مرزا غالب

دل سے تری نگاہ جگر تک اتر گئی
دونوں کو اک ادا میں رضامند کر گئی

حیدر علی آتش

منزل فقر و فنا جائے ادب ہے غافل
بادشہ تخت سے یاں اپنے اتر لیتا ہے

شیخ ابراہیم ذوق

سامنے چشمِ گہر بار کے کہہ دو دریا
چڑھ کے گر آئے تو نظروں سے اتر جائیں گے
رخِ روشن سے نقاب اپنے الٹ دیکھو تم
مہر و ماہ نظروں سے یاروں کی اتر جائیں گے

مصحفی غلام ہمدانی

چڑھے کوٹھے پر تو تھے مصحفیؔ پہ نہ داؤ پر وہ مرے چڑھے
میں چڑھاؤں جب تلک آستیں اٹھے اور اتر کے چلے گئے
عزت یہ پیادگی کی کم ہے کہ گھوڑے والے
گھوڑے سے دیکھتے ہی مجھ کو اتر پڑے ہیں

فیض احمد فیض

کس قدر ہو گا یہاں مہر و وفا کا ماتم
ہم تری یاد سے جس روز اتر جائیں گے
خاکِ رہ جاناں پر کچھ خوں تھا گرو اپنا
اس فصل میں ممکن ہے یہ قرض اتر جائے

باقی صدیقی

ساحل کا مرحلہ ہے باقیؔ
طوفاں سے تو پار اتر گئے ہم
ہم ذرے ہیں خاک رہگزر کے
دیکھو ہمیں بام سے اتر کے
پھول بکرھے ہیں خاک پر ساقی
بام افلاک سے اتر ساقی
قافلے شور مچاتے ہوئے گزرے لیکن
اپنی دیوار سے آئے نہ اتر کے ساتھی
ٹمٹمانے لگے یادوں کے چراغ
شبِ غمِ دل میں اتر آئی ہے

جون ایلیا

حواس میں تو نہ تھے پھر بھی کیا نہ کر آئے
کہ دار پر گئے ہم اور پھر اتر آئے
بتاؤ دام گرو چاہیے تمہیں اب کیا
پرندگان ہوا خاک پر اتر آئے
اک ہنر ہے جو کر گیا ہوں میں
سب کے دل سے اتر گیا ہوں میں
اوپر سے اتر کے تازہ دم تھا
نیچے سے اتر کے تھک گیا ہوں

قمر جلالوی

دیکھا نہ تم نے آنک اٹھا کر بزم میں
آنسو تو میں نے تھا نظر سے اتر گیا

شکیب جلالی

سورج کی کرن تھے جانے کیا تھے
ظلمت میں اتر اتر گئے ہم

عرفان صدیقی

سرخ رو ہونے کو اک سیلاب خوں درکار ہے
جب بھی یہ دریا چڑھے گا پار اترجائیں گے لوگ
نشاں نہ تھا کوئی ڈوبی ہوئی زمینوں کا
سو ہم جہاز پہ اڑتے رہے اتر نہیں آئے

الطاف حسین حالی

بری اور بھلی سب گزر جائے گی
یہ کشتی یوں ہی پار اتر جائے گی
رہیں گے نہ ملاح یہ دن سدا
کوئی دن میں گنگا اتر جائے گی

رئیس فروغؔ

جب تری یاد کا طوفان گزر جائے گا
دل کسی اور سمندر میں اتر جائے گا
دوپہر میں وہ کڑی دھوپ پڑے گی کہ فروغؔ
جس کے چہرے پہ جو غازہ ہے اتر جائے گا

احسان دانش

روحوں میں نئی سحر کے باعث
ذہنوں کے نشے اتر رہے ہیں

ادا جعفری

شکستِ دل تک نہ بات پہنچی مگر اداؔ کہہ سکو تو کہنا
کہ اب کے ساون دھنک سے آنچل کے رنگ سارے اتر گئے ہیں

ظہیر کاشمیری

فراقِ یار کے لمحے گزر ہی جائیں گے
چڑھے ہوئے ہیں جو دریا اتر ہی جائیں گے

عالم تاب تشنہ

تمہارا قرب بھی دوری کا استعارہ ہے
کہ جیسے چاند کا تالاب میں اتر جانا

عبید اللہ علیم

کبھی رحمتیں تھیں نازل اسی خطۂ زمیں پر
وہی خطۂ زمیں ہے کہ عذاب اتر رہے ہیں

غلام محمد قاصر

بوند بھی تشنہ ابابیل پہ نازل نہ ہوئی
ورنہ بادل تو بلندی سے اتر آیا تھا

فارغ بخاری

یہ کیسی رفعتیں آئینۂ نگاہ میں ہیں
کسی ستارے پہ جیسے اتر رہا ہوں میں

ماجد صدیقی

حاصل تجھے ہے تیرے قدر و رخ سے یہ مقام
اور ہم بزور نطق دلوں میں اتر گئے
کیوں نظر میں چبھتا تھا عکس اک گریزاں سا
تھا اگر وہ کانٹا ہی پار تو اتر جاتا
یہ کیسا خنجر سا میرے پہلو میں لحظہ لحظہ اتر رہا ہے
کہ دل بھی چنگیزی غمِ جاں کو جیسے تسلیم کر رہا ہے
یہ ایک لمحہ کہ جان لوں تو اسی میں ایٹم سی قوتیں ہیں
مجھے ہے جینا اگر تو پہنائیوں میں اس کی اتر نہ جاؤں

تلوک چند محروم

تری نظروں سے گر جانا ترے دل سے اتر جانا
یہ وہ افتاد ہے جس سے بہت اچھا ہے مر جانا
تلاطم آرزو میں ہے نہ طوفاں جستجو میں ہے
جوانی کا گزر جانا ہے دریا کا اتر جانا

جلیل مانک پوری

رہ گیا آنکھ میں نزاکت سے
دل میں نقشہ ترا اتر نہ سکا
آگ ایسی لگی تھی سینے میں
آنکھ سے دل میں وہ اتر نہ سکا

حفیظ جالندھری

حباب آ سامنے سب ولولے جوش جوانی کے
غضب تھا قلزم امید کا چڑھ کر اتر جانا
یہاں جز کشتی موجِ بلا کچھ بھی نہ پاؤ گے
اسی کے آسرے دریائے ہستی سے اتر جانا

حفیظ ہوشیارپوری

نظر کہ تشنۂ دیدار تھی رہی محروم
نظر اٹھائی تو دل میں اتر گیا کوئی

خاطر غزنوی

پہلی محبتوں کے زمانے گزر گئے
ساحل پہ ریت چھوڑ کے دریا اتر گئے

شاد عظیم آبادی

اب انتہا کا ترے ذکر میں اثر آیا
کہ منہ سے نام لیا دل میں تو اتر آیا
ہزار شکر کہ اس دل میں تو نظر آیا
یہ نقشہ صفحۂ خالی پہ جلد اتر آیا
اسی کو شعر سمجھتے ہیں شادؔ اہل مذاق
ادھر پڑھا کہ دلوں میں ادھر اتر آیا
حسبِ معمول چڑھایا نہیں ناصح کوئی جام
یہ سبب بھی ہے مرے منہ کے اتر جانے کا
ناامیدی ہمیں پہنچاتی ہے پستی کی طرف
یہی زینہ تو ہے کوٹھے سے اتر جانے کا

شکیل بدایونی

ہم نے پایا ہے محبت کا خمار ابدی
کیسے ہوتے ہیں وہ نشے کہ اتر جاتے ہیں

عزیز حامد مدنی

وہ زبان سرمد بے دلیل وہ خراش خنجر حکمراں
کوئی امتحان دلیل کیا کہ دلوں میں بات اتر گئی

فانی بدایونی

آزاد کچھ ہوئے ہیں اسیران زندگی
یعنی جمالِ یار کا صدقہ اتر گیا
شاید کہ شامِ ہجر کے مارے بھی جی اٹھیں
صبحِ بہار حشر کا چہرہ اتر گیا

اختر ہوشیارپوری

وہ کیسی چھت تھی جو مجھ کو آواز دے رہی تھی
وہ کیا نگر تھا جہاں میں چپ چاپ اتر رہا تھا

احمد فراز

قربت بھی نہیں دل سے اتر بھی نہیں جاتا
وہ شخص کوئی فیصلہ کر بھی نہیں جاتا
آنکھ سے دور نہ ہو دل سے اتر جائے گا
وقت کا کیا ہے ، گزرتا ہے گزر جائے گا
تم سر راہِ وفا دیکھتے رہ جاؤ گے
اور وہ بامِ رفاقت سے اتر جائے گا
ڈوبتے ڈوبتے کشتی کو اچھالا دے دوں
میں نہیں، کوئی تو ساحل پہ اتر جائے گا
وہ وقت آ گیا ہے کہ ساحل کو چھوڑ کر
گہرے سمندروں میں اتر جانا چاہیے
پکارتے رہے محفوظ کشتیوں والے
میں ڈوبتا ہوا دریا کے پار اتر بھی گیا
جسے بھلا نہ سکا اس کو یاد کیا رکھتا
جو نام لب پہ رہا ذہن سے اتر بھی گیا
سنا ہے رات اسے چاند تکتا رہتا ہے
ستارے بام فلک سے اتر کے دیکھتے ہیں
عشق نشہ ہے نہ جادو جو اتر بھی جائے
یہ تو اک سیلِ بلا ہے سو گزر بھی جائے
تلخی کام و دہن کب سے عذابِ جاں ہے
اب تو یہ زہر رگ و پے میں اتر بھی جائے

امیر مینائی

سب کی نظروں پہ نہ چڑھیے اتنا
دیکھیے دل سے اتر جائیے گا

فراق گورکھپوری

فضا کو جیسے کوئی راگ چیرتا جائے
تری نگاہ دلوں میں یوں ہی اتر آئی
ترا ہی عکس سرشکِ غمِ زمانہ میں تھا
نگاہ میں تری تصویر سی اتر آئی

کلیم عاجز

دل کو زخموں کے سواِ کچھ نہ دیا پھولوں نے
اب تو کانٹوں میں اتر جانے کو جی چاہے ہے

کیف بھوپالی

تم سے نہ مل کے خوش ہیں وہ دعویٰ کدھر گیا
دو روز میں گلاب سا چہرہ اتر گیا

کیفی اعظمی

اب جس طرف سے چاہے گزر جائے کارواں
ویرانیاں تو سب مرے دل میں اتر گئیں

محبوب خزاں

کتراتے ہیں بل کھاتے ہیں گھبراتے ہیں کیوں لوگ
سردی ہے تو پانی میں اتر کیوں نہیں جاتے

محسن احسان

فلک نشیں سہی میرا خدا مگر محسنؔ
کبھی کبھی وہ زمیں پر اتر بھی آتا ہے

محسن نقوی

کبھی کبھی مجھے ملنے بلندیوں سے کوئی
شعاع صبح کی صورت اتر بھی آتا ہے

ناصر کاظمی

ذرا سی دیر ٹھہرنے دے اے غمِ دنیا
بلا رہا ہے کوئی بام سے اتر کے مجھے
رین اندھیری ہے اور کنارہ دور
چاند نکلے تو پار اتر جائیں
نیتِ شوق بھر نہ جائے کہیں
تو بھی دل سے اتر نہ جائے کہیں
آؤ کچھ دیر رو ہی لیں ناصر
پھر یہ دریا اتر نہ جائے کہیں
کیا کہوں اب تجھ سے اے جوئے کم آب
میں بھی دریا تھا اتر کر رہ گیا
خوشی کی رت ہو کہ غم کا موسم نظر اسے ڈھونڈتی ہے ہر دم
وہ بوئے گل تھا کہ نغمہِ جاں مرے تو دل میں اتر گیا وہ