مرزا غالب

کرم ہی کچھ سببِ لطف و التفات نہیں
انہیں ہنساکے رلانا بھی کوی بات نہیں
نشو و نما ہے اصل سے غالب فروع کو
خاموشی ہی سے نکلے ہے جو بات چاہیے

انشاء اللہ خان انشا

کل سے تو اختلاط میں تازہ ہے اختراع
رکنے لگی ہیں آپ مری بات بات سے

حیدر علی آتش

جب کے رسوا ہوئے انکار ہے سچ بات میں کیا
اے صنم لطف ہے پردے کی ملاقات میں کیا
دل لگی اپنی ترے ذکر سے کس رات نہ تھی
صبح تک شام سے یاہو کے سوا بات نہ تھی
غنچۂِ گل کو نہ ہنسنا تھا تری صورت سے
چھوٹے سے منہ کی سزاوار بڑی بات نہ تھی
بے شعوروں نے نہ سمجھا تو نہ سمجھا آتشؔ
نکتہ سنجوں کو لطیفہ تھی تری بات نہ تھی

مصحفی غلام ہمدانی

بحث اس کی میری وقت ملاقات بڑھ گئی
باتیں ہوئیں کچھ ایسی کہ بس بات بڑھ گئی
یارب مری اس بت سے ملاقات کہیں ہو
جس بات کو جی چاہے ہے وہ بات کہیں ہو
سو باتیں ہوئیں تو نہ ملا اپنے سے اے دل
کیا بات ہے تیری کہ وہی بات ہے اور تو
وہ در تلک آوے نہ کبھی بات کی ٹھہرے
حیراں ہوں میں کس طرح ملاقات کی ٹھہرے
جب کاٹ کے دل پیر گئی ہووے جگر میں
پھر کیوں نہ چھری آپ کی اس بات کی ٹھہرے
برسوں نہیں کرتا تو کبھو بات کسو سے
مشتاق ہی رہتا ہے تری بات کا عالم
مجھے گالیاں دے گیا وہ صریحاً
مرے منہ سے ہرگز نہ کچھ بات نکلی

مصطفٰی خان شیفتہ

کہتے ہیں جان، جانتے ہیں بے وفا مجھے
کیا اعتبار ہے انہیں دشمن کی بات کا

فیض احمد فیض

جس دھج سے کوئی مقتل میں گیا، وہ شان سلامت رہتی ہے
یہ جان توآنی جانی ہے ، اس جاں کی تو کوئی بات نہیں

مرزا رفیع سودا

پوچھا پیام بر سے جو میں یار کا جواب
کہنے لگا خموش کہ ہے بات بے طرح

باقی صدیقی

ان کے لبوں پر آ کے مری بات رہ گئی
انگڑائی لے کے موج خرابات رہ گئی
ہونے کو ان سے سینکڑوں باتیں ہوئیں مگر
جس بات کا گلہ تھا وہی بات رہ گئی
سامنے بیٹھ کے ہر بات ہوئی
پھر بھی ان سے نہ ملاقات ہوئی
آپ پھر بیچ میں بول اٹھے ہیں
کب ابھی ختم مری بات ہوئی
میرے ہوتے تو وہ چپ تھے باقیؔ
کیا مرے بعد کوئی بات ہوئی
یاد آئی کیا تیری بات
نیند نہ آئی ساری رات
تم بھی واپس لا نہ سکو
اتنی دور گئی ہے بات
رسوائی کا نام برا
جب چھیڑو تازہ ہے بات
جب عرضِ غم کی باقیؔ
ہنس کر ٹال گئے وہ بات
ترے حضور ہوں، فکر حیات ہے پھر بھی
مرے لبوں پہ زمانے کی بات ہے پھر بھی
وہ پو پھٹی، وہ سحر آئی، رات ختم ہوئی
پھر ایک بات چھڑی، ایک بات ختم ہوئی
مریضِ عشق نے لو شرح زندگی کر دی
چھڑی تھی آہ سے ، ہچکی پہ بات ختم ہوئی
ہر نظر ایک گھات ہوتی ہے
دل میں جب کوئی بات ہوتی ہے
حسن سرشار، عشق وا رفتہ
کس سے ایسے میں بات ہوتی ہے
بے رخی، اختلاف، روکھا پن
یوں بھی کیا کوئی بات ہوتی ہے

جگر مراد آبادی

دل دھڑکتے ہی پھر گئی وہ نظر
لب تک آئی نہ تھی کہ بات گئی
مرگِ عاشق تو کچھ نہیں لیکن
اک مسیحا نفس کی بات گئی
ترکِ الفت بہت بجا ناصح
لیکن اس تک اگر یہ بات گئی
نہیں ملتا مزاج دل ہم سے
غالباً دور تک یہ بات گئی

عبدالحمید عدم

ساکت رہیں تو ہم ہی ٹھہرتے ہیں با قصور
بولیں تو بات بڑھتی ہے چھوٹی سی بات سے
سوا اس کے کیا دوسری بات ہو گی
تمہیں جیت ہو گی ہمیں مات ہو گی
مرے دوستوں کی دل آزاریوں میں
مری بہتری کی کوئی بات ہو گی
گلے بہت تھے مگر جب نظر نظر سے ملی!
نہ مجھ سے بات ہوئی اور نہ ان سے بات ہوئی
کیا بات ہے اے جانِ سخن بات کیے جا
ماحول پہ نغمات کی برسات کیے جا
داور حشر مجھے اپنا مصاحب نہ سمجھ
بعض اوقات کھری بات بھی ہو جاتی ہے
جس وقت بھی موزوں سی کوئی بات ہوئی ہے
ماحول سے نغمات کی برسات ہوئی ہے
امکاں نکل آئے ہیں عدمؔ صلح کے کچھ کچھ
کل شبِ غمِ ہستی سے مری بات ہوئی ہے

قمر جلالوی

میں ڈھونڈ لوں تجھے میری بس کی بات کہاں
نہ جانے چھوڑ دے مجھ کو مری حیات کہاں
قفس میں یاد نہ کر آشیاں کی آزادی
وہ اپنا گھر تھا یہاں اپنے گھر کی بات کہاں
وفائے وعدہ میں اچھا تمھاری بات سہی
نہیں دن کو جو فرصت تمھیں تو رات سہی
جو چاہو کہہ لو کہ مجبورِ عشق ہوں ورنہ
تمھیں بتاؤ کہ کس کی بات سہی

شکیب جلالی

آج وہ یوں نگہِ شوق سے بچ کر گزرے
جیسے یاد آئے کوئی بھولی ہوئی بات ہمیں

عرفان صدیقی

یہاں کوئی نہیں سنتا حدیثِ دل زدگاں
مگر میں اور طرح بات کرتا رہتا ہوں
ایک ہی پیڑ پر سانپ اور آدمی ساتھ رہتے ہیں سیلاب اترنے تلک
ہم سفر ہے اگر دشمنِ جاں تو کیا‘ راہ سنسان ہے ‘ بات کرتے رہیں
ایسا تو نئیں کہ ان سے ملاقات نئیں ہوئی
جو بات میرے دل میں تھی وہ بات نئیں ہوئی

مجید امجد

یہ کیا عجیب راز ہے ، سمجھ سکوں تو بات ہے
نہ اب وہ ان کی بے رخی نہ اب وہ التفات ہے
مری تباہیوں کا بھی فسانہ کیا فسانہ ہے
نہ بجلیوں کا تذکرہ نہ آشیاں کی بات ہے
دل سے ہر گزری بات گزری ہے
کس قیامت کی رات گزری ہے
گہرے سروں میں عرضِ نوائے حیات کر
سینے پہ ایک درد کی سل رکھ کے بات کر
یہ دوریوں کا سیلِ رواں، برگِ نامہ بھیج
یہ فاصلوں کے بندِ گراں، کوئی بات کر
آ، ایک دن، میرے دلِ ویراں میں بیٹھ کر
اس دشت کے سکوتِ سخن جو سے بات کر

مصطفی زیدی

اتنا تو سمجھ روز کے بڑھتے ہوئے فتنے
ہم کچھ نہیں بولے تو تری بات رہی ہے
حسن کا ایک وار سہہ نہ سکا
ڈوب مرنے کی بات ہے اے دل

الطاف حسین حالی

اب وہ اگلا سا التفات نہیں
جس پہ بھولے تھے ہم وہ بات نہیں

جمال احسانی

سویرا ہو بھی چکا اور رات باقی ہے
ضرور دل میں ابھی کوئی بات باقی ہے

رئیس فروغؔ

لہوکے رنگ میں اک بات ہے تمھارے لیے
ہمارے گھر یہی سوغات ہے تمھارے لیے

اختر شیرانی

اس مہ جبیں سے آج ملاقات ہو گئی
بے درد آسمان یہ کیا بات ہو گئی
ذکر شبِ وصال ہو کیا قصہ مختصر
جس بات سے وہ ڈرتے تھے وہ بات ہو گئی

بشیر بدر

نہ جی بھر کے دیکھا نہ کچھ بات کی
بڑی آرزو تھی ملاقات کی
بازار کا نقیب سمجھ کر مجھے نہ چھیڑ
خاموش رہنے دے میں ترے گھر کی بات ہوں
سر پہ سورج کے ہمارے پیار کا سایہ رہے
مامتا کا جسم مانگے زندگی کی بات کو
کہاں آنسوؤں کی یہ سوغات ہوگی
نئے لوگ ہوں گے نئی بات ہوگی
پریشاں ہو تم بھی پریشاں ہوں میں بھی
چلو مے کدے میں وہیں بات ہوگی

زہرا نگاہ

کیوں اے غمِ فراق یہ کیا بات ہو گئی
ہم انتظارِ صبح میں تھے رات ہو گئی

سدرشن فاکر

عشق میں غیرت جذبات نے رونے نہ دیا
ورنہ کیا بات تھی کس بات نے رونے نہ دیا
آپ کہتے تھے کہ رونے سے نہ بدلیں گے نصیب
عمر بھر آپ کی اس بات نے رونے نہ دیا

ضیا جالندھری

ہر بات میں شامل ہیں تصور کے کئی رنگ
ہر رنگ تصور میں ہے جو بات وہ تم ہو

عبید اللہ علیم

بولے نہیں وہ حرف جو ایمان میں نہ تھے
لکھی نہیں وہ بات جو اپنی نہیں تھی بات
ایک شجر ہے جس کی شاخیں پھیلتی جاتی ہیں
کسی شجر میں ہم نے ایسی بات نہیں دیکھی
شاہوں کی تاریخ بھی ہم نے دیکھی ہے لیکن
اس کے در کے گداؤں والی بات نہیں دیکھی
صدیوں کی اس دھوپ چھاؤں میں کوئی ہمیں بتلائے
پوری ہوئی کون سی اس کی بات نہیں دیکھی

غلام محمد قاصر

تری آواز کو اس شہر کی لہریں ترستی ہیں
غلط نمبر ملاتا ہوں تو پہروں بات ہوتی ہے
جب ان کے گرد کہانی طواف کرنے لگے
تو درمیاں سے کوئی بات چھوڑ دیتے ہیں

احمد راہی

دن کو رہتے جھیل پر دریا کنارے رات کو
یاد رکھنا چاند تارو اس ہماری بات کو
دن گزرتا ہے کہاں رات کہاں ہوتی ہے
درد کے ماروں سے اب بات کہاں ہوتی ہے
یوں تو اوروں کی بہت باتیں سنائیں ان کو
اپنی جو بات ہے وہ بات کہاں ہوتی ہے

ماجد صدیقی

تجھ سے کہنے کی بس اب یہی بات ہے
آج پھر چاند کی چودہویں رات ہے

تلوک چند محروم

کہتے ہیں عذر ہم کو ملاقات میں نہیں
ہم تجھ سے متفق مگر اک بات میں نہیں
آزاد قید و بند سے ہیں آج اہلِ فن
پابند یعنی کوئی کسی بات میں نہیں

جوش ملیح آبادی

مجھ سے ساقی نے کہی رات کو کیا بات اے جوشؔ
یعنی اضداد ہیں پروردۂ یک ذات اے جوشؔ

حسرت موہانی

روش حسن مراعات چلی جاتی ہے
ہم سے اور ان سے وہی بات چلی جاتی ہے

حفیظ جالندھری

عرضِ ہنر بھی وجہ شکایات ہو گئی
چھوٹا سا منہ تھا مجھ سے بڑی بات ہو گئی
یاروں کی برہمی پہ ہنسی آ گئی حفیظؔ
یہ مجھ سے ایک اور بری بات ہو گئی
یہ ملاقات ملاقات نہیں ہوتی ہے
بات ہوتی ہے مگر بات نہیں ہوتی ہے
وصل ہے نام ہم آہنگی و یک رنگی کا
وصل میں کوئی بری بات نہیں ہوتی ہے

سید ضمیر جعفری

خدا اشعار رسمی سے بچائے
یہ قتلِ عام سچی بات کا ہے
بارہا اس سادگی پر خود ہنسی آئی مجھے
کر رہا ہوں کس زمانے میں وفا کی بات میں

سیف الدین سیف

چاندنی رات بڑی دیر کے بعد آئی ہے
لب پہ اک بات بڑی دیر کے بعد آئی ہے
ہم کو تو گردشِ حالات پہ رونا آیا
رونے والے تجھے کس بات پہ رونا آیا
حسن مغرور کا یہ رنگ بھی دیکھا آخر
آخر ان کو بھی کسی بات پہ رونا آیا
کتنے ان جان ہیں کیا سادگی سے پوچھتے ہیں
کہیے کیا میری کسی بات پہ رونا آیا
سیفؔ یہ دن تو قیامت کی طرح گزرا ہے
جانے کیا بات تھی ہر بات پہ رونا آیا
مغرور تھے اپنی ذات پر ہم
رونے لگے بات بات پر ہم
لٹ جائیں گے ضبطِ غم کے ہاتھوں
مر جائیں گے اپنی بات پر ہم
کیا ناز تھا سیفؔ حوصلے پر
چپ ہو گئے ایک بات پر ہم
وصل کی بات اور ہی کچھ تھی
ان دنوں رات اور ہی کچھ تھی
دل نے کچھ اور ہی لیا مطلب
آپ کی بات اور ہی کچھ تھی

سلام مچھلی شہری

حیات ایک تخیل نہیں حقیقت ہے
مجھے بتائی ہے آدم کے عزم نے یہ بات
سنائی جائے گی کوئل کو ہم نوا کر کے
حسین پھولوں کو بھونروں کی ایک راز کی بات

شان الحق حقی

محفل میں وہ جب بہرِ ملاقات اٹھے ہیں
ہم راز سے کرتے ہوئے کچھ بات اٹھے ہیں
اے شیخ نہ یہ کفر نہ فتنہ ہے نہ شر ہے
اک ہم بھی سنانے کو نئی بات اٹھے ہیں

شکیل بدایونی

کیسے کہہ دوں کی ملاقات نہیں ہوتی ہے
روز ملتے ہیں مگر بات نہیں ہوتی ہے
آپ للہ نہ دیکھا کریں آئینہ کبھی
دل کا آ جانا بڑی بات نہیں ہوتی ہے
جب بھی ملتے ہیں تو کہتے ہیں کہ کیسے ہو شکیلؔ
اس سے آگے تو کوئی بات نہیں ہوتی ہے

فراق گورکھپوری

آنکھوں میں جو بات ہو گئی ہے
اک شرح حیات ہو گئی ہے
مدت سے خبر ملی نہ دل کی
شاید کوئی بات ہو گئی ہے
اقرار گناہ عشق سن لو
مجھ سے اک بات ہو گئی ہے
ہستی کو جس نے زلزلہ ساماں بنا دیا
وہ دل قرار پائے مقدر کی بات ہے
یوں تو ہزار درد سے روتے ہیں بد نصیب
تم دل دکھاؤ وقت مصیبت تو بات ہے
مایوسیوں کی گود میں دم توڑتا ہے عشق
اب بھی کوئی بنا لے تو بگڑی نہیں ہے بات
کچھ اور بھی تو ہو ان اشارات کے سوا
یہ سب تو اے نگاہِ کرم بات بات بات
ہم اہلِ غم نے رنگ زمانہ بدل دیا
کوشش تو کی سبھی نے مگر بن پڑے کی بات
سنا تو ہے کہ کبھی بے نیاز غم تھی حیات
دلائی یاد نگاہوں نے تیری کب کی بات
سکوت راز وہی ہے جو داستاں بن جائے
نگاہِ ناز وہی جو نکالے بات میں بات
بحثیں چھڑی ہوئی ہیں حیات و ممات کی
سو بات بن گئی ہے فراقؔ ایک بات کی

قتیل شفائی

تم پوچھو اور میں نہ بتاؤں ایسے تو حالات نہیں
ایک ذرا سا دل ٹوٹا ہے اور تو کوئی بات نہیں
عشق بری شے سہی پر دوستو
دخل نہ دو تم مری ہر بات میں
وہ فسانے جو مرے نام سے منسوب ہوئے
ان فسانوں میں تری بات بھی آ جاتی ہے

کلیم عاجز

میرے ہی لہو پر گزر اوقات کرو ہو
مجھ سے ہی امیروں کی طرح بات کرو ہو
ہم خاک نشیں تم سخن آرائے سرِ بام
پاس آ کے ملو دور سے کیا بات کرو ہو
ہم کو جو ملا ہے وہ تمہیں سے تو ملا ہے
ہم اور بھلا دیں تمہیں کیا بات کرو ہو
بکنے بھی دو عاجزؔ کو جو بولے ہے بکے ہے
دیوانہ ہے دیوانے سے کیا بات کرو ہو

محبوب خزاں

آنکھ جب اٹھے بھر آئے شعر اب کہا نہ جائے
کیسے بھول جائے وہ بھولنے کی بات کو

مجروح سلطان پوری

ہمارے لب نہ سہی وہ دہانِ زخم سہی
وہیں پہنچتی ہے یارو کہیں سے بات چلے

ناصر کاظمی

بیگانہ وار ان سے ملاقات ہو تو ہو
اب دور دور ہی سے کوئی بات ہو تو ہو
ان کو تو یاد آئے ہوے مدتیں ہوئیں
جینے کی وجہ اور کوئی بات ہو تو ہو

نوح ناروی

ابھی کم سن ہیں معلومات کتنی
وہ کتنے اور ان کی بات کتنی
یہ میرے واسطے ہے بات کتنی
وہ کہتے ہیں تری اوقات کتنی
توجہ سے کبھی سن لو مری بات
جو تم چاہو تو یہ ہے بات کتنی
کرو شکرِ ستم ان کے ستم پر
کہ اتنی بات بھی ہے بات کتنی