مرزا غالب

آمد خط سے ہوا ہے سرد جو بازارِ دوست
دودِ شمعِ کشتہ تھا شاید خطِ رخسارِ دوست
غارت گرِ ناموس نہ ہو گر ہوسِ زر
کیوں شاہدِ گلِ باغ سے بازار میں آوے

امام بخش ناسخ

بعد اک عمر کے ناسخؔ کی جو اب آمد ہے
لکھنؤ کے ہوئے سب کوچہ و بازار سفید
زور ہے گرمیِ بازار ترے کوچے میں
جمع ہیں تیرے خریدار ترے کوچے میں

انشاء اللہ خان انشا

کل یوں کہا کہ ٹک تو ٹھہر لے تو بولے آپ
ہیں منتظر مرے سرِ بازار چار پانچ

حیدر علی آتش

خلوت سے انجمن کا کہاں یار کو دماغ
وہ جنس بے بہا نہیں بازار کے لیے
اندھیر ہے جو دم کی نہ اس کے ہو روشنی
یوسف مرا چراغ ہے بازار کے لیے
مال مفلس مجھے سمجھا ہے جنوں نے شاید
وحشتِ دل سرِ بازار لیے پھرتی ہے
بد نام محبت نے تری ہم کو کیا تھا
رسوائے سرِ کوچہ و بازار ہمیں تھے

داغ دہلوی

بنا دیا مری چاہت نے غیرت یوسف
تم اپنی گرمیِ بازار دیکھتے جاؤ

شیخ ابراہیم ذوق

گھر سے باہر نہ نکلتا کبھی اپنے خورشید
ہوس گرمیِ بازار لیے پھرتی ہے

مصحفی غلام ہمدانی

ہم دل کو لیے بر سرِ بازار کھڑے ہیں
حیران تمنائے خریدار کھڑے ہیں
ہے اس کی سواری کی خبر سیرِ چمن کو
اور اہل تماشا سرِ بازار کھڑے ہیں
سودائی بن کے اس پہ مجھے ہاتھ ڈالنا
ہنگامہ اس میں جو سرِ بازار ہو سو ہو
دل چھیننے والے کوئی گھر بیٹھ رہیں ہیں
پوچھیں ہیں یہی رستۂِ بازار کدھر ہے
سودائیان عشق کا جھگڑا چکا کہیں
لے جا کے ان کو برسر بازار مار ڈال
بکتے ہیں شہر میں گلِ بے خار ہر طرف
ہے باغباں کی گرمیِ بازار ہر طرف

مصطفٰیٰ خان شیفتہ

سرفروش آتے ہیں اے یار ترے کوچے میں
گرم ہے موت کا بازار ترے کوچے میں
جنسِ دل کے وہ خریدار ہوئے تھے کس دن
یہ یونہی کوچہ و بازار کی افواہیں ہیں

مرزا رفیع سودا

سوداؔ میں کہتا ہوں کہ یہ پرہیز عشق سے
رسوا ہے کیوں تو کوچہ و بازار الغیاث
سوداؔ کے ہاتھ کیوں کے لگے وہ متاعِ حسن
لے نکلیں جس کو گھر سے تو بازار ساتھ ہے

باقی صدیقی

دل جنس محبت کا خریدار نہیں ہے
پہلی سی وہ اب صورت بازار نہیں ہے
پہلے اک دل پہ نظر تھی باقیؔ
سامنے اب کئی بازار بھی ہیں
دل سے باہر ہیں خریدار ابھی
سامنے ہے بھرا بازار ابھی

جون ایلیا

جن دکانوں نے لگائے تھے نگہ میں بازار
ان دکانوں کا یہ رونا ہے کہ بازار نہیں
یوسف کنعاں کا ہو کچھ تذکرہ
مصر کے بازار کی باتیں کریں

جگر مراد آبادی

یہ فتنے جن سے اک دنیا ہے نالاں
انہیں سے گرمیِ بازار بھی ہے
اب عرضِ محبت کی جگرؔ کیوں نہیں جرأت
وہ سامنے ہیں گرم ہے بازارِ محبت

عبدالحمید عدم

گرتے ہیں لوگ گرمیِ بازار دیکھ کر
سرکار دیکھ کر مری سرکار دیکھ کر
دیکھا کسی کی سمت تو کیا ہو گیا عدمؔ
چلتے ہیں راہ رو سرِ بازار دیکھ کر

شکیب جلالی

ننگ و ناموس کے بکتے ہوئے ان مول رتن
لب و رخسار کے سجتے ہوئے بازار یہاں

عرفان صدیقی

اپنے سوا بھی رنج تماشا کریں‘ تو چل
کچھ دیر سیرِ کوچہ و بازار کرتے ہیں
مری بلا سے جو ہو کاروبارِ شوق تباہ
میں خود کو بیچ کے بازار سے نکل آیا
کچھ حرف و سخن پہلے تو اخبار میں آیا
پھر عشق مرا کوچہ و بازار میں آیا
پتلیاں گرمیِ نظارہ سے جل جاتی ہیں
آنکھ کی خیر میاں‘ رونقِ بازار پہ خاک
قحط میں کب سے دکاں میری پڑی ہے خالی
عشق سے گرمیِ بازار ہے میں کیا جانوں
ادھر بھی آئے گی شاید وہ شاہ بانوئے شہر
یہ سوچ کر سرِ بازار رہنا چاہتا ہوں
یوسفِ شہر، تجھے تیرے قبیلے والے
دام لگ جائیں تو بازار بھی کر سکتے ہیں
نسبت ہے اسی قافلۂ اہلِ وفا سے
واماندہ سرِ کوچہ و بازار ہیں ہم بھی
گر گئی قیمتِ شمشاد قداں آنکھوں میں
شہر کو مصر کا بازار کیا ہے اس نے

مصطفیٰ زیدی

جنس ویرانی صحرا میری دکان میں ہے
کیا خریدے گا ترے شہر کا بازار مجھے

اختر حسین جعفری

تپش گلزار تک پہنچی لہو دیوار تک آیا
چراغ خود کلامی کا دھواں بازار تک آیا

ادا جعفری

لہجے کی کھنک ہو کہ نگاہوں کی صداقت
یوسف کے لیے مصر کے بازار بہت ہیں
دل کے لیے بس آنکھ کا معیار بہت ہے
جو سکۂ جاں ہے سرِ بازار چلے ہے

ظہیر کاشمیری

وہ محفلیں وہ مصر کے بازار کیا ہوئے
اے شہرِ دل ترے در و دیوار کیا ہوئے
محسوس کر رہا ہوں کہ تنہا ہوں ان دنوں
ہر شہر گرچہ مصر کا بازار بن گیا

عبید اللہ علیم

اس قافلے نے دیکھ لیا کربلا کا دن
اب رہ گیا ہے شام کا بازار دیکھنا

علی سردار جعفری

فروخت ہوتی ہے انسانیت سی جنس گراں
جہاں کو پھونک نہ دے گی یہ گرمیِ بازار

غلام محمد قاصر

اپنے اشعار کو رسوا سرِ بازار کروں
کیسے ممکن ہے کہ میں مدحت دربار کروں

احمد راہی

ہم جو کرتے ہیں کہیں مصر کے بازار کی بات
لوگ پا لیتے ہیں یوسف کے خریدار کی بات

ماجد صدیقی

وقت بدلا ہے تو گوشوں میں چھپے بیٹھے ہیں
وہ جو کرتے رہے رسوا سرِ بازار ہمیں

ثروت حسین

میں ایک لہر ہوں اپنے مکان میں اور پھر
ہجوم کوچہ و بازار اک سمندر ہے

جوش ملیح آبادی

غنچۂ بستہ چٹک جاگ اٹھی موج صبا
شعلۂ حسن بھڑک مصر کا بازار آیا

شبلی نعمانی

جمع کر لیجیے غمزوں کو مگر خوبی بزم
بس وہیں تک ہے کہ بازار نہ ہونے پائے

شکیل بدایونی

بے نقد عمل جنت کی طلب کیا شے ہیں جناب واعظ بھی
مٹھی میں نہیں ہیں دام و درم بازار کی باتیں کرتے ہیں

افضل منہاس

بکھرے ہوئے ہیں دل میں مری خواہشوں کے رنگ
اب میں بھی اک سجا ہوا بازار ہو گیا

احمد فراز

پیچ رکھتے ہو بہت صاحبو دستار کے بیچ
ہم نے سر گرتے ہوئے دیکھے ہیں بازار کے بیچ
کسی سودائی کا قصہ کسی ہرجائی کی بات
لوگ لے آتے ہیں بازار سے باتیں کیا کیا
اس شہر میں ہر جنس بنی یوسف کنعاں
بازار کے بازار بڑی دیر سے چپ ہیں
پہلے پہلے ہوس اک آدھ دکاں کھولتی ہے
پھر تو بازار کے بازار سے لگ جاتے ہیں
ہم اپنے بت کو، زلیخا لیے ہے یوسف کو
ہے کون رونقِ بازار چل کے دیکھتے ہیں
شاید آ جائیں کبھی چشمِ خریدار میں ہم
جان و دل بیچ میں بازار کے رکھ دیتے ہیں
یہ نہ ہو تم بھی کسی بھیڑ میں کھو جاؤٔ کہیں
یہ نہ ہو ہم کسی بازار میں گم ہو جائیں
یہ کیا کہ تم بھی سرِ راہ حال پوچھتے ہو
کبھی ملو ہمیں بازار کے علاوہ بھی
بجا کہ چشمِ طلب بھی ہوئی تہی کیسہ
مگر ہے رونقِ بازار اب کہاں تو بھی

شاذ تمکنت

اے جنوں دشت میں دیوار کہاں سے لاؤں
میں تماشا سہی بازار کہاں سے لاؤں

فراق گورکھپوری

ہم رہ حسن اک انبوہ حریدار چلا
ساتھ اس جنس کے بازار کا بازار چلا

قتیل شفائی

کھلا ہے جھوٹ کا بازار آؤ سچ بولیں
نہ ہو بلا سے خریدار آؤ سچ بولیں

محبوب خزاں

جلاتی ہے دلوں کو سرد مہری بھی زمانے کی
سوال گرمیِ بازار بھی کرتے نہیں بنتا

مجروح سلطان پوری

ہم ہیں متاع کوچہ و بازار کی طرح
اٹھتی ہے ہر نگاہ خریدار کی طرح
دست منعم مری محنت کا خریدار سہی
کوئی دن اور میں رسوا سرِ بازار سہی

محسن احسان

شہر تخریب میں کیا خواہش تعمیر کریں
ایسے تاراج ہوئے کوچہ و بازار کہ بس
کچھ اس قدر تھا اندھیرا کہ صبح کا سورج
ہمارے کوچہ و بازار ڈھونڈنے نکلا
خود سے نا خوش غیر سے بیزار ہونا تھا ہوئے
ہم کو گرد کوچہ و بازار ہونا تھا ہوئے

محسن نقوی

قتل چھپتے تھے کبھی سنگ کی دیوار کے بیچ
اب تو کھلنے لگے مقتل بھرے بازار کے بیچ
کس نے سنگ خامشی پھینکا بھرے بازار پر
اک سکوتِ مرگ طاری ہے در و دیوار پر