مرزا غالب

بس کہ ہوں غالب، اسیری میں بھی آتش زیرِ پا
موئے آتش دیدہ ہے حلقہ مری زنجیر کا
قید میں ہے ترے وحشی کو وہی زلف کی یاد
ہاں! کچھ اک رنجِ گرانباریِ زنجیر بھی تھا
مانع دشت نوردی کوئی تدبیر نہیں
ایک چکر ہے مرے پاؤں میں زنجیر نہیں

امام بخش ناسخ

اے جنوں پاؤں ہیں جب تک یہ تمنا ہے مجھے
کبھی مانند رگوں کے نہ ہو زنجیر جدا
مجھ گرفتار جدائی کے جو پاؤں میں پڑی
ہو جنوں حلقے سے ہر حلقۂِ زنجیر جدا
سب ہمارے لیے زنجیر لیے پھرتے ہیں
ہم سر زلفِ گرہ گیر لیے پھرتے ہیں

بہادر شاہ ظفر

کھینچتا تھا پاؤں میرا پہلے ہی زنجیر سے
اے جنوں تو نے مری زنجیر پھر کھینچی تو کیا
غل سدا وادی وحشت میں رکھوں گا برپا
اے جنوں دیکھ مرے پاؤں کی زنجیر نہ توڑ

شیخ ابراہیم ذوق

اسیرِ زلف دیوانے ہیں دیکھ اے پاسباں شب کو
دبا کر بیٹھ ان کے پاؤں کی زنجیر پہلو سے

مصحفی غلام ہمدانی

اٹھ کے تا کوچۂِ لیلیٰ سے نہ جاوے یہ کہیں
پانو میں قیس کے زنجیر کیے جاتا ہوں
وحشت ہے میرے دل کو تو تدبیر وصل کر
پانو میں اس غزال کے زنجیر وصل کر
اے عشق تیری اب کے وہ تاثیر کیا ہوئی
شور جنوں کدھر گیا زنجیر کیا ہوئی
پانو میں قیس کے زنجیر بھلی لگتی ہے
یوں ہی دیوانے کی تصویر بھلی لگتی ہے

مصطفٰی خان شیفتہ

پابندیِ وحشت میں زنجیر کے مشتاق
دیوانے ہیں اس زلفِ گرہ گیر کے مشتاق

مرزا رفیع سودا

سودائی دل کو زلفِ گرہ گیر شرط ہے
دیوانے کے علاج میں زنجیر شرط ہے

یگانہ چنگیزی

آوازے مجھ پہ کستے ہیں پھر بندگان عشق
پڑ جائے پھر نہ پاؤں میں زنجیر دیکھنا
ٹھوکریں کھلوائیں کیا کیا پائے بے زنجیر نے
گردشِ تقدیر نے جولانی تدبیر نے
سلسلہ چھڑ گیا پھر دل کی گرفتاری کا
پھر نسیم آج ہلانے لگی زنجیر بہار
سیرِ چمن سے دل نہ لگاؤ چلے چلو
فصلِ بہار پاؤں کی زنجیر ہو نہ جائے

باقی صدیقی

سفرِ شوق کا حاصل معلوم
راستہ پاؤں کی زنجیر ہوا
کس نے کھینچی حیات کی تصویر
ہاتھ میں جام پاؤں میں زنجیر

قمر جلالوی

ایک جا رہنا نہیں لکھا میری تقدیر میں
آج گر صحرا میں ہوں کل خانۂ زنجیر میں
پاسِ آدابِ اسیری تیرے دیوانے کو ہے
ورنہ یہ زنجیر کچھ زنجیر ہے زنجیر میں
چلا میں توڑ کر جب باب زنداں غل مچا ڈالے
متی باتوں پہ کیا کیا پاؤں کی زنجیر بگڑی ہے
کیا ہے ہر کڑی کو میں نے ٹیڑھا جوشِ وحشت میں
مرے ہاتھوں ہی میرے پاؤں کی زنجیر بگڑی ہے

عرفان صدیقی

دروازوں پر دن بھر کی تھکن تحریر ہوئی
مرے شہر کی شب ہر چوکھٹ کی زنجیر ہوئی
اس کے حلقے میں تگ و تاز کی وسعت ہے بہت
آہوئے شہر، مری بانہوں کی زنجیر میں آ
جاؤ اب دشت ہی تعزیر تمہارے لیے ہے
پھر نہ کہنا کوئی زنجیر تمہارے لیے ہے

مجید امجد

رت بدلتے ہی چمن جو ہم صفیر اب کے بھی کوسوں دور سے
آ کے جب اس شاخ پر چہکے ، مرے دل میں بجی زنجیرِ دل
اک شوق بے اماں کے یہ نخچیر کون ہیں
اے موجۂ ہوا، تہہِ زنجیر کون ہیں

عبید اللہ علیم

گھر آؤں یا باہر جاؤں ہر ایک فضا میں میرے لیے
اک جھوٹی سچی چاہت ہو رسموں کی کوئی زنجیر نہ ہو
چہرہ ہوا میں اور مری تصویر ہوئے سب
میں لفظ ہوا مجھ میں ہی زنجیر ہوئے سب

غلام محمد قاصر

یہ دیوانہ پن تو رہے گا دشت کے ساتھ سفر میں
سائے میں سو جائیں گے زنجیر بنانے والے
خواب کہاں سے ٹوٹا ہے تعبیر سے پوچھتے ہیں
قیدی سب کچھ بھول گیا زنجیر سے پوچھتے ہیں

ماجد صدیقی

حشر کیا ہو گا بھلا جینے کی اس تدبیر کا
سوچ پر بھی ہے گماں جب حلقۂ زنجیر کا

سیماب اکبر آبادی

شکستہ ہر کڑی ہے ہر کڑی میں دل کے ٹکڑے ہیں
بڑی عبرت سے دیوانے مری زنجیر دیکھیں گے

شان الحق حقی

پہلوئے ساز سے اک موجِ ہوا گزری تھی
یہ چھنکتی ہوئی زنجیر کہاں سے آئی

شکیل بدایونی

عشق کی قید میں اب تک تو امیدوں پہ جیے
مٹ گئی آس تو زنجیر پہ رونا آیا
قید سے چھوٹ کے بھی کیا پایا
آج بھی پاؤں میں زنجیر تو ہے

فانی بدایونی

جبر کو کیونکر نہ سمجھوں اختیار
تم نے باندھا ہے مجھے زنجیر سے
مر کے ٹوٹا ہے کہیں سلسلۂ قیدِ حیات
مگر اتنا ہے کہ زنجیر بدل جاتی ہے

اختر ہوشیارپوری

رخصت رقص بھی ہے پاؤں میں زنجیر بھی ہے
سر منظر مگر اک بولتی تصویر بھی ہے

احمد فراز

جس کو بھی چاہا اسے شدت سے چاہا ہے فرازؔ
سلسلہ ٹوٹا نہیں ہے درد کی زنجیر کا
وطن سے دور بھی آزادیاں نصیب کسے
قدم کہیں بھی ہوں زنجیر گھر کی دیکھتے ہیں

قتیل شفائی

جب سے اسیرِ زلفِ گرہ گیر ہو گیا
میں بے نیاز حلقۂ زنجیر ہو گیا
جاتا کہاں بھلا تری محفل کو چھوڑ کر
میں اپنے آپ پاؤں کی زنجیر ہو گیا
آج پھر وصل کے اڑتے ہوئے لمحے سن لیں
وقت کے پاؤں میں زنجیر ہماری ہو گی

مجروح سلطان پوری

دیکھ زنداں سے پرے رنگِ چمن جوشِ بہار
رقص کرنا ہے تو پھر پاؤں کی زنجیر نہ دیکھ

محسن احسان

دیکھا اسے دلگیر تو دلگیر ہوا میں
کس درد کا رشتہ تھا کہ زنجیر ہوا میں
ہمارے دل سے اٹھی حوصلہ شکن آواز
مگر یہ پاؤں کی زنجیر تک نہیں پہنچی