یگانہ چنگیزی

خدا ہی جانے یگانہؔ میں کون ہوں کیا ہوں
خود اپنی ذات پہ شک دل میں آئے ہیں کیا کیا
قفس پہ رکھیو نہ صیاد بار پھولوں کا
کہیں اسیروں کو ظالم نہ یاد آئے بہار
کھڑی ہوئی ہے عصا ٹیکے نرگسِ بیمار
اس انتظار میں ہے دیکھیے کب آئے بہار

باقی صدیقی

روز دل پر اک نیا زخم آئے ہے
روز کچھ بار سفر بڑھ جائے ہے
تیریافسانیمیں ہم شامل نہیں
بات بس اتنی سمجھ میں آئے ہے
کیا وفا کر کے ہوئے سب کی نظر میں مجرم
ایک عرصہ ترے کوچے میں نہ ہم آئے گئے
ہم حق پر ہی سہمی لیکن
ان کی راہ میں آئے کون

جگر مراد آبادی

رواں دواں لیے جاتی ہے آرزوئے وصال
کشاں کشاں ترے نزدیک آئے جاتے ہیں
الٰہی ترکِ محبت بھی کیا محبت ہے
بھلاتے ہیں انہیں وہ یاد آئے جاتے ہیں

قمر جلالوی

اگر ہم سے خوشی کے دن بھی وہ گھبرائے جاتے ہیں
تو کیا اب عید ملنے کو فرشتے آئے جاتے ہیں
رقیبوں سے نہ ملیے عید اتنی گرم جوشی سے
تمھارے پھول سے رخ پر پسینے آئے جاتے ہیں
قمر افشاں چنی ہے رخ پہ اس نے اس سلیقے سے
ستارے آسماں سے دیکھنے کو آئے جاتے ہیں
قمر کی صبح پوچھئے سورج کی کرنوں سے
ستارے تو گوآ ہی کے لیے آئے نہیں جاتے

شکیب جلالی

ہوا کا رخ ہی اچانک بدل گیا ورنہ
مہک کے قافلے صحرا کی سمت آئے بہت
جمی رہے گی نگاہوں پہ تیرگی دن بھر
کہ رات خواب میں تارے اتر کے آئے بہت
حسنِ فردا‘ غمِ امروز سے ضو پائے گا
چاند ڈوبا ہے تو سورج بھی ابھر آئے گا
راہ میں جس کی‘ دیا خونِ دل و جاں ہم نے
وہ حسیں دور بھی آئے گا‘ ضرور آئے گا
آپ نغموں کے منتظر ہوں گے
ہم تو فریاد لے کے آئے ہیں
کیا نظر آئے گا ابھی ہم کو
یک بیک روشنی سے آئے ہیں

عرفان صدیقی

وہ پھول ہے تو مری شاخ جاں بھی مہکائے
اگر ہوا ہے تو میرے بدن تک آئے بھی
صدا کی لہر کسی اور شہر تک لے جائے
کچھ اور بات ہو کچھ اور یاد آئے مجھے
صبر نے موجوں کو زنجیر پنہا دی ورنہ
کیسے ممکن تھا کہ خدمت میں نہ آئے دریا

رئیس فروغؔ

کل کسی اجنبی کا حسن مجھے
یاد آیا تو یاد آئے گیا
اپنے ہو نہ پرائے ہو
کس سے ملنے آئے ہو
کئی طرح کے لوگ ہیں پچھلے پہر
مرے حرف کی چھاؤں میں آئے ہوئے
تیرا تو انگ انگ مجھے رات رات بھر
یادوں کے آئینے میں نظر آئے ہے صنم
کوئی ایسا ہو کہ دیکھے جائے
میں جہاں تک نظر آئے جاؤں

احسان دانش

جب بھی خلوت میں وہ یاد آئے گا
وقت کا سیل ٹھہر جائے گا
میں نے دیکھے ہیں چمن بے پردہ
کوئی گل کیا مرے منہ آئے گا
اور کچھ دیر ستارو ٹھہرو
اس کا وعدہ ہے ضرور آئے گا
نہیں ہے غم تو محبت کی تربیت ناقص
حوادث آئیں تو نرمی سے پیش آئے جا
کبھی کبھی جو وہ غربت کدے میں آئے ہیں
مرے بہے ہوئے آنسو جبیں پہ لائے ہیں
نظر نہ توڑ سکی آنسوؤں کی چلمن کو
وہ روز اگرچہ مرے آئینے میں آئے ہیں
رسالہ ہاتھ سے رکھتے نہ کیوں وہ شرما کر
غزل پڑھی ہے تو ہم سامنے بھی آئے ہیں
چلے ہیں خیر سے ان کو پکارنے دانشؔ
مگر وہ یوں تو نہ آئیں گے اور نہ آئے ہیں

آنس معین

تب ہوگی خبر کتنی ہے رفتار تغیر
جب شام ڈھلے لوٹ کے آئے گا کوئی اور

بشیر بدر

نہ جانے کب ترے دل پر نئی سی دستک ہو
مکان خالی ہوا ہے تو کوئی آئے گا
میں اپنی راہ میں دیوار بن کے بیٹھا ہوں
اگر وہ آیا تو کس راستے سے آئے گا
جل کر جو راکھ ہو گئیں دنگوں میں اس برس
ان جھگیوں میں آئے گی اکیسویں صدی
اک یاترا ضرور ہو نناوے کے پاس
رتھ پر سوار آئے گی اکیسویں صدی

زہرا نگاہ

کیا غیر کو ڈھونڈیں کہ ترے کوچے میں ہر ایک
اپنا سا نظر آئے ہے کیا جانیے کیا ہو

عبید اللہ علیم

جان تو چیز ہے کیا رشتۂ جاں سے آگے
کوئی آواز دیے جائے میں آئے جاؤں

احمد راہی

چاند کے پہلو میں دم سادھ کے روتی ہے کرن
آج تاروں کا فسوں خاک نظر آئے گا

جوش ملیح آبادی

ہستی کے دام سخت سے اکتا گیا ہے کون
کہہ دو کہ پھر گرفت میں آئے ہوئے ہیں ہم
ہاں کس کے پائے دل میں ہے زنجیر آب و گل
کہہ دو کہ دام زلف میں آئے ہوئے ہیں ہم
جس پر نثار کون و مکاں کی حقیقتیں
پھر جوشؔ اس فریب میں آئے ہوئے ہیں ہم

حفیظ جالندھری

دن ہو کہ رات ایک ملاقات کی ہے بات
اتنی سی بات بھی نہ بن آئے تو کیا کروں
جو کچھ بنا دیا ہے ترے انتظار نے !
اب سوچتا ہوں تو ادھر آئے تو کیا کروں

رسا چغتائی

یہ درختوں کے سائے جو چپ چاپ ہیں ہم محبت زدوں کے یہ ہم راز ہیں
اب یہیں دیکھنا رات پچھلے پہر دو دھڑکتے دلوں کی صدا آئے گی
غم کا سورج ڈھلا درد کا چاند بھی بجھ چلے آنسوؤں کے دیے آج بھی
اور اسی سوچ میں اب سحر آئے گی اب سحر آئے گی اب سحر آئے گی

خاطر غزنوی

کوئی کلی ہے نہ غنچہ نہ گل برائے صبا
چمن میں کانٹے ہیں دامن بچا کے آئے صبا
حریم غنچہ میں خوشبو سمٹ کے بیٹھی ہے
حجاب اٹھے جو صحن‌ چمن میں آئے صبا

سیف الدین سیف

زہد کس کس نے لٹائے ہیں تمہیں کیا معلوم
آج وہ کیا نظر آئے ہیں تمہیں کیا معلوم
شوق آوارہ کو صحرائے فراموشی میں
راستے ڈھونڈنے آئے ہیں تمہیں کیا معلوم
اہلِ دل حسرتِ دل لے کے تمہارے در پر
آج کس بھیس میں آئے ہیں تمہیں کیا معلوم
دیکھ کر حال ہمارا نہ ہنسو غربت میں
کون ہیں کس طرح آئے ہیں تمہیں کیا معلوم

شاد عظیم آبادی

سب طرح کی سختیاں سہہ جائے گا
کیوں دلا تو بھی کبھی کام آئے گا
ایک دن ایسا بھی ناصح آئے گا
غم کو میں اور غم مجھے کھا جائے گا
اے فلک ایسا بھی اک دن آئے گا
جب کیے پر اپنے تو پچھتائے گا
چھوڑ دے ہم وحشیوں کو اے غبار
پیچھے پیچھے تو کہاں تک آئے گا
منتظر ہے جانِ بر لب آمدہ
دیکھیے کب پھر کے قاصد آئے گا
کیوں نہ میں مشتاق ناصح کا رہوں
نام تیرا اس کے لب پر آئے گا

شکیل بدایونی

پڑ جائے لاکھ وقت مگر یہ نہیں قبول
میں دیکھتا رہوں کہ مرے کام آئے کون
ہر گوشۂ نظر میں سمائے ہوئے ہو تم
جیسے کہ مرے سامنے آئے ہوئے ہو تم

فانی بدایونی

بہارِ صد چمنستان آرزو بن کر
مرے خیال کی رنگینیوں میں آئے جا
ہو کاش وفا وعدۂ فردائے قیامت
آئے گی مگر دیکھیے کب آئے قیامت

اختر ہوشیارپوری

ہر ایک شخص یہاں اپنے دل کا مالک ہے
میں لاکھ اس کو بلاؤں مگر نہ آئے وہ
مری رگوں کا لہو بنت عم سے ملتا ہے
میں اپنا آپ بھی دیکھوں تو یاد آئے وہ
مرا وجود کتابوں میں حرف حرف ہوا
خدا کرے مری آواز بن کے آئے وہ
پلٹ چکا ہوں ورق زندگی کے اے اخترؔ
حریم شب میں دبے پاؤں پھر بھی آئے وہ

افضل منہاس

اپنے ماحول سے کچھ یوں بھی تو گھبرائے نہ تھے
سنگ لپٹے ہوئے پھولوں میں نظر آئے نہ تھے

فراق گورکھپوری

نگاہِ ناز نے پردے اٹھائے ہیں کیا کیا
حجاب اہلِ محبت کو آئے ہیں کیا کیا

قتیل شفائی

یہ معجزہ بھی محبت کبھی دکھائے مجھے
کہ سنگ تجھ پہ گرے اور زخم آئے مجھے
میں گھر سے تیری تمنا پہن کے جب نکلوں
برہنہ شہر میں کوئی نظر نہ آئے مجھے
میں اپنے دل سے نکالوں خیال کس کس کا
جو تو نہیں تو کوئی اور یاد آئے مجھے
وہ میرا دوست ہے سارے جہاں کو ہے معلوم
دغا کرے وہ کسی سے تو شرم آئے مجھے
مرحلہ رات کا جب آئے گا
جسم سائے کو ترس جائے گا
میری معزولی کی سننا چاہتے ہیں سب خبر
سوچتا ہوں جانشیں بن کر مرا آئے گا کون

کلیم عاجز

دل آئے ہے پھر دل میں درد آئے ہے
یوں ہی بات میں بات بڑھ جائے ہے
جنوں سب اشارے میں کہہ جائے ہے
مگر عقل کو کب سمجھ آئے ہے
پکاروں ہوں لیکن نہ باز آئے ہے
یہ دنیا کہاں ڈوبنے جائے ہے
قیامت جہاں آئے گی آئے گی
یہاں صبح آئے ہے شام آئے ہے

کیفی اعظمی

آج سوچا تو آنسو بھر آئے
مدتیں ہو گئیں مسکرائے
ہر قدم پر ادھر مڑ کے دیکھا
ان کی محفل سے ہم اٹھ تو آئے
دل کی نازک رگیں ٹوٹتی ہیں
یاد اتنا بھی کوئی نہ آئے
کہیں سے لوٹ کے ہم لڑکھڑائے ہیں کیا کیا
ستارے زیرِ قدم رات آئے ہیں کیا کیا
نشیب ہستی سے افسوس ہم ابھر نہ سکے
فرازِ دار سے پیغام آئے ہیں کیا کیا
اٹھا کے سر مجھے اتنا تو دیکھ لینے دے
کہ قتل گاہ میں دیوانے آئے ہیں کیا کیا

مجروح سلطان پوری

جس دم یہ سنا ہے صبحِ وطن محبوس فضائے زنداں میں
جیسے کہ صبا اے ہم قفسو بیتاب ہم آئے زنداں میں

محسن نقوی

رات ہمیں کچھ یاد نہیں تھا
رات بہت ہی یاد آئے ہو

ناصر کاظمی

کبھی یہ فکر کہ دن کو بھی منہ دکھانا ہے
کبھی یہ غم کہ پھر آئے نہ آئے شامِ فراق

نوح ناروی

یہ میرے پاس جو چپ چاپ آئے بیٹھے ہیں
ہزار فتنۂ محشر اٹھائے بیٹھے ہیں
چین ہو یا بے چینی ہو پہلے دل گھبرائے گا
جاتے جاتے جائے گی آتے آتے آئے گا
نوحؔ کے رونے پر ہنسنا بے دردوں کا خواب نہیں
بحر محبت میں اس سے اور بھی طوفان آئے گا