مرزا غالب

ہم نے مانا کہ تغافل نہ کرو گے ، لیکن
خاک ہوجائیں گے ہم، تم کو خبر ہونے تک
پھر بے خودی میں بھول گیا راہ کوئے یار
جاتا وگرنہ ایک دن اپنی خبر کو میں
ہم وہاں ہیں جہاں سے ہم کو بھی
کچھ ہماری خبر نہیں آتی

انشاء اللہ خان انشا

دیکھیے کیا ہو چلے جاؤ میاں اپنی راہ
کون یاں ہم سے غریبوں کی خبر لیتا ہے

بہادر شاہ ظفر

دولتِ دنیا نہیں جانے کی ہرگز تیرے ساتھ
بعد تیرے سب یہیں اے بے خبر بٹ جائے گی

حیدر علی آتش

غیرت نالہ و فریاد نہ کھو اے آتشؔ
آشنا کوئی نہیں کون خبر لیتا ہے
یوسف کی اک دکاں میں نہ تو نے تلاش کی
بازار کون کون سے اے بے خبر کھلے
کہتا ہوں رازِ عشق مگر ساتھ شرط کے
کانوں ہی تک رہے نہ زباں کو خبر کھلے
دیوانہ ہو کے کوئی پھاڑا کرے گریباں
ممکن نہیں کہ دامن وہ بے خبر سنبھالے

داغ دہلوی

کہو کیا کرو گے مرے وصل کی
جو مشہور جھوٹی خبر ہو گئی
خط غیر کا پڑھتے تھے جو ٹوکا تو وہ بولے
اخبار کا پرچہ ہے خبر دیکھ رہے ہیں
عدم کہتے ہیں اس کوچے کو اے دل
ادھر آ بے خبر جاتا کہاں ہے

شیخ ابراہیم ذوق

ہنسی کے ساتھ یاں رونا ہے مثل قلقل مینا
کسی نے قہقہہ اے بے خبر مارا تو کیا مارا
یہ اقامت ہمیں پیغام سفر دیتی ہے
زندگی موت کے آنے کی خبر دیتی ہے
بنے بلا سے مرا مرغ نامہ بر بھنورا
کہ اس کو دیکھ کے وہ منہ سے خوش خبر تو کہے
آنا ہے ان کا آنا قیامت کا دیکھیے
کب آئیں لیکن آنے کی ان کے خبر تو ہے

مصحفی غلام ہمدانی

اس دل کی تو تو خبر رکھا کر
یہ آپ سے بے خبر بہت ہے
آ ہی لیا بے خبری نے ہمیں
کون ہے یاں کس کو خبر کیجیے
نسیم صبحِ چمن سے ادھر نہیں آتی
ہزار حیف کہ گل کی خبر نہیں آتی
یہ سارے خدا شناس ہیں لیک
دیتا نہیں کوئی خبر خدا سے
گر میں بد نام ہوا اس کی گلی میں تو ہوا
یارو اب یاں سے نہ جاوے یہ خبر اور کہیں
جان پر اپنی میں کھیلا ہوں جدائی میں تری
بے خبر تجھ کو بھی کچھ اس کی خبر ہے کہ نہیں
شبنم گلاب پاشی غنچے کی جلد اٹھا لا
گل بستر غشی پر سب بے خبر پڑے ہیں

مصطفٰی خان شیفتہ

آئے تو ان کو رنج، نہ آئے تو مجھ کو رنج
مرنے کی میرے کاش نہ ان کو خبر کریں
بے فائدہ ہے وہم کہ کیوں بے خبر آیا
اس راہ سے جاتا تھا ہمارے بھی گھر آیا
دیکھے کہ جدائی میں ہے کیا حال، وہ بدظن
اس واسطے شب گھر میں مرے بے خبر آیا
اسبابِ عیش یہ جو مہیا ہے شیفتہ
کیا پردہ تم سے ، آنے کی ان کے خبر ہے آج

مومن خان مومن

مانع ظلم ہے تغافل یار
بخت بد کو خبر نہ ہو جائے

فیض احمد فیض

نگاہِ شوق سر بزمِ بے حجاب نہ ہو
وہ بے خبر ہی سہی اتنے بے خبر بھی نہیں
میری قسمت سے کھیلنے والے
مجھ کو قسمت سے بے خبر کر دے
کب تک ابھی رہ دیکھیں اے قامتِ جانانہ
کب حشر معین ہے تجھ کو تو خبر ہو گی

مرزا رفیع سودا

کس ہستی موہوم پہ نازاں ہے تو اے یار
کچھ اپنے شب و روز کی ہے تج کو خبر بھی

یگانہ چنگیزی

محروم شہادت کی ہے کچھ تجھ کو خبر بھی
او دشمنِ جاں دیکھ ذرا پھر کے ادھر بھی
کھول آنکھیں ذرا مست ہے کیا ساغرِ جم سے
ہے گردشِ ایام کی کچھ تجھ کو خبر بھی
پچھلے کو اٹھ کھڑا نہ ہو دردِ جگر کہیں
پہنچے نہ اڑتے اڑتے کہیں سے خبر کہیں
بہار دو روزہ سے دل کیا بہلتا
خبر کر چکے تھے خبر کرنے والے
آنکھوں آنکھوں میں لے لیا وعدہ
کانوں کان ایک کو خبر نہ ہوئی
ہٹ کے بالیں سے لوگ روتے ہیں
جیسے بیمار کو خبر نہ ہوئی
لٹ گیا سارا کارواں عدم
ایک کو ایک کی خبر نہ ہوئی
زمین پاؤں تلے سے نکل گئی تو کیا
ہم اپنی دھن میں زمانے سے بے خبر گزرے

باقی صدیقی

لے نہ ڈوبے کہیں یہ بے خبری
ہر خبر کو تری خبر جانا
اندر کچھ اور داستاں ہے
سرخی کچھ اور ہے خبر کی
ہونٹوں پہ مہر بن گئیں ان کی عنایتیں
راز درونِ خانہ کی مجھ کو خبر سہی
لہو میں تر ہیں کا ٹوں کی زبانیں
کسی کو ہے گلستاں کی خبر بھی
کل تو سب کچھ تھی آپ کی آمد
آج کچھ بھی نہیں خبر کے سوا
اس طرح اٹھا دہ سے یقیں اہلِ جہاں کا
افواہ نظر آتی ہے سچی بھی خبر اب
کیا کسی پر یقیں کریں باقیؔ
بے سہارا ہیں بے خبر تو نہیں
کوئی ان کی خبر نہیں آتی
بات بنتی نطر نہیں آتی
بار ہیں اب خزاں کے ہنگامے
فصلِ گل کی کوئی خبر ساقی
کیا ملے گی ہمیں خبر اپنی
ہے گراں خود پہ اک نظر اپنی
راہ بھی گرد، منزلیں بھی گرد
ہر قدم اک نئی خبر ہے ابھی
ساری دنیا کو ہے خبر باقیؔ
خود کو اپنی خبر کریں کیسے
ڈوب کر نبض ابھر آئی ہے
کیا کوئی ان کی خبر آئی ہے

جون ایلیا

ہے غنیمت کہ اسرار ہستی سے ہم
بے خبر آئے ہیں بے خبر جائیں گے
تھا خبر میں زیاں دل و جاں کا
ہر طرف سے میں بے خبر آیا
شیخ آیا تھا محتسب کو لیے
میں نے بھی ان کی وہ خبر لی ہے
بند باہر سے مری ذات کا در ہے مجھ میں
میں نہیں خود میں یہ اک عام خبر ہے مجھ میں
داد و ستد کے شہر میں ہونے کو آئی شام
خواہش ہے میرے پاس خبر کس کے پاس ہے
اس کے بھی کچھ گلے ہیں دل ان کا حساب تم رکھو
دید نے اس میں کی بسر اس کی خبر لیے بغیر

جگر مراد آبادی

آیا نہ راس نالۂ دل کا اثر مجھے
اب تم ملے تو کچھ نہیں اپنی خبر مجھے
یکساں ہے حسن و عشق کی سر مستیوں کا رنگ
ان کی خبر انہیں ہے نہ میری خبر مجھے
ناگہاں لب ہائے برگِ گل سے یہ آئی ندا
نالے کرتا ہے عبث اے بے خبر میرے لیے
نگاہوں نے سب رازِ دل کہہ دیا
انہیں آج اپنی خبر ہو گئی
الٰہی برا ہو غمِ عشق کا
سنا ہے کہ ان کو خبر ہو گئی

خواجہ میر درد

ان نے کیا تھا یاد مجھے بھول کر کہیں
پاتا نہیں ہوں تب سے میں اپنی خبر کہیں
بھلا ٹک صبح ہونے دو اسے بھی دیکھ لیویں گے
کسی عاشق کے رونے سے نہیں رکھتی خبر شبنم

سراج الدین ظفر

بت پرستی کیجیے اس شدتِ احساس سے
سنگ میں بھی جزو احساس و خبر رکھ دیجیے

قمر جلالوی

آہ کو سمجھے ہو کیا دل سے اگر ہو جائے گی
وہ تو وہ ان کے فرشتوں کو خبر ہو جائے گی
کوئی چھپ جائے گا بیمارِ شامِ ہجر کا مرنا
پہنچ جائے گی ان تک بھی خبر آہستہ آہستہ

عرفان صدیقی

دستِ قاتل کیا کٹے اے چشمِ تر کیا دیکھنا
آج کے اخبار میں کل کی خبر کیا دیکھنا
اور کیا دیکھتی دنیا ترے چہرے کے سوا
کم سے کم رنگ تھا سرخی میں، خبر میں کیا تھا
نہیں تھا میں بھی اتنا بے تعلق
کہ تو بھی بے خبر ایسا نہیں تھا
یہ درد رات مرے بے خبر کے نام تمام
اسی چراغِ جہانِ دگر کے نام تمام
دیکھیے کس صبح نصرت کی خبر سنتا ہوں میں
لشکروں کی آہٹیں تو رات بھر سنتا ہوں میں
تم ہمیں ایک دن دشت میں چھوڑ کر چل دیے تھے تمہیں کیا خبر یا اخی
کتنے موسم لگے ہیں ہمارے بدن پر نکلنے میں یہ بال و پر یا اخی
جھلس رہے ہیں کڑی دھوپ میں شجر میرے
برس رہا ہے کہاں ابرِ بے خبر میرے
پس حصار خبر آتی جاتی رہتی ہے
ہوا ادھر سے ادھر آتی جاتی رہتی ہے
اک خرابہ دل میں ہے ، اک آب جو آنکھوں میں ہے
میں تمہیں لینے کہاں آؤں خبر کرنا مجھے

جمال احسانی

چشمِ حیراں کو تماشائے دگر پر رکھا
اور اس دل کو تری خیر خبر پر رکھا
جو کچھ ان آنکھوں نے دیکھا ہے میں اس کا کیا کروں
شہر میں پھیلی ہوئی جھوٹی خبر اپنی جگہ

احسان دانش

رندان‌ تشنہ کام کو جا کر خبر کریں
آئی بہار ابرِ کرم پر نظر کریں

ادا جعفری

نگاہ اوٹ رہوں کاسۂ خبر میں رہوں
میں بجھتے بجھتے بھی پیراہن شرر میں رہوں

اسرار الحق مجاز

یوں ہی بیٹھے رہو بس دردِ دل سے بے خبر ہو کر
بنو کیوں چارہ گر تم کیا کرو گے چارہ گر ہو کر

بشیر بدر

کبھی یوں بھی آ مری آنکھ میں کہ مری نظر کو خبر نہ ہو
مجھے ایک رات نواز دے مگر اس کے بعد سحر نہ ہو

بیخود بدایونی

بے خبر جن کی یاد میں ہیں ہم
خیر سے ان کو کچھ خبر ہی نہیں

ضیا جالندھری

یہ کون دیوانے ریگِ صحرا کو موجۂ خوں سے سینچتے ہیں
کوئی کہو اس جنوں کی اس نو بہار تک بھی خبر گئی ہے

عبید اللہ علیم

یہ حال ہو گیا آخر تری محبت میں
کہ چاہتے ہیں تجھے اور تری خبر سے گئے

غلام محمد قاصر

محبت کی گواہی اپنے ہونے کی خبر لے جا
جدھر وہ شخص رہتا ہے مجھے اے دل! ادھر لے جا

احمد راہی

ہم بھانپ گئے تھے رنگ محفل
کہنے کو تو بے خبر گئے ہم

تلوک چند محروم

اس بے خودی میں کس کو ہے پروا مآل کی
موجود مبتدا ہی نہ ہو تو خبر کہاں
موت کو بھی خبر نہیں شاید
کہ وہاں سے خبر نہیں آتی
ہر موجِ آب سندھ ہوئی وقفہ پیچ و تاب
محرومؔ جب وطن میں ہماری خبر گئی

جلیل مانک پوری

میں ہوں گو بے خبر زمانے سے
دل ہے پہلو میں با خبر اپنا

جوش ملیح آبادی

ہر سانس دے رہی ہے خبر کائنات کی
پھر بادۂ جمال سے یوں بے خبر ہیں ہم

حسرت موہانی

دردِ دل کی انہیں خبر نہ ہوئی
کوئی تدبیر کارگر نہ ہوئی
نہ رہتی خبر دین و دنیا کی حسرتؔ
جو سوتے انہیں بے خبر دیکھ لیتے

حفیظ ہوشیارپوری

دل ستم زدہ کو جیسے کچھ ہوا ہی نہیں
خود اپنے حسن سے یوں بے خبر گیا کوئی

رسا چغتائی

وہ ستارہ شناس ایسا تھا
یا کسی نے اسے خبر کی ہے
اس نے زنجیر کر کے رکھا ہے
ہم سے وہ بے خبر رہے گا کیا

سید ضمیر جعفری

گمرہوں کا ہم سفر رہنا بھی اچھی بات ہے
راستے سے بے خبر رہنا بھی اچھی بات ہے

سیماب اکبر آبادی

کھو کر تری گلی میں دل بے خبر کو میں
فکر خودی سے چھوٹ گیا عمر بھر کو میں
رسماً ہی ان کو نالۂ دل کی خبر تو ہو
یعنی اثر نہ ہو تو فریب اثر تو ہو

شاد عظیم آبادی

تار ہوں آنسوؤں کے آہ کے ہرکارے ہوں
سلسلہ کوئی تو ان تک ہو خبر جانے کا
آنکھیں ملتے صحنِ چمن میں جھوم کے اٹھے نیند کے ماتے
دیکھ صبا نے آ کے خبر کی چونک مسافر رات نہیں ہے
تجھ پہ میں قرباں جانی پیارے ہم نفس و ہم درد ہمارے
تجھ سے ہے الفت میں نے خبر کی چونک مسافر رات نہیں ہے

شان الحق حقی

جو کہہ چکا ہے تو انداز تازہ تر سے کہہ
خبر کی بات ہے اک گوش بے خبر سے کہہ

عزیز حامد مدنی

وہی داغِ لالہ کی بات ہے کہ بہ نام حسن ادھر گئی
کوئی کیا کہے کہ کہاں کہاں ترے خال رخ کی خبر گئی

فانی بدایونی

آہ اب تک تو بے اثر نہ ہوئی
کچھ تمہیں کو مری خبر نہ ہوئی
دنیا میں حال آمد و رفت بشر نہ پوچھ
بے اختیار آ کے رہا بے خبر گیا
دل کی ہر لرزش مضطر پہ نظر رکھتے ہیں
وہ میری بے خبری کی بھی خبر رکھتے ہیں

اختر ہوشیارپوری

کہیں ایسا نہ ہو میں حد خبر سے گزروں
کوئی عالم ہو مجھے اپنی خبر میں رکھنا
کر گئی ہے نام سے غافل ہمیں اپنی شناخت
صرف آوازوں کے سائے ہی خبر میں رہ گئے
وہی مٹی ہے سب کے چہروں پر
آئنہ سب سے با خبر ہے یہاں

اکبر حمیدی

میں جانتا ہوں کہ اس کی خبر نہ آئے گی
تناظر اس کا مگر ہر خبر سے نکلے گا

احمد فراز

پیام کیسا مگر ہو سکے تو اے قاصد
کبھی کوئی خبر یار بے خبر لانا
زندگی بھر لہو رلائے گی
یاد یاران بے خبر شاید
یہ ایک شب کی ملاقات بھی غنیمت ہے
کسے ہے کل کی خبر تھوڑی دور ساتھ چلو
جو غیر تھے وہ اسی بات پر ہمارے ہوئے
کہ ہم سے دوست بہت بے خبر ہمارے ہوئے

اقبال ساجد

بے خبر دنیا کو رہنے دو خبر کرتے ہو کیوں
دوستو میرے دکھوں کو مشتہر کرتے ہو کیوں

امیر مینائی

اے ضبط دیکھ عشق کی ان کو خبر نہ ہو
دل میں ہزار درد اٹھے آنکھ تر نہ ہو

شاذ تمکنت

سنبھل اے قدم کہ یہ کارگاہ نشاط و غم ہے خبر بھی ہے
جسے لوگ کہتے ہیں رہ گزر کسی پا شکستہ کا گھر بھی ہے
یہ ہے بے گناہی کا ماجرا کوئی یوں ہی مجھ سے کھنچا رہا
یہی سوچ سوچ کے رہ گیا کہ مرے خدا کو خبر بھی ہے
کوئی جھونکا نہیں سنکا چمن رفتہ سے
کوئی سن گن نہیں یاروں کی خبر کیا کچھ ہے

فراق گورکھپوری

کہیں یہی تو نہیں کاشف حیات و ممات
یہ حسن و عشق بظاہر ہیں بے خبر پھر بھی
نیا نہیں ہے مجھے مرگِ ناگہاں کا پیام
ہزار رنگ سے اپنی مجھے خبر آئی
جنون کارگر ہے اور میں ہوں
حیات بے خبر ہے اور میں ہوں
جسے لوگ کہتے ہیں تیرگی وہی شب حجاب سحر بھی ہے
جنہیں بے خودی فنا ملی انہیں زندگی کی خبر بھی ہے
نہ غم عذاب و ثواب سے کبھی چھیڑ فطرت عشق کو
جو ازل سے مست نگاہ ہے اسے نیک و بد کی خبر بھی ہے

قابل اجمیری

اب یہ عالم ہے کہ غم کی بھی خبر ہوتی نہیں
اشک بہہ جاتے ہیں لیکن آنکھ تر ہوتی نہیں
تیرا انداز تغافل ہے جنوں میں آج کل
چاک کر لیتا ہوں دامن اور خبر ہوتی نہیں

قتیل شفائی

بنا ہوں میں آج تیرا مہماں کوئی عدو کو خبر نہ کر دے
اٹھا کے وہ تیری انجمن سے کہیں مجھے در بدر نہ کر دے
جو بیت گئی اس کی خبر ہے کہ نہیں ہے
دیکھو مرے تن پر مرا سر ہے کہ نہیں ہے

کلیم عاجز

یہ پکار سارے چمن میں تھی وہ سحر ہوئی وہ سحر ہوئی
مرے آشیاں سے دھواں اٹھا تو مجھے بھی اس کی خبر ہوئی

مجروح سلطان پوری

راہ گم کردہ ہوں کچھ اس کو خبر ہے کہ نہیں
اس کی پلکوں پہ ستاروں کا گزر ہے کہ نہیں

محسن احسان

اپنوں کی کوئی خبر نہ رکھیں
اتنے بھی تو بے خبر نہیں ہم

محسن نقوی

تو صداؤں کے بھنور میں مجھے آواز تو دے
تجھ کو دے گا مرے ہونے کی خبر سناٹا

میرا جی

سانس کے آغوش میں ہر سانس کا نغمہ یہ ہے
ایک دن امید ہے ان کو خبر ہو جائے گی

ناصر کاظمی

کچھ نئے لوگ آنے والے ہیں
گرم اب شہر میں خبر ہے یہ

نوح ناروی

اتنی خبر تو ہے ضرور لے گئے دل وہ چھین کر
کیا ہوا اس کا پھر مآل اس کی مجھے خبر نہیں
پوچھتے ہیں وہ حالِ دل طول سخن سے فائدہ
سو کی یہ ایک بات ہے کہہ دوں مجھے خبر نہیں