مرزا غالب

حنائے پائے خزاں ہے بہار اگر ہے یہی
دوامِ کلفتِ خاطر ہے عیش دنیا کا
میں ہوں اور افسردگی کی آرزو، غالب! کہ دل
دیکھ کر طرز تپاک اہلِ دنیا جل گیا
بازیچۂِ اطفال ہے دنیا مرے آگے
ہوتا ہے شب و روز تماشا مرے آگے

انشاء اللہ خان انشا

بے ‌ مدد حق کے کریں کیا مردم دنیا مدد
کب تلک بالا مدد اے عالمِ بالا مدد

بہادر شاہ ظفر

اے ظفرؔ کچھ ہو سکے تو فکر کر عقبیٰ کا تو
کر نہ دنیا کا تردد کارِ دنیا سہل ہے

حیدر علی آتش

معشوق و مے و خانۂِ خالی و شب ماہ
عاشق کے لیے حاصلِ دنیا ہے تو یہ ہے
دم نظارہ لڑے مرتے ہیں عاشق اس پر
دولتِ حسن کے پیش آنے سے دنیا ہے وہ رخ

یگانہ چنگیزی

کس دل سے ترک لذت دنیا کرے کوئی
وہ خوابِ دل فریب کہ دیکھا کرے کوئی

باقی صدیقی

شوقِ نظارہ کا پردہ اٹھا
نظر آنے لگی دنیا ہم کو
اور بھی تنگ ہو گئی دنیا
دل کو دنیا کا جب خیال یا
غمِ دل کیا، غمِ دنیا بھی نہیں
تم نہیں تو کوئی رونا بھی نہیں
انصاف کتابوں میں بھلا لگتا ہے
مجرم ہے وہ مجرم جسے دنیا کہہ دے
فاصلہ در فاصلہ ہے زندگی
سامنے ہم ہیں نہ دنیا سامنے

جون ایلیا

بے دنیائی نے اس دل کی اور بھی دنیا دار کیا
دل پر ایسی ٹوٹی دنیا ترک ذرا دنیا کی تھی

عرفان صدیقی

جدھر بھی دیکھئے دل کی حریف دنیا ہے
یہ کون شعبدہ گر ہے ، یہ کیا تماشا ہے
اور یہ بھی دیکھ لو اسی نسبت کے فیض سے
پیروں پہ ہے مرے سگِ دنیا پڑا ہوا
ایک مدت سے مری بیعتِ جاں مانگتی تھی!
آج خاموش ہے کیا دیکھ کے دنیا مجھ میں
یہ تجھ کو جن زمین کے ٹکروں پہ ہے غرور
پھینکے ہوئے یہ اے سگِ دنیا، ہمارے ہیں
تم اس حریف کو پامال کر نہیں سکتے
تمہاری ذات ہے دنیا نہیں ٹھہر جاؤ

مجید امجد

ان چمکیلے زینوں میں یہ خوش خوش لوگ
چہروں پر تسکینیں دنیا دنیا کی
جم گئے خود ہی اس دلدل میں، اور خود ہی
کریں شکایت، اہلِ دنیا، دنیا کی

الطاف حسین حالی

لگاؤ تم میں نہ لاگ زاہد، نہ درد الفت کی آگ زاہد
پھر اور کیا کیجیے آخر جو ترکِ دنیا نہ کیجیے گا

جمال احسانی

قریہ قریہ جتنا آوارہ پھرے
گھر میں رہ لیتے تو دنیا دیکھتے

رئیس فروغؔ

بوڑھی ہے تو ہونے دو
پیار کروں گا دنیا سے
یہ جو حسن ہے میری تمنا میں
کوئی سورج تھا کسی دنیا میں
دلوں کے بند دریچوں سے جھانک کر دیکھو
کسی فساد کی پرچھائیاں ہیں دنیا میں

احسان دانش

اٹھا ہوں اک ہجومِ تمنا لیے ہوئے
دنیا سے جا رہا ہوں میں دنیا لیے ہوئے
دنیائے آرزو سے کنارہ تو کر کے دیکھ
دنیا کھڑی ہے دولتِ دنیا لیے ہوئے

ادا جعفری

ریت بھی اپنی رت بھی اپنی
دل رسمِ دنیا کیا جانے

بہزاد لکھنوی

جب تک نہ ملا تھا تو اے فتنۂ دو عالم
جب درد سے غافل تھا اب درد کی دنیا ہوں
قسمت سے مل گئی ہے یہ بیداری حیات
اس عشق کے نثار کہ دنیا نظر میں ہے

ظہیر کاشمیری

عشق اک حکایت ہے سرفروش دنیا کی
ہجر اک مسافت ہے بے نگار صحرا کی
وقت کے تسلسل میں ہم بہ رنگ شعلہ تھے
عمر یک نفس میں بھی روشنی تھے دنیا کی
میں ہوں وحشت میں گم میں تیری دنیا میں نہیں رہتا
بگولا رقص میں رہتا ہے صحرا میں نہیں رہتا
طلب آسودگی کی عرصۂ دنیا میں رکھتے ہیں
امید فصلِ گل ہے اور قدم صحرا میں رکھتے ہیں
ہمیں ہر گام پر ملتا رہا اعزاز محرومی
وقار اپنا بہت ہم دیدۂ دنیا میں رکھتے ہیں

عبید اللہ علیم

اک ہجر زدہ بابل پیاری ترے جاگتے بچوں سے ہاری
اے شاعر کس دنیا میں ہے تو تری تنہا دنیا گھر میں ہے

تلوک چند محروم

پہلو میں دل ہے درد کی دنیا کہیں جسے
پر اس قدر اجاڑ کہ صحرا کہیں جسے

جوش ملیح آبادی

اے آفتاب جلوۂ جاناں بلند ہو
کھویا ہوا ہے مطلع دنیا ترے لیے
سرشار ہوں سرشار ہے دنیا مرے آگے
کونین ہے اک لرزش صہبا مرے آگے
میں اور ڈروں صولت دنیائے دنی سے
خود لرزہ بر اندام ہے دنیا مرے آگے

حفیظ جالندھری

دور سے آنکھیں دکھاتی ہے نئی دنیا مجھے
گلشنِ ہستی نظر آتا ہے اک صحرا مجھے

رسا چغتائی

عبارت ہے شعور زندگی سے
نہ یہ دنیا نہ وہ دنیا الگ ہے
ممکن ہے وہ دن آئے کہ دنیا مجھے سمجھے
لازم نہیں ہر شخص ہی اچھا مجھے سمجھے

سیماب اکبر آبادی

ہے حصول آرزو کا راز ترک آرزو
میں نے دنیا چھوڑ دی تو مل گئی دنیا مجھے
دیکھتے ہی دیکھتے دنیا سے میں اٹھ جاؤں گا
دیکھتی کی دیکھتی رہ جائے گی دنیا مجھے
دل لے کے خود کو رہتے ہیں کیا کیا لیے ہوئے
شیشے وہی تو ہیں مری دنیا لیے ہوئے
وحدت و کثرت کے جلوے خلقت انساں میں دیکھ
ایک ذرہ اس قدر پھیلا کہ دنیا ہو گیا
ناحق شکایت غمِ دنیا کرے کوئی
غم ہے بڑی خوشی جو گوارا کرے کوئی
حسن میں ہو عشق کی بو عشق میں ہو رنگ حسن
پھر مرتب رنگ و بوئے نو سے اک دنیا کریں

شاد عظیم آبادی

میں شادؔ تنہا اک طرف اور دنیا کی دنیا اک طرف
سارا سمندر اک طرف آنسو کا قطرہ اک طرف

شان الحق حقی

اے دل اب اور کوئی قصۂ دنیا نہ سنا
چھیڑ دے ذکر وفا ہاں کوئی افسانہ سنا
اے دل ترے خیال کی دنیا کہاں سے لائیں
ان وحشتوں کے واسطے صحرا کہاں سے لائیں
حسرت تو ہے یہی کہ ہو دنیا سے دل کو میل
ہو جس سے دل کو میل وہ دنیا کہاں سے لائیں
بساط آرزو تصویر صحرا ہو گئی آخر
وہ ہنگاموں کی بستی ہو کی دنیا ہو گئی آخر

شکیل بدایونی

پہلو میں دردِ عشق کی دنیا لیے ہوئے
بیٹھا ہوں زندگی کا سہارا لیے ہوئے
پہنچے تو دل میں جوشِ تمنا لیے ہوئے
لوٹے مگر لٹی ہوئی دنیا لیے ہوئے
زاہد سے پوچھئے غمِ دنیا کی عظمتیں
عقبیٰ نہ مل سکی غمِ دنیا کیے بغیر
اک اک قدم فریب تمنا سے بچ کے چل
دنیا کی آرزو ہے تو دنیا سے بچ کے چل
لمحے اداس اداس فضائیں گھٹی گھٹی
دنیا اگر یہی ہے تو دنیا سے بچ کے چل
اپنے ادب پہ ناز ہے تجھ کو اگر شکیلؔ
مغرب زدہ ادیب کی دنیا سے بچ کے چل

عزیز حامد مدنی

ایک آدھ حریف غمِ دنیا بھی نہیں تھا
ارباب وفا میں کوئی اتنا بھی نہیں تھا

فانی بدایونی

بے ذوقِ نظر بزم تماشا نہ رہے گی
منہ پھیر لیا ہم نے تو دنیا نہ رہے گی
ایذا نہ رہے گی جو گوارا نہ رہے گی
چھیڑا مجھے دنیا نے تو دنیا نہ رہے گی

احمد فراز

ہم اپنے آپ میں گم تھے ہمیں خبر کیا تھی
کہ ماور ائے غمِ جاں بھی ایک دنیا تھی
ہوا ہے تجھ سے بچھڑنے کے بعد اب معلوم
کہ تو نہیں تھا ترے ساتھ ایک دنیا تھی
اس دید کی ساعت میں کئی رنگ ہیں لرزاں
میں ہوں کہ کوئی اور ہے دنیا ہے کہ تم ہو
کم نہیں طمع عبادت بھی تو حرص زر سے
فقر تو وہ ہے کہ جو دین نہ دنیا رکھے

شاذ تمکنت

چھوڑ دوں شہر ترا چھوڑ دوں دنیا تیری
مجھ کو معلوم نہ تھا کیا ہے تمنا تیری

فراق گورکھپوری

بس اتنے پر ہمیں سب لوگ دیوانہ سمجھتے ہیں
کہ اس دنیا کو ہم اک دوسری دنیا سمجھتے ہیں
معلوم ہے حقیقت غم ہائے روزگار
دنیا کو تیرے درد نے دنیا بنا دیا
وہ تھا مرا دل خوں گشتہ جس کے مٹنے سے
بہار باغ جناں تھی وجود دنیا تھا
رنج و راحت وصل‌ و فرقت ہوش و وحشت کیا نہیں
کون کہتا ہے کہ رہنے کی جگہ دنیا نہیں
ایک حالت پر زمانے میں نہ گزری عشق کی
درد کی دنیا بھی اب وہ درد کی دنیا نہیں
جہان غنچۂ دل کا فقط چٹکنا تھا
اسی کی بوئے پریشاں وجود دنیا تھا
کچھ اشارے تھے جنہیں دنیا سمجھ بیٹھے تھے ہم
اس نگاہ آشنا کو کیا سمجھ بیٹھے تھے ہم

محسن احسان

بلندیوں سے مری سمت دیکھنے والے
مرے قریب تو آ میں بھی ایک دنیا ہوں
جو برتیں تو کھلیں سب بھید اس کے
حسیں لگتی ہے دنیا دیکھنے میں
یہی ہے لغزش بینائی محسنؔ
کہ ہو مشغول دنیا دیکھنے میں
میں دنیا کے لیے زندہ ہوں محسنؔ
مجھے خود خواہشِ دنیا کہاں ہے

ناصر کاظمی

ایسا بھی کوئی سپنا جاگے
ساتھ مرے اک دنیا جاگے

نوح ناروی

وہ فرماتے ہیں مجھ کو دیکھ کر میں یوں نہ مانوں گا
اگر یہ نوحؔ ہے طوفان اٹھائے غرق دنیا ہو