مرزا غالب

موت کا ایک دن معین ھے
نیند کیوں رات بھر نہیں آتی؟

امام بخش ناسخ

چین دنیا میں زمیں سے تا فلک دم بھر نہیں
داغ ہیں یہ گل نہیں ناسور ہیں اختر نہیں

بہادر شاہ ظفر

کریں گے قصد ہم جس دم تمہارے گھر میں آویں گے
جو ہو گی عمر بھر کی راہ تو دم بھر میں آویں گے

حیدر علی آتش

نظر آ جاتا ہے اے گل جسے رخسار ترا
پھولوں سے دامن نظارہ وہ بھر لیتا ہے

داغ دہلوی

عشق تاثیر ہی کرتا ہے کہ اس کافر نے
جب مرا حال سنا سنتے ہی جی بھر آیا

شیخ ابراہیم ذوق

کوئی غماز نہیں میری طرف سے اے ذوقؔ
کان اس کے مری فریاد ہی بھر دیتی ہے
جل اٹھے شمع کے مانند قصہ خواں کی زباں
ہمارا قصۂِ پرسوز لحظہ بھر تو کہے
خالی اے چارہ گرو ہوں گے بہت مرہم داں
پر مرے زخم نہیں ایسے کہ بھر جائیں گے

مصحفی غلام ہمدانی

کبھو تک کے در کو کھڑے رہے کبھو آہ بھر کے چلے گئے
ترے کوچے میں جو ہم آئے بھی تو ٹھہر ٹھہر کے چلے گئے
جاتے ہوئے اس گلی سے ہم کو
ہر گام اک آہ بھر کے چلنا

مصطفٰیٰ خان شیفتہ

محفل میں اک نگاہ اگر وہ ادھر کریں
سو سو اشارے غیر سے پھر رات بھر کریں
یہ دیا ہائے مجھے لذتِ آزار نے چین
دل ہوا رنج سے خالی بھی تو جی بھر آیا
کرتا ہوں فکرِ شعر جو میں شب کو شیفتہ
رہتا ہے خواب گہ میں مری رات بھر چراغ

میر مہدی مجروح

گویا شراب ہی سے بھرا عمر کا قدح
موت اس کی خوب ہے جو پیے عمر بھر شراب

مرزا رفیع سودا

لے دیدۂ تر جدھر گئے ہم
ڈبرے جو تھے خشک بھر گئے ہم

یگانہ چنگیزی

کیفیت حیات سے خالی ہوا ہے دل
او ساقی ازل مرا پیمانہ بھر کہیں

باقی صدیقی

اک نوے غم کا پیش خیمہ ہے
بے سبب زخمِ دل کا بھر جانا
زندگی کے ہنگامے دھڑکنوں میں ڈھلتیہیں
خواب میں بھی سنتے ہیں شور رات بھر اپنا
صبح امید کا خیال نہ پوچھ
ہم نے سوچا ہے رات بھر کیا کیا
گونجتی تھی کہیں صدائے جرس
قافلے دل سے رات بھر گزرے
اے بادِ سحر نہ چھیڑ ہم کو
ہم جاگے ہوئے ہیں رات بھر کے
طوفاں کو بھی ہے ملال ان کا
ڈوبی ہیں جو کشتیاں بھر کے
دل پہ کھلتی ہے جب حقیقت غم
پھر ہنسی عمر بھر نہیں آتی
بجھ رہا ہے چراغ ہے خانہ
رگ ساغر میں خون بھر ساقی
چاک دامن کا گلہ کرتے رہے ہم باقیؔ
اور محفل سے اٹھے جھولیاں بھر کے ساتھی
کیا کوئی اپنا ستم یاد آیا
آنکھ کیوں آپ کی بھر آئی ہے

جون ایلیا

میں رہا عمر بھر جدا خود سے
یاد میں خود کو عمر بھر آیا
اب کیا کہوں کہ سارا محلہ ہے شرمسار
میں ہوں عذاب میں کہ مرے زخم بھر گئے
شوق کا رنگ بجھ گیا یاد کے زخم بھر گئے
کیا مری فصل ہو چکی کیا مرے دن گزر گئے
فنا ہر دم مجھے گنتی رہی ہے
میں اک دم کا تھا اور دن بھر رہا ہوں
بجز اپنے میسر ہے مجھے کیا
سو خود سے اپنی جیبیں بھر رہا ہوں
عجب خلوص سے رخصت کیا گیا ہم کو
خیالِ خام کا تاوان تھا سو بھر آئے
کبھی خود تک پہنچ نہیں پایا
جب کہ واں عمر بھر گیا ہوں میں
مرہم ہجر تھا عجب اکسیر
اب تو ہر زخم بھر گیا ہو گا
میرا کشکول کب سے خالی تھا
میں نے اس میں شراب بھر لی ہے
زخمِ امید بھر گیا کب کا
قیس تو اپنے گھر گیا کب کا
ہمارا عمر بھر کا ساتھ ٹھیرا
سو میرے ساتھ تو دن بھر نہ رہیو
دو جہاں سے گزر گیا پھر بھی
میں رہا خود کو عمر بھر درپیش
دن ہوئے پر تو کہیں ہونا کسی بھی شکل میں
جاگ کر خوابوں نے تیرا رات بھر رکھا ہے نام

جگر مراد آبادی

دل لے کے مجھ سے دیتے ہو داغِ جگر مجھے
یہ بات بھولنے کی نہیں عمر بھر مجھے
کل شبِ ماہتاب میں اک بلبل آفت نوا
مرکزِ غم بن رہا تھا رات بھر میرے لیے
بس یہ سننا تھا کہ پائے گل پہ گر کر مر مٹا
بن گیا اک نقش عبرت عمر بھر میرے لیے

خواجہ میر درد

جان سے ہو گئے بدن خالی
جس طرف تو نے آنکھ بھر دیکھا
ایک میں دل ریش ہوں ویسا ہی دوست
زخم کتنوں کے سنا ہے بھر چلے
جوں شرر اے ہستی بے بود یاں
بارے ہم بھی اپنی باری بھر چلے

عبدالحمید عدم

دن گزر جائیں گے سرکار کوئی بات نہیں
زخم بھر جائیں گے سرکار کوئی بات نہیں
وہی شے مقصد‌ قلب و نظر محسوس ہوتی ہے
کمی جس کی برابر عمر بھر محسوس ہوتی ہے

قمر جلالوی

قمر ان کو نہ آنا تھا نہ آئے صبح ہو نے تک
شبِ وعدہ سجاتے ہی رہے گھر رات بھر اپنا
آنسو کسی کا دیکھ کہ بیمار مر گیا
جامِ حیات ایک ہی قطرے میں بھر گیا
وقت آ گیا ہے یار کے وعدے کا اے قمر
دیکھو وہ آسمان ستاروں سے بھر گیا
اب تو منہ سے بول مجھ کو دیکھ دن بھر ہو گیا
اے بتِ خاموش کیا سچ مچ کا پتھر ہو گیا
دیکھا جو صبحِ فرقت اترا سا منہ قمر کا
بولے کہ ہو گیا ہے کیا حال رات بھر میں
مرا حال دیکھ کے ساقیا کوئی بادہ خوار نہ پی سکا
ترا جام خالی نہ ہو سکے مری چشمِ تر نہ بھر رہی
یوں تمھارے ناتوان منزل بھر چلے
کھائی ٹھوکر گر پڑے گر کر اٹھے اٹھ کر چلے
آ رہے ہیں اشک آنکھوں میں اب اے ساقی نہ چھیڑ
بس چھلکنے کی کسر باقی ہے ساغر بھر چلے
اس طرف بھی اک نظر ہم بھی کھڑے ہیں دیر سے
مانگنے والے تمھارے در سے جھولی بھر چلے
ان کی محفل میں انہیں سب رات بھر دیکھا کیے
ایک ہم ہی تھے کہ اک اک کی نظر دیکھا کیے
رات بھر تڑپا کیا ہے دردِ فرقت سے قمر
پوچھ تاروں سے تارے رات بھر دیکھا کیے

شکیب جلالی

اس مرحلے کو موت بھی کہتے ہیں دوستو
اک پل میں ٹوٹ جائیں جہاں عمر بھر کے ساتھ
اس کی آواز پا تو بڑی بات ہے
ایک پتہ بھی کھڑکا نہیں رات بھر
لوگ دیتے رہے کیا کیا نہ دلاسے مجھ کو
زخم گہرا ہی سہی، زخم ہے ، بھر جائے گا
صدیوں میں طے ہوا تھا بیاباں کا راستہ
گلشن کو لوٹتے ہوئے پل بھر لگا مجھے

عرفان صدیقی

ہو چکا کھیل بہت جی سے گزر جانے کا
آج اقرار کریں زخم کے بھر جانے کا
ان گنت منظر ہیں اور دل میں لہو دو چار بوند
رنگ آخر کتنی تصویروں میں بھر جائیں گے لوگ
اب آ گئی ہے سحر اپنا گھر سنبھالنے کو
چلوں‘ کہ جاگا ہوا رات بھر کا میں بھی ہوں
دیکھیے کس صبح نصرت کی خبر سنتا ہوں میں
لشکروں کی آہٹیں تو رات بھر سنتا ہوں میں
آگے تقدیر پرندے کی جہاں لے جائے
حدِ پرواز فقط حوصلہ بھر ہے سائیں
جنگ کا فیصلہ ہو چکا ہے تو پھر میرے دل کی کمیں گاہ میں کون ہے
اک شقی کاٹتا ہے طنابیں مرے خیمہ خواب کی رات بھر یا اخی
اور اے روشن قبا تجھ سے ہمیں کیا چاہیے
ایک دامن بھر ہوا اور اک دیا بھر روشنی
میرے مولا، ہجر کی تاریک راتوں کے طفیل
زندگی بھر چاہتیں اور زندگی بھر روشنی

الطاف حسین حالی

حالیؔ نشاط نغمہ و مے ڈھونڈتے ہو اب
آئے ہو وقت صبح رہے رات بھر کہاں

جمال احسانی

کب دل کے آئنے میں وہ منظر نہیں رہا
آنکھوں کے سامنے جو کہ پل بھر نہیں رہا
واقعی کوئی اگر موجود ہے
پھر تو یہ دکھ عمر بھر موجود ہے

رئیس فروغؔ

تیری بھی تنہائی کو
باتوں سے بھر جاؤں گا

ادا جعفری

جو درد عیسیٰ نفس نہ ہوتا تو دل پہ کیا اعتبار آتا
کچھ اور پیماں کچھ اور پیکاں کہ زخم جتنے تھے بھر گئے ہیں

بشیر بدر

بہت دنوں سے ہے دل اپنا خالی خالی سا
خوشی نہیں تو اداسی سے بھر گئے ہوتے

بیخود بدایونی

اللہ ری میری بے قراری
چین ان کو بھی رات بھر نہ آیا

ضیا جالندھری

اب اس کا چارہ ہی کیا کہ اپنی طلب ہی لا انتہا تھی ورنہ
وہ آنکھ جب بھی اٹھی ہے دامان درد پھولوں سے بھر گئی ہے

ظہیر کاشمیری

تو میرے حالِ پریشاں کا کچھ خیال نہ کر
جو زخم تو نے لگائے ہیں بھر ہی جائیں گے

عبید اللہ علیم

وہی طائروں کے جھرمٹ جو ہوا میں جھولتے تھے
وہ فضا کو دیکھتے ہیں تو اب آہ بھر رہے ہیں
بڑی آرزو تھی ہم کو نئے خواب دیکھنے کی
سو اب اپنی زندگی میں نئے خواب بھر رہے ہیں

فارغ بخاری

جی لیں گے وہ لمحہ اوڑھ کر ہم
اے کاش وہ لمحہ بھر ہی ٹھہرے

احمد راہی

جلوے تھے کسی کے کار فرما
ہر نقش میں رنگ بھر گئے ہم

ماجد صدیقی

یاد میں تھیں صبا کی سی اٹکھیلیاں
جانے کیا کچھ رہا رات بھر سامنے

تلوک چند محروم

جب وہ صورت نظر نہیں آتی
کب مری آنکھ بھر نہیں آتی

جلیل مانک پوری

کیا اثر تھا نگاہ ساقی میں
نشہ اترا نہ عمر بھر اپنا
وضع داری کی شان ہے یہ جلیلؔ
رنگ بدلا نہ عمر بھر اپنا
موسمِ گل میں بھی جلیلؔ افسوس
دامن اپنا گلوں سے بھر نہ سکا
آج آنسو تم نے پونچھے بھی تو کیا
یہ تو اپنا عمر بھر کا کام ہے

ثروت حسین

کبھی تیغ تیز سپرد کی کبھی تحفۂ گل تر دیا
کسی شاہ زادی کے عشق نے مرا دل ستاروں سے بھر دیا
دیکھا جو اس طرف تو بدن پر نظر گئی
اک آگ تھی جو میرے پیالے میں بھر گئی

حفیظ ہوشیارپوری

آج انہیں کچھ اس طرح جی کھول کر دیکھا کیے
ایک ہی لمحے میں جیسے عمر بھر دیکھا کیے

رسا چغتائی

ہجر کی شب گزر ہی جائے گی
یہ اداسی تو عمر بھر کی ہے
سر اٹھایا تو سر رہے گا کیا
خوف یہ عمر بھر رہے گا کیا
وہ جو اک خواب ہم نے دیکھا تھا
خواب ہی عمر بھر رہے گا کیا

خاطر غزنوی

شب بھر بدن مناتے رہے جشن ماہتاب
آئی سحر تو جیسے اندھیروں سے بھر گئے

سید ضمیر جعفری

تا ابد کتنے اندھیرے تھے کہ روشن ہو گئے
شمع کا جلنا بظاہر رات بھر کی بات ہے
اپنی خبر نہیں ہے بجز اس قدر مجھے
اک شخص تھا کہ مل نہ سکا عمر بھر مجھے
کپڑے اپنے گھر کے ہیں
دھبے دنیا بھر کے ہیں

سیماب اکبر آبادی

کھو کر تری گلی میں دل بے خبر کو میں
فکر خودی سے چھوٹ گیا عمر بھر کو میں
جو میرے تنگنائے دل میں تجھ کو جلوہ گر دیکھا
مری نظروں نے حیرت سے مجھی کو عمر بھر دیکھا

شاد عظیم آبادی

عدم میں عیش ہے چلتا ہوں میں بھی لے اے دل
جہاں میں جتنے مصیبت کے دن تھے بھر آیا
ہجومِ غم نے سکھانے کی لاکھ کوشش کی
ہمیں تو آہ بھی کرنا نہ عمر بھر آیا
جو چند دن میں ہوئے ذی کمال کون ہیں شادؔ
ہمیں تو شعر کا کہنا نہ عمر بھر آیا
تجھ سے رخصت ہے مری جلد بس اے پیرِ مغاں
منتظر ہوں فقط اس جام کے بھر جانے کا
غم کی لذت ابتدا میں تھی مگر
اس قدر کھایا کہ اب جی بھر گیا
ہر نوالہ اس کا اب تو تلخ ہے
عمر نعمت تھی مگر جی بھر گیا
کیا کہوں ان آنسوؤں کا زور و شور
آنکھیں جھپکی تھیں کہ چلو بھر گیا
دل یہ امڈا مے سے خالی دیکھ کر
جام اشکوں سے لبالب بھر گیا
گر نہ جائے خاک پر قطرہ کوئی
بس بس اے ساقی کہ ساغر بھر گیا
شادؔ کیا کچھ کم ہیں دو کم ساٹھ سال
زندگی سے بس دل اپنا بھر گیا

شان الحق حقی

اثر نہ ہو تو اسی نطق بے اثر سے کہہ
چھپا نہ دردِ محبت جہان بھر سے کہہ

شکیل بدایونی

لا رہا ہے مے کوئی شیشے میں بھر کے سامنے
کس قدر پر کیف ہے منظر نظر کے سامنے

اختر ہوشیارپوری

کچے مکان جتنے تھے بارش میں بہہ گئے
ورنہ جو میرا دکھ تھا وہ دکھ عمر بھر کا تھا
میرے لہو میں اس نے نیا رنگ بھر دیا
سورج کی روشنی نے بڑا کام کر دیا
میں دیکھتا تھا کہ انگلیوں میں دیئے کی لو ہے
میں جاگتا تھا کہ رنگ خوابوں میں بھر رہا تھا

احمد فراز

آنکھیں ہیں کہ خالی نہیں رہتی ہیں لہو سے
اور زخمِ جدائی ہے کہ بھر بھی نہیں جاتا
مجھ کو ساقی سے گلہ ہو نہ تنک بخشی کا
زہر بھی دے تو مرے جام کو بھر بھر کر دے
کچھ تو ثبوتِ خونِ تمنا کہیں ملے
ہے دل تہی تو آنکھ کو بھر جانا چاہیے
ہم بھی قائل ہیں وفا میں استواری کے مگر
کوئی پوچھے کون کس کو عمر بھر اچھا لگا
جہاں بھی جانا تو آنکھوں میں خواب بھر لانا
یہ کیا کہ دل کو ہمیشہ اداس کر لانا
میں برف برف رتوں میں چلا تو اس نے کہا
پلٹ کے آنا تو کشتی میں دھوپ بھر لانا
بہت سی خواہشیں سو بارشوں میں بھیگی ہیں
میں کس طرح سے کہوں عمر بھر اسی کا رہا
عیسیٰ نہ بن کہ اس کا مقدر صلیب ہے
انجیل آ گہی کے ورق عمر بھر نہ کھول
سنا ہے لوگ اسے آنکھ بھر کے دیکھتے ہیں
سو اس کے شہر میں کچھ دن ٹھہر کے دیکھتے ہیں
سنا ہے حشر ہیں اس کی غزال سی آنکھیں
سنا ہے اس کو ہرن دشت بھر کے دیکھتے ہیں
سنا ہے اس کی سیہ چشمگی قیامت ہے
سو اس کو سرمہ فروش آہ بھر کے دیکھتے ہیں

امیر مینائی

دشمن کو کبھی ہوتی ہے دل پہ مرے رقت
پر دل یہ ترا ہے کہ کبھی بھر نہیں آتا
خونِ ناحق کر کے اک بے جرم کا
ہاتھ ناحق خون میں تم بھر چلے
یہ ملی کس جرم پر دم کو سزا؟
حکم ہے دن بھر چلے شب بھر چلے

شاذ تمکنت

میں کب سے ہاتھ میں کاسہ لیے کھڑا ہوں شاذؔ
اگر یہ زخم ہی ہوتا تو کب کا بھر جاتا
ٹوٹ جائے گا نشہ دیکھ کوئی نام نہ لے
آنکھ بھر آئے گی اس طرح مرا جام نہ بھر
شکن شکن تری یادیں ہیں میرے بستر کی
غزل کے شعر نہیں کروٹیں ہیں شب بھر کی
یہ جمع و خرچ زبانی ہے نقدِ شعر و سخن
مگر یہی تو کمائی ہے زندگی بھر کی

فراق گورکھپوری

کسی کا یوں تو ہوا کون عمر بھر پھر بھی
یہ حسن و عشق تو دھوکا ہے سب مگر پھر بھی
فضا تبسم صبحِ بہار تھی لیکن
پہنچ کے منزلِ جاناں پہ آنکھ بھر آئی
عجب نہیں کہ چمن در چمن بنے ہر پھول
کلی کلی کی صبا جا کے گود بھر آئی
شبِ فراق اٹھے دل میں اور بھی کچھ درد
کہوں یہ کیسے تری یاد رات بھر آئی
فراقؔ اک ایک حسرت مٹ رہی ہے
یہ ماتم رات بھر ہے اور میں ہوں

کلیم عاجز

شاعر فکر و نظر کا مالک دل کا سلطاں گھر کا فقیر
دنیا کا پامال قدم بھی دنیا بھر سے آگے بھی

محسن احسان

خود اپنے آپ سے یہ گلہ عمر بھر کیا
کیسے ترے فراق کا موسم بسر کیا
بہار نے کیا منصوبہ حنا بندی
مناؤ جشن کہ سب زخم بھر گئے اپنے

محسن نقوی

ہر ایک شب یوں ہی دیکھیں گی سوئے در آنکھیں
تجھے گنوا کے نہ سوئیں گی عمر بھر آنکھیں

ناصر کاظمی

کسی کلی نے بھی دیکھا نہ آنکھ بھر کے مجھے
گزر گئی جرسِ گل اداس کر کے مجھے
ترے فراق کی راتیں کبھی نہ بھولیں گی
مزے ملے انہیں راتوں میں عمر بھر کے مجھے
کہیں اجڑی اجڑی سی منزلیں کہیں ٹوٹے پھوٹے سے بام و در
یہ وہی دیار ہے دوستو جہاں لوگ پھرتے تھے رات بھر
اب کوئی کام بھی کریں ناصر
رونا دھونا تو عمر بھر ہے یہ
نیتِ شوق بھر نہ جائے کہیں
تو بھی دل سے اتر نہ جائے کہیں
آرزو ہے کہ تو یہاں آئے
اور پھر عمر بھر نہ جائے کہیں
دل بھی عجب عالم ہے نظر بھر کے تو دیکھو
نقشے کبھی اس اجڑے ہوئے گھر کے تو دیکھو
بے زادِ سفر جیب تہی شہر نوردی
یوں میری طرح عمر کے دن بھر کے تو دیکھو
چھپ جاتی ہیں آئینہ دکھا کر تری یادیں
سونے نہیں دیتیں مجھے شب بھر تری یادیں
نہ اب وہ یادوں کا چڑھتا دریا نہ فرصتوں کی اداس برکھا
یونہی ذرا سی کسک ہے دل میں جو زخم گہرا تھا بھر گیا وہ