مرزا غالب

بہت سہی غمِ گیتی، شراب کم کیا ہے ؟
غلام ساقی کوثر ہوں، مجھ کو غم کیا ہے

انشاء اللہ خان انشا

کوئے بتاں سے طوفِ حرم کو چلے تو ہم
لیکن کمال حسرت و حرمان و غم کے ساتھ
عشق میں شرم کہاں ناصح مشفق یہ بجا
آپ کو کیا ہے جو اس بات کا غم کرتے ہیں

بہادر شاہ ظفر

کہاں آنسو کے قطرے خونِ دل سے ہیں بہم نکلے
یہ دل میں جمع تھے مدت سے کچھ پیکانِ غم نکلے
واقف ہیں ہم کہ حضرت غم ایسے شخص ہیں
اور پھر ہم ان کے یار ہیں ہم ایسے شخص ہیں
ہم یہ تو نہیں کہتے کہ غم کہہ نہیں سکتے
پر جو سبب غم ہے وہ ہم کہہ نہیں سکتے
محبت چاہیے باہم ہمیں بھی ہو تمہیں بھی ہو
خوشی ہو اس میں یا ہو غم ہمیں بھی ہو تمہیں بھی ہو

حیدر علی آتش

تھی سزا اپنی جو شادی مرگ قسمت نے کیا
ہجر میں کس نے کہا تھا وصل کا غم کیجیے
روز مولود سے ساتھ اپنے ہوا غم پیدا
لالہ ساں داغ اٹھانے کو ہوئے ہم پیدا

داغ دہلوی

دل گیا تم نے لیا ہم کیا کریں
جانے والی چیز کا غم کیا کریں
فلک دیتا ہے جن کو عیش ان کو غم بھی ہوتے ہیں
جہاں بجتے ہیں نقارے وہیں ماتم بھی ہوتے ہیں

شیخ ابراہیم ذوق

ہوئے کیوں اس پہ عاشق ہم ابھی سے
لگایا جی کو ناحق غم ابھی سے
کہا جانے کو کس نے مینہ کھلے پر
کہ چھایا دل پہ ابر غم ابھی سے

مصحفی غلام ہمدانی

جلتا ہے جگر تو چشمِ نم ہے
کیا جانے یہ کس کا مجھ کو غم ہے

مومن خان مومن

عدم میں رہتے تو شاد رہتے اسے بھی فکر ستم نہ ہوتا
جو ہم نہ ہوتے تو دل نہ ہوتا جو دل نہ ہوتا تو غم نہ ہوتا

فیض احمد فیض

بزم اہلِ طرب کو شرماو
بزمِ اصحابِ غم کی بات کرو
دل میں اب یوں ترے بھولے ہوئے غم آتے ہیں
جیسے بچھڑے ہوئے کعبے میں صنم آتے ہیں
آوارہ ہے پھر کوہِ ندا پر جو بشارت
تمہیدِ مسرت ہے کہ طول شبِ غم ہے
بہت ملا نہ ملا، زندگی سے غم کیا ہے
متاعِ درد بہم ہے تو بیش و کم کیا ہے

باقی صدیقی

تو خالق کونین ہے و حاصل کونین
ہے جس پہ نظر تیری اسے کوئی ہو غم کیا
پی کے تلخابۂ غم جاتے ہیں
لے تری بزم سے ہم جاتے ہیں
جب سے دل میں ترا غم رکھتے ہیں
خود سے ہم واسطہ کم رکھتے ہیں
شک نہ کیجے مری خاموشی پر
لوگ سو طرح کے غم رکھتے ہیں
ایک عالم سرنگوں پایا گیا
جس طرف ہم لے کیتیرا غم گئے
دل پہ کچھ کھل سکا نہ رازِ غم
وہ نگاہیں اٹھیں مگر کم کم
دیکھ کر تیرے گیسوے برھم
مسکرانے لگے حیات کے غم
کھڑا ہوں دل کے دوارہے پہ ہاتھ پھیلائے
چھپائے چھپتے نہیں زندگی کے غم اب تو
کھائیں کیوں دہر کا غم دیوانے
اور دنیا میں ہیں کم دیوانے
یر ہو تیری کم نگاہی کی
ہم کبھی بے نیاز غم نہ ہوئے
شمع کی طرح ہم جلے باقیؔ
پھر بھی آگاہ رازِ غم نہ ہوئے

جون ایلیا

شرمندگی ہے ہم کو بہت ہم ملے تمہیں
تم سر بہ سر خوشی تھے مگر غم ملے تمہیں

جگر مراد آبادی

بے فائدہ الم نہیں بے کار غم نہیں
توفیق دے خدا تو یہ نعمت بھی کم نہیں
بحمداللہ تو ہے جس کا ہمدم
کہاں اس قلب میں گنجائش غم
مسرت زندگی کا دوسرا نام
مسرت کی تمنا مستقل غم
طبیعت ان دنوں بیگانۂ غم ہوتی جاتی ہے
مرے حصے کی گویا ہر خوشی کم ہوتی جاتی ہے

قمر جلالوی

نہ پوچھ صیاد حال مجھ سے کہ کیوں مقدر پہ رو رہا ہوں
قفس میں گر بال و پر نہ کٹتے مجھے اسیری کا غم نہ ہوتا
وہ ستا کر مجھے کہتے ہیں کہ غم ہوتا ہے
یہ ستم اور بھی بالائے ستم ہوتا ہے
ہجر کی رات بھی ہوتی ہے عجب رات قمر
تارے ہنستے ہیں فلک پر مجھے غم ہوتا ہے

عرفان صدیقی

اکیلا شخص کسے حالِ دل سنانے جائے
کبھی ملیں تو بچھڑنے کا غم کریں دونوں
ان کا غم تو خیر پھر بھی ان کا غم ہے دوستو
ہم پہ تو دنیا کے ہر غم کا کرم ہے دوستو
مجھے اس طرح نصرت کی نوید آئی کہ دم بھر میں
اٹھا کر طاق پر سب دفترِ غم رکھ دیا دیکھو
کتنے دلدار تھے اربابِ ستم دلی کے
چین ملتا ہے تو یاد آتے ہیں غم دلی کے

مصطفی زیدی

اس وفا دشمن سے چھٹ جانے کے بعد
خود کو پا لینے کا کتنا غم رہا
کوئی رفیق بہم ہی نہ ہو تو کیا کیجے
کبھی کبھی ترا غم ہی نہ ہو تو کیا کیجے

احسان دانش

بسا اوقات مایوسی میں یہ عالم بھی ہوتا ہے
تبسم کی تہوں میں اہتمام غم بھی ہوتا ہے
خوشی تنہا نہیں آتی جلو میں غم بھی ہوتا ہے
جہاں ہنستی ہیں کلیاں گریۂ شبنم بھی ہوتا ہے
جسے کوئی سمجھ لے سادگی سے حاصلِ ہستی
وہ جب حاصل نہیں ہوتا تو آخر غم بھی ہوتا ہے

ادا جعفری

کچھ بت بنا لیے ہیں چٹانیں تراش کر
دل بھی بہانہ ساز ہے غم بھی بہانہ ساز
یہ خود فریب اجالے یہ ہاتھ ہاتھ دیے
دیے بجھاؤ کہ انسان غم کو پہچانے
یہ خود فریب اجالے یہ ہاتھ ہاتھ دیے
دیے بجھاؤ کہ انسان غم کو پہچانے

اسرار الحق مجاز

بہت کچھ اور بھی ہے اس جہاں میں
یہ دنیا محض غم ہی غم نہیں ہے
مری بربادیوں کا ہم نشینو
تمہیں کیا خود مجھے بھی غم نہیں ہے

بہزاد لکھنوی

خوشی محسوس کرتا ہوں نہ غم محسوس کرتا ہوں
مگر ہاں دل میں کچھ کچھ زیر و بم محسوس کرتا ہوں
کبھی پاتا ہوں دل میں ایک حشر درد بیتابی
کبھی میں اپنے دل میں درد و غم محسوس کرتا ہوں

بشیر بدر

کوئی لشکر کہ دھڑکتے ہوئے غم آتے ہیں
شام کے سائے بہت تیز قدم آتے ہیں

ضیا جالندھری

دیکھیں آئینے کے مانند سہیں غم کی طرح
ہم کہ ہیں بزمِ گل و لالہ میں شبنم کی طرح
دل ہی دل میں سلگ کے بجھے ہم اور سہے غم دور ہی دور
تم سے کون سی آس بندھی تھی تم سے رہے ہم دور ہی دور
افتاد طبیعت سے اس حال کو ہم پہنچے
شدت کی محبت میں شدت ہی کے غم پہنچے

ظہیر کاشمیری

تری چشم طرب کو دیکھنا پڑتا ہے پر نم بھی
محبت خندۂ بے باک بھی ہے گریۂ غم بھی
مری تنہائیوں کی دل کشی تیری بلا جانے
میری تنہائیوں سے پیار کرتا ہے ترا غم بھی

عبید اللہ علیم

جو لکھے وہ خواب مرے اب آنکھوں آنکھوں زندہ ہیں
جو اب تک نہیں لکھ پایا میں ان خوابوں کے غم میں ہوں

احمد راہی

کبھی حیات کا غم ہے کبھی ترا غم ہے
ہر ایک رنگ میں ناکامیوں کا ماتم ہے
مرے حبیب مری مسکراہٹوں پہ نہ جا
خدا گواہ مجھے آج بھی ترا غم ہے
تمہاری زلف کو سلجھائیں گے وہ دیوانے
جو اپنے چاک گریباں کا غم نہیں کرتے

ماجد صدیقی

بزم آرا ہیں لوگ ہم تنہا
لے کے بیٹھے ہیں تیرا غم تنہا
ظرف کی داد یہی ہو جیسے
دینے والے ہمیں غم دیتے ہیں
رہ بہ رہ پھر وہی اندیشۂ غم
پھر وہی ہم ہیں وہی دشت ستم
زندگانی سے الجھنا ہے مجھے
رہنے دیجے گا مجھی تک مرا غم

تلوک چند محروم

یہی حالت ہے اک مدت سے محرومؔ
طبیعت خوگر غم ہو گئی ہے

جوش ملیح آبادی

جی میں آتا ہے کہ پھر مژگاں کو برہم کیجیے
کاسۂ دل لے کے پھر دریوزۂ غم کیجیے
نہ جانے سینۂ احساس پر یہ ہات ہے کس کا
طبیعت بے نیاز شادی و غم ہوتی جاتی ہے

حسرت موہانی

ستم ہو جائے تمہید کرم ایسا بھی ہوتا ہے
محبت میں بتا اے ضبطِ غم ایسا بھی ہوتا ہے
بدعوائے وفا کیوں شکوہ سنج جور ہے حسرتؔ
دیار شوق میں اے محوِ غم ایسا بھی ہوتا ہے

حفیظ ہوشیارپوری

وصل کی شیرینی میں پنہاں ہجر کی تلخی بھی ہے کم کم
تم سے ملنے کی بھی خوشی ہے تم سے جدا ہونے کا بھی غم
زمانے بھر کے غم یا اک ترا غم
یہ غم ہو گا تو کتنے غم نہ ہوں گے

رسا چغتائی

اپنی رو میں مست و غزل خواں
موج ہوائے غم رہتی ہے

شان الحق حقی

نکلے تری دنیا کے ستم اور طرح کے
درکار مرے دل کو تھے غم اور طرح کے

شکیل بدایونی

کیا خوشی میں زندگی کا ہوش کم رہ جائے گا
غم اگر مٹ بھی گیا احساسِ غم رہ جائے گا

فانی بدایونی

وہ کہتے ہیں کہ ہے ٹوٹے ہوئے دل پر کرم میرا
مگر منجملۂ آداب غم خواری ہے غم میرا
زہے تقدیر ناکامی کہ تیری مصلحت ٹھہری
تری مرضی سے وابستہ ہوا اللہ رے غم میرا
یہ محروم تبسم میرِ سامان تبسم ہے
تری بزمِ طرب میں معتبر ہے اشکِ غم میرا
یا عشرت دو روزہ تھا یا حسرت دیروز
وہ لمحۂ ہستی جو ابھی غم نہ ہوا تھا
واہمہ کی یہ مشق پیہم کیا
یاس و امید شادی و غم کیا
ان کے آگے غم اک فسانہ ہے
ان سے کہیے فسانۂ غم کیا
جستجوئے نشاط مبہم کیا
دل میسر ہے لذتِ غم کیا
دیر میں یا حرم میں گزرے گی
عمر تیرے ہی غم میں گزرے گی
زندگی یادِ دوست ہے یعنی
زندگی ہے تو غم میں گزرے گی
دل کو شوق نشاطِ وصل نہ چھیڑ
غم میں گزری ہے غم میں گزرے گی
حشر کہتے ہیں جس کو اے فانیؔ
وہ گھڑی شرحِ غم میں گزرے گی

احمد فراز

تیرا غم اپنی جگہ دنیا کے غم اپنی جگہ
پھر بھی اپنے عہد پر قائم ہم اپنی جگہ
ہوائے قربِ منزل کا برا ہو
فراق ہم سفر کا غم نہیں ہے

شاذ تمکنت

دل تو آمادۂ غم تھا بہ ایں بربادی جاں
مگر اندازۂ غم نے مجھے جینے نہ دیا

فراق گورکھپوری

یہ تو نہیں کہ غم نہیں
ہاں مری آنکھ نم نہیں
اپنے غم کا مجھے کہاں غم ہے
اے کہ تیری خوشی مقدم ہے

قتیل شفائی

اے دوست! تری آنکھ جو نم ہے تو مجھے کیا
میں خوب ہنسوں گا تجھے غم ہے تو مجھے کیا
ایک ترا ہی دل نہیں گھائل درد کے مارے اور بھی ہیں
کچھ اپنا کچھ دنیا کا غم دیکھنے والے دیکھتا جا
اندیشۂ ارباب حرم ساتھ رہے گا
جنت بھی ملے گی تو یہ غم ساتھ رہے گا

کلیم عاجز

امتحان شوق میں ثابت قدم ہوتا نہیں
عشق جب تک واقفِ آداب غم ہوتا نہیں
رات بھر ہوتی ہیں کیا کیا انجمن آرائیاں
شمع کا کوئی شریک صبحِ غم ہوتا نہیں
یہ دیوانے کبھی پابندیوں کا غم نہیں لیں گے
گریباں چاک جب تک کر نہ لیں گے دم نہیں لیں گے
غمِ دل ہی کے ماروں کو غمِ ایام بھی دے دو
غم اتنا لینے والے کیا اب اتنا غم نہیں لیں گے

مجروح سلطان پوری

اب کارگہ دہر میں لگتا ہے بہت دل
اے دوست کہیں یہ بھی ترا غم تو نہیں ہے
جو سمجھاتے بھی آ کر واعظ برہم تو کیا کرتے
ہم اس دنیا کے آگے اس جہاں کا غم تو کیا کرتے

ناصر کاظمی

رہ نوردِ بیابانِ غم صبر کر صبر کر
کارواں پھر ملیں گے بہم صبر کر صبر کر