میر انیس

مقام یوں ہوا اس کارگاہ دنیا میں
کہ جیسے دن کو مسافر سرا میں آ کے چلے

یگانہ چنگیزی

ہنسی میں وعدۂ فردا کو ٹالنے والو
لو دیکھ لو وہی کل آج بن کے آ نہ گیا
پکارتا رہا کس کس کو ڈوبنے والا
خدا تھے اتنے مگر کوئی آڑے آ نہ گیا

باقی صدیقی

رنگِ محفل سے ہمیں کیا مطلب
جانے کیا سوچ کے آ بیٹھے ہیں
دل و نگاہ کا پردہ کبھی اٹھا تو سہی
تو اپنی ذات کے مدفن سے باہر آ تو سہی
ہمر ہو گوش بر آواز رہو
کیا خبر کوئی خبر آ جائے
اس طرح چونک چونک اٹھا ہوں خیال میں
جیسے ابھی ابھی کوئی آ کر چلا گیا
اپنا قصہ سنا رہا ہوں
سامنے تیرے آ رہا ہوں
وضعداری کیا حقیقت راس آ سکتی نہیں
غم وہ شعلہ ہے جسے دنیا بجھا سکتی نہیں

جون ایلیا

یقیں کا راستہ طے کرنے والے
بہت تیزی سے واپس آ رہے ہیں
وہ پاگل مست ہے اپنی وفا میں
مری آنکھوں میں آنسو آ رہے ہیں
تو مرے دل میں آن کے بس جا
اور تو میرے پاس آ بھی نہیں
شام ہوئے خوش باش یہاں کے میرے پاس آ جاتے ہیں
میرے بجھنے کا نظارہ کرنے آ جاتے ہوں گے
ہے فصیلیں اٹھا رہا مجھ میں
جانے یہ کون آ رہا مجھ میں
تم سے بھی اب تو جا چکا ہوں میں
دور ہا دور آ چکا ہوں میں

جگر مراد آبادی

محبت میں یہ کیا مقام آ رہے ہیں
کہ منزل پہ ہیں اور چلے جا رہے ہیں
یہ کہہ کہہ کے ہم دل کو بہلا رہے ہیں
وہ اب چل چکے ہیں وہ اب آ رہے ہیں
وہ از خود ہی نادم ہوئے جا رہے ہیں
خدا جانے کیا کیا خیال آ رہے ہیں
مزاجِ گرامی کی ہو خیر یارب
کئی دن سے اکثر وہ یاد آ رہے ہیں
یادش بخیر جب وہ تصور میں آ گیا
شعر و شباب و حسن کا دریا بہا گیا
جب عشق اپنے مرکز اصلی پہ آ گیا
خود بن گیا حسین دو عالم پہ چھا گیا
نظر ملا کے مرے پاس آ کے لوٹ لیا
نظر ہٹی تھی کہ پھر مسکرا کے لوٹ لیا
یہ دن بہار کے اب کے بھی راس آ نہ سکے
کہ غنچے کھل تو سکے کھل کے مسکرا نہ سکے
نہ جانے آہ کہ ان آنسوؤں پہ کیا گزری
جو دل سے آنکھ تک آئے مژہ تک آ نہ سکے

خواجہ میر درد

کھل نہیں سکتی ہیں اب آنکھیں مری
جی میں یہ کس کا تصور آ گیا
وحدت میں تیری حرف دوئی کا نہ آ سکے
آئینہ کیا مجال تجھے منہ دکھا سکے

سراج الدین ظفر

ذوقِ نمو کو منزل دوست میں آ کے بھول جا
اس طرح بے نیاز ہو سر کو جھکا کے بھول جا

عبدالحمید عدم

ساقی ذرا نگاہ ملا کر تو دیکھنا
کمبخت ہوش میں تو نہیں آ گیا ہوں میں
شاید مجھے نکال کے پچھتا رہے ہوں آپ
محفل میں اس خیال سے پھر آ گیا ہوں میں
کیا اب حساب بھی تو مرا لے گا حشر میں
کیا یہ عتاب کم ہے یہاں آ گیا ہوں میں
نکلا تھا مے کدے سے کہ اب گھر چلوں عدمؔ
گھبرا کے سوئے مے کدہ پھر آ گیا ہوں میں
وہ سورج اتنا نزدیک آ رہا ہے
مری ہستی کا سایہ جا رہا ہے
خدا کا آسرا تم دے گئے تھے
خدا ہی آج تک کام آ رہا ہے
جوانی آئنہ لے کر کھڑی ہے
بہاروں کو پسینہ آ رہا ہے
غم فردا کا استقبال کرنے
خیال عہدِ ماضی آ رہا ہے
خدا محفوظ رکھے کشتیوں کو
بڑی شدت کا طوفاں آ رہا ہے
یہ کیسی سرگوشی ازل سازِ دل کے پردے ہلا رہی ہے
مری سماعت کھنک رہی ہے کہ تیری آواز آ رہی ہے
فسانہ خواں دیکھنا شب زندگی کا انجام تو نہیں ہے
کہ شمع کے ساتھ رفتہ رفتہ مجھے بھی کچھ نیند آ رہی ہے
اگر کوئی خاص چیز ہوتی تو خیر دامن بھگو بھی لیتے
شراب سے تو بہت پرانے مذاق کی باس آ رہی ہے
چلے تو خندہ مزاجی سے جا رہے تھے ہم
کسی حسین نے رستے میں آ کے مار دیا
رہِ حیات میں کچھ ایسے پیچ و خم تو نہ تھے
کسی حسین نے رستے میں آ کے مار دیا
امشب گریز و رم کا نہیں ہے کوئی محل
آغوش میں در آ کہ طبیعت اداس ہے

قمر جلالوی

سرِ شام تجھ سے ملنے ترے در پہ آ گئے ہیں
یہ وہیں ہیں لوگ شاید جو فریب کھا گئے ہیں
میں اگر قفس سے چھوٹا تو چلے گی باغباں سے
جہاں میرا آشیاں تھا وہاں پھول آ گئے ہیں
کوئی ان سے جا کہ کہہ دے سرِ بام پھر تجلی
جنہیں کر چکے ہو بے خود انہیں ہوش آ گئے ہیں

احسان دانش

کچھ اس طرح سے تصور میں آ رہا ہے کوئی
چراغ روح میں جیسے جلا رہا ہے کوئی
بدل رہے ہیں جنون و خرد کے پیمانے
کس اہتمام تغیر سے آ رہا ہے کوئی
خبر کرو یہ حقائق کے پاسبانوں کو
مجاز کھو کے حقیقت میں آ رہا ہے کوئی
مجھے ستم میں اضافے کا غم نہیں لیکن
یقین کر کہ مرے بعد آ رہا ہے کوئی
یہ صبح و شام کی یورش یہ موسموں کی روش
کہ جیسے میرے تعاقب میں آ رہا ہے کوئی

اختر شیرانی

مری شامِ غم کو وہ بہلا رہے ہیں
لکھا ہے یہ خط میں کہ ہم آ رہے ہیں
ٹھہر جا ذرا اور اے دردِ فرقت
ہمارے تصور میں وہ آ رہے ہیں
جھوم کر بدلی اٹھی اور چھا گئی
ساری دنیا پر جوانی آ گئی
سازِ دل کو گدگدایا عشق نے
موت کو لے کر جوانی آ گئی

اسرار الحق مجاز

رودادِ غمِ الفت ان سے ہم کیا کہتے کیوں کر کہتے
اک حرف نہ نکلا ہونٹوں سے اور آنکھ میں آنسو آ بھی گئے
یہ رنگ بہار عالم ہے کیوں فکر ہے تجھ کو اے ساقی
محفل تو تری سونی نہ ہوئی کچھ اٹھ بھی گئے کچھ آ بھی گئے
دھواں سا اک سمت اٹھ رہا ہے شرارے اڑ اڑ کے آ رہے ہیں
یہ کس کی آہیں یہ کس کے نالے تمام عالم پہ چھا رہے ہیں
صراحیاں نو بہ نو ہیں اب بھی جماہیاں نو بہ نو ہیں اب بھی
مگر وہ پہلو تہی کی سوگند اب بھی نزدیک آ رہے ہیں

اکبر معصوم

آج کل تو کسی سدا کی طرح
اپنے اندر سے آ رہا ہوں میں

بیان میرٹھی

یہ میں کہوں گا فلک پہ جا کر زمیں سے آیا ہوں تنگ آ کر
جو اے مسیحا تو ہے مسیحا تو کچھ مرے درد کی دوا کر
گوہر نابسودہ کو زلف میں مت دکھا کہ یوں
میری کمند شوق میں رات کے وقت آ کہ یوں

زہرا نگاہ

بیٹھے بیٹھے کیسا دل گھبرا جاتا ہے
جانے والوں کا جانا یاد آ جاتا ہے

ضیا جالندھری

پریشاں ہو گئے تعبیر سے خواب
کہ جیسے کچھ بدل کر آ گئی ہو
شمعِ حق شعبدۂ حرف دکھا کر لے جائے
کہیں تجھ کو ہی نہ تجھ سے کوئی آ کر لے جائے

ظہیر کاشمیری

شبِ غم یاد ان کی آ رہی ہے
چراغِ دل کی لو تھرا رہی ہے
کہاں نقشِ کفِ پا ڈھونڈتے ہو
صدائے پا تو دل سے آ رہی ہے
ہوئی مدت کہ دل آتش زدہ تھا
فغاں سے آج تک آنچ آ رہی ہے
سکوتِ شام کی پہنائیوں سے
صدا اس اجنبی کی آ رہی ہے
آہ یہ مہکی ہوئی شامیں یہ لوگوں کے ہجوم
دل کو کچھ بیتی ہوئی تنہائیاں یاد آ گئیں

عبید اللہ علیم

محبتوں نے کسی کی بھلا رکھا تھا اسے
ملے وہ زخم کہ پھر یاد آ گیا اک شخص

جلیل مانک پوری

مزے بیتابیوں کے آ رہے ہیں
وہ ہم کو ہم انہیں سمجھا رہے ہیں
مجھے تو انتظار چارہ گر ہے
الٰہی غش پہ غش کیوں آ رہے ہیں
کبھی ہم نے پیا تھا بادۂ عشق
جلیلؔ اس کے مزے اب آ رہے ہیں

ثروت حسین

اسے بھی یاد رکھنا بادبانی ساعتوں میں
وہ سیارہ کنار صبح فردا آ ملے گا

جوش ملیح آبادی

خلاف مصلحت میں بھی سمجھتا ہوں مگر ناصح
وہ آتے ہیں تو چہرے پر تغیر آ ہی جاتا ہے
شکایت کیوں اسے کہتے ہو یہ فطرت ہے انساں کی
مصیبت میں خیال عیش رفتہ آ ہی جاتا ہے
سمجھتی ہیں مآل گل مگر کیا زور فطرت ہے
سحر ہوتے ہی کلیوں کو تبسم آ ہی جاتا ہے

حسرت موہانی

ہم سے یاں رنج ہجر اٹھ نہ سکا
واں وہ مجبور تھے وہ آ نہ سکے

حفیظ جالندھری

ہم ہی میں تھی نہ کوئی بات یاد نہ تم کو آ سکے
تم نے ہمیں بھلا دیا ہم نہ تمہیں بھلا سکے
عجز سے اور بڑھ گئی برہمی مزاج دوست
اب وہ کرے علاج دوست جس کی سمجھ میں آ سکے
زندگی کا لطف بھی آ جائے گا
زندگانی ہے تو دیکھا جائے گا
دوستوں کی بے وفائی پر حفیظؔ
صبر کرنا بھی مجھے آ جائے گا
مری بزم وفا سے جانے والو
ٹھہر جاؤ کہ میں بھی آ رہا ہوں
ہوئی جاتی ہے کیوں بیتاب منزل
مسلسل چل رہا ہوں آ رہا ہوں
خاموش ہو کیوں دردِ محبت کے گواہو
دعوے کو نباہو مرے نالو مری آہو
اتریں گے کس کے حلق سے یہ دل خراش گھونٹ
کس کو پیام دوں کہ مرے ساتھ آ کے پی

سیف الدین سیف

لطف فرما سکو تو آ جاؤ
آج بھی آ سکو تو آ جاؤ
فرصت نامہ و پیام کہاں
اب تم ہی آ سکو تو آ جاؤ
وہ رہی سیفؔ منزلِ ہستی
دو قدم آ سکو تو آ جاؤ

سیماب اکبر آبادی

بقیدِ وقت یہ مژدہ سنا رہا ہے کوئی
کہ انقلاب کے پردے میں آ رہا ہے کوئی
ہے اپنے سائے سے وحشت میں کس قدر تسکیں
سمجھ رہا ہوں مرے ساتھ آ رہا ہے کوئی

شاد عظیم آبادی

مزا ہے بادہ کشی کا وہیں تو اے ساقی
پیوں جو اب تو ترے آستاں پہ آ کے پیوں
ہماری آنکھوں میں اشکوں کا آ کے رہ جانا
جھکا کے سر کو ترا مسکرا کے رہ جانا
نہیں یہ حسن نہیں بخت کی ہے کوتاہی
سوالِ وصل کا ہونٹوں تک آ کے رہ جانا

شکیل بدایونی

ہوئی ہم سے یہ نادانی تری محفل میں آ بیٹھے
زمیں کی خاک ہو کر آسمان سے دل لگا بیٹھے
جو دل پہ گزرتی ہے وہ سمجھا نہیں سکتے
ہم دیکھنے والوں کو نظر آ نہیں سکتے
مانا کہ ترے لطف و کرم خواب ہیں لیکن
ہر شخص کو یہ خواب نظر آ نہیں سکتے
عشق سے گھبرا رہی ہے ان کی یاد
رکتے رکتے آ رہی ہے ان کی یاد
میں تو خودداری کا قائل ہوں مگر
کیا کروں پھر آ رہی ہے ان کی یاد
دل لذت نگاہِ کرم پا کے رہ گیا
کتنا حسین خواب نظر آ کے رہ گیا

فانی بدایونی

ہر سانس کے ساتھ جا رہا ہوں
میں تیرے قریب آ رہا ہوں
تیری تجلیوں سے کسی طرح کم نہیں
دل کی تجلیوں کو کبھی دل میں آ کے دیکھ

اختر ہوشیارپوری

یک بیک موسم کی تبدیلی قیامت ڈھا گئی
رک کے سستانا تھا جب مجھ کو کڑی دھوپ آ گئی
وہ ہوائیں ہیں اڑے جاتے ہیں پیراہن یہاں
اے عروس زیست تو کیوں گھر سے باہر آ گئی

احمد فراز

جیسے تجدید تعلق کی بھی رت ہو کوئی
زخم بھرتے ہیں تو احباب بھی آ جاتے ہیں
ترس رہا ہوں مگر تو نظر نہ آ مجھ کو
کہ خود جدا ہے تو مجھ سے نہ کر جدا مجھ کو
جہاں کے شور سے گھبرا گئے کیا
مسافر گھر کو واپس آ گئے کیا؟
نہ تھی اتنی کڑی تازہ مسافت
پرانے ہم سفر یاد آ گئے کیا؟
نہیں آیا مرا جانِ بہاراں
درختوں پر شگوفے آ گئے کیا
اے تو کہ تیرے در پہ ہیں رندوں کے جمگھٹے
اک روز اس فقیر کے گھر آ شراب پی

فراق گورکھپوری

اگر ممکن ہو لے لے اپنی آہٹ
خبر دو حسن کو میں آ رہا ہوں
حد‌‌ جور‌ و کرم سے بڑھ چلا حسن
نگاہِ یار کو یاد آ رہا ہوں
شام بھی تھی دھواں دھواں حسن بھی تھا اداس اداس
دل کو کئی کہانیاں یاد سی آ کے رہ گئیں

قتیل شفائی

نگاہیں ساتھ دیتی ہیں تو سنتے ہیں وہ افسانے
جو پلکوں سے جھلکتے ہیں زباں پر آ نہیں سکتے

کیفی اعظمی

لگ گیا اک مشین میں میں بھی
شہر میں لے کے آ گیا کوئی
میرا بچپن بھی ساتھ لے آیا
گاؤں سے جب بھی آ گیا کوئی

محسن نقوی

اس شخص کے تم سے بھی مراسم ہیں تو ہوں گے
وہ جھوٹ نہ بولے گا مرے سامنے آ کر

ناصر کاظمی

خموشی انگلیاں چٹخا رہی ہے
تری آواز اب تک آ رہی ہے
کڑے کوسوں کے سناٹے ہیں لیکن
تری آواز اب تک آ رہی ہے
طناب خیمہِ گل تھام ناصرؔ
کوئی آندھی افق سے آ رہی ہے
کبھی کبھی تو جذبِ عشق مات کھا کے رہ گیا
کہ تجھ سے مل کے بھی ترا خیال آ کے رہ گیا
یہ کیا مقامِ شوق ہے نہ آس ہے نہ یاس ہے
یہ کیا ہوا کہ لب پہ تیرا نام آ کے رہ گیا
کوئی بھی ہم سفر نہ تھا شریکِ منزلِ جنوں
بہت ہوا تو رفتگاں کا دھیان آ کے رہ گیا
وہی اداس روز و شب، وہی فسوں، وہی ہوا
ترے وصال کا زمانہ یاد آ کے رہ گیا
دل میں بیتاب ہیں کیا کیا منظر
کبھی اس شہر میں آ کر دیکھو
موت اور زیست کے اسرار و رموز
آ مری بزم میں آ غور سے سن
وہ کوئی دوست تھا اچھے دنوں کا
جو پچھلی رات سے یاد آ رہا ہے
جدائیوں کے زخم دردِ زندگی نے بھر دیے
تجھے بھی نیند آ گئی مجھے بھی صبر آ گیا
گئے دنوں کی لاش پر پڑے رہو گے کب تلک
الم کشو اٹھو کہ آفتاب سر پہ آ گیا
چلے تھے اور کسی راستے کی دھن میں مگر
ہم اتفاق سے تیری گلی میں آ نکلے
نصیحتیں ہمیں کرتے ہیں ترکِ الفت کی
یہ خیرخواہ ہمارے کدھر سے آ نکلے