، سید سجاد کا صدقہ
یہ بندِ گراں کھول کہ بیمار ہیں ہم بھی
سو ہم نذرِ فراموشی یہ سب اشعار کردیں گے
وہ ہم سے کہہ رہا ہے کیا مجھے بیمار کردیں گے

الطاف حسین حالی

دل مہجور سے سن لذت وصل
نشاط عافیت بیمار سے پوچھ

بیخود بدایونی

نہ دوا سے اسے مطلب نہ شفا سے سروکار
ایسے آرام میں بیمار ہے کس کا تیرا

علی سردار جعفری

روح کو روگ محبت کا لگا دیتی ہیں
صحت دل جو عطا کرتی ہیں بیمار آنکھیں

احمد راہی

مدتوں لب پہ رہی نرگس بیمار کی بات
کیجیے اہل چمن اب خلش خار کی بات

تلوک چند محروم

محرومؔ لا جواب ہے یہ مصرعۂ امیرؔ
عیسیٰ ہیں سینکڑوں کوئی بیمار بھی تو ہو

جلیل مانک پوری

چھوڑ بھی گلشن کو اے نرگس کہیں
یہ ہوا بیمار کے قابل نہیں

جوش ملیح آبادی

دل کچھ پنپ چلا تھا تغافل کی رسم سے
پھر تیرے التفات نے بیمار کر دیا
صبح بالیں پہ یہ کہتا ہوا غم خوار آیا
اٹھ کہ فریاد رس عاشق بیمار آیا
شکر ایزد کہ وہ سرخیل مسیحا نفساں
زلف بر دوش پئے پرسش بیمار آیا

سلام مچھلی شہری

آج تو شمع ہواؤں سے یہ کہتی ہے سلامؔ
رات بھاری ہے میں بیمار کو کیسے چھوڑوں

عزیز حامد مدنی

جانے بھی دو تغیر عالم کی داستاں
کس حال میں ہے نرگسِ بیمار کچھ کہو

فانی بدایونی

کہتے ہو کہ ہم وعدۂ پرسش نہیں کرتے
یہ سن کے تو بیمار ہوا بھی نہیں جاتا

احمد فراز

تری آنکھوں کو جاناں کیا ہوا ہے
کبھی دیکھے نہ تھے بیمار قاتل
آسان نہ کر دی ہو کہیں موت نے مشکل
روتے ہوئے بیمار بڑی دیر سے چپ ہیں
سنا ہے ایسا مسیحا کہیں سے آیا ہے
کہ اس کو شہر کے بیمار چل کے دیکھتے ہیں
بس ایک ترا نام چھپانے کی غرض سے
کس کس کو پکارا دلِ بیمار نے میرے
وہ کون ستمگر تھے کہ یاد آنے لگے ہیں
تو کیسا مسیحا ہے کہ بیمار کرے ہے

شاذ تمکنت

ان نگاہوں میں ترسنے کی سی کیفیت ہے
طاقت پرسش بیمار کہاں سے لاؤں

فراق گورکھپوری

تو نے بھی تو دیکھی تھی وہ جاتی ہوئی دنیا
کیا آخری لمحوں میں بیمار نظر آیا

قتیل شفائی

گر جاؤ گے تم اپنے مسیحا کی نظر سے
مر کر بھی علاج دلِ بیمار نہ مانگو
یہ حاکم بھی دوست ہے میرا یہ ناصح بھی میرا ہمدم
کتنے ہی غم خوار پڑے ہیں ایک ترے بیمار کے پیچھے

محبوب خزاں

جوانی مہربانی حسن بھی اچھی مصیبت ہے
اسے اچھا اسے بیمار بھی کرتے نہیں بنتا

محسن احسان

جن کو ساری زندگی زعم مسیحائی رہا
ان کو آخر ایک دن بیمار ہونا تھا ہوئے

ناصر کاظمی

بیٹھے بیٹھے جانے کیوں بیتاب ہو جاتا ہے دل
پوچھتے کیا ہو میاں اچھا بھی ہوں بیمار بھی