مرزا غالب

غیر لیں محفل میں بوسے جام کے
ہم رہیں یوں تشنہ لب پیغام کے

امام بخش ناسخ

اول تو نہ قاصد کو رہے کوئے صنم یاد
پہنچے تو فراموش ہو پیغام ہمارا
اتنی مدت سے ہوں غربت میں وطن بھول گیا
مجھ کو اب نامہ و پیغام سے کچھ کام نہیں

انشاء اللہ خان انشا

بیتابی دل کے سبب اس شوخ تک انشاؔ
پہنچے ہے بلا واسطہ پیغام ہمارا
یاں غش ہیں شوق طوف ہیں یاران کعبہ کو
اے نامہ بر تو کہیو یہ پیغام اور عشق

حیدر علی آتش

خون قاصد تو وہ سفاک سمجھتا ہے حلال
کسی غماز سے بھجوائیں گے پیغام کو ہم

داغ دہلوی

قاصدوں کے منتظر رہنے لگے
پڑ گئے ان کو مزے پیغام کے

مصحفی غلام ہمدانی

اس کے خط میں جو لکھا غیر کا میں نام الٹا
لایا قاصد بھی مجھے واں سے تو پیغام الٹا
کب وعدہ نہیں کرتیں ملنے کا تری آنکھیں
کس روز نگاہوں میں پیغام نہیں ہوتا

مصطفٰی خان شیفتہ

قاصد کو کیا قتل، کبوتر کو کیا ذبح
لے جائے مرا اب کوئی پیغام، نہ ہو گا

مومن خان مومن

میں وہم سے مرتا ہوں وہاں رعب سے اس کے
قاصد کی زباں سے نہیں پیغام نکلتا

فیض احمد فیض

بہت سنبھالا وفا کا پیماں مگر وہ برسی ہے اب کے برکھا
ہر ایک اقرار مٹ گیا ہے تمام پیغام بجھ گئے ہیں

باقی صدیقی

اس طرح باغ سے چپ چاپ گزر آئے ہیں
جیسے پھولوں کی مہک میں کوئی پیغام نہ تھا
دل کے لیے حیات کا پیغام بن گئیں
بے تابیاں سمٹ کے ترا نام بن گئیں

جگر مراد آبادی

دل کو سکون روح کو آرام آ گیا
موت آ گئی کہ دوست کا پیغام آ گیا

سراج الدین ظفر

ٹھہر اے بادِ سحر اس گل نورستہ کے نام
اور بھی شوق کے پیغام ابھی باقی ہیں
ٹھہر اے بادِ سحر اس گل نورستہ کے نام
اور بھی شوق کے پیغام ابھی باقی ہیں

عبدالحمید عدم

اس بار تو آیا تھا ادھر قاصد جاں خود
سرکار کو پہنچا نہیں پیغام ہمارا

قمر جلالوی

نامہ بر ان سے کہنا نزع کا ہنگام ہے
ابتدائے خط نہیں یہ آخری پیغام ہے
چارہ گر میرے سکوں پر یہ نہ کہہ آرام ہے
اضطرابِ دل نہ ہونا موت کا پیغام ہے
نامہ بر ان کی زباں کے تو یہ الفاظ نہیں
راستے میں کہیں پیغام بدل جاتا ہے

شکیب جلالی

خموشی بول اٹھے ‘ ہر نظر پیغام ہو جائے
یہ سناٹا اگر حد سے بڑھے کہرام ہو جائے

عرفان صدیقی

سارے بوسے خاک میں مل گئے آتے آتے
اب کے ہوا کے ہاتھ میں یہ پیغام نہ رکھنا

مجید امجد

دل ہے کہ اک اجنبیِ حیراں، تم ہو کہ پرایا دیس
نظروں کی کہانی بن نہ سکیں ہونٹوں پہ رکے پیغام

الطاف حسین حالی

امیدِ شفا کا تو جواب آ ہی چکا ہے
اب موت کا سننا ہمیں پیغام ہے درپیش

احسان دانش

وہ تو دل میں درد کی دنیا بسا کر چل دیے
مجھ کو ہر تارِ نفس اک موت کا پیغام ہے
نہ آؤ تم تو پھر کیوں ہچکیوں پر ہچکیاں آئیں
انہیں روکو یہ کیوں پیغام پر پیغام آتا ہے

ادا جعفری

حیران ہیں لب بستہ ہیں دلگیر ہیں غنچے
خوشبو کی زبانی ترا پیغام ہی آئے

ظہیر کاشمیری

اب کچھ بھی نہیں حاصل‌ تدبیر محبت
اب کچھ بھی نہیں نامہ و پیغام کے آگے

سیف الدین سیف

مرے جذب وفا سے خامشی بھی
ترا پیغام ہوتی جا رہی ہے

شاد عظیم آبادی

یہی کہہ کر اجل کو قرض خواہوں کی طرح ٹالا
کہ لے کر آج قاصد یار کا پیغام آئے گا

شکیل بدایونی

ہر نفس محسوس ہوتا ہے شکیلؔ
آ رہے ہیں نامہ و پیغام سے
کافی ہے مرے دل کی تسلی کو یہی بات
آپ آ نہ سکے آپ کا پیغام تو آیا

فانی بدایونی

دل سے کسی کی آنکھوں تک کچھ راز کی باتیں پہنچی ہیں
آنکھ سے دل تک آیا ہو ایسا تو کوئی پیغام نہیں
نظریں نہ بچانا تھیں نظر مجھ سے ملا کر
پیغام نہ دینا تھا تو پیغام نہ لیتے

شاذ تمکنت

شاذؔ اب اس کی خموشی کو دعا دینا ہے
جس نے بھیجے تھے مجھے نامہ و پیغام کئی

فراق گورکھپوری

تیری دزدیدہ نگاہی یوں تو نا محسوس تھی
ہاں مگر دفتر کا دفتر حسن کا پیغام تھا

قتیل شفائی

ربطِ باہم پہ ہمیں کیا نہ کہیں گے دشمن
آشنا جب ترے پیغام سے جل جاتے ہیں
ان کی آنکھوں کو دیے تھے جو مری آنکھوں نے
کس سے پوچھوں کہ وہ پیغام کہاں تک پہنچے

کلیم عاجز

اے کاش مری بات سمجھ میں تری آئے
میری جو غزل ہے مرا پیغام ہے پیارے