مرزا غالب

شب ہوئی، پھر انجم رخشندہ کا منظر کھلا
اس تکلف سے کہ گویا بتکدے کا در کھلا
اس کی امت میں ہوں میں، میرے رہیں کیوں کام بند
واسطے جس شہ کے غالب! گنبدِ بے در کھلا
گلشن میں بند وبست بہ رنگِ دگر ہے آج
قمری کا طوق حلقۂِ بیرونِ در ہے آج
اے عافیت! کنارہ کر، اے انتظام! چل
سیلابِ گریہ در پے دیوار و در ہے آج
وفورِ عشق نے کاشانہ کا کیا یہ رنگ
کہ ہو گئے مرے دیوار و در در و دیوار
یہ ہم جو ہجر میں دیوار و در کو دیکھتے ہیں
کبھی صبا کو کبھی نامہ بر کو دیکھتے ہیں
خیالِ جلوۂِ گل سے خراب ہیں میکش
شراب خانے کے دیوار و در میں خاک نہیں

امام بخش ناسخ

دم نکلنے پر جو آتا ہے نہیں رکتا ہے پھر
دیکھ لو قصرِ حباب اے اہل غفلت در نہیں

انشاء اللہ خان انشا

گر بھروسا ہے ہمیں اب تو بھروسا تیرا
اور تکیہ ہے اگر تیرے ہی در کا تکیہ

حیدر علی آتش

قاتل جزائے خیر ملے تیری تیغ کو
زخموں کے منہ کھلے نہیں جنت کے در کھلے

داغ دہلوی

نہ گئی تاک جھانک کی عادت
لیے پھرتی ہیں در بہ در آنکھیں
شبِ وعدہ اپنا یہی مشغلہ تھا
اٹھا کر نظر سوئے در دیکھ لینا

مصحفی غلام ہمدانی

پھر غیرتِ عشق نے بٹھائے
درباں شدید اس کے در پر
شب شوق لے گیا تھا ہمیں اس کے گھر تلک
پر غش سا آ گیا ووہیں پہنچے جو در تلک
خواہی تو چشم چپ سے در آ خواہ راست ہے
آنے کو گھر میں دل کے یہ در دونوں ایک ہیں
ہمیں اس کو میں رہنے کا نہیں کچھ اور تو حاصل
پر اتنا ہے کہ گاہے چاک در سے دیکھ لیتے ہیں
کیا میں جاتا ہوں صنم چھٹ ترے در اور کہیں
لے قسم مجھ سے جو میرا ہو گزر اور کہیں

مصطفٰی خان شیفتہ

دل سے کشادہ تر نہ ہو کیوں کر فضائے بزم
تنگیِ خانہ حلقۂِ بیرونِ در ہے آج
اربابِ خانقاہ ہیں محتاجِ اغنیا
کافی ہے ہم کو پیرِ مغاں! تیرے در سے فیض

مومن خان مومن

ہجر پردہ نشیں میں مرتے ہیں
زندگی پردۂِ در نہ ہو جائے
لگے ان آنکھوں سے ہر وقت اے دلِ صد چاک
ترا نہ رتبہ ہوا کیوں شگاف در کا سا

میر مہدی مجروح

مجھے دیوار حیرت نے بنایا
گیا ہے جھانک کر یہ کون در سے
نہ کھولیں گے تو یہ ٹوٹے گا آخر
کہ میں ٹکرا رہا ہوں سر کو در سے

فیض احمد فیض

گرمیء شوقِ نظارہ کا اثر تو دیکھو
گل کھلے جاتے ہیں وہ سایہء در تو دیکھو
بیداد گروں کی بستی ہے یاں داد کہاں خیرات کہاں
سر پھوڑتی پھرتی ہے ناداں فریاد جو در در جاتی ہے

یگانہ چنگیزی

غیب سے پچھلے پہر آتی ہے کانوں میں صدا
اٹھو اٹھو رحمت ربِ علا کا در کھلا
رنگ بدلا پھر ہوا کا مے کشوں کے دن پھرے
پھر چلی بادِ صبا پھر مے کدے کا در کھلا
خدا کی مار وہ ایام شور و شر گزرے
وہ جن سوار تھا سر پر کہ سر سے در گزرے
جو سبز باغ تمنا پہ پھیر دے پانی
خدا بچائے ہم ایسی نظر سے در گزرے

باقی صدیقی

لو اب تو دل کے سناٹے میں باقیؔ
ہوا شامل سکوت بام و در بھی
کچھ بھی پایا نہ دردِ سر کے سوا
گئے جس در پہ تیرے در کے سوا
کس کے در پر صدا کریں جا کر
وا نہیں کوئی اپنے در کے سوا
پھر چلے گر سے تماشا بن کر
پھر ترا روزنِ در یاد آیا
منزلوں ذوقِ سفر سے الجھے
منزلروں آپ کا در یاد آیا
جو پرسشِ غم کے لیے آ جائے غنیمت
کشکول کی مانند کھلا رہتا ہے در اب
زندگی حسن بام و در تو نہیں
چند اینٹوں کانام گھر تو نہیں
سائے کا ایک طور نہ چلمن کا ایک رنگ
دیوار کا رہا نہ کسی در کا آدمی
گھر کے اندر نظر نہیں جاتی
راہ میں حسن بام و در ہے ابھی
بیٹھا ہوا ہوں غیر کے در پر شکستہ پا
کس مہ سے میں کہو ترے در کی تلاش ہے

جون ایلیا

بند باہر سے مری ذات کا در ہے مجھ میں
میں نہیں خود میں یہ اک عام خبر ہے مجھ میں
پڑ گیا ہے اک بھنور اس کو سمجھ بیٹھے ہیں گھر
لہر اٹھی ہے لہر کا دیوار و در رکھا ہے نام
بس اک غبار وہم ہے اک کوچہ گرد کا
دیوار بود کچھ نہیں اور در بھی کچھ نہیں

جگر مراد آبادی

اپنے دل میں جز ترے میں بھی سما سکتا نہیں
میرا ہر ہر سانس ہے زنجیرِ در میرے لیے

عبدالحمید عدم

یہ دو پتھر نہ جانے کب سے آپس میں ہیں وابستہ
جبیں اپنی تمہارا سنگِ در محسوس ہوتی ہے

قمر جلالوی

نشاناتِ جبیں جوشِ عقیدت خود بتائیں گے
نہ پوچھو مجھ سے سجدے جا کے دیکھو سنگِ در اپنا
دیکھو پھر دیکھ لو دیوار کی در کی صورت
تم کہیں بھول نہ جاؤ مرے گھر کی صورت
پوچھتا ہوں ترے حالات بتاتے ہی نہیں
غیر کہتے نہیں مجھ سے ترے در کی صورت
اللٰہ رے الفت بتِ کافر ترے در کی
منت مجھے درباں کی نہ کرنی تھی مگر کی
ایسا بھی ایک وقت پڑا تھا شبِ الم
حسرت سے دیکھنے لگے دیوار و در مجھے
ان کے جاتے ہی وحشت کا اثر دیکھا کیے
سوئے در دیکھا تو پہروں سوئے در دیکھا کیے

شکیب جلالی

یادیں ہیں اپنے شہر کی اہل سفر کے ساتھ
صحرا میں لوگ آئے ہیں دیوار و در کے ساتھ
اجڑا ہوا مکاں ہے یہ دل‘ جہاں پہ ہر شب
پرچھائیاں لپٹ کر روتی ہیں بام و در سے
گھر میں طوفان آئے زمانہ ہوا
اب بھی کانوں میں بجتی ہے زنجیرِ در
کچھ دن اگر یہی رہا دیوار و در کا رنگ
دیوار و در پہ دیکھنا خونِ جگر کا رنگ

عرفان صدیقی

ہر شئے کو ایک سیل بلاخیز لے گیا
سودا نہ سر، چراغ نہ در، کچھ نہیں بچا
خرابہ ایک دن بن جائے گھر ایسا نہیں ہو گا
اچانک جی اٹھیں وہ بام و در ایسا نہیں ہو گا
آخری امید کا مہتاب جل بجھنے کے بعد
میرا سو جانا مرے دیوار و در کا جاگنا
ہم نے خود بن باس لینے کا کیا تھا فیصلہ
یار اب مڑ مڑ کے سوئے بام و در کیا دیکھنا
اندھیرا تھا مری گلیوں میں لیکن
پسِ دیوار و در ایسا نہیں تھا
اب تو یہ پرچھائیاں پہچان میں آتیں نہیں
ان میں اک چہرہ چراغِ بام و در جیسا بھی تھا
چاہیے کوئی نہ کوئی راستہ سیلاب کو
سرپھری دیوار آخر بہ گئی‘ در بچ گیا
اب آفتاب تو محور بدل نہیں سکتا
تو کیوں نہ زاویۂ بام و در بدل دیں ہم
رات دن سوچتے رہتے ہیں یہ زندانیِ ہجر
اس نے چاہا ہے تو دیوار میں در آ گئے ہیں
احوال اس چراغ کا گھر نے کہا نہیں
دستک جو دی تو سایۂ در نے کہا نہیں
شب گزیدہ دیاروں کے ناقہ سواروں میں مہتاب چہرہ تمہارا نہ تھا
خاک میں مل گئے راہ تکتے ہوئے سب خمیدہ کمر بام و در یا اخی
خبر نہیں ہے مرے گھر نہ آنے والے کو
کہ اس کے قد سے تو اونچے ہیں بام و در میرے
ذرا جو بند ہوں آنکھیں تو شب کے زنداں میں
عجیب سلسلۂ بام و در نکلتا ہے
بولتے بولتے ہو جاتے ہیں خاموش چراغ
سخنِ سایۂ در ختم کہاں ہوتا ہے
اپنے چاروں سمت دیواریں اٹھانا رات دن
رات دن پھر ساری دیواروں میں در کرنا مجھے
پاؤں پتھر ہوں تو کیا وحشت سرکا حاصل
فرض کر لیجیے دیوار میں در بھی ہو جائے