مرزا غالب

عذرِ واماندگی، اے حسرتِ دل!
نالہ کرتا تھا، جگر یاد آیا
آہ وہ جرأت فریاد کہاں
دل سے تنگ آ کے جگر یاد آیا
عاشقی صبر طلب ، اور تمنا بیتاب
دل کا کیا رنگ کروں خونِ جگر ہونے تک
حیراں ہوں، دل کو روؤں کہ پیٹوں جگر کو میں
مقدور ہو تو ساتھ رکھوں نوحہ گر کو میں
نظر لگے نہ کہیں اس کے دست و بازو کو
یہ لوگ کیوں مرے زخمِ جگر کو دیکھتے ہیں
مزے جہان کے اپنی نظر میں خاک نہیں
سوائے خونِ جگر، سو جگر میں خاک نہیں
شق ہو گیا ہے سینہ، خوشا لذتِ فراغ
تکلیفِ پردہ داریِ زخمِ جگر گئی

انشاء اللہ خان انشا

اک پھریری جو ترا خاک بسر لیتا ہے
تھام جبریل امیں اپنا جگر لیتا ہے
میں ترے صدقے بس یہی میرے
دل و جان و جگر کی پونجی ہے

بہادر شاہ ظفر

جلا جلا کے کیا شمع ساں تمام مجھے
بس اور تو مجھے سوزِ جگر سے کچھ نہ ہوا

حیدر علی آتش

اک نہ اک مونس کی فرقت کا فلک نے غم دیا
دردِ دل پیدا ہوا دردِ جگر جاتا رہا
دردِ فراق آتشؔ تڑپا رہا ہے ہم کو
اک ہاتھ دل سنبھالے ہے اک جگر سنبھالے

داغ دہلوی

کوئی تو نکل آئے گا سر باز محبت
دل دیکھ رہے ہیں وہ جگر دیکھ رہے ہیں
پڑھ پڑھ کے وہ دم کرتے ہیں کچھ ہاتھ پر اپنے
ہنس ہنس کے مرے زخمِ جگر دیکھ رہے ہیں
دل کے نالوں سے جگر دکھنے لگا
یاں تلک روئے کہ سر دکھنے لگا

شیخ ابراہیم ذوق

وہ اپنی برشِ تیغ نظر کو دیکھتے ہیں
ہم ان کو دیکھتے ہیں اور جگر کو دیکھتے ہیں
جب اپنے گریہ و سوزِ جگر کو دیکھتے ہیں
سلگتی آگ میں ہم خشک و تر کو دیکھتے ہیں
رفیق جب مرے زخمِ جگر کو دیکھتے ہیں
تو چارہ گر انہیں وہ چارہ گر کو دیکھتے ہیں
زخمی ہوں ترے ناوک دزدیدہ نظر سے
جانے کا نہیں چور مرے زخمِ جگر سے
نالوں کے اثر سے مرے پھوڑا سا ہے پکتا
کیوں ریم سدا نکلے نہ آہن کے جگر سے
لذت ناوک غم ذوقؔ سے ہو پوچھتے کیا
لب پڑے چاٹتے ہیں زخمِ جگر دیکھتے ہو
کہتے سنتے نہیں کچھ ہم تو شبِ ہجر میں پر
نالۂِ دل کا جواب آہِ جگر دیتی ہے
نخل مژگاں سے ہے کیا جانیے کیا چشم ثمر
چشم پانی کی جگہ خونِ جگر دیتی ہے
ہے دردِ دل میں گر نہیں ہمدرد میرے پاس
دل سوز کوئی گر نہیں سوزِ جگر تو ہے
تربت پہ دل جلوں کی نہیں گر چراغ و گل
سینے میں سوزشِ دل و داغِ جگر تو ہے
اے ذوقؔ وقت نالے کے رکھ لے جگر پہ ہاتھ
ورنہ جگر کو روئے گا تو دھر کے سر پہ ہاتھ
جوں پنج شاخہ تو نہ جلا انگلیاں طبیب
رکھ رکھ کے نبض عاشق تفتہ جگر پہ ہاتھ

مصحفی غلام ہمدانی

اس کی مژگاں کا کوئی نام نہ لو کیا حاصل
میرا ان باتوں سے سوراخ جگر ہوتا ہے
چھریاں چلیں شب دل و جگر پر
لعنت ہے اس آہ بے اثر پر
کس کی مژگان ہیں کہ سینوں میں
یک بیک چھن گئے جگر سب کے
چمن لالہ ستاں میں مجھے جانے دے صبا
چنگے ہوں گے نہ مرے داغِ جگر اور کہیں
رکھ نہ سوزن کو ذرا دیکھ تو لے اے جراح
قابل بخیہ مرا زخمِ جگر ہے کہ نہیں
رویا ہے اس چمن میں کون آ کے اے صبا جو
ہر نخلِ گل کے نیچے لختِ جگر پڑے ہیں

مصطفٰی خان شیفتہ

کچھ دور نہیں ان سے کہ نیرنج بتا دیں
کیا فائدہ گر آنکھ سے لختِ جگر آیا
ہے عالمِ کبیر میں بھی یوں ہی جس طرح
دل سے جگر کو فیض ہے ، دل کو جگر سے فیض

مومن خان مومن

اے دل آہستہ آہ تاب شکن
دیکھ ٹکڑے جگر نہ ہو جائے
لگے خدنگ جب اس نالۂ سحر کا سا
فلک کا حال نہ ہو کیا مرے جگر کا سا

میر مہدی مجروح

نہ کیوں تیرِ نظر گزرے جگر سے
کہیں یہ وار رکتے ہیں سپر سے

فیض احمد فیض

وہ جو اب چاکِ گریباں بھی نہیں کرتے ہیں
دیکھنے والو کبھی ان کا جگر تو دیکھو

مرزا رفیع سودا

جا ہی بھڑا تجھ صفِ مژگاں سے یار
دل تو مرا زور جگر کر گیا
اے ابر قسم ہے تجھے رونے کی ہمارے
تجھ چشم سے ٹپکا ہے کبھو لختِ جگر بھی

یگانہ چنگیزی

اب چپ رہو جو دل پہ گزرنی تھی وہ گزری
ایسا نہ ہو پھٹ جائے کہیں زخمِ جگر بھی
پچھلے کو اٹھ کھڑا نہ ہو دردِ جگر کہیں
پہنچے نہ اڑتے اڑتے کہیں سے خبر کہیں
گر یاد میں ساقی کی ساغر نظر آ جائے
پیمانۂ دل چھلکے منہ کو جگر آ جائے

باقی صدیقی

سوزِ دل، زخمِ جگر لے آئے
حادثے زادِ سفر لے آئے

جگر مراد آبادی

دل لے کے مجھ سے دیتے ہو داغِ جگر مجھے
یہ بات بھولنے کی نہیں عمر بھر مجھے
ملتی نہیں ہے لذت دردِ جگر مجھے
بھولی ہوئی نہ ہو نگہ فتنہ گر مجھے
زندگی اک تہمت بے جا ہے میری ذات پر
موت اک الزام ناجائز جگرؔ میرے لیے
میں تو ہر حالت میں خوش ہوں لیکن اس کا کیا علاج
ڈبڈبا آتی ہیں وہ آنکھیں جگرؔ میرے لیے
قرباں تری آنکھوں کے صدقے تری نظروں کے
تھا حاصل صد ناوک جو زخمِ جگر دیکھا
ماتھے پہ پسینا کیوں آنکھوں میں نمی کیسی
کچھ خیر تو ہی تم نے کیا حال جگر دیکھا

قمر جلالوی

بہے جب آنکھ سے آنسو بڑھا سوزِ جگر اپنا
ہمیشہ مینہ پرستے میں جلا کرتا ہے گھر اپنا
دل کو خبر نہیں ہے اور درد ہے جگر میں
ہمسایہ سو رہا ہے بے فکر اپنے گھر میں
دل کو وہ کیا دیکھتے سوزِ جگر دیکھا کیے
لگ رہی تھی آگ جس گھر میں وہ گھر دیکھا کیے
بس آپ دیکھ جائیے صورت مریض کی
نبضوں کا حال دردِ جگر کچھ نہ پوچھیے

شکیب جلالی

کچھ دن اگر یہی رہا دیوار و در کا رنگ
دیوار و در پہ دیکھنا خونِ جگر کا رنگ

عرفان صدیقی

کچھ خاک تھی سو وقت کی آندھی میں اڑ گئی
آخر نشان سوزِ جگر کچھ نہیں بچا
کوئی یقیں نہ کرے میں اگر کسی کو بتاؤں
وہ انگلیاں تھیں کہ زخمِ جگر چلا بھی گیا
راہ ستم میں سوزِ جگر کیسے چھوڑ دیں
لمبا سفر ہے زادِ سفر کیسے چھوڑ دیں