مرزا غالب

دریائے معاصیتنک آبی سے ہوا خشک
میرا سرِ دامن بھی ابھی تر نہ ہوا تھا
پھر مجھے دیدۂِ تر یاد آیا
دل، جگرِ تشنۂِ فریاد آیا

امام بخش ناسخ

میں نے لکھا ہے جو اپنا یہ مصیبت نامہ
مہر کرنے کو کروں اشک سے اب تر کاغذ

انشاء اللہ خان انشا

اشک مژگانِ تر کی پونجی ہے
یہ ثمر اس شجر کی پونجی ہے

بہادر شاہ ظفر

رہیں عدو سے وہی گرم جوشیاں اس کی
اس آہ سرد اور اس چشمِ تر سے کچھ نہ ہوا
یہی گر جوشِ گریہ ہے تو بہہ کر ساتھ اشکوں کے
ہزاروں پارۂ دل میرے چشمِ تر میں آویں گے

حیدر علی آتش

شیشے شراب کے رہیں آٹھوں پہر کھلے
ایسا گھرے کہ پھر نہ کبھی ابرِ تر کھلے
لختِ جگر کو کیونکر مژگانِ تر سنبھالے
یہ شاخ وہ نہیں جو بار ثمر سنبھالے

داغ دہلوی

ہے مجمع اغیار کہ ہنگامۂِ محشر
کیا سیر مرے دیدۂ تر دیکھ رہے ہیں

شیخ ابراہیم ذوق

جب اپنے گریہ و سوزِ جگر کو دیکھتے ہیں
سلگتی آگ میں ہم خشک و تر کو دیکھتے ہیں
مری حقیقت پر درد کو کبھی اس سے
بہ آہ و نالہ نہ کہوے بہ چشمِ تر تو کہے
ہر ایک شعر میں مضمون گریہ ہے میرے
مری طرح سے کوئی ذوقؔ شعرِ تر تو کہے
آگ دوزخ کی بھی ہو جائے گی پانی پانی
جب یہ عاصی عرق شرم سے تر جائیں گے
کھائے ہے اس مزے سے غمِ عشق میرا دل
جیسے گرسنہ مارے ہے حلوائے تر پہ ہاتھ

مصحفی غلام ہمدانی

کیا فائدہ رکھے ہے بس اب زیادہ مت رو
رونا ترا کسی نے اے چشمِ تر نہ دیکھا
اس رنگ سے اپنے گھر نہ جانا
دامن ترا خوں میں تر بہت ہے
رہتی ہیں بہ وقت گریہ اکثر
دو انگلیاں اپنی چشمِ تر پر
جتنے ہیں گرد و پیش ہمسائے
گھر ڈبوئے گی چشمِ تر سب کے
ہے اضطرابِ دل سے نپٹ عرصہ مجھ پہ تنگ
آج اس تلک بہ دیدۂ تر جاؤں کیا کروں
میں جل رہا ہوں ان کے تو ہاتھوں سے کچھ نہ پوچھ
اے مصحفیؔ یہ دیدۂ تر دونوں ایک ہیں
ہمیں گریہ سے وہ فرصت کہاں جو خال و خط دیکھیں
مگر نقشہ ترا اس چشمِ تر سے دیکھ لیتے ہیں
سامنے اس کے لگوں رونے تو جھنجھلا کے کہے
یاں سے لے جائیے یہ دیدۂ تر اور کہیں
دیکھ تو اے بتِ بے مہر تری فرقت میں
ہر بن موے مرا دیدۂ تر ہے کہ نہیں

مصطفٰی خان شیفتہ

کچھ اب کے ہم سے بولے تو یہ جی میں ہے کہ پھر
ناصح کو بھی رقیب سے آزردہ تر کریں
گو کچھ نہ کہا، پر ہوئے دل میں متاثر
شکوہ جو زباں پر مری آشفتہ تر آیا
کیا دیر ہے اے ساقی گلفام سحر ہے
کیا عذر ہے اے زاہدِ خشک، ابرِ تر آیا
شعلہ رو یار، شعلہ رنگِ شراب
کام یاں کیا ہے دامنِ تر کا
اپنی نہاد میں نہیں احساں فرامشی
پایا ہے ہم نے صاعقے کا ابرِ تر سے فیض

مومن خان مومن

میرے آنسو نہ پونچھنا دیکھو
کہیں دامانِ تر نہ ہو جائے
کرے نہ خانہ خرابی تری ندامت جور
کہ آب شرم میں ہے جوش چشمِ تر کا سا

فیض احمد فیض

پھر آگ بھڑکنے لگی ہر ساز طرب میں
پھر شعلے لپکنے لگے ہر دیدہِ تر سے
تیز ہے آج دردِ دل ساقی
تلخیِ مے کو تیز تر کر دے
صبح کی طرح جھمکتا ہے شبِ غم کا افق
فیض، تابندگیء دیدہء تر تو دیکھو
کب جان لہو ہو گی، کب اشک گہر ہو گا
کس دن تری شنوائی اے دیدۂ تر ہو گی

مرزا رفیع سودا

دیکھ لی ساقی کی بھی دریا دلی
لب نہ ہمارے کبھو تر کر گیا

یگانہ چنگیزی

ایسا رونا بھی کوئی رونا ہے
آستین آنسوؤں سے تر نہ ہوئی

باقی صدیقی

دل کو جب تیری رہگزر جانا
دور کا غم قریب تر جانا
بوجھ پلکیں، اداس نظریں
فریاد ہے میری چشمِ تر کی
آنچ دامان صبا سے آئی
اعتبار گلِ تر یاد آیا
کھل گیا راز گلستاں دل پر
قچبھ رہے ہیں گلِ تر آنکھوں میں
رودادِ غم ہے اب نئے عنوان کی فکر میں
آنسو بہا کے دیدہِ تر مطمئن نہیں
بے ارادہ چھلک چھلک جانا
جامِ مے ہے کہ چشمِ تر ساقی
دست گلچیں ہے کہ شاخِ گل ہے
جب اٹے اک گلِ تر لے آئے

جون ایلیا

زخم ہا زخم ہوں اور کوئی نہیں خوں کا نشاں
کون ہے وہ جو مرے خون میں تر ہے مجھ میں
ہے یہ عالم عجیب اور یہاں
ماجرا ہے عجیب تر درپیش

جگر مراد آبادی

ہاں مبارک اب ہے معراج نظر میرے لیے
جس قدر وہ دور تر نزدیک تر میرے لیے
میں ہوں وحشی آہ کس صحرائے آفت خیز کا
ہے گل ویرانہ بھی بیگانہ تر میرے لیے
جذب ہو کر رہ گیا ہوں میں جمالِ دوست میں
عشق ہے تابندہ تر پائندہ تر میرے لیے
مجھ کو جنت ہی جو دنیا ہے تو یارب بخش دے
بس یہی دامانِ تر چشمان تر میرے لیے
جس نے زاہد سے بھی کافر کے اڑا ڈالے ہیں ہوش
اس سے بھی کچھ اور ساقی تیز تر میرے لیے

خواجہ میر درد

شمع کے مانند ہم اس بزم میں
چشمِ تر آئے تھے دامنِ تر چلے
چمن میں صبح یہ کہتی تھی ہو کر چشمِ تر شبنم
بہار باغ گو یوں ہی رہی لیکن کدھر شبنم

قمر جلالوی

اے کلی اپنی طرف دیکھ کہ خاموش ہے کیوں
کل کو ہو جائے گی تو بھی گلِ تر کی صورت
جام خالی ہوئے محفل میں ہمارے آگے
ہم بھرے بیٹھے رہے دیدۂ تر کی صورت
رسوائیوں کا ڈر بھی میری قضا کا غم ہے
میت سے کچھ الگ ہیں آنسو ہیں چشمِ تر میں

شکیب جلالی

رشتہِ غم کو رگِ جاں سمجھے
زخمِ خنداں کو گلِ تر جانا
کاسہِ سرکو نہ دی زخم کی بھیک
ہم کو مجنوں سے بھی کم تر جانا
اس بت کدے میں تو جو حسیں تر لگا مجھے
اپنے ہی اک خیال کا پیکر لگا مجھے
کم نہیں رات کے صحرا سے ‘ مرے دل کی فضا
اور آکاش کے تاروں سے فزوں تر یادیں

عرفان صدیقی

طوفاں میں تا بہ حدِ نظر کچھ نہیں بچا
اب دیکھنے کو دیدۂ تر، کچھ نہیں بچا
موجِ خوں بھرتی رہی دشت کی تصویر میں رنگ
کبھی دریا نہ مرے دیدۂ تر کا ٹھہرا
خشک ہوتا ہی نہیں دیدۂ تر پانی کا
یم بہ یم آج بھی جاری ہے سفر پانی کا
کوئی حرفِ دعا میرے لیے پتوار بن جائے
بچا لے ڈوبنے سے چشمِ تر ایسا نہیں ہو گا
پھر ہواؤں سے کسی امکان کی ملنا نوید
پھر لہو میں آرزوئے تازہ تر کا جاگنا
دستِ قاتل کیا کٹے اے چشمِ تر کیا دیکھنا
آج کے اخبار میں کل کی خبر کیا دیکھنا
مرے خوابوں کے دریا خشک ہو جائیں
نہیں‘ اے چشمِ تر‘ ایسا نہیں تھا
دل کی بے رنگی سے بہتر تھی لہو کی ایک بوند
وہ بھی اک سرمایہ تھا اے چشمِ تر جیسا بھی تھا
اب ڈھونڈ اور قدرشناسان رنگ و بو
ہم نے یہ کام اے گلِ تر بند کر دیا
کب مرے قریۂ ظلمات پہ ہو گا روشن
میرا مہتاب‘ مرے دیدۂ تر کا وارث
کسی نے بند کیا ہم پہ اپنے نام کا رزق
تو ہم بھی بھول گئے خشک و تر کے نام تمام
اب تو باقی ہے یہی سمتِ سفر چلتا ہوں
آج میں بھی طرف دیدۂ تر چلتا ہوں
تمہارے زخموں سے میرا بھی ایک رشتہ ہے
لہو نہیں ہوں مگر چشمِ تر کا میں بھی ہوں
ہم نے دیکھا ہی تھا دنیا کو ابھی اس کے بغیر
لیجیے بیچ میں پھر دیدۂ تر آ گئے ہیں
تو شہریار آب و نمِ شاخسار کا
میرے لیے بھی کوئی گلِ تر، علیؑ علیؑ
کیا ابرِ گریزاں سے شکایت ہو کہ دل میں
صحرا ہی کچھ ایسا ہے کہ تر ہم نہیں ہوتے
ہوئی ہے شاخ نوا تازہ تر، سلام تجھے
مسافتوں کی ہوائے سحر سلام تجھے
جہانِ نو تھا کہ مقتل ہمیں نہیں معلوم
جو اس گلی سے گئے تھے زیادہ تر نہیں آئے