مرزا غالب

آتا ہے میرے قتل کو پر جوش رشک سے
مرتا ہوں اس کے ہاتھ میں تلوار دیکھ کر
اس سادگی پہ کوں نہ مر جائے اے خدا!
لڑتے ہیں اور ہاتھ میں تلوار بھی نہیں

امام بخش ناسخ

ہے محبت سب کو اس کے ابروئے خم دار کی
ہند میں کیا آبرو باقی رہی تلوار کی
سر گرتے ہیں کٹ کٹ کے وہ رکھتا ہے جہاں پاؤں
سیکھی ہے مگر یار نے تلوار کی رفتار
گر یہی ہیں ترے ابرو کے اشارے قاتل
آج کل چلتی ہے تلوار ترے کوچے میں

انشاء اللہ خان انشا

رستم سے چھین لیجیے دیو‌ سفید کو
اور اس کی دہ مروڑ کے تلوار توڑیے

بہادر شاہ ظفر

پان کی سرخی نہیں لب پر بت خوں خوار کے
لگ گیا ہے خون عاشق منہ کو اس تلوار کے

حیدر علی آتش

پھول جو ہے اپنے گلشن کا سپر کا پھول ہے
ہر شجر اس باغ میں لاتا ہے پھل تلوار کا
فدیے بہت اس ابروئے خم دار کے لیے
چو رنگ کی کمی نہیں تلوار کے لیے
گل ہائے زخم سے ہوں شہادت طلب نہال
توفیق خیر ہو تری تلوار کے لیے
افشاں سے کشتہ ابروئے خم دار نے کیا
جوہر سے کام یار کی تلوار نے کیا
تو نکلتا نہیں شمشیر بکف اے قاتل
موت میرے لیے تلوار لیے پھرتی ہے

شیخ ابراہیم ذوق

کر دیا کیا ترے ابرو نے اشارہ قاتل
کہ قضا ہاتھ میں تلوار لیے پھرتی ہے

مصحفی غلام ہمدانی

جیتے اگر نہ ہم تو کیوں ذلتیں اٹھاتے
کھائی ہے دل پہ ہم نے تلوار زندگی سے
مکھ پھاٹ منہ پہ کھائیں گے تلوار ہو سو ہو
دبنے کے بھی تو اس سے نہیں یار ہو سو ہو
اے دل! تو سادہ رویوں کی بھپکی میں آ نہ جا
اک دن لپٹ کے چھین لے تلوار ہو سو ہو
دیکھا مجھے کل اس نے تو غیروں سے یہ بولا
لاؤ بھی شتابی مری تلوار کدھر ہے
ترسا نہ مجھ کو کھینچ کے تلوار مار ڈال
گر مار ڈالنا ہے تو یک بار مار ڈال

مصطفٰی خان شیفتہ

کچھ بیمِ قتل سے نہیں آنکھوں میں اشکِ سرخ
کھاتا ہے جوش خوں تری تلوار دیکھ کر

باقی صدیقی

دم سادھ کے بیٹھا ہوں اگرچہ مرے سر پر
اک شاخ ثمر دار ہے تلوار نہیں ہے

جگر مراد آبادی

نفس پر ہے مدار زندگانی
نفس چلتی ہوئی تلوار بھی ہے
محبت صلح بھی پیکار بھی ہے
یہ شاخِ گل بھی ہے تلوار بھی ہے

قمر جلالوی

واہ کا کیا کہنا ہے اس پہلے پہل کے وار کا
میں ترے قربان قبضہ چوم لے تلوار کا
بڑھ تو جاؤ خون بھی کرنا کسی ناچار کا
تم تو اتنے بھی نہیں جتنا ہے قد تلوار کا
اب بھلا ابھریں گے کیا بحرِ شہادت کے غریق
سر سے اونچا ہو گیا پانی تری تلوار کا
عشق اور ابروئے خمدار کا اس دل کے سپرد
آپ تو دیوانے کو تلوار دیے دیتے ہیں

شکیب جلالی

وقت کی ڈور خدا جانے کہاں سے ٹوٹے
کس گھڑی سر پہ یہ لٹکی ہوئی تلوار گرے

عرفان صدیقی

مرے لہو نے کہاں پار اتارتا تھا مجھے
یہ راستہ تری تلوار سے نکل آیا
تو نے مٹی سے الجھنے کا نتیجہ دیکھا
ڈال دی میرے بدن نے تری تلوار پہ خاک
عاشقوں کے سرِ تسلیم کو تسلیم سے کام
اب یہ ابرو ہے کہ تلوار ہے میں کیا جانوں
جی دکھایا ترے لہجے نے تو معلوم ہوا
کس طرح لفظ کو تلوار بھی کر سکتے ہیں
کچھ نہ کچھ ہوش ہے باقی ابھی دیوانوں میں
یہ تو ابرو نہیں تلوار ہے خاکم بدہن
اب میں چپ ہوں تو مجھے اپنی دلیلوں سے نہ کاٹ
میری ٹوٹی ہوئی تلوار پہ تلوار نہ رکھ
قیامت استعارہ ہے اشارہ میرے قاتل کا
کہ ہم ابرو ہی کیا سارا بدن تلوار کردیں گے
تمہارے ناز کشیدہ سری سے کیا ہو گا
میاں کھینچی ہوئی تلوار سے معاملہ ہے

الطاف حسین حالی

میں تو میں غیر کو مرنے سے اب انکار نہیں
اک قیامت ہے ترے ہاتھ میں تلوار نہیں

جمال احسانی

وہی تو زندہ بچ کے آئے ہیں تیری گلی سے
جنہوں نے سر تری تلوار پر رکھا ہوا تھا

ظہیر کاشمیری

ہم دل زدے جو سیرِ چمن کو نکل پڑے
ہر پھول دست شاخ میں تلوار بن گیا

عبید اللہ علیم

دیکھا تھا خواب شاعر مومن نے اس لیے
تعبیر میں ملا ہمیں تلوار دیکھنا

علی سردار جعفری

کبھی چھلکی ہوئی شربت کے کٹوروں کی طرح
اور کبھی زہر میں ڈوبی ہوئی تلوار آنکھیں

سیف الدین سیف

ان کے جوہر بھی کھلے اپنی حقیقت بھی کھلی
ہم سے کھنچتے ہی وہ تلوار نظر آنے لگے

شکیل بدایونی

دل کی بے تابی کا عالم کیا کہوں
ہر نفس تلوار ہے تیرے بغیر
کرنے دو اگر قتال جہاں تلوار کی باتیں کرتے ہیں
ارزاں نہیں ہوتا ان کا لہو جو پیار کی باتیں کرتے ہیں
انقلاب آیا نہ جانے یہ چمن میں کیسا
غنچہ و گل مجھے تلوار نظر آتے ہیں

احمد فراز

ہمیشہ سے ہلاک اک دوسرے کے
مرا سر اور تری تلوار قاتل

شاذ تمکنت

یہ دور وہ ہے کہ سب نیم جاں نظر آئے
کہ رقص میں ہے اناڑی کے ہاتھ میں تلوار

فراق گورکھپوری

معرکے سر ہوں اسی برق نظر سے اے حسن
یہ چمکتی ہوئی چلتی ہوئی تلوار تو ہے

قتیل شفائی

یارو کسی قاتل سے کبھی پیار نہ مانگو
اپنے ہی گلے کے لیے تلوار نہ مانگو

کیف بھوپالی

سلام اس پر اگر ایسا کوئی فن کار ہو جائے
سیاہی خون بن جائے قلم تلوار ہو جائے

مجروح سلطان پوری

غیرت سنگ ہے ساقی یہ گلوئے تشنہ
تیرے پیمانے میں جو موج ہے تلوار سہی

محسن احسان

نگار فن پہ حریفان شعر کی یلغار
نیامِ حرف کہاں ہے خیال کی تلوار
ہم کبھی شمشیر جوہر دار تھے لیکن ہمیں
دست ناہنجار میں تلوار ہونا تھا ہوئے

محسن نقوی

شاخ عریاں پر کھلا اک پھول اس انداز سے
جس طرح تازہ لہو چمکے نئی تلوار پر