مرزا غالب

تم جانو، تم کو غیر سے جو رسم و راہ ہو
مجھ کو بھی پوچھتے رہو تو کیا گناہ ہو

امام بخش ناسخ

آمد خط میں تو ہونے دے نگاہوں کا گزر
دیکھ لے بچنے نہیں پاتا ہے سبزہ راہ کا

انشاء اللہ خان انشا

تفضلات نہیں لطف کی نگاہ نہیں
معاملہ ابھی مطلق وہ رو بہ راہ نہیں
غلام ہم تو ہیں ایسے مزاج والوں کے
کسی کے ساتھ کسی ڈھب کی جن کو راہ نہیں
غلط ہے آہ کہ ہے دل کو دل سے راہ نہیں
کہ تیری چاہ مجھے تجھ کو میری چاہ نہیں

حیدر علی آتش

بس کہ پھرتا ہے خیال آنکھوں میں اس دل خواہ کا
رنگ رو کے اڑنے میں عالم ہے گردِ راہ کا
راہِ ہستی میں ہے رخسارِ صنم سے زندگی
تازہ دم کرتا مسافر کو ہے تکیہ راہ کا
عشق بت میں کوہ پر جا جا کے سر پٹکا کیے
پاؤں کو صدمے رہے پست و بلند راہ کے
منزلِ مقصود میں چل کر نکالوں گا انہیں
آبلوں میں یہ جو ہیں پیوست کانٹے راہ کے
کج رکھ نہ پا کو جا دل سے غافل
پھیر اس نے کھایا جو راہ بھولا
ہے تمہارا خیال پیشِ نظر
جس طرف جائیں سد راہ ہو تم

داغ دہلوی

بھلا ہو پیرِ مغاں کا ادھر نگاہ ملے
فقیر ہیں کوئی چلو خدا کی راہ ملے
وہ روزِ حشر ہے دنیا نہیں کہ راہ ملے
کہاں چھپوگے جو دو چار داد خواہ ملے
مری خرابی میں آ کر وہ چوکڑی بھولے
کہ پھر نہ خانہ خرابی کو گھر کی راہ ملے
ہوا ہے دردِ جگر سے یہ گھر مرا تاریک
کہ موت ڈھونڈتی پھرتی ہے کوئی راہ ملے
ٹھہر نہ آہ مری جان لے کے چلتے ہو
سفر کرے جو مسافر کو زاد راہ ملے
لگا کے پاؤں میں اس کے اڑاؤں قاصد کو
اگر مجھے ترے توسن کی گردِ راہ ملے

مصحفی غلام ہمدانی

رستے مسدود ہو گئے ہیں
اب دیکھیے کیوں کہ راہ نکلے
ہے ہر ایک بات میں اب کجی کہ چلن نکالے ہیں اور ہی
نہ وہ ربط ہے نہ وہ دوستی نہ وہ رسم ہے نہ وہ راہ ہے
کیا جانے کوئی کہ گھر میں بیٹھے
اس شوخ سے راہ ہم نے کر لی
ہر چند امردوں میں ہے اک راہ کا مزا
غیر از نسا ولے نہ ملا چاہ کا مزا
یوں چلتے ہیں لوگ راہ ظالم
کوئی چال ہے یہ بھی آہ ظالم

مومن خان مومن

دل میں اس شوخ کے جو راہ نہ کی
ہم نے بھی جان دی پر آہ نہ کی

میر مہدی مجروح

جانا ز بس ضرور تھا اس جلوہ گاہ میں
ہم دیر و کعبہ چھوڑ گئے دونوں راہ میں

فیض احمد فیض

شیخ صاحب سے رسم و راہ نہ کی
شکر ہے زندگی تباہ نہ کی

مرزا رفیع سودا

نہیں بے وجہ کوچے سے ترے اٹھنا بگولے کا
ہماری خاک بھی جاتی ہے تیری راہ کے صدقے
دنیا سے گزرنا ہی عجب کچھ ہے کہ جس میں
کوئی نہ کبھو روک سکے راہ کسو کی

باقی صدیقی

جب جھجک کر تری نگاہ ملی
حادثات جہاں کو راہ ملی

جون ایلیا

شام ہوئی ہے یار آئے ہیں یاروں کے ہم راہ چلیں
آج وہاں قوالی ہو گی جونؔ چلو درگاہ چلیں
اپنی گلیاں اپنے رمنے اپنے جنگل اپنی ہوا
چلتے چلتے وجد میں آئیں راہوں میں بے راہ چلیں

جگر مراد آبادی

کیا کشش حسنِ بے پناہ میں ہے
جو قدم ہے اسی کی راہ میں ہے
عشق میں کیسی منزلِ مقصود
وہ بھی اک گرد ہے جو راہ میں ہے
دل میں کسی کے راہ کیے جا رہا ہوں میں
کتنا حسیں گناہ کیے جا رہا ہوں میں
آگے قدم بڑھائیں جنہیں سوجھتا نہیں
روشن چراغِ راہ کیے جا رہا ہوں میں

عرفان صدیقی

پھر وہم دلِ یار کم آگاہ میں آیا
لو، ایک نیا سنگِ گراں راہ میں آیا

ادا جعفری

خلش تیر بے پناہ گئی
لیجیے ان سے رسم و راہ گئی
دل میں عزم حرم سہی لیکن
ان کے کوچہ کو گر یہ راہ گئی

ضیا جالندھری

دائمی دوریوں کا صدمہ ضیاؔ
سرسری رسم و راہ سے دیکھا
چھیڑی بھی جو رسم و راہ کی بات
وہ سن نہ سکے نگاہ کی بات

جلیل مانک پوری

کس شان سے چلا ہے مرا شہسوار حسن
فتنے پکارتے ہیں ذرا ہٹ کے راہ سے
دلچسپ ہو گئی ترے چلنے سے رہ گزر
اٹھ اٹھ کے گردِ راہ لپٹتی ہے راہ سے

حفیظ جالندھری

چھیڑو نہ میٹھی نیند میں اے منکر و نکیر
سونے دو بھائی میں تھکا ماندہ ہوں راہ کا
دیکھا کیے ہماری طرف بزمِ غیر میں
تجدیدِ رسم و راہ نہ کی ہم بھی چپ رہے

شاد عظیم آبادی

تنہا مزا اٹھاتا ہے دل رسم و راہ کا
بینا تو ہے پہ بس نہیں چلتا نگاہ کا
دیکھا نہ کارواں نے پلٹ کر کہ کون ہوں
میری طرح نہ ہو کوئی واماندہ راہ کا
منزل کے قطع کرنے کا محکم ہوا جو قصد
اک اک درخت خضر بنا میری راہ کا
اک تجھ پہ منحصر نہیں اے خضر کر نہ ناز
ہر راہرو کو تکتا ہے واماندہ راہ کا

شکیل بدایونی

میں وہ اک رہرو محبت ہوں
جس کی منزل بھی راہ میں گزری
زندگی اپنی اے شکیلؔ اب تک
تلخی رسم و راہ میں گزری
عرضِ غم کیوں نہ ان سے کر دیکھوں
اب بھی تھوڑی سی رسم و راہ تو ہے
زندگی اک سیاہ رات سہی
عاشقی اک چراغِ راہ تو ہے

عزیز حامد مدنی

صورت گردِ کارواں ہے غم منزل جہاں
خواب جنون تازہ کار چاہیے راہ کے لیے

ناصر کاظمی

بے منت خضرِ راہ رہنا
منظور ہمیں تباہ رہنا
یاروں کو نصیب سرفرازی
مجھ کو تری گردِ راہ رہنا