مرزا غالب

ترے سروِ قامت سے اک قدِ آدم
قیامت کے فتنے کو کم دیکھتے ہیں
لکھنؤ آنے کا باعث نہیں کھلتا یعنی
ہوسِ سیر و تماشا، سو وہ کم ہے ہم کو
بہت دنوں میں تغافل نے تیرے پیدا کی
وہ اک نگہ کہ ، بظاہر نگاہ سے کم ہے
بے اعتدالیوں سے سبک سب میں ہم ہوئے
جتنے زیادہ ہو گئے اتنے ہی کم ہوئے

انشاء اللہ خان انشا

کنایہ اور ڈھب کا اس مری مجلس میں کم کیجے
اجی سب تاڑ جاویں گے نہ ایسا تو ستم کیجے
کیا این و ملک و وضع و اضافت کا دخل واں
ہے انفعال و فعل متیٰ کیف و کم کے ساتھ
جی نہ لگ جائے کہیں تجھ سے اسی واسطے بس
رفتہ رفتہ ترے ہم ملنے کو کم کرتے ہیں
گرمی نے کچھ آگ اور بھی سینہ میں لگائی
ہر طور غرض آپ سے ملنا ہی کم اچھا

بہادر شاہ ظفر

شمار اک شب کیا ہم نے جو اپنے دل کے داغوں سے
تو انجم چرخ ہشتم کے بہت سے ان سے کم نکلے
یوں تو بہت ہیں اور بھی خوبانِ دل فریب
پر جیسے پر فن آپ ہیں کم ایسے شخص ہیں
رہے حرص و ہوا دائم عزیزو ساتھ جب اپنے
نہ کیونکر فکرِ بیش و کم ہمیں بھی ہو تمہیں بھی ہو

حیدر علی آتش

ہزاروں حسرتیں جاویں گی میرے ساتھ دنیا سے
شرار و برق سے بھی عرصۂِ ہستی کو کم پایا
آپ کی نازک کمر پر بوجھ پڑتا ہے بہت
بڑھ چلے ہیں حد سے گیسو کچھ انہیں کم کیجیے
روز مردم شب کیے دیتا ہے سرمہ پوچھیے
خون ہوتے ہیں بہت شوق حنا کم کیجیے
قلزم فکر میں ہر چند لگائے غوطے
در مضموں کوئی یاروں سے ہوا کم پیدا

داغ دہلوی

ہماری طرف اب وہ کم دیکھتے ہیں
وہ نظریں نہیں جن کو ہم دیکھتے ہیں
غنیمت ہے چشم تغافل بھی ان کی
بہت دیکھتے ہیں جو کم دیکھتے ہیں
نگہباں سے بھی کیا ہوئی بد گمانی
اب اس کو ترے ساتھ کم دیکھتے ہیں
ایک ساغر پر ہے اپنی زندگی
رفتہ رفتہ اس سے بھی کم کیا کریں
نہیں گھٹتی شبِ فرقت بھی اکثر ہم نے دیکھا ہے
جو بڑھ جاتے ہیں حد سے وہ ہی گھٹ کر کم بھی ہوتے ہیں

شیخ ابراہیم ذوق

دلا ربط اس سے رکھنا کم ابھی سے
جتا دیتے ہیں تجھ کو ہم ابھی سے

مصطفٰی خان شیفتہ

وہ مرا دل ہے کہ خود بینوں کو
دیکھ کر آئینہ کم یاد آیا

مومن خان مومن

وہاں ترقی جمال کو ہے یہاں محبت ہے روز افزوں
شریک زیبا تھا بوالہوس بھی جو بے وفائی میں کم نہ ہوتا

فیض احمد فیض

اور کچھ دیر نہ گزرے شبِ فرقت سے کہو
دل بھی کم دکھتا ہے ، وہ یاد بھی کم آتے ہیں
حلقہ کیے بیٹھے رہو اک شمع کو یارو
کچھ روشنی باقی تو ہے ہر چند کہ کم ہے
بہت ملا نہ ملا، زندگی سے غم کیا ہے
متاعِ درد بہم ہے تو بیش و کم کیا ہے

مرزا رفیع سودا

مگر تجھ سے رنجیدہ خاطر ہے سوداؔ
اسے تیرے کوچے میں کم دیکھتے ہیں

باقی صدیقی

تو قادرِ مطلق ہے یہی وصف ہے کم کیا
آگے کرے اک بندہ ناچیز رقم کیا
جب سے اٹھ آئے تری محفل سے
ہم کہیں اور بھی کم جاتے ہیں
جب سے دل میں ترا غم رکھتے ہیں
خود سے ہم واسطہ کم رکھتے ہیں
ہم یہ کیجے نہ بھروسا باقیؔ
ہم خیال اپنا بھی کم رکھتے ہیں
زندگی جنتی بلند اڑتی ہے
درد ہم اتنا ہی کم دیکھتے ہیں
دل پہ کچھ کھل سکا نہ رازِ غم
وہ نگاہیں اٹھیں مگر کم کم
مسکراہٹ کو سمجھ لیتے ہیں دل کا پر تو
آشنا دہر کے انداز سے کم ہیں ہم لوگ
کھائیں کیوں دہر کا غم دیوانے
اور دنیا میں ہیں کم دیوانے
آپ کب ماول کرم نہ ہوئے
حادثات جہاں ہی کم نہ ہوئے

جون ایلیا

دل کی تکلیف کم نہیں کرتے
اب کوئی شکوہ ہم نہیں کرتے
جرم میں ہم کمی کریں بھی تو کیوں
تم سزا بھی تو کم نہیں کرتے
میں اپنے آپ میں نہ ملا اس کا غم نہیں
غم تو یہ ہے کہ تم بھی بہت کم ملے تمہیں

جگر مراد آبادی

بے فائدہ الم نہیں بے کار غم نہیں
توفیق دے خدا تو یہ نعمت بھی کم نہیں
میری زباں پہ شکوۂ اہلِ ستم نہیں
مجھ کو جگا دیا یہی احسان کم نہیں
شکوہ تو ایک چھیڑ ہے لیکن حقیقتاً
تیرا ستم بھی تیری عنایت سے کم نہیں
جنوں کم جستجو کم تشنگی کم
نظر آئے نہ کیوں دریا بھی شبنم
توجہ بے نہایت اور نظر کم
خوشا یہ التفات حسن برہم
طبیعت ان دنوں بیگانۂ غم ہوتی جاتی ہے
مرے حصے کی گویا ہر خوشی کم ہوتی جاتی ہے
قیامت کیا یہ اے حسنِ دو عالم ہوتی جاتی ہے
کہ محفل تو وہی ہے دل کشی کم ہوتی جاتی ہے
وہی ہیں شاہد و ساقی مگر دل بجھتا جاتا ہے
وہی ہے شمع لیکن روشنی کم ہوتی جاتی ہے
وہی ہے زندگی لیکن جگرؔ یہ حال ہے اپنا
کہ جیسے زندگی سے زندگی کم ہوتی جاتی ہے

قمر جلالوی

یہ مئے ہے ذرا سوچ لے اے شیخِ حرم اور
تو پہلے پہل پیتا ہے کم اور ارے کم اور
چارہ گر میں تری خاطر سے کہے دیتا ہوں
درد ہوتا ہے مگر پہلے سے کم ہوتا ہے

عرفان صدیقی

سخت ہے مرحلۂ رزق بھی ہم جانتے ہیں
پر اسے معرکۂ عشق سے کم جانتے ہیں
یہ شام عمر، یہ خواہش کی تیز روشنیاں
لویں اب اپنے چراغوں کی کم کریں دونوں
نیاز مند یہ دنیا نہیں کسی کی مگر
اسے خبر ہے کہ میں ناز کم اٹھاتا ہوں
کیا ہرن ہے کہ کبھی رم نہیں کرتا ہم سے
فاصلہ اپنا مگر کم نہیں کرتا ہم سے

مصطفی زیدی

گریہ تو اکثر رہا پیہم رہا
پھر بھی دل کے بوجھ سے کچھ کم رہا
ہمیں بھی بادہ گساری سے عار تھی لیکن
شراب ظرف سے کم ہی نہ ہو تو کیا کیجے

رئیس فروغؔ

آنکھ جو ہم کو دکھاتی ہے وہ ہم کیا دیکھیں
دیکھنا ہے تو کسی خواب سے کم کیا دیکھیں
ہم فقیروں کے تکیے پہ کیوں آج کل
شاہ جنات ملتا ہے کم دوستو

ادا جعفری

کسی خیال کا سایہ کسی امید کی دھوپ
کوئی تو آئے کہ دل کیف و کم کو پہچانے
جو ہم سفر بھی رہے ہیں شریک منزل بھی
کچھ اجنبی تو نہ تھے پھر بھی کم کو پہچانے

اسرار الحق مجاز

جنونِ شوق اب بھی کم نہیں ہے
مگر وہ آج بھی برہم نہیں ہے
تقاضے کیوں کروں پیہم نہ ساقی
کسے یاں فکرِ بیش و کم نہیں ہے
ادھر مشکوک ہے میری صداقت
ادھر بھی بد گمانی کم نہیں ہے

بہزاد لکھنوی

جو لطف زندگانی مل رہا تھا گھٹتا جاتا ہے
خلش جو دل میں رہتی تھی وہ کم محسوس کرتا ہوں

بشیر بدر

میں نے دو چار کتابیں تو پڑھی ہیں لیکن
شہر کے طور طریقے مجھے کم آتے ہیں

زہرا نگاہ

ایک گل تنہائی تھا جو ہمدم تھا
خار و غبار کا سرمایہ بھی کم کم تھا

ضیا جالندھری

تم نے ہم کو جب بھی دیکھا شکر بہ لب تھے یا خاموش
یوں تو اکثر روئے لیکن چھپ چھپ کم کم دور ہی دور
قطع سرِ شاخ نرم آغاز نموئے نو
صدمے مری چاہت کو پہنچے تو پہ کم پہنچے
میرے ارمان تھے برسات کے بادل کی طرح
غنچے شاکی ہیں کہ یہ ابر بہت کم برسا

عالم تاب تشنہ

گنتی میں بے شمار تھے کم کر دیے گئے
ہم ساتھ کے قبیلوں میں ضم کر دیے گئے
پہلے ہی کم تھی قریۂ جاناں میں روشنی
اور اس پہ کچھ چراغ بھی کم کر دیے گئے

احمد راہی

یہ اپنا دل ہے کہ اس حال میں بھی زندہ ہیں
ستم کچھ اہل ستم ہم پہ کم نہیں کرتے

ماجد صدیقی

کیوں مرے ہو کے دور رہتے ہو
چاند ہے آسماں پہ کم تنہا

تلوک چند محروم

بظاہر گرم ہے بازار الفت
مگر جنسِ وفا کم ہو گئی ہے

ثروت حسین

یہ ہونٹ ترے ریشم ایسے
کھلتے ہیں شگوفے کم ایسے

جوش ملیح آبادی

غیظ کی دوڑی ہوئی ہے لہر سی اصنام میں
جوشؔ اب اہل حرم سے دوستی کم کیجیے
خجل تھا جس کی شورش سے تلاطم بحر ہستی کا
مرے دل میں وہ ہلچل جوشؔ اب کم ہوتی جاتی ہے

حفیظ ہوشیارپوری

وصل کی شیرینی میں پنہاں ہجر کی تلخی بھی ہے کم کم
تم سے ملنے کی بھی خوشی ہے تم سے جدا ہونے کا بھی غم
محبت کرنے والے کم نہ ہوں گے
تری محفل میں لیکن ہم نہ ہوں گے
اگر تو اتفاقاً مل بھی جائے
تری فرقت کے صدمے کم نہ ہوں گے

شان الحق حقی

کرتی ہیں مرے دل سے وہ خاموش نگاہیں
کچھ رمز اشاروں سے بھی کم اور طرح کے
غم ہوتے رہے دل میں کم و بیش ولیکن
بیش اور طرح کے ہوئے کم اور طرح کے

شکیل بدایونی

مری زندگی پہ نہ مسکرا مجھے زندگی کا الم نہیں
جسے تیرے غم سے ہو واسطہ وہ خزاں بہار سے کم نہیں
کیا خوشی میں زندگی کا ہوش کم رہ جائے گا
غم اگر مٹ بھی گیا احساسِ غم رہ جائے گا

عزیز حامد مدنی

ساری فضا تھی وادی مجنوں کی خواب ناک
جو روشناس مرگ محبت تھے کم گئے
مرا چاکِ گریباں چاک دل سے ملنے والا ہے
مگر یہ حادثے بھی بیش و کم ہوتے ہی رہتے ہیں
اک لا تعلقی کی فضا درمیاں رہی
جب دو دلوں میں فرق بہت کم سا رہ گیا

فانی بدایونی

مری آوارگی ہر قید سے بے زار ہے شاید
کہ اب اس کی گلی میں بھی گزر ہوتا ہے کم میرا
پھر چھیڑ دیا وسعت محشر کی فضا نے
سودا ترے وحشی کا ابھی کم نہ ہوا تھا
غمِ دنیا بقدرِ ظرف نہیں
حسرت بیش و شکوۂ کم کیا

احمد فراز

تری یادوں کا وہ عالم نہیں ہے
مگر دل کی اداسی کم نہیں ہے
جنونِ پارسائی بھی تو ناصح
مری دیوانگی سے کم نہیں ہے
فراز اس قحط زارِ روشنی میں
چراغوں کا دھواں بھی کم نہیں ہے
سب کچھ سہی فراز پر اتنا ضرور ہے
دنیا میں ایسے لوگ بہت کم ہیں دوستو
نبھاتا کون ہے قول و قسم تم جانتے تھے
یہ قربت عارضی ہے کم سے کم تم جانتے تھے
سو اب کیوں ہر کس و ناکس سے یہ شکوہ شکایت
یہ سب سود و زیاں، یہ بیش و کم تم جانتے تھے

شاذ تمکنت

مثال شعلہ و شبنم رہا ہے آنکھوں میں
وہ ایک شخص جو کم کم رہا ہے آنکھوں میں
کبھی زیادہ کبھی کم رہا ہے آنکھوں میں
لہو کا سلسلہ پیہم رہا ہے آنکھوں میں

فراق گورکھپوری

اٹھنے والی ہے بزم ماضی کی
روشنی کم ہے زندگی کم ہے
میرے سینے سے لگ کے سو جاؤٔ
پلکیں بھاری ہیں رات بھی کم ہے
یوں بھی دل میں نہیں وہ پہلی امنگ
اور تیری نگاہ بھی کم ہے
اور کیوں چھیڑتی ہے گردش چرخ
وہ نظر پھر گئی یہ کیا کم ہے
دیے جاتی ہے لو صدائے فراقؔ
ہاں وہی سوز و ساز کم کم ہے
غالبؔ و میرؔ و مصحفیؔ
ہم بھی فراقؔ کم نہیں

قتیل شفائی

اس بھری خدائی میں وہ بھی آج اکیلے ہیں
خلوتوں میں رہ کر بھی جو رہے تھے کم تنہا
میں سرمد و منصور بنا ہوں تری خاطر
یہ بھی تری امید سے کم ہے تو مجھے کیا

کلیم عاجز

ان کی خاطر سے کبھی ہم مسکرا اٹھے تو کیا
مسکرا لینے سے دل کا درد کم ہوتا نہیں
مانگتا ہے ہم سے ساقی قطرے قطرے کا حساب
غیر سے کوئی حساب بیش و کم ہوتا نہیں

مجروح سلطان پوری

گو رات مری صبح کی محرم تو نہیں ہے
سورج سے ترا رنگِ حنا کم تو نہیں ہے

ناصر کاظمی

دل میں اک عمر جس نے شور کیا
وہ بہت کم رہا ہے آنکھوں میں