مرزا غالب

زندگی یوں بھی گزر ہی جاتی
کیوں ترا راہ گزر یاد آیا
جانا پڑا رقیب کے در پر ہزار بار
اے کاش جانتا نہ تری رہ گزر کو میں
یہ کس بہشت شمائل کی آمد آمد ہے ؟
کہ غیرِ جلوۂِ گل رہ گزر میں خاک نہیں
فردا و دی کا تفرقہ یک بار مٹ گیا
کل تم گئے کہ ہم پہ قیامت گزر گئی

انشاء اللہ خان انشا

لختِ دل آ کے مسافر سے ٹھہرتے ہیں یہاں
چشم ہے ہم سے گداؤں کی گزر کا تکیہ

داغ دہلوی

آمد ہے کسی کی کہ گیا کوئی ادھر سے
کیوں سب طرف راہ گزر دیکھ رہے ہیں

شیخ ابراہیم ذوق

پہنچیں گے رہ گزر یار تلک کیوں کر ہم
پہلے جب تک نہ دو عالم سے گزر جائیں گے

مصحفی غلام ہمدانی

حیران ہوں کہ کیوں کہ یہ قصہ چکے مرا
سر رکھ کے تیغ ہی پہ گزر جاؤں کیا کروں
کیا میں جاتا ہوں صنم چھٹ ترے در اور کہیں
لے قسم مجھ سے جو میرا ہو گزر اور کہیں

مصطفٰی خان شیفتہ

تزئین میری گور کی لازم ہے خوب سی
تقریبِ سیر ہی سے وہ شاید گزر کریں

میر مہدی مجروح

ہوا گو پائمال غیر مجروحؔ
نہ سرکا یار کے پر رہ گزر سے

فیض احمد فیض

فیض آتے ہیں رہِ عشق میں جو سخت مقام
آنے والوں سے کہو ہم تو گزر جائیں گے

باقی صدیقی

حیرت ہے کہ سامنے سے تیرے
غیروں کی طرح گزر گئے ہم
آ دیکھ مجھ سے روٹھنے والے ترے بغیر
دن بھی گزر گیا، شبِ غم بھی گزر گئی
وارفتگان شوق کا باقیؔ نہ حال پوچھ
دل سے اکٹھی وہ موج کہ سر سے گزر گئی
مت دیکھ کہ ہے کہاں زمانہ
یہ سچ کہ کیا گزر رہی ہے
زندگی کتنی کٹھن راہوں سے
باتوں باتوں میں گزر آئی ہے

جون ایلیا

بے دلی کیا یوں ہی دن گزر جائیں گے
صرف زندہ رہے ہم تو مر جائیں گے
اے کوئے یار تیرے زمانے گزر گئے
جو اپنے گھر سے آئے تھے وہ اپنے گھر گئے
ہم نے بھی زندگی کو تماشا بنا دیا
اس سے گزر گئے کبھی خود سے گزر گئے
شوق کا رنگ بجھ گیا یاد کے زخم بھر گئے
کیا مری فصل ہو چکی کیا مرے دن گزر گئے
دل کا دیار خواب میں دور تلک گزر رہا
پاؤں نہیں تھے درمیاں آج بڑا سفر رہا
اب ہے بس اپنا سامنا در پیش
ہر کسی سے گزر گیا ہوں میں
آدمی وقت پر گیا ہو گا
وقت پہلے گزر گیا ہو گا
دن بھلا کس طرح گزارو گے
وصل کی شب بھی اب گزر لی ہے
خود میں ہی گزر کے تھک گیا ہوں
میں کام نہ کر کے تھک گیا ہوں
جو گزر دشمن ہے اس کا رہ گزر رکھا ہے نام
ذات سے اپنی نہ ہلنے کا سفر رکھا ہے نام

جگر مراد آبادی

برابر سے بچ کر گزر جانے والے
یہ نالے نہیں بے اثر جانے والے
ترے اک اشارے پہ ساکت کھڑے ہیں
نہیں کہہ کے سب سے گزر جانے والے

خواجہ میر درد

سب کے ہاں تم ہوئے کرم فرما
اس طرف کو کبھو گزر نہ کیا

عبدالحمید عدم

دن گزر جائیں گے سرکار کوئی بات نہیں
زخم بھر جائیں گے سرکار کوئی بات نہیں

شکیب جلالی

اس خاکداں میں اب تک باقی ہیں کچھ شررسے
دامن بچا کے گزرو‘ یادوں کی رہ گزر سے
بس یہیں ختم ہے پیار کی رہ گزر
دوست! اگلا قدم کچھ سمجھ سوچ کر
چلنا تھا جہاں محال یارو
اس راہ سے بھی گزر گئے ہم
الجھے ہوئے دھوئیں کی فضا میں ہے اک لکیر
کیا پوچھتے ہو شمع سرِ رہ گزر کا رنگ

عرفان صدیقی

ہو چکا کھیل بہت جی سے گزر جانے کا
آج اقرار کریں زخم کے بھر جانے کا
بستیوں سے شب نوردوں کا چلا جانا مگر
رات بھر اب بھی چراغِ رہ گزر کا جاگنا
اپنے آنگن ہی میں تھا، راہ گزر میں کیا تھا
ایسا تنہا تھا میں باہر بھی کہ گھر میں کیا تھا
موجِ خوں بن کر کناروں سے گزر جائیں گے لوگ
اتنی زنجیروں میں مت جکڑو، بکھر جائیں گے لوگ
خوش تھی ہوا کہ راہ کا ہر سنگ ہٹ گیا
تب سر اٹھا کے خاکِ گزر نے کہا نہیں
تو مجھے اس کے خم و پیچ بتاتا کیا ہے
کوئے قاتل تو مری راہ گزر ہے سائیں
خود کو چراغِ راہ گزر جانتا ہوں میں
لیکن چراغِ راہ گزر بھی اسی کا ہے
تجھ کو اک جادو دکھانا پیچ و تاب خاک کا
اک تماشا اے ہوائے رہ گزر کرنا مجھے

الطاف حسین حالی

بری اور بھلی سب گزر جائے گی
یہ کشتی یوں ہی پار اتر جائے گی
نہ پوری ہوئی ہیں امیدیں نہ ہوں
یوں ہی عمر ساری گزر جائے گی

جمال احسانی

اگر میں کھڑکیاں دروازے بند کر لیتا
تو گھر کا بھید سرِ رہ گزر چلا جاتا
عین ممکن ہے چراغوں کو وہ خاطر میں نہ لائے
گھر کا گھر ہم نے اٹھا راہ گزر پر رکھا

رئیس فروغؔ

دریا تھے اور ان کی گزرگاہ تھی مگر
اک دن سجے سجائے گھروں سے گزر گئے
جب تری یاد کا طوفان گزر جائے گا
دل کسی اور سمندر میں اتر جائے گا
داغ رہنے کے لیے ہوتے ہیں رہ جائیں گے
وقت کا کام گزرنا ہے گزر جائے گا

احسان دانش

ہے نقشِ قدم پہ نقش زنجیر
دیوانے جدھر گزر رہے ہیں
اٹھتی تھیں دریچوں پہ ہماری بھی نگاہیں
اپنا بھی کبھی شہرِ نگاراں میں گزر تھا
ہے ان کے سراپا کی طرح خوش قد و خوش رنگ
وہ سرو کا پودا جو سرِ راہ گزر تھا

ادا جعفری

تمام عمر سفر میں گزار دوں اپنی
تمام عمر تمنائے رہ گزر میں رہوں
اجالا دے چراغِ رہ گزر آساں نہیں ہوتا
ہمیشہ ہو ستارا ہم سفر آساں نہیں ہوتا

اسرار الحق مجاز

مئے گلفام بھی ہے سازِ عشرت بھی ہے ساقی بھی
بہت مشکل ہے آشوب حقیقت سے گزر جانا
پھر وہی رہ گزر ہے کیا کہیے
زندگی راہ پر ہے کیا کہیے
عقل کی سطح سے کچھ اور ابھر جانا تھا
عشق کو منزل پستی سے گزر جانا تھا

بشیر بدر

مرے بازوؤں میں تھکی تھکی ابھی محو خواب ہے چاندنی
نہ اٹھے ستاروں کی پالکی ابھی آہٹوں کا گزر نہ ہو

زہرا نگاہ

اب اس گھر کی آبادی مہمانوں پر ہے
کوئی آ جائے تو وقت گزر جاتا ہے

ضیا جالندھری

وہ دور نہیں ہے یہ رسائی نہیں ہوتی
ہر لمحہ کوئی تازہ خم راہ گزر ہے
مہکتے جھونکے کے حرف تسکیں میں جانی پہچانی لرزشیں تھیں
تمہاری سانسوں کی آنچ کتنی قریب آ کر گزر گئی ہے

ظہیر کاشمیری

فراقِ یار کے لمحے گزر ہی جائیں گے
چڑھے ہوئے ہیں جو دریا اتر ہی جائیں گے

عالم تاب تشنہ

یہ انتقام ہے دشتِ بلا سے بادل کا
سمندروں پہ برستے ہوئے گزر جانا

عبید اللہ علیم

میں یہ کس کے نام لکھوں جو الم گزر رہے ہیں
مرے شہر جل رہے ہیں مرے لوگ مر رہے ہیں
جو چاہے سجدہ گزارے جو چاہے ٹھکرا دے
پڑا ہوا میں زمانے کی رہ گزر میں ہوں
بچھڑنے والوں کا دکھ ہو تو سوچ لینا یہی
کہ اک نوائے پریشاں تھے رہ گزر سے گئے

علی سردار جعفری

فروغ دیدہ و دل لالۂ سحر کی طرح
اجالا بن کے رہو شمع رہ گزر کی طرح
سپاہ دشمن انسانیت قریب آئی
دیارِ حسن سرِ رہ گزر کی خیر مناؤ

فارغ بخاری

قدم قدم پہ وہاں قربتیں تھیں اور یہاں
ہجومِ شہر سے تنہا گزر رہا ہوں میں
کچھ نہیں گرچہ تری راہ گزر سے آگے
دیکھنا کفر نہیں حدِ نظر سے آگے

احمد راہی

جس راہ سے بھی گزر گئے ہم
ہر دل کو گداز کر گئے ہم

ماجد صدیقی

پہنچے بہ کوئے دل کہ نظر سے گزر گئے
رنگینیاں بکھیر گئے تم جدھر گئے
صبح کی خیر مناؤ لوگو
شب کوئی دم ہے گزر جائے گی
یہ کونسی عمر نوح بخشی گئی ہے مجھ کو کہ عہدِ نو میں
گمان اک ایک پل پہ جیسے صدی صدی کا گزر رہا ہے
یہ حال ہے اب افق سے گھر تک
ہوتا نہیں چاند کا گزر تک
دلوں میں یاروں کے وسوسے ہیں تو میں بھی کیوں دل کو دشت کر لوں
گمان تک بھی کروں جو ایسا تو جاں سے ماجدؔ گزر نہ جاؤں

تلوک چند محروم

یکایک منزل آفات عالم سے گزر جانا
ڈریں کیوں موت سے جب ہے اسی کا نام مر جانا
اوج مقام دوست پہ اپنا گزر کہاں
شایان‌‌ سدرہ طائر بے بال و پر کہاں
روتی ہوئی آنکھوں میں ہے غرقاب تبسم
پنجاب ہے دہلی میں جو اب راہ گزر ہے
اس زندگی سے ہم کو نہ دنیا ملی نہ دیں
تقدیر کا مشاہدہ کرتے گزر گئی

جلیل مانک پوری

اس جہاں سے گزر گئے لاکھوں
اس گلی سے کوئی گزر نہ سکا
میرا نامہ خط مقدر تھا
کہ نظر سے تری گزر نہ سکا

ثروت حسین

منزلیں بجھ گئیں چہروں کی طرح
اب جدھر راہ گزر لے جائے

حسرت موہانی

نہ کرتے کبھی خواہش سیر جنت
جو واعظ ترا رہ گزر دیکھ لیتے

حفیظ جالندھری

ترکِ تعلقات پر گر گئی برق التفات
راہ گزر میں مل گئے راہ گزر کو کیا کروں
دل کو اب آنکھ کی منزل میں بٹھا رکھیں گے
عشق گزرے گا اسی راہ گزر سے پہلے
کچھ سمجھ دار تو ہیں نعش اٹھانے والے
لے چلے ہیں مجھے اس راہ گزر سے پہلے
مبادا پھر اسیرِ دام عقل و ہوش ہو جاؤں
جنوں کا اس طرح اچھا نہیں حد سے گزر جانا
ایک ایک قدم پر ہے جہاں خندۂ تقدیر
تدبیر گزرتی ہے اسی راہ گزر سے

حفیظ ہوشیارپوری

کچھ اس طرح سے نظر سے گزر گیا کوئی
کہ دل کو غم کا سزاوار کر گیا کوئی

رسا چغتائی

یوں بھی اک عمر رائیگاں گزری
یوں بھی کچھ دن گزر گئے ہوتے
عمر گزری رہ گزر کے آس پاس
رقص کرتے اس نظر کے آس پاس
چھوڑ آیا ہوں متاعِ جاں کہیں
غالباً اس رہ گزر کے آس پاس

خاطر غزنوی

پہلی محبتوں کے زمانے گزر گئے
ساحل پہ ریت چھوڑ کے دریا اتر گئے

شاد عظیم آبادی

یہی موقع ہے زمانے سے گزر جانے کا
کیوں اجل کیا کیا ساماں مرے مر جانے کا
کیا کہوں نزع میں میں اپنی خموشی کا سبب
رنج ہے وقت کے بے کار گزر جانے کا

شکیل بدایونی

جب کبھی ہم ترے کوچے سے گزر جاتے ہیں
لوح ادراک پہ کچھ اور ابھر جاتے ہیں
مسکرا کر یوں نہ اپنی رہ گزر سے دیکھیے
جس طرف میری نظر چاہے ادھر سے دیکھیے

عزیز حامد مدنی

یہ شکایت در و بام کیا یہ رباط کہنہ کی رات کیا
کوئی بے چراغ شب وفا ترے شہر میں بھی گزر گئی
کبھی کبھی نگۂ آشنا کے افسانے
اسی حدیث سرِ رہ گزر میں ہوتے ہیں
گزر رہا ہے تو آنکھیں چرا کے یوں نہ گزر
غلط بیاں بھی بہت رہ گزر میں ہوتے ہیں

فانی بدایونی

پھر ترا نقشِ قدم ہے درکار
سجدۂ راہ گزر یاد آیا
وہ جی گیا جو عشق میں جی سے گزر گیا
عیسیٰ کو ہو نوید کہ بیمار مر گیا

اختر ہوشیارپوری

زندان آرزو میں نظر بے بصر رہی
دیوار در ہوئی تو کرن کا گزر ہوا
اپنا سایہ بھی نہ ہمراہ سفر میں رکھنا
پختہ سڑکیں ہی فقط راہ گزر میں رکھنا
کسے خبر جب میں شہر جاں سے گزر رہا تھا
زمیں تھی پہلو میں سورج اک کوس پر رہا تھا
یہ بات الگ ہے کہ میں نے جھانکا نہیں گلی میں
یہ سچ ہے کوئی صدائیں دیتا گزر رہا تھا
جتنے منظر تھے مرے ہمراہ گھر تک آئے ہیں
اور پس منظر سواد رہ گزر میں رہ گئے

احمد فراز

آنکھ سے دور نہ ہو دل سے اتر جائے گا
وقت کا کیا ہے ، گزرتا ہے گزر جائے گا
نہ منزلوں کو نہ ہم رہ گزر کو دیکھتے ہیں
عجب سفر ہے کہ بس ہم سفر کو دیکھتے ہیں
اب شوق سے کہ جاں سے گزر جانا چاہیے
بول اے ہوائے شہر کدھر جانا چاہیے
کوچۂ یار سے ہر فصل میں گزرے ہیں مگر
شاید اب جاں سے گزر جانے کا موسم آیا
سلگتے سوچتے ویران موسموں کی طرح
کڑا تھا عہدِ جوانی مگر گزر بھی گیا
سنا ہے درد کی گاہک ہے چشم ناز اس کی
سو ہم بھی اس کی گلی سے گزر کے دیکھتے ہیں
سنا ہے رات سے بڑھ کر ہیں کاکلیں اس کی
سنا ہے شام کو سائے گزر کے دیکھتے ہیں
کٹھن ہے راہ گزر تھوڑی دور ساتھ چلو
بہت کڑا ہے سفر تھوڑی دور ساتھ چلو
عشق نشہ ہے نہ جادو جو اتر بھی جائے
یہ تو اک سیلِ بلا ہے سو گزر بھی جائے
ہائے پابندی آداب تری محفل کی
کہ سرِ راہ گزر رونے کے عادی روئے

امیر مینائی

جس طرح عمر گزرتی ہے امیر
آپ بھی یونہی گزر جائیے گا

شاذ تمکنت

کس نے دیکھا ہے مرا شہر خموشان حیات
دل کی وادی سے گزرنا ہے تو آہستہ گزر
جیسے قسمت کی لکیروں پہ ہمیں چلنا ہے
کون سمجھے گا تیری راہ گزر کیا کچھ ہے
عرصہ ہوا کے پاؤں کے نیچے زمیں نہیں
وہ نقشِ پا وہ راہ گزر کون لے گیا

فراق گورکھپوری

ہزار بار زمانہ ادھر سے گزرا ہے
نئی نئی سی ہے کچھ تیری رہ گزر پھر بھی
لپٹ گیا ترا دیوانہ گرچہ منزل سے
اڑی اڑی سی ہے یہ خاکِ رہ گزر پھر بھی
خطا معاف ترا عفو بھی ہے مثل سزا
تری سزا میں ہے اک شان در گزر پھر بھی
یہ موڑ وہ ہے کہ پرچھائیاں بھی دیں گی نہ ساتھ
مسافروں سے کہو اس کی رہ گزر آئی
بڑی چیز دولت و جاہ ہے بڑی وسعتیں ہیں نصیب اسے
مگر اہل دولت و جاہ میں کہیں آدمی کا گزر بھی ہے

قتیل شفائی

سکونِ دل تو کہاں راحت نظر بھی نہیں
یہ کیسی بزم ہے جس میں ترا گزر بھی نہیں

کلیم عاجز

تجھے فخر اپنے ستم پہ ہے کہ عصائے راہ نما بنا
مجھے ناز اپنی وفا پہ ہے کہ چراغِ راہ گزر ہوئی
جس دن کوئی غم مجھ پہ گزر جائے ہے پیارے
چہرہ ترا اس روز نکھر جائے ہے پیارے
وہ بات ذرا سی جسے کہتے ہیں غمِ دل
سمجھانے میں اک عمر گزر جائے ہے پیارے
عشق نے راہِ وفا سمجھائی سمجھانے کے بعد کہا
وقت پڑا تو جانا ہو گا راہ گزر سے آگے بھی

کیفی اعظمی

کیا جانے کس کی پیاس بجھانے کدھر گئیں
اس سر پہ جھوم کے جو گھٹائیں گزر گئیں
پایا بھی ان کو کھو بھی دیا چپ بھی ہو رہے
اک مختصر سی رات میں صدیاں گزر گئیں

محبوب خزاں

ہم آپ قیامت سے گزر کیوں نہیں جاتے
جینے کی شکایت ہے تو مر کیوں نہیں جاتے
حسن سے ہٹ کے محبت کی نظر جائے کہاں
کوئی منزل نہ ملے راہ گزر جائے کہاں

مجروح سلطان پوری

راہ گم کردہ ہوں کچھ اس کو خبر ہے کہ نہیں
اس کی پلکوں پہ ستاروں کا گزر ہے کہ نہیں
دل سے ملتی تو ہے اک راہ کہیں سے آ کر
سوچتا ہوں یہ تری راہ گزر ہے کہ نہیں
مرے پیچھے یہ تو محال ہے کہ زمانہ گرمِ سفر نہ ہو
کہ نہیں مرا کوئی نقشِ پا جو چراغِ راہ گزر نہ ہو

محسن احسان

خوشبو مرے بدن سے خود آ کر لپٹ گئی
محسنؔ یہ کس دیار سے میں نے گزر کیا
سرِ دیوار وہ خورشید بکف آیا ہے
اب چراغِ دل و جاں راہ گزر میں رکھیے

محسن نقوی

اس کو ہنگامۂ منزل کی خبر کیا دو گے
جس نے پایا ہو سرِ راہ گزر سناٹا

ناصر کاظمی

ان اجالوں کی دھن میں پھرتا ہوں
چھب دکھاتے ہی جو گزر جائیں
آج دیکھا ہے تجھ کو دیر کے بعد
آج کا دن گزر نہ جائے کہیں
تجھے کہنا ہے کچھ مگر خاموش
دیکھ اور دیکھ کر گزر خاموش
کچھ اب سنبھلنے لگی ہے جاں بھی بدل چلا دور آسماں بھی
جو رات بھاری تھی ٹل گئی ہے جو دن کڑا تھا گزر گیا وہ
وہ جس کے شانے پہ ہاتھ رکھ کر سفر کیا تو نے منزلوں کا
تری گلی سے نہ جانے کیوں آج سر جھکائے گزر گیا وہ