مرزا غالب

کل کے لیے کر آج نہ خست شراب میں
یہ سوء ظن ہے ساقی کوثر کے باب میں
مجھ تک کب ان کی بزم میں آتا تھا دورِ جام
ساقی نے کچھ ملا نہ دیا ہو شراب میں
پلا دے اوک سے ساقی ، جو ہم سے نفرت ہے
پیالہ گر نہیں دیتا ، نہ دے شراب تو دے
مینائے مے ہے سروِ نشاطِ بہار سے
بال تدر و جلوۂِ موجِ شراب ہے

امام بخش ناسخ

ہماری کیف سزاوار احتساب نہیں
خیال چشم ہے کچھ ساغرِ شراب نہیں
آج ذرے کو آفتاب ملا
کہ مجھے ساغرِ شراب ملا
ہو گیا دل جو آبلہ ساقی
سمجھے ہم شیشۂِ شراب ملا

انشاء اللہ خان انشا

ٹک اک اے نسیم سنبھال لے کہ بہار مستِ شراب ہے
وہ جو حسن عالم نشہ ہے اسے اب کی عین شباب ہے
مجھے کیوں نہ آوے ساقی نظر آفتاب الٹا
کہ پڑا ہے آج خم میں قدح شراب الٹا
ابھی جھڑ لگا دے بارش کوئی مست بڑھ کے نعرہ
جو زمین پہ پھینک مارے قدح شراب الٹا
گرچہ معجون کھا چکے لیکن
دور جامِ شراب باقی ہے

بہادر شاہ ظفر

پیوں نہ رشک سے خوں کیوں کہ دم بہ دم اپنا
کہ ساتھ غیر کے وہ آج ہم شراب ہوا
اپنی چشمِ مست کی گردش نہ اے ساقی دکھا
دیکھ چکر میں ابھی جامِ شراب آ جائے گا

حیدر علی آتش

ہے جب سے دستِ یار میں ساغرِ شراب کا
کوڑے کا ہو گیا ہے کٹورا گلاب کا
ان انکھڑیوں میں اگر نشۂِ شراب آیا
سلام جھک کے کروں گا جو پھر حجاب آیا

داغ دہلوی

پیوں گا آج ساقی سیر ہو کر
میسر پھر شراب آئے نہ آئے

شیخ ابراہیم ذوق

کہاں تلک کہوں ساقی کہ لا شراب تو دے
نہ دے شراب ڈبو کر کوئی کباب تو دے

مصحفی غلام ہمدانی

مرے حال پر مغاں نے یہ کرم کیا کہ ہنس ہنس
مرے ننگے سر پہ رکھا قدح شراب الٹا
کل مے کدے میں بغیر ساقی
اوندھا قدح شراب دیکھا
کسی مست کی لگی ہے مگر اس کے سر کو ٹھوکر
جو پڑا ہے میکدے میں یہ خم شراب الٹا
آبِ رواں و سبزہ و روئے نگار ہے
ساقی شتاب ایسے میں لے کر شراب آ

مصطفٰی خان شیفتہ

لڑتی نہ جائے آنکھ جو ساقی سے شیفتہؔ
ہم کو تو خاک لطف نہ آئے شراب میں

مومن خان مومن

جلتا ہوں ہجر شاہد و یاد شراب میں
شوق ثواب نے مجھے ڈالا عذاب میں

میر مہدی مجروح

ابر کی تیرگی میں ہم کو تو
سوجھتا کچھ نہیں سوائے شراب

فیض احمد فیض

آئے کچھ ابر، کچھ شراب آئے
اس کے بعد آئے جو عذاب آئے

میر انیس

مزیل عقل ہے دنیا کی دولت اے منعم
اسی کے نشے کو صوفی شراب سمجھے ہیں

باقی صدیقی

اک نہ اک چیز کی کمی ہی رہی
کبھی ساغر کبھی شراب نہیں
سینکڑوں گردشوں کے بعد کہیں
ایک جامِ شراب ملتا ہے

جون ایلیا

خون کے گھونٹ پی رہا ہوں میں
یہ مرا خون ہے شراب نہیں

جگر مراد آبادی

مست جامِ شراب ہونا تھا
بے خود اضطراب ہونا تھا
مست جامِ شراب خاک ہوتے
غرق جامِ شراب ہونا تھا
مے خانہ ہے اسی کا یہ دنیا اسی کی ہے
جس تشنہ لب کے ہاتھ میں جامِ شراب ہے
اے محتسب نہ پھینک مرے محتسب نہ پھینک
ظالم شراب ہے ارے ظالم شراب ہے
گرچہ اہل شراب ہیں ہم لوگ
یہ نہ سمجھو خراب ہیں ہم لوگ
مستیاں ہر طرف ہیں آوارہ
کون غارت گر شراب ہوا
تو نے جس اشک پر نظر ڈالی
جوش کھا کر وہی شراب ہوا
حسن کافر شباب کا عالم
سر سے پا تک شراب کا عالم
سب کو مارا جگرؔ کے شعروں نے
اور جگرؔ کو شراب نے مارا
برستا ہے کیف شباب محبت
ہر آنسو ہے جامِ شراب محبت
عجب جوش پر ہے شباب محبت
محبت ہے مستِ شراب محبت

سراج الدین ظفر

ہے بوئے گل کہیں کہیں رنگِ شراب ہے
ہر چیز میں شریک کسی کا شباب ہے

عبدالحمید عدم

ان کو عہدِ شباب میں دیکھا
چاندنی کو شراب میں دیکھا
جام لا کر قریب آنکھوں کے
آپ نے کچھ شراب میں دیکھا
ایک دن اے عدمؔ نہ پی تو کیا
روز شغل شراب کرتے ہو

شکیب جلالی

اک یاد ہے کہ چھین رہی ہے لبوں سے جام
اک عکس ہے کہ کانپ رہا ہے شراب میں