مرزا غالب

وہ دن کہاں کہ حرفِ تمنا ہو لب شناس
ناکام، بد نصیب، کبھی شاد کام ہو
عشق نے غالب نکما کر دیا
ورنہ ہم بھی آدمی تھے کام کے
خوں ہو کے جگر آنکھ سے ٹپکا نہیں اے مرگ
رہنے دے مجھے یاں، کہ ابھی کام بہت ہے

امام بخش ناسخ

کام اوروں کے جاری رہیں ناکام رہیں ہم
اب آپ کی سرکار میں کیا کام ہمارا
ہے فراق بتِ خود کام میں ناسخؔ کا کلام
ہوں میں ناکام مجھے کام سے کچھ کام نہیں

انشاء اللہ خان انشا

ٹک آنکھ ملاتے ہی کیا کام ہمارا
تس پر یہ غضب پوچھتے ہو نام ہمارا
میں نے جو کہا آئیے مجھ پاس تو بولے
کیوں کس لیے کس واسطے کیا کام ہمارا
دیوار پھاندنے میں دیکھوگے کام میرا
جب دھم سے آ کہوں گا صاحب سلام میرا
در مے کدہ سے آئی مہک ایسی ہی مزے کی
کہ پچھاڑ کھا گرا واں دل تشنہ کام الٹا
نہیں عجائب کچھ آنکھ ہی میں رطوبتیں تین سات پردے
عقول دس مدرکات دس ہیں سو کرتے رہتے ہیں کام تیسوں

بہادر شاہ ظفر

جب کہ پہلو میں ہمارے بتِ خود کام نہ ہو
گریے سے شام و سحر کیوں کہ ہمیں کام نہ ہو
بن ترے اے بتِ خود کام یہ دل کو ہے خطر
تیرے عاشق کا تمام آہ کہیں کام نہ ہو

حیدر علی آتش

حسن سے عشق کی خاطر ہے خدا نے بھیجا
کرتے ہیں آتشؔ اسے آئے ہیں جس کام کو ہم

داغ دہلوی

ہاتھ نکلے اپنے دونوں کام کے
دل کو تھاما ان کا دامن تھام کے
دعویٰ عشق و وفا پر یہ کہا
سب بجا لیکن مرے کس کام کے
جور سے یا لطف سے پورا کیا
آپ پیچھے پڑ گئے جس کام کے
دل کو روکوں کہ چشمِ گریاں کو
ایک ہی خوب کام ہوتا ہے
یا رب ہے بخش دینا بندے کو کام تیرا
محروم رہ نہ جائے کل یہ غلام تیرا
دلِ ناکام کے ہیں کام خراب
کر لیا عاشقی میں نام خراب
وہ قتل کر کے مجھے ہر کسی سے پوچھتے ہیں
یہ کام کس نے کیا ہے یہ کام کس کا تھا

شیخ ابراہیم ذوق

بلائیں آنکھوں سے ان کی مدام لیتے ہیں
ہم اپنے ہاتھوں کا مژگاں سے کام لیتے ہیں

مصحفی غلام ہمدانی

نے عشق کے قابل ہیں نے زہد کے درخور ہیں
اے مصحفیؔ اب ہم سے کچھ کام نہیں ہوتا
دل چرانا یہ کام ہے تیرا
لے گیا ہے تو نام ہے تیرا

مصطفٰی خان شیفتہ

قبر پر وہ بتِ گل فام آیا
بارے مرنا تو مرے کام آیا
خیر باد اے ہوسِ کام کہ اب
دل میں شوق بتِ خود کام آیا
بس کہ آغازِ محبت میں ہوا کام اپنا
پوچھتے ہیں ملکُ الموت سے انجام اپنا
ذکرِ عشاق سے آتی ہے جو غیرت اس کو
آپ عاشق ہے مگر وہ بتِ خود کام اپنا
بے داد وہ اور اس پہ وفا یہ کوئی مجھ سا
مجبور ہوا ہے ، دل خود کام نہ ہو گا

مومن خان مومن

تیرے سمند ناز کی بے جا شرارتیں
کرتے ہیں آگ نالۂِ اندیشہ کام کو
سہ سہ کے نادرست تری خو بگاڑ دی
ہم نے خراب آپ کیا اپنے کام کو
کیوں کام طلب ہے مرے آزار سے گردوں
ناکام سے دیکھا ہے کہیں کام نکلتا
بے اثر ہے فغان خون آلود
کیوں نہ ہوئے خراب کام مرا

مرزا رفیع سودا

نے فکر ہے دنیا کی نہ دیں کا متلاشی
اس ہستی موہوم میں کس کام کا ہوں میں

باقی صدیقی

کچھ اس انداز سے اس فتنہ پرور کا پیام آیا
نہ دنیا میرے کام آئی نہ میں دنیا کے کام آیا
کنارے آ گلے کوئی سفینہ جس طرح باقیؔ
اھا اک شور جب محفل میں کوئی تشنہ کام آیا
محفل ہستی کے سازوں پر کیوں خاموشی طاری ہے
آؤ کوئی نغمہ چھیڑیں، لاؤ کوئی کام کریں
اٹھی نہ جب نگاہ کسی تشنہ کام کی
ساقی کو پڑ گئی خم و مینا و جام کی
یاد نہ آؤ صبح و شام
اور بھی ہیں دنیا کے کام
ایسی پیاس کا کیا ہو گا
جب بھی دیکھو تشنہ کام
یاد آؤ نہ صبح و شام بہت
زندگی کو ہیں اور کام بہت
فضائے زیست باقیؔ خاک بدلی
نہ دل بدلا نہ دل کے کام بدلے
علاج تلخیِ ایام کی ضرورت ہے
فسانے ہو چکے اب کام کی ضرورت ہے

جون ایلیا

اپنے سب یار کام کر رہے ہیں
اور ہم ہیں کہ نام کر رہے ہیں

جگر مراد آبادی

جو ذرا سی پی کے بہک گیا اسے میکدے سے نکال دو
یہاں تنگ نظر کا گزر نہیں یہاں اہلِ ظرف کا کام ہے
اللہ اگر توفیق نہ دے انسان کے بس کا کام نہیں
فیضان محبت عام سہی عرفان محبت عام نہیں
آنا ہے جو بزم جاناں میں پندار خودی کو توڑ کے آ
اے ہوش و خرد کے دیوانے یاں ہوش و خرد کا کام نہیں
عشق اور گوارا خود کر لے بے شرط شکست فاش اپنی
دل کی بھی کچھ ان کے سازش ہے تنہا یہ نظر کا کام نہیں
دیوانگی ہو عقل ہو امید ہو کہ یاس
اپنا وہی ہے وقت پہ جو کام آ گیا
دل کو نہ پوچھ معرکۂ حسن و عشق میں
کیا جانیے غریب کہاں کام آ گیا
نہ غرض کسی سے نہ واسطہ مجھے کام اپنے ہی کام سے
ترے ذکر سے تری فکر سے تری یاد سے ترے نام سے

عبدالحمید عدم

لے جاتی ہے اس سمت ہمیں گردشِ دوراں
اے دوست خرابات سے کیا کام ہمارا
دل کو دل سے کام رہے گا
دونوں طرف آرام رہے گا
مفتی سے جھگڑا نہ عدمؔ کر
اس سے اکثر کام رہے گا
خوش ہوں کہ زندگی نے کوئی کام کر دیا
مجھ کو سپرد گردشِ ایام کر دیا
فرصت کا وقت ڈھونڈ کے ملنا کبھی اجل
تجھ کو بھی کام ہے ابھی مجھ کو بھی کام ہے
بے جنبشِ ابرو تو نہیں کام چلے گا
آ کر مرے قصے میں ترا نام چلے گا
عدمؔ دل کھو کے آسودہ نہیں ہم
برا تھا یا بھلا کام آ رہا تھا
کام بھی اک نماز ہے میری
ختم کرتے ہی کام پیتا ہوں
تری نگاہ کا کیا قرض ہم اتاریں گے
تری نظر سے بڑے کام لیتے رہتے ہیں

قمر جلالوی

اب مجھے دشمن سے کیا جب زیرِ دام آ ہی گیا
اک نشیمن تھا سو وہ بجلی کے کام آ ہی گیا
سن مآلِ سوزِ الفت جب یہ نام آ ہی گیا
شمع آخر جل بجھی پروانہ کام آ ہی گیا
طالبِ دیدار کا اصرار کام آ ہی گیا
سامنے کوئی بحسنِ انتظام آ ہی گیا
کر دیا مشہور پردے میں تجھے زحمت نہ دی
آج کا ہونا ہمارا تیرے کام آ ہی گیا
سن کے نامِ عشق برہم وہ بتِ خود کام ہے
میں نہ سمجھا تھا محبت اس قدر بدنام ہے
آپ کیوں پردے سے نکلے آپ پردے میں رہیں
آپ کو مشہور کر دینا ہمارا کام ہے
ہمارا آشیانہ اے باغباں غارت نہ کر دینا
ہمارے بعد ممکن ہے کسی کے کام آ جائے

شکیب جلالی

اس حادثے کی‘ نخوتِ ساقی کو کیا خبر
بادہ پیا کہ زہر پیا تشنہ کام نے

عرفان صدیقی

رگِ گلو نے بجھائی ہے تیغ ظلم کی پیاس
کیا ہے خونِ شہیداں نے کام پانی کا
رکھنا یا فہرست میں تم مرا نام نہ رکھنا
مجھ کو اس الجھن سے کوئی کام نہ رکھنا

مصطفی زیدی

یہ تشنگیاں کل بھی تھیں اور آج بھی زیدیؔ
اس ہونٹ کا سایہ بھی مرے کام نہ آیا

الطاف حسین حالی

جب دیکھئے حالیؔ کو پڑا پائیے بے کار
کرنا اسے باقی یہی اک کام ہے گویا
جی اس کا کسی کام میں لگتا نہیں زنہار
ظاہر ہے کہ حالیؔ کو کوئی کام ہے درپیش

جمال احسانی

کہنی ہے ایک بات دلِ شاد کام سے
تنگ آ گیا ہوں یار محبت کے نام سے
میں ہوں کہ مجھ کو دیدۂ بینا کا روگ ہے
اور لوگ ہیں کہ کام انہیں اپنے کام سے
قرار دل کو سدا جس کے نام سے آیا
وہ آیا بھی تو کسی اور کام سے آیا

رئیس فروغؔ

سڑکوں پہ گھومنے کو نکلتے ہیں شام سے
آسیب اپنے کام سے ہم اپنے کام سے
مجھ بے عمل سے ربط بڑھانے کو آئے ہو
یہ بات ہے اگر تو گئے تم بھی کام سے
جینے کی مزدوری کو بیگار کہوں یا کام کہوں
نقد مرگ عطا ہوتا ہے صلہ کہوں انعام کہوں

احسان دانش

زمانے میں نہیں دلدادۂ مہر و وفا کوئی
تجھے دھوکا ہے اے دل کون کس کے کام آتا ہے

اسرار الحق مجاز

زندگی کے خاکۂ سادہ کو رنگیں کر دیا
حسن کام آئے نہ آئے عشق کام آ ہی گیا

بشیر بدر

یونہی روز ملنے کی آرزو بڑی رکھ رکھاؤ کی گفتگو
یہ شرافتیں نہیں بے غرض اسے آپ سے کوئی کام ہے
وہ دلوں میں آگ لگائے گا میں دلوں کی آگ بجھاؤں گا
اسے اپنے کام سے کام ہے مجھے اپنے کام سے کام ہے
معاملہ ہے ترا بدترین دشمن سے
مرے عزیز محبت سے کام لینا ہے
تمہاری چال کی آہستگی کے لہجے میں
سخن سے دل کو مسلنے کا کام لینا ہے

ظہیر کاشمیری

کچھ بس نہ چلا جذبۂ خود کام کے آگے
جھکنا ہی پڑا اس بت بدنام کے آگے

علی سردار جعفری

ستاروں کے پیام آئے بہاروں کے سلام آئے
ہزاروں نامہ ہائے شوق اہلِ دل کے کام آئے

غلام محمد قاصر

کروں گا کیا جو محبت میں ہو گیا ناکام
مجھے تو اور کوئی کام بھی نہیں آتا

احمد راہی

گردش جام نہیں گردش ایام تو ہے
سعیٔ ناکام سہی پھر بھی کوئی کام تو ہے

تلوک چند محروم

سر مست مے کو دیکھ کے مت سوئے جام دیکھ
ساقی پلا اسی کو جسے تشنہ کام دیکھ

جلیل مانک پوری

ضبط نالہ سے آج کام لیا
گرتی بجلی کو میں نے تھام لیا
آفریں تجھ کو حسرتِ دیدار
چشمِ تر سے زباں کا کام لیا

حسرت موہانی

جو وہ نظر بسر لطفِ عام ہو جائے
عجب نہیں کہ ہمارا بھی کام ہو جائے

رسا چغتائی

ایسے کیسے بات بنے گی
ایسے کیسے کام چلے گا

سیف الدین سیف

آپ نے اس کا تڑپنا بھی گوارا نہ کیا
دلِ مضطر سے کوئی کام تو لینے دیتے

سیماب اکبر آبادی

اللٰہ اللٰہ یہ تغافل اور اس پر یہ غرور
کیا مجھے ناکام کر دینا بھی کوئی کام ہے

شاد عظیم آبادی

اگر مرتے ہوئے لب پر نہ تیرا نام آئے گا
تو میں مرنے سے در گزرا مرے کس کام آئے گا
انہیں دیکھے گی تو اے چشم حسرت وصل میں یا میں
ترے کام آئے گا رونا کہ میرے کام آئے گا
زمانہ شادؔ بے گاری میں کیوں آخر پھنساتا ہے
اپاہج کر دیا پیری نے مجھ سے کام کیا ہو گا

شکیل بدایونی

غمِ عشق سے ہیں غمِ ہستی کے ہنگامے جدا لیکن
وہاں بھی دن گزرتے ہیں یہاں بھی کام چلتا ہے
شکیلؔ مست کو مستی میں جو کہنا ہے کہنے دو
یہ مے خانہ ہے اے واعظ یہاں سب کام چلتا ہے
خوش ہوں کہ مرا حسنِ طلب کام تو آیا
خالی ہی سہی میری طرف جام تو آیا
اپنوں نے نظر پھیری تو دل تو نے دیا ساتھ
دنیا میں کوئی دوست مرے کام تو آیا
تم نے یہ کیا ستم کیا ضبط سے کام لے لیا
ترکِ وفا کے بعد بھی میرا سلام لے لیا

عزیز حامد مدنی

جو بات سکوت لب تک ہے اس سے نہ الجھ اے جذبۂ دل
کچھ عرضِ ہنر کی لاگ رہے کچھ میرے جنوں کا کام چلے

فانی بدایونی

عشق کے آزاری بھی کہیں مر جانے سے جی جاتے ہیں
لے یہ تسلی رہنے دے اے موت یہ تیرا کام نہیں
ضبط کی کوششیں بھی جاری ہیں
درد بھی کر رہا ہے اپنا کام
اللہ رے مرے دل کی نزاکت کا تقاضا
تاثیر محبت سے بھی ہم کام نہ لیتے

شاذ تمکنت

وہ معرکہ تھا کہ فتح و شکست بھی نہ ملی
نہ جانے شاذؔ نے کس مصلحت سے کام لیا
عقدۂ جاں کو ہے اب تک ترے ناخن سے امید
کس کو معلوم ادھورے ہیں مرے کام کئی

قتیل شفائی

پیار کی راہ میں ایسے بھی مقام آتے ہیں
صرف آنسو جہاں انسان کے کام آتے ہیں

کلیم عاجز

کیا غم ہے اگر شکوۂ غم عام ہے پیارے
تو دل کو دکھا تیرا یہی کام ہے پیارے
اس وقت ترا جانِ جہاں نام ہے پیارے
جو کام تو کر دے وہ بڑا کام ہے پیارے
جب پیار کیا چین سے کیا کام ہے پیارے
اس میں تو تڑپنے ہی میں آرام ہے پیارے
پھولوں سے محبت ہے تقاضائے طبیعت
کانٹوں سے الجھنا تو نہیں کام ہمارا
غیر آ کے بنے ہیں سبب رونقِ محفل
اب آپ کی محفل میں ہے کیا کام ہمارا
پئے بغیر کہو تو یہ تشنہ کام کہے
وہ راز مے جو صراحی کہے نہ جام کہے

مجروح سلطان پوری

نہ مانگوں بادۂ گلگوں سے بھیک مستی کی
اگر ترے لبِ لعلیں مرا یہ کام کریں

محسن احسان

خود اعتماد کبھی تھے پر اب یہ عالم ہے
ہزار وسوسے دل میں ہیں کام سے پہلے

ناصر کاظمی

خلوص و مہر و وفا لوگ کر چکے ہیں بہت
مرے خیال میں اب اور کوئی کام کریں
شکوہ بہ طرزِ عام نہیں آپ سے مجھے
ناکام ہوں کہ کام نہیں آپ سے مجھے