مرزا غالب

تم شہر میں ہو تو ہمیں کیا غم، جب اٹھیں گے
لے آئیں گے بازار سے جا کر دل و جاں اور
جاں ہے بہائے بوسہ ولے کیوں کہے ابھی
غالب کو جانتا ہے کہ وہ نیم جاں نہیں
جاں فزا ہے بادہ جس کے ہاتھ میں جام آ گیا
سب لکیریں ہاتھ کی گویا، رگِ جاں ہو گئیں
نویدِ امن ہے بیدادِ دوست جاں کے لیے
رہی نہ طرزِ ستم کوئی آسماں کے لیے
پھر شوق کر رہا ہے خریدار کی طلب
عرضِ متاعِ عقل و دل و جاں کیے ہوئے

امام بخش ناسخ

دشمن اگر وہ دوست ہوا ہے تو کیا عجب
یاں اعتماد دوستی جسم و جاں نہیں
مثل پروانہ نہیں کچھ زر و مال اپنے پاس
ہم فقط تم پہ فدا کرنے کو جاں رکھتے ہیں

بہادر شاہ ظفر

کرو ہزار ستم لے کے ذکر کیا یک یار
شکایت اپنی تم اس اپنے نیم جاں سے سنو

حیدر علی آتش

عالم حسن خدا داد بتاں ہے کہ جو تھا
ناز و انداز بلائے دل و جاں ہے کہ جو تھا
نہ مڑ کر بھی بے درد قاتل نے دیکھا
تڑپتے رہے نیم جاں کیسے کیسے
زنار عشق بت میں رگِ جاں ہے ان دنوں
ناقوس برہمن دلِ نالاں ہے ان دنوں

داغ دہلوی

غضب آیا ستم ٹوٹا قیامت ہو گئی برپا
یہ پوچھا تھا کہ تم آزردہ مجھ سے میری جاں کیوں ہو
کہتے ہیں جس کو حور وہ انساں تمہیں تو ہو
جاتی ہے جس پہ جان مری جاں تمہیں تو ہو
یہ دل ہے آپ کا گھر رہئے شوق سے لیکن
شکیب و راحت و صبر و قرار جاں کی طرح

شیخ ابراہیم ذوق

ابھی کیا سرد قاتل یہ شہید تفتہ جاں ہوتا
کوئی دم شمع مردہ میں بھی ہے باقی دھواں ہوتا
صید دل کو کیوں کہ چھوڑے جب کہ دکھلا دے نہ تو
مچھلیاں دستِ حنائی میں مری جاں چھوڑ کر
پیش خیمہ لے کے نکلا گرد باد دور رو
ہے جو سرگرم سفر تن کو مری جاں چھوڑ کر

مصحفی غلام ہمدانی

رکھ نہ خنجر کو ہاتھ سے قاتل
تیرے کشتوں میں نیم جاں ہیں ہم
جانتے آپ سے جدا تجھ کو
کرتے گر فرق جسم و جاں میں ہم
اہلِ دل گر جہاں سے اٹھتا ہے
اک جہاں جسم و جاں سے اٹھتا ہے
قد نوخیز نہیں آفتِ جاں اور ہی ہے
جس پہ دل اپنا گیا ہے وہ جواں اور ہی ہے
تم آنکھوں میں کیا بیٹھتے ہو مری
بہ پہلوئے دل مثل جاں بیٹھیے
اک حرف کن میں جس نے کون و مکاں بنایا
سارے جہاں کا تجھ کو آرام جاں بنایا
منہ میں جس کے تو شبِ وصل زباں دیتا ہے
صبح تک مارے مزے ہی کے وہ جاں دیتا ہے
یک رنگی کہیں ہیں کس کو، یعنی
دو شخص کا ہووے جسم و جاں ایک

مصطفٰی خان شیفتہ

کوئی بے جانِ جہاں میں نہیں جیتا لیکن
تیرے مہجور کو جیتے ہوئے بے جاں دیکھا
ناصح تپاں ہے ، شیفتۂِ نیم جاں کی طرح
کیا دل میں چبھ گئی نگہِ جاں ستاں کی طرح؟
تمام علت درماندگی ہے قلت شوق
تپش ہوئی پرِ پرواز مرغ جاں کے لیے
ہم آپ پر نثار کریں کائنات کو
پر کیا کریں بساط میں جز نیم جاں نہیں
کیوں کر کہیں کہ چھٹ گئے ہم بندِ جسم سے
اس زلفِ پیچ پیچ میں الجھی ہے جاں ہنوز
مرے غم میں گیسوئے مشکیں نہ کھول
نہ ہو خلق کا دشمنِ جاں عبث

مومن خان مومن

ناوک انداز جدھر دیدۂِ جاناں ہوں گے
نیم بسمل کئی ہوں گے کئی بے جاں ہوں گے
دل سختیوں سے آئی طبیعت میں نازکی
صبر و تحمل قلق جاں نہیں رہا
زخمی کیا عدو کو تو مرنا محال ہے
قربان جاؤں تیرے مجھے نیم جاں نہ چھوڑ

میر مہدی مجروح

جان کیوں کر نثار مقدم ہو
اب وہ آئے کہ نیم جاں ہوں میں
بے وفائیں کا عیب کیسا ہے
یہ تو سچ ہے کہ میری جاں ہو تم

فیض احمد فیض

آج تک شیخ کے اکرام میں جو شے تھی حرام
اب وہی دشمنِ دیں، راحتِ جاں ٹھہری ہے
جان باقی ہے تو کرنے کو بہت باقی ہے
اب وہ جو کچھ کہ مری جاں نہیں کرنے دیتے

مرزا رفیع سودا

دل لے کے ہمارا جو کوئی طالب جاں ہے
ہم بھی یہ سمجھتے ہیں کہ جی ہے تو جہاں ہے
صدمہ ہر چند ترے جور سے جاں پر آیا
تس پہ شکوہ نہ کبھی میری زباں پر آیا

یگانہ چنگیزی

پھر گیا تلوار کا منہ تھم گئے بازوئے دوست
کیوں اجل اس کی تلافی سخت جاں کیوں کر کریں

باقی صدیقی

ہے یہ کیسی غمِ جاں کی صورت
دل بھی اب چپ ہے زباں کی صورت
جرس غم نے پکارا ہم کو
کاروان دل و جاں یاد آیا
آگ سے کھیلتے ہو کیوں باقیؔ
اپنا دل دیکھو اپنی جاں دیکھو
وہ رگِ دل میں رگِ جاں میں رہے
پھر بھی ہم ملنے کے ارماں میں رہے
بعداتنا کہ تصور بھی محال
قرب ایسا کہ رگِ جاں میں رہے
کس نے مٹی میں روح پھونکی ہے
کوئی یہ ربط جسم و جاں دیکھے

جون ایلیا

یہاں جو ہے تنفس ہی میں گم ہے
پرندے اڑ رہے ہیں شاخ جاں سے
یہاں جو ہے تنفس ہی میں گم ہے
پرندے اڑ رہے ہیں شاخ جاں سے
ایک گماں کا حال ہے اور فقط گماں میں ہے
کس نے عذابِ جاں سہا کون عذابِ جاں میں ہے
اے وصل کچھ یہاں نہ ہوا کچھ نہیں ہوا
اس جسم کی میں جاں نہ ہوا کچھ نہیں ہوا
وجد کرے گی زندگی جسم بہ جسم جاں بہ جاں
جسم بہ جسم جاں بہ جاں شام بخیر شب بخیر
ہے مرا نام ارجمند تیرا حصار سر بلند
بانو شہرِ جسم و جاں شام بخیر شب بخیر
ہو گئی دیر جاؤ تم مجھ کو گلے لگاؤ تم
تو مری جاں ہے میری جاں شام بخیر شب بخیر
نہ تو دل کا نہ جاں کا دفتر ہے
زندگی اک زیاں کا دفتر ہے
ہجر تعطیل جسم و جاں ہے میاں
وصل جسم اور جاں کا دفتر ہے

جگر مراد آبادی

جو تیرے عارض و گیسو کے درمیاں گزرے
کبھی کبھی وہی لمحے بلائے جاں گزرے
آنکھ تک دل سے نہ آئے نہ زباں تک پہنچے
بات جس کی ہے اسی آفتِ جاں تک پہنچے

سراج الدین ظفر

میں نے کہا کہ تجزیۂ جسم و جاں کرو
اس نے کہا یہ بات سپرد بتاں کرو

عبدالحمید عدم

وہ گل انداز جن کا خلق سرمایہ تھا جینے کا
وہ بن بن کر چراغ محفل جاں یاد آتے ہیں

قمر جلالوی

منزلیں غربت میں مجھ کو آفتِ جاں ہو گئیں
وسعتیں ایک ایک ذرے کی بیاباں ہو گئیں
وہ اٹھی عاشق کی میت لے مبارک ہو تجھے
اب تو پوری حسرتیں او دشمنِ جاں ہو گئیں

شکیب جلالی

سر چشمہ افکار جواں ہیں تری آنکھیں
تابندہ خیالات کی جاں ہیں تری آنکھیں

عرفان صدیقی

ہر طرف ڈوبتے سورج کا سماں دیکھئے گا
اک ذرا منظرِ غرقابی جاں دیکھئے گا
وہ ہلالِ ماہِ وصال ہے دلِ مہرباں اسے دیکھنا
پسِ شامِ تن جو پکارنا سرِ بام جاں اسے دیکھنا
چراغ دینے لگے گا دھواں، نہ چھوِ لینا
تو میرا جسم کہیں میری جاں نہ چھوِ لینا
رختِ سفر اٹھا گیا کون سرائے خواب سے
رات پھر اس نواح میں گریۂ جاں بہت ہوا
عجیب شخص تھا، بچتا بھی تھا حوادث سے
پھر اپنے جسم پہ الزامِ جاں بھی رکھتا تھا
جو کبھی تو نے کہا اور نہ کبھی ہم نے سنا
وہی اک لفظ تو سرنامۂ جاں ہے جاناں
لو، میں راز ہنر چارہ گراں کھولتا ہوں
تنگ آیا ہوں سو پیراہن جاں کھولتا ہوں
جسم کی رسمیات اور دل کے معاملات اور
بیعتِ دست ہاں ضرور، بیعتِ جاں نہیں نہیں
تم جو عرفانؔ یہ سب دردِ نہاں لکھتے ہو
کون ہے جس کے لیے نامۂ جاں لکھتے ہو
ایک بار اور مرے سینے پر رکھ پھول سا ہاتھ
ایک دستک پہ یہ دروازۂ جاں کیسے کھلے
شہر میں گلبدناں، سیم تناں تھے کتنے
راہ زن درپئے نقدِ دل و جاں تھے کتنے
مرا چراغ تو جانے کہاں سے آتا ہے
مگر اجالا مرے سوز جاں سے آتا ہے
اے مرے طائرِ جاں کس کی طرف دیکھتا ہے
ناوکِ کور کماں کس کی طرف دیکھتا ہے
تو یہاں تھا تو بہت کچھ تھا اسی شہر کے پاس
اب جو کچھ ہے وہ مرے قریۂ جاں جیسا ہے
وادی ہو میں پہنچتا ہوں بیک جستِ خیال
دشتِ افلاک مری وحشتِ جاں سے کم ہے
زیرِ محراب نہ بالائے مکاں بولتی ہے
خامشی آ کے سر خلوتِ جاں بولتی ہے
زمیں سے اٹھ کے مری خاک جاں کہاں جائے
یہ نامراد ہنوز آسماں کہاں جائے
زمیں سے اٹھ کے مری خاک جاں کہاں جائے
یہ نامراد تہِ آسماں کہاں جائے

مجید امجد

عشق کی ٹیسیں جو مضراب رگِ جاں ہو گئیں
روح کی مدہوش بیداری کا ساماں ہو گئیں
بچا کے رکھا ہے جس کو غروبِ جاں کے لیے
یہ ایک صبح تو ہے سیر بوستاں کے لیے
یہ نین، جلتی لووں، جیتی نیکیوں والے
گھنے بہشتوں کا سایہ ہیں ارضِ جاں کے لیے