مرزا غالب

بھوکے نہیں ہیں سیرِ گلستان کے ہم ولے
کیوں کر نہ کھائیے کہ ہوا ہے بہار کی
آغوش گل کشودہ برائے وداع ہے
اے عندلیب چل! کہ چلے دن بہار کے
چھڑکے ہے شبنم آئینۂِ برگِ گل پر آب
اے عندلیب وقتِ ود اعِ بہار ہے
اے عندلیب یک کفِ خس بہر آشیاں
طوفان آمد آمد فصلِ بہار ہے
دل سے اٹھا لطفِ جلوہہائے معانی
غیرِ گل آئینۂِ بہار نہیں ہے

امام بخش ناسخ

برنگ حسن بتاں ہے دل شگفتہ مرا
جو اس چمن میں خزاں ہو تو پھر بہار نہ ہو
خار تدبیر ہے پیش گل تقدیر عبث
وقت پر باغ میں آتی ہے بہار آپ سے آپ
قدح لیے ہوئے گل مثل بادہ خوار آیا
خزاں چمن سے گئی موسمِ بہار آیا
خبر کرے کوئی زاہد کو آئے بہر مدد
شکست توبہ کو پھر موسمِ بہار آیا
شراب کیوں نہ چلے فصلِ گل میں اے زاہد
کہ نہریں جاری ہوئیں موسمِ بہار آیا

بہادر شاہ ظفر

یہی تنگ حال جو سب کا ہے یہ کرشمہ قدرت رب کا ہے
جو بہار تھی سو خزاں ہوئی جو خزاں تھی اب وہ بہار ہے
کانٹوں کو مت نکال چمن سے او باغباں
یہ بھی گلوں کے ساتھ پلے ہیں بہار میں
بلبل کو باغباں سے نہ صیاد سے گلہ
قسمت میں قید لکھی تھی فصلِ بہار میں

حیدر علی آتش

ہوائے دور مے خوش گوار راہ میں ہے
خزاں چمن سے ہے جاتی بہار راہ میں ہے

شیخ ابراہیم ذوق

اس روئے تابناک پہ ہر قطرۂِ عرق
گویا کہ اک ستارہ ہے صبحِ بہار کا
دیکھ اپنے در گوش کو عارض سے متصل
دیکھا نہ ہو ستارہ جو صبحِ بہار کا

مصحفی غلام ہمدانی

مری بے کسی پہ تری نظر نہ پڑی جب اے بت عشوہ گر
وہ جو تیرا عہدِ شباب تھا سو وہ عین جوشِ بہار تھا
برق رخسارِ یار پھر چمکی
اس چمن کی بہار پھر چمکی
صیاد کا برا ہو جس کے تغافلوں نے
کنجِ قفس میں رکھا فصلِ بہار مجھ کو
ہے آخر عمر اس چمن میں
دو چار ہی دن بہار ہے اور
قفس سے چھوڑے ہے اب مجھ کو کیا تو اے صیاد
چمن کے بیچ کہاں موسمِ بہار رہا

مصطفٰی خان شیفتہ

باغ بے صرفہ چل کے کیا کیجے
جن سے تھی باغ کی بہار نہیں
ہر کوچہ میں کھلی ہے جو دکانِ مے فروش
کیا فصل ہے شراب کی، موسمِ بہار کا؟

مومن خان مومن

نام بدبختی عشاق خزاں ہے بلبل
تو اگر نکلے چمن سے تو بہار آ جائے
سما رہے ہیں مگر تیرے نو بہ نو جلوے
کہ بن گیا ہے طلسم بہار آئینہ

فیض احمد فیض

زیرِ لب ہے ابھی تبسم دوست
منتشر جلوۂ بہار نہیں
ویراں ہے میکدہ، خم و ساغر اداس ہیں
تم کیا گئے کہ روٹھ گئے دن بہار کے
نہ گل کھلے ہیں، نہ ان سے ملے ، نہ مے پی ہے
عجیب رنگ میں اب کے بہار گزری ہے
رہِ خزاں میں تلاشِ بہار کرتے رہے
شبِ سیہ سے طلب حسنِ یار کرتے رہے
گلوں میں رنگ بھرے باد نو بہار چلے
چلے بھی آؤ کہ گلشن کا کاروبار چلے
رت بدلنے لگی رنگِ دل دیکھنا، رنگِ گلشن سے اب حال کھلتا نہیں
زخم چھلکا کوئی یا کوئی گل کھلا، اشک امڈے کہ ابرِ بہار آ گیا

مرزا رفیع سودا

خونِ جگر شراب و ترشح ہے چشمِ تر
ساغر مرا گرو نہیں ابرِ بہار کا
دیکھے بلبل جو یار کی صورت
پھر نہ دیکھے بہار کی صورت

یگانہ چنگیزی

خزاں کے جور سے واقف کوئی بہار نہ ہو
کسی کا پیرہن حسن تار تار نہ ہو
ٹپک کے آنکھوں سے آئے لہو جو دامن تک
تو اس بہار سے بہتر کوئی بہار نہ ہو
دکھائی آج ہی آنکھوں نے صورت فردا
خزاں کی سیر بھی ہنگامۂ بہار میں ہے
غبار بن کے لپٹتی ہے دامنِ دل سے
مٹے پہ بھی وہی دل بستگی بہار میں ہے
پر تولنے لگے پھر اسیران بدنصیب
شاید قریب آ گیا موسمِ بہار کا
موئے سفید کانپتے ہاتھ اور جامِ مے
دکھلا رہے ہیں رنگِ خزاں میں بہار کا
مستوں کی روحیں بھٹکیں گی اچھا نہیں ہے اب
گھرگھر کے آنا قبروں پر ابرِ بہار کا

باقی صدیقی

روش روش پہ سلگتے ہوئے شگوفوں سے
کبھی کبھی ہمیں اندازہ بہار ہوا
پتا پتا ہے مضمحل باقیؔ
ہم کہاں تک غم بہار کریں
چمن کو دیکھ کے دیکھو بنانے والے کو
مقام فکر بھی ہے صرف یہ بہار نہیں
اٹھا نقاب جب رخِ صبحِ بہار سے
روئی صبا لپٹ کے ہر اک شاخسار سے
شاخوں میں تھی دبی ہوئی شاید خزاں کی آگ
گلشن بھڑک اٹھا ہے نسیم بہار سے
روداد گلستاں کو نیا رنگ دے گیا
رستا رہا ہے خون جو زخم بہار سے
پھول سا رنگ، خار سے انداز
تجھ کو دیکھا بہار کو دیکھا
میں کتنا بیباک ہو گیا ہوں مجے سزا دو چمن پرستو!
بہار کہتے ہو تم جسے اس بہار پر غور کر رہا ہوں
تھا میسر نہ ایک تار ہمیں
ہنس پڑی دیکھ کر بہار ہمیں
دنیا ہے نام موت کا عقبے حیات کا
آگے خوشی تمہاری خزاں لو بہار لو

جون ایلیا

زندگی کی دھوپ میں مرجھا گیا میرا شباب
اب بہار آئی تو کیا ابرِ بہار آیا تو کیا

جگر مراد آبادی

کبھی شاخ و سبزہ و برگ پر کبھی غنچہ و گل و خار پر
میں چمن میں چاہے جہاں رہوں مرا حق ہے فصلِ بہار پر
مری سمت سے اسے اے صبا یہ پیام آخر غم سنا
ابھی دیکھنا ہو تو دیکھ جا کہ خزاں ہے اپنی بہار پر
ہائے یہ حسن تصور کا فریبِ رنگ و بو
میں یہ سمجھا جیسے وہ جانِ بہار آ ہی گیا

سراج الدین ظفر

لائی نہیں پیام کوئی زلفِ یار سے
مجھ کو شکایتیں ہیں نسیم بہار سے

عبدالحمید عدم

ترے گلستاں کی آبرو ہے مہک تری انفرادیت کی
تو کسمپرسی سے بجھ بھی جائے تو غیرت نو بہار ہو گا
سو کے جب وہ نگار اٹھتا ہے
مثل ابرِ بہار اٹھتا ہے

قمر جلالوی

کہتے تھے اہلِ قفس گلشن کا اب لیں گے نہ نام
باتوں باتوں میں مگر ذکرِ بہار آ ہی گیا
یہ دیکھنے ، قفس میں بنی کیا ہزار پر
نکہت چلی ہے دوشِ نسیم بہار پر

عرفان صدیقی

عادت سیر و تماشا نہیں جانے والی
دور سے دیکھتا رہتا ہوں بہار دنیا

مجید امجد

دن کٹ رہے ہیں کشمکشِ روزگار میں
دم گھٹ رہا ہے سایۂ ابرِ بہار میں
آتی ہے اپنے جسم کے جلنے کی بو مجھے
لٹتے ہیں نکہتوں کے سبو جب بہار میں
آ، ساز گلستاں کو بہ مضرابِ خار چھیڑ
مطرب، کوئی ترانہ بیادِ بہار چھیڑ
کل یہ جگہ تھی وادیِ نکہت، رباب اٹھا
کل یاں ہجومِ گل تھا، سرودِ بہار چھیڑ

احسان دانش

فسوں عجیب یہ اے موسمِ بہار کیا
کہ خار زار کو ہم رنگِ لالہ زار کیا
تڑپ کے آبلہ پا ایک بار پھر اٹھے
یہ کسی نے تذکرۂ آمد بہار کیا
مری نظر کا تو کیا ذکر خود بہار کے پھول
فریب خوردۂ رنگینی بہار رہے
تمام پھول تھے اور ظرف دامن گلچیں
جو بچ گئے وہ چراغ‌ شبِ بہار رہے
مری نگاہ میں ہے وہ حریم‌‌ زیبائی
کنیز بن کے جہاں مریم بہار رہے
خزاں خزاں ہو تو دور بہار کیا معنی
بہار ہو تو خزاں کیوں بنے بہار رہے
مری نظر سے وہ جلوے نہ رہ سکے مستور
جو زیر پردۂ پیراہن بہار رہے
جنونِ شوق میں تحقیق رنگ و بو کیسی
رہے چمن میں تو دیوانۂ بہار رہے
شباب لالہ و گل کو پکارنے والو
خزاں سرشت بہار آ گئی تو کیا ہو گا

اختر شیرانی

کلی کلی میں سمائی ہے نکہت سلمیٰ
شمیم حور ہے یہ بوئے نو بہار نہیں
غموں کی فصل ہمیشہ رہی تر و تازہ
یہ وہ خزاں ہے کہ شرمندۂ بہار نہیں
کسی کی زلفِ پریشاں کا سایۂ رقصاں ہے
فضا میں بال فشاں ابر نو بہار نہیں
گل فسردہ بھی اک طرفہ حسن رکھتا ہے
خزاں یہ ہے تو مجھے حسرتِ بہار نہیں
چمن کی چاندنی راتیں ہیں کس قدر ویراں
کہ اس بہار میں وہ ماہِ نو بہار نہیں
نہ وہ خزاں رہی باقی نہ وہ بہار رہی
رہی تو میری کہانی ہی یادگار رہی
وہ پھول ہوں جو کھلا ہو خزاں کے موسم میں
تمام عمر مجھے حسرتِ بہار رہی
زمان ہجر مٹے دور وصل یار آئے
الٰہی اب تو خزاں جائے اور بہار آئے
چمن کی ہر کلی آمادۂ تبسم ہے
بہار بن کے مری جان نو بہار آئے

اسرار الحق مجاز

آج پھرتا بہ چمن درپئے گل ہائے چمن
گنگناتا ہوا زنبور بہار آ ہی گیا
باغبانوں کو بتاؤ گل و نسریں سے کہو
اک خراب گل و نسرین بہار آ ہی گیا
زلف کا ابر سیہ بازوئے سیمیں پہ لیے
پھر کوئی خیمہ زن ساز بہار آ ہی گیا

اکبر معصوم

یہ دشت اور کسی دشت کا سراب سہی
یہ باغ اور کسی باغ کی بہار نہ ہو

آنس معین

یہ اور بات کہ رنگ بہار کم ہوگا
نئی رتوں میں درختوں کا بار کم ہوگا

بہزاد لکھنوی

صیاد کی رضا یہ ہم آنسو نہ پی سکے
عذر غم بہار کیا ہائے کیا کیا
رنگینی خیال سے کچھ بھی نہ بچ سکا
ہر شے کو پر بہار کیا ہائے کیا کیا

بیان میرٹھی

ہر ایک ذرہ نے ایجاد صد بہار کیا
یہ میری خاک کو کس گل نے رہ گزار کیا

علی سردار جعفری

چاک دل چاک جگرِ چاکِ گریباں والے
مثلِ گل آتے ہیں مانند بہار آتے ہیں
ابھی مے کدہ جواں ہے ابھی موج میں ہے ساقی
ابھی جام رقص میں ہے ابھی مے بہار میں ہے
کھلے ہیں مشرق و مغرب کی گود میں گلزار
مگر خزاں کو میسر نہیں یقین بہار

فارغ بخاری

دیکھے کوئی جو چاکِ گریباں کے پار بھی
آئینۂ خزاں میں ہے عکس بہار بھی

ماجد صدیقی

پت جھڑ کا سکوت ہے لبوں پر
ہمراہ مرے بہار بھی ہے

اختر امام رضوی

ہوا کے زخم کھلے تھے اداس چہرے پر
خزاں کے شہر سے کوٹی تو پر بہار گیا

تلوک چند محروم

باعث انبساط ہو آمد نو بہار کیا
رنگِ چمن دکھائے گا سینۂ داغدار کیا
جہاں میں بلبل‌ باغ خزاں نصیب ہوں میں
مری نواؤں میں رنگینی بہار نہیں
زوال حسن کو حسن نگار کیا جانے
خزاں قدم بہ قدم ہے بہار کیا جانے

جلیل مانک پوری

شباب ہو کہ نہ ہو حسنِ یار باقی ہے
یہاں کوئی بھی ہو موسمِ بہار باقی ہے
پکارتا ہے جنوں ہوش میں جو آتا ہوں
ٹھہر ٹھہر ابھی فصلِ بہار باقی ہے
پلا ساقی بہار آئے نہ آئے
گھٹا پھر بار بار آئے نہ آئے
ترے دل میں مسرت کے کھلیں پھول
مرے دل میں بہار آئے نہ آئے
جلیلؔ اب مے کشی کا لطف اٹھاؤ
پھر ابر نو بہار آئے نہ آئے

حسرت موہانی

نہ آئیں گے وہ حسرتؔ انتظار شوق میں یوں ہی
گزر جائیں گے ایام بہار آہستہ آہستہ

حفیظ جالندھری

مستوں پہ انگلیاں نہ اٹھاؤ بہار میں
دیکھو تو ہوش ہے بھی کسی ہشیار میں
کچھ محتسب کا خوف ہے کچھ شیخ کا لحاظ
پیتا ہوں چھپ کے دامن ابرِ بہار میں
وہ عندلیب گلشن معنی ہوں میں حفیظؔ
سوز سخن سے آگ لگا دوں بہار میں

رسا چغتائی

تیرے آنے کا انتظار رہا
عمر بھر موسمِ بہار رہا

سیماب اکبر آبادی

شاید جگہ نصیب ہو اس گل کے ہار میں
میں پھول بن کے آؤں گا اب کی بہار میں
کفنائے باغباں مجھے پھولوں کے ہار میں
کچھ تو برا ہو دل مرا اب کی بہار میں
گندھوا کے دل کو لائے ہیں پھولوں کے ہار میں
یہ ہار ان کو نذر کریں گے بہار میں
بادل کی یہ گرج نہیں ابرِ بہار میں
برا رہا ہے کوئی شرابی خمار میں
سیمابؔ پھول اگیں لحد عندلیب سے
اتنی تو زندگی ہو ہوائے بہار میں

شاد عظیم آبادی

گلوں کی سرخ رنگت جسم میں لوکے لگاتی ہے
دکھاتی ہے تماشا کس کی آنکھوں کو بہار اپنا
خزاں کا دور گیا موسمِ بہار آیا
مگر نہ اس دل بے صبر کو قرار آیا
جب اختیار چمن پر نہیں تو ہم کو کیا
ہزار بار اگر موسمِ بہار آیا

شان الحق حقی

امید کے افق سے نہ اٹھا غبار تک
دیکھی اگرچہ راہ خزاں سے بہار تک
ہے اب کی فصل میں رنگ بہار اور ہی کچھ
ہوا ہے نقشۂ شہر و دیار اور ہی کچھ
شگوفے آج بھی کھلتے ہیں کل بھی کھلتے تھے
ہے اس چمن کی خزاں اور بہار اور ہی کچھ

شکیل بدایونی

غمِ حیات بھی آغوش حسنِ یار میں ہے
یہ وہ خزاں ہے جو ڈوبی ہوئی بہار میں ہے
شگفتگی دل کارواں کو کیا سمجھے
وہ اک نگاہ جو الجھی ہوئی بہار میں ہے

فانی بدایونی

لے گیا چمن کو بھی موسمِ بہار آ کر
اب قفس کا گوشہ ہے حاصلِ بہار اپنا
فرشِ گل پھر بچھا رہی ہے نسیم
آئیے موسمِ بہار آیا
بقدر ہستی دل ہے خمار غم بدنام
خزاں خراب بہ اندازۂ بہار ہوئی
بہار نذر تغافل ہوئی خزاں ٹھہری
خزاں شہید تبسم ہوئی بہار ہوئی
اب گریباں کہیں سے چاک نہیں
شغل فصلِ بہار تھا نہ رہا

امیر مینائی

نخلِ امید میں نہ پھول نہ پھل
شجرِ بے بہار سا ہے کچھ

شاذ تمکنت

بدلتی رت ہے رگ سبزہ میں نمو کم کم
کلی کلی پہ ترا نام لکھ رہی ہے بہار

فراق گورکھپوری

گلشن عشق ہوں خزاں میری
وجہ رنگینی بہار بھی ہے

قابل اجمیری

بقدر جوش جنوں تار تار بھی نہ کیا
وہ پیرہن جسے نذر بہار بھی نہ کیا

قتیل شفائی

ابھی کونپلوں میں وہ رس کہاں جو گلوں کا روپ بدل سکے
ابھی گل فروش کے ہاتھ سے ہمیں احتیاج بہار ہے
تو نے دیکھی تو ہو گی شام خزاں
اے مریض بہار سونے دے

قیوم نظر

کیوں بیٹھ گئے غبار سے ہم
کچھ کہہ نہ سکے بہار سے ہم

کلیم عاجز

جب صبا آئی ادھر ذکرِ بہار آ ہی گیا
یاد ہم کو انقلاب روزگار آ ہی گیا
لالہ و گل پر جو گزری ہے گزرنے دیجیے
آپ کو تو مہرباں لطف بہار آ ہی گیا
بڑی طلب تھی بڑا انتظار دیکھو تو
بہار لائی ہے کیسی بہار دیکھو تو

مجروح سلطان پوری

مثال ملتی ہے کتنوں کی اس دوانے سے
چمن سے دور جو بیٹھا غم بہار کرے

محسن احسان

صبا میں تھا نہ دل آویزی بہار میں تھا
وہ اک اشارہ کہ اس چشم وضع دار میں تھا
تری نگاہ سے اوجھل سہی مگر محسنؔ
خزاں کا عکس بھی آئینۂ بہار میں تھا

میرا جی

رشک صحرا ہے گھر کی ویرانی
یہی رنگ بہار ہے اپنا

ناصر کاظمی

یوں آیا وہ جانِ بہار
جیسے جگ میں پھیلے بات
یہ غنچہ و گل ہیں سب مسافر
ہے قافلۂ بہار کچھ دیر
ٹھہرا تھا وہ گلعذار کچھ دیر
بھرپور رہی بہار کچھ دیر
یہ رنگِ خوں ہے گلوں پر نکھار اگر ہے بھی
’’حنائے پائے خزاں ہے بہار اگر ہے بھی‘‘