مرزا غالب

صبا لگا وہ طمانچہ طرف سے بلبل کے
کہ روئے غنچہ سوئے آشیاں پھر جائے
ہاں وہ نہیں خدا پرست، جاؤ وہ بے وفا سہی
جس کو ہوں دین و دل عزیز اس کی گلی میں جائے کیوں؟
عرضِ ناز شوخی دنداں برائے خندہ ہے
دعوی جمعیتِ احباب جائے خندہ ہے

مصحفی غلام ہمدانی

ہر قدم پر ہے لاش کشتے کی
اب کہاں اس گلی میں جائے قدم
پیشتر منزل فنا سے نہیں
وادی ما و من میں جائے قدم
اے مصحفیؔ ز گوشۂ خلوت بروں خرام
خالی ست از برائے تو خود جائے شاعری
دکان مے فروش پہ گر آئے محتسب
دن عید کے تو خوب گھڑا جائے محتسب

مصطفٰی خان شیفتہ

پروانے کیا خجل ہوئے دیکھا جو صبح کو
تھا شب کو اس کی بزم میں خورشید جائے شمع

میر مہدی مجروح

کیا ہے اس خوش خرام کی آمد
فتنے جو جائے جائے بیٹھے ہیں

فیض احمد فیض

رات یوں دل میں تری کھوئی ہوئی یاد آئی
جیسے ویرانے میں چپکے سے بہار آ جائے
جیسے صحراؤں میں ہولے سے چلے باد نسیم
جیسے بیمار کو بے وجہ قرار آ جائے

مرزا رفیع سودا

آرام پھر کہاں ہے جو ہو دل میں جائے حرص
آسودہ زیر خاک نہیں آشنائے حرص

باقی صدیقی

روز دل پر اک نیا زخم آئے ہے
روز کچھ بار سفر بڑھ جائے ہے
وسعت دل تنگی جاں بن گئی
زخم اک تازیست پھیلا جائے ہے
زخموں کو وہ چھیڑتے ہیں باقیؔ
لب پر کوئی بات آ نہ جائے
دامن خواب کہاں تک پھیلے
ریگ کی موج کہاں تک جائے
کوئی کس طرح ان کو سمجھائے
بات چھیڑو تو بات کھل جائے
ان کی بات پہ جائے کون
جھوٹی آس لگائے کون

جگر مراد آبادی

ضد پر عشق اگر آ جائے
پانی چھڑکے آگ لگائے
کار زمانہ جتنا جتنا
بنتا جائے بگڑتا جائے

قمر جلالوی

اے ناخدا، خدا پہ مجھے چھوڑ کر تو دیکھ
ساحل پہ کون جا کے لگے ڈوب جائے کون
رسوا کرے گی دیکھ کے دنیا مجھے قمر
اس چاندنی میں ان کو بلانے کو جائے کون
دیکھو محشر میں کس کی بات رکھی جائے ہے
تجھ سے میں شرماؤں یا تو مجھ سے شرمائے ہے
ہجر سے تنگ آنے والے ایسا کیوں گھبرائے ہے
موت سے پہلے کیا تجھے موت آئی جائے ہے
غیر کے کہنے پہ مت آ، ٹک مری حالت تو دیکھ
کیا تری محفل سے اٹھوں دل تو بیٹھا جائے ہے
اور بھرنی ہیں تصور میں ابھی رنگینیاں
دردِ دل تھم جا کہ اب تصویر بگڑی جائے ہے
کن خیالوں سے یہ کاٹے ہے قمر فرقت کی رات
روتا بھی جائے ہے اور تارے بھی گنتا جائے ہے

شکیب جلالی

آندھیوں میں بھی فروزاں ہے چراغِ امید
خاک ڈالے سے یہ شعلہ کہیں بجھ جائے گا
توڑ کر حلقہِ شب‘ ڈال کے تاروں پہ کمند
آدمی عرصہِ آفاق پہ چھا جائے گا

عرفان صدیقی

پھر ایک جھونکا وہاں سے لگا کے لائے مجھے
پھر اک کرن اسی کوچے میں لے کے جائے مجھے
میرے انکار پرستش نے بچایا ہے مجھے
سر جھکا دوں تو ہر انسان خدا ہو جائے

الطاف حسین حالی

ذوق سب جاتے رہے جز ذوقِ درد
اک یہ لپکا دیکھئے کب جائے گا

احسان دانش

جب بھی خلوت میں وہ یاد آئے گا
وقت کا سیل ٹھہر جائے گا
چاند تم دیکھ رہے ہو جس کو
یہ بھی آنسو سا ڈھلک جائے گا
کلی کلی میں ہے دھرتی کے دودھ کی خوشبو
تمام پھول اسی ایک ماں کے جائے ہیں

بشیر بدر

اگر تلاش کروں کوئی مل ہی جائے گا
مگر تمہاری طرح کون مجھ کو چاہے گا
آہن میں ڈھلتی جائے گی اکیسویں صدی
پھر بھی غزل سنائے گی اکیسویں صدی
کمپیوٹروں سے غزلیں لکھیں گے بشیرؔ بدر
غالبؔ کو بھول جائے گی اکیسویں صدی

زہرا نگاہ

کہہ دو کوئی صبا سے ادھر آج کل نہ آئے
کلیاں کہیں مہک نہ اٹھیں پھول کھل نہ جائے
آنکھوں کو نہیں راس کسی یاد کا آنسو
تھم تھم کے ڈھلک جائے ہے کیا جانیے کیا ہو
اس بحر میں ہم جیسوں پہ ہر موجۂ‌ پر خوں
آ آ کے گزر جائے ہے کیا جانیے کیا ہو

علی سردار جعفری

تیرا درد سلامت ہے تو مرنے کی امید نہیں
لاکھ دکھی ہو یہ دنیا رہنے کی جگہ بن جائے ہے
دل کی آگ جوانی کے رخساروں کو دہکائے ہے
بہے پسینہ مکھڑے پر یا سورج پگھلا جائے ہے
من اک ننھا سا بالک ہے ہمک ہمک رہ جائے ہے
دور سے مکھ کا چاند دکھا کر کون اسے للچائے ہے

احمد راہی

دل کے سنسان جزیروں کی خبر لائے گا
درد پہلو سے جدا ہو کے کہاں جائے گا
زندگی چل کہ ذرا موت کے دم خم دیکھیں
ورنہ یہ جذبہ لحد تک ہمیں لے جائے گا

ماجد صدیقی

ظلمت سے نظر چرانے والو
شب، خونِ جگر نہ چاٹ جائے

حفیظ جالندھری

عذابِ قبر سے بد تر سہی حیات حفیظؔ
یہ جبر ہے تو بجز صبر کیا کیا جائے
دل سے ترا خیال نہ جائے تو کیا کروں
میں کیا کروں کوئی نہ بتائے تو کیا کروں

رسا چغتائی

میں نے سوچا تھا اس اجنبی شہر میں زندگی چلتے پھرتے گزر جائے گی
یہ مگر کیا خبر تھی تعاقب میں ہے ایک نادیدہ زنجیر ہمسائیگی
لاکھ پھولوں پہ پہرے بٹھاتے رہیں لاکھ اونچی فصیلیں اٹھاتے رہیں
جائے گی سوئے گلزار جب بھی صبا اپنی آواز زنجیرِ پا جائے گی

خاطر غزنوی

نہ اب طلسم بہاراں نہ اب فسون جمال
وہ لمحے خواب ہوئے خواب بھول جائے صبا

سیف الدین سیف

پھیل رہے ہیں وقت کے سائے
دیکھیں رات کہاں تک جائے

شاد عظیم آبادی

سب طرح کی سختیاں سہہ جائے گا
کیوں دلا تو بھی کبھی کام آئے گا
ایک دن ایسا بھی ناصح آئے گا
غم کو میں اور غم مجھے کھا جائے گا
چوٹ کھائے دل کا ماتم دار ہے
میرا نالہ بھی تڑپتا جائے گا
باغ میں کیا جائیں آتی ہے خزاں
گل کا اترا منہ نہ دیکھا جائے گا
تھک کے آخر بیٹھ جائے گا غبار
کارواں منہ دیکھ کر رہ جائے گا
ہے خزاں گل گشت کو جاؤ نہ شادؔ
گریۂ شبنم نہ دیکھا جائے گا
کچھ نہ کہنا شادؔ سے حال خزاں
اس خبر کو سنتے ہی مر جائے گا
تیری زلفیں غیر اگر سلجھائے گا
آنکھ والوں سے نہ دیکھا جائے گا

شکیل بدایونی

تیرے حضور تجھ سے خفا ہو کے جائے کون
زخم دلِ تباہ پہ نشتر لگائے کون
ذوقِ عمل نہ ذوق جنوں ہر طرف سکوں
جنت اگر یہی ہے تو جنت میں جائے کون

فانی بدایونی

اللہ بچائے غمِ فرقت وہ بلا ہے
منکر کی نگاہوں پہ بھی چھا جائے قیامت

اختر ہوشیارپوری

میں اپنے آپ سے نکلا تو سامنے وہ تھا
اور اب یہ سوچ رہا ہوں کہیں کو جائے وہ

قتیل شفائی

لوگو میرے ساتھ چلو تم جو کچھ ہے وہ آگے ہے
پیچھے مڑ کر دیکھنے والا پتھر کا ہو جائے گا
میرے بعد وفا کا دھوکا اور کسی سے مت کرنا
گالی دے گی دنیا تجھ کو سر میرا جھک جائے گا
مرحلہ رات کا جب آئے گا
جسم سائے کو ترس جائے گا
نہ رہے جب وہ بھلے دن بھی قتیلؔ
یہ زمانہ بھی گزر جائے گا
مل رہی ہے جب ہمیں اک راحت آوارگی
لوٹ کر اس انجمن سے اپنے گھر جائے گا کون

کلیم عاجز

میں روؤں ہوں رونا مجھے بھائے ہے
کسی کا بھلا اس میں کیا جائے ہے
دل آئے ہے پھر دل میں درد آئے ہے
یوں ہی بات میں بات بڑھ جائے ہے
کوئی دیر سے ہاتھ پھیلائے ہے
وہ نامہرباں آئے ہے جائے ہے
محبت میں دل جائے گر جائے ہے
جو کھوئے نہیں ہے وہ کیا پائے ہے
جنوں سب اشارے میں کہہ جائے ہے
مگر عقل کو کب سمجھ آئے ہے
پکاروں ہوں لیکن نہ باز آئے ہے
یہ دنیا کہاں ڈوبنے جائے ہے
خموشی میں ہر بات بن جائے ہے
جو بولے ہے دیوانہ کہلائے ہے
جنوں ختم دار و رسن پر نہیں
یہ رستہ بہت دور تک جائے ہے

کیفی اعظمی

جنگل کی ہوائیں آ رہی ہیں
کاغذ کا یہ شہر اڑ نہ جائے

ناصر کاظمی

اڑتی ہوئی زلف یوں پریشاں
جیسے کوئی راہ بھول جائے
تارے گنوائے یا سحر دکھلائے
دیکھیے شامِ غم کہاں لے جائے
وہ اشکِ خوں ہی سہی دل کا کوئی رنگ تو ہو
اب آ گئی ہے تو خالی نہ جائے شامِ فراق

نوح ناروی

قاصد آنے جانے میں تھک تھک کر گھبرائے گا
جائے گا پھر آئے گا آئے گا پھر جائے گا
دل میں امیدیں لاکھوں تھیں کچھ نکلیں ہیں کچھ باقی ہیں
خیر کبھی پھر آؤ گے پھر کبھی دیکھا جائے گا
دل کے خود آزار و الم دل کی قدر بڑھائیں گے
ہو گا یہ اکسیر مگر خاک میں جب مل جائے گا
شکوۂ غم کی محشر میں ہم کو تو امید نہیں
سامنے وہ آ جائیں گے ہوش کسے رہ جائے گا