مرزا غالب

نظر میں کھٹکے ہے بن تیرے گھر کی آبادی
ہمیشہ روتے ہیں ہم دیکھ کر در و دیوار
ہے کچھ ایسی ہی بات جو چپ ہوں
ورنہ کیا بات کر نہیں آتی
دل سے تری نگاہ جگر تک اتر گئی
دونوں کو اک ادا میں رضامند کر گئی

انشاء اللہ خان انشا

کوئی سرکار جنوں کی نہیں لازم نائب
کام جتنے ہیں وہ سب آپ ہی کر لیتا ہے
لگ جا تو مرے سینہ سے دروازہ کو کر بند
دے کھول قبا اپنی کی بے خوف و خطر بند

حیدر علی آتش

جانب کہسار جا نکلا جو میں تو کوہ کن
اپنا تیشہ میرے سر سے مار کر جاتا رہا

داغ دہلوی

غیر کے روپ میں بھیجا ہے جلانے کو مرے
نامہ بر ان کا نیا بھیس بدل کر آیا
آئینہ تصویر کا تیرے نہ لے کر رکھ دیا
بو سے لینے کے لیے کعبے میں پتھر رکھ دیا
کیوں چراتے ہو دیکھ کر آنکھیں
کر چکیں میرے دل میں گھر آنکھیں
یہ نرالا ہے شرم کا انداز
بات کرتے ہو ڈھانک کر آنکھیں
داغ آنکھیں نکالتے ہیں وہ
ان کو دیدو نکال کر آنکھیں
تغافل میں شوخی نرالی ادا تھی
غضب تھا وہ منہ پھیر کر دیکھ لینا
مرے سامنے غیر سے بھی اشارے
ادھر بھی ادھر دیکھ کر دیکھ لینا
ترے جاتے ہی مر جاؤں گا ظالم
مجھے تو چھوڑ کر جاتا کہاں ہے

شیخ ابراہیم ذوق

خطا تو دل کی تھی قابل بہت سی مار کھانے کے
تری زلفوں نے مشکیں باندھ کر مارا تو کیا مارا
تفنگ و تیر تو ظاہر نہ تھا کچھ پاس قاتل کے
الٰہی اس نے دل کو تاک کر مارا تو کیا مارا
زال دنیا ہے عجب طرح کی علامۂِ دہر
مرد دیں دار کو بھی دہریہ کر دیتی ہے
کوئی کمر کو تری کچھ جو ہو کمر تو کہے
کہ آدمی جو کہے بات سوچ کر تو کہے
غائب میں جو کہا سو کہا پھر بھی ہے یہ شکر
خاموش ہو گیا وہ مجھے دیکھ کر تو ہے

مصحفی غلام ہمدانی

ہرگز ہوا نہ یارو وہ شوخ یار اپنا
زیں پیش ورنہ ہم نے کیا کیا کہ کر نہ دیکھا
ہے بیر خدائی اور خودی میں
اتنی بھی خودی نہ کر خدا سے
گئے باغ میں کسی گل تلے تو وہاں بھی اپنا نہ جی لگا
لے برنگ غنچہ جمائیاں تجھے یاد کر کے چلے گئے
اے غم زدہ ضبط کر کے چلنا
ہر گام ٹھہر ٹھہر کے چلنا

مصطفٰی خان شیفتہ

س سے میں شکوے کی جا شکرِ ستم کر آیا
کیا کروں تھا مرے دل میں سو زباں پر آیا
قبر سے اٹھ کے یہی دھیان مکرر آیا
وہ تو آئے نہیں میں آپ میں کیوں کر آیا

مومن خان مومن

دیکھو مت دیکھیو کہ آئینہ
غش تمہیں دیکھ کر نہ ہو جائے

میر مہدی مجروح

توبہ میں ہم نہ کھائیں گے الزام کیا ہوا
اک آدھ یار پی گئے گر بھول کر شراب

فیض احمد فیض

ہاں، جاں کے زیاں کی ہم کو بھی تشویش ہے لیکن کیا کیجے
ہر رہ جو ادھر کو جاتی ہے ، مقتل سے گزر کر جاتی ہے

مرزا رفیع سودا

تیرا جو ستم ہے اس کی تو جان
اپنی تھی سو خوب کر گئے ہم
جوں شمع لبوں پر آ رہا جی
تن تھا سو گداز کر گئے ہم

یگانہ چنگیزی

بہتر ہے خم‌‌ و‌‌ ساغر آنکھوں سے رہیں اوجھل
ایسا نہ ہو شیشے پر دل ٹوٹ کر آ جائے
مزا نہ پوچھیے واللہ دل دکھانے کا
کہاں کا خوفِ خدا ٹھان لی تو کر گزرے

باقی صدیقی

آئنے ماں ہر صورت آئنہ نہیں ہوتی
مسکرا دیے ہم بھی عکس دیکھ کر اپنا
کیا دورِ جہاں سے ڈر گئے ہم
کیوں تجھ سے گریز کر گئے ہم
ہر چند میرے غم کا مداوا نہ ہو سکا
پھر بھی تری نگاہ بڑا کام کر گئی
وعدہ نہ دلاؤ یاد ان کا
نادم ہیں ہم اعتبار کر کے
یا بات میں بھی اثر نہیں تھا
یا کام نظر بھی کر رہی ہے
ہم کہیں آئنہ لے کر آئے
لوگ اٹھائے ہوئے پتھر آئے
جن کے سائے میں صبا چلتی تھی
پھر نہ وہ لوگ پلٹ کر آئے
رات کے آخری تبسم پر
مئے باقیؔ نثار کر ساقی
تار دل کے ٹوٹ کر چپ ہو گئے
چپ نہ ہوتے تھے مگر چپ ہو گئے
سوچ کر آئے تھے ہم کیا کیا مگر
رنگِ محفل دیکھ کر چپ ہو گئے
کہہ رہے تھے جانے کیا لوگوں سے وہ
مجھ کو آتا دیکھ کر چپ ہو گئے

جون ایلیا

سارے رشتے تباہ کر آیا
دلِ برباد اپنے گھر آیا
حواس میں تو نہ تھے پھر بھی کیا نہ کر آئے
کہ دار پر گئے ہم اور پھر اتر آئے
عجیب حال کے مجنوں تھے جو بہ عشوہ و ناز
بہ سوئے باد یہ محمل میں بیٹھ کر آئے
اک ہنر ہے جو کر گیا ہوں میں
سب کے دل سے اتر گیا ہوں میں
آخری بار آہ کر لی ہے
میں نے خود سے نباہ کر لی ہے
جو بھی مانگو ادھار دوں گا میں
اس گلی میں دکان کر لی ہے
اور تو کچھ نہیں کیا میں نے
اپنی حالت تباہ کر لی ہے
آپ اک اور نیند لے لیجے
قافلہ کوچ کر گیا کب کا
کسی سے عہد و پیماں کر نہ رہیو
تو اس بستی میں رہیو پر نہ رہیو
خود میں ہی گزر کے تھک گیا ہوں
میں کام نہ کر کے تھک گیا ہوں
بکھرا ہوا ہوں صر صر شامِ فراق سے
اب آ بھی جاؤ اور مجھے آ کر سمیٹ لو
مجھے یاں کسی پہ بھروسا نہیں
میں اپنی نگاہوں سے چھپ کر چھپا

جگر مراد آبادی

وہ مرا ساغر بکف ہونا پشیمانی کے ساتھ
ابرِ رحمت کا وہ اٹھنا جھوم کر میرے لیے
مرے دل کی بیتابیاں بھی لیے جا
دبے پاؤں منہ پھیر کر جانے والے
اب کیا امید رکھوں اے حسنِ یار تجھ سے
تو نے تو مسکرا کر دیوانہ کر دیا ہے

خواجہ میر درد

نالہ فریاد آہ اور زاری
آپ سے ہو سکا سو کر دیکھا
تہمت چند اپنے ذمے دھر چلے
جس لیے آئے تھے سو ہم کر چلے
ہم جہاں میں آئے تھے تنہا ولے
ساتھ اپنے اب اسے لے کر چلے
ان نے کیا تھا یاد مجھے بھول کر کہیں
پاتا نہیں ہوں تب سے میں اپنی خبر کہیں
مدت تلک جہان میں ہنستے پھرا کیے
جی میں ہے خوب رویے اب بیٹھ کر کہیں
ظالم جفا جو چاہے سو کر مجھ پہ تو ولے
پچھتاوے پھر تو آپ ہی ایسا نہ کر کہیں
نہ سمجھا دردؔ ہم نے بھید یاں کی شادی و غم کا
سحر خنداں ہے کیوں روتی ہے کس کو یاد کر شبنم

سراج الدین ظفر

دن کو بحر و بر کا سینہ چیر کر رکھ دیجیے
رات کو پھر پائے گل رویاں پہ سر رکھ دیجیے

عبدالحمید عدم

آپ کا شہر اگر بار سمجھتا ہے ہمیں
کوچ کر جائیں گے سرکار کوئی بات نہیں

قمر جلالوی

کریں گے شکوۂ جورو جفا دل کھول کر اپنا
کہ یہ میدان محشر ہے نہ گھر ان کا نہ گھر اپنا
مجھ اے قبر دنیا چین سے رہنے نہیں دیتی
چلا آیا ہوں اتنی بات پر گھر چھوڑ کر اپنا
یوں تمھارے ناتوان منزل بھر چلے
کھائی ٹھوکر گر پڑے گر کر اٹھے اٹھ کر چلے
چھوڑ کر بیمار کو یہ کیا قیامت کر چلے
دم نکلنے بھی نہ پایا آپ اپنے گھر چلے
کس طرح طے کی ہے منزل عشق کی ہم نے نہ پوچھ
تھک گئے جب پاؤں ترا نام لے لے کر چلے
اے قمر شب ختم ہونے کو ہے انتظار
ساحلِ شب سے ستارے بھی کنارہ کر چلے
آخر ہے وقت دیکھ لو بھر کر نظر مجھے
بیٹھو نہ ذبحِ کرنے کو منہ پھیر کر مجھے
عذرِ گناہ حشر میں اور میرے سامنے
انکارِ قتل کیجیے پہچان کر مجھے
خفا بھی ہیں ارادہ بھی ہے شاید بات کرنے کا
وہ چل نکلیں ہیں مجھ کو دیکھ کر آہستہ آہستہ

شکیب جلالی

بس یہیں ختم ہے پیار کی رہ گزر
دوست! اگلا قدم کچھ سمجھ سوچ کر
مانندِ صبا جدھر گئے ہم
کلیوں کو نہال کر گئے ہم
ہنس ہنس کے گلے ملے قضا سے
تکمیلِ حیات کر گئے ہم
چوٹ ہر گام پہ کھا کر جانا
قربِ منزل کے لیے مر جانا
یہ بھی ہے کارِ نسیمِ سحری
پتی پتی کو جدا کر جانا
ڈھونڈتی ہیں تری مہکی ہوئی زلفوں کی بہار
چاندنی رات کے زینے سے اتر کر یادیں
عشرتِ رفتہ کو آواز دیا کرتی ہیں
ہر نئے لمحے کی دہلیز پہ جا کر یادیں

عرفان صدیقی

تیری کھیتی لب دریا ہے تو مغروز نہ ہو
اعتبار اتنا مری جان نہ کر پانی کا
نقشِ ظفر تھا لوحِ ازل پر لکھا ہوا
تلوار کاٹ سکتی تھی کیوں کر لکھا ہوا
زندگی کا مول وہ بھی اس سے کم کیا مانگتے
میں بھی اپنے قاتلوں کو جان دے کر بچ گیا
مجھے بچا بھی لیا، چھوڑ کر چلا بھی گیا
وہ مہرباں پسِ گردِ سفر چلا بھی گیا
کوئے قاتل کی روایت ہی بدل دی میں نے
ورنہ دستور یہاں لوٹ کر آنے کا نہیں
زرد پتوں کے ٹھنڈے بدن اپنے ہاتھوں پہ لے کر ہوا نے شجر سے کہا
اگلے موسم میں تجھ پر نئے برگ و بار آئیں گے تب تلک صبر کر‘ یا اخی
اکثر اکثر اس کا چہرہ دھیان میں آتا بھی ہے
جیسے گم ہو جائے جنگل میں چمک کر روشنی
تو پھر کیوں اس کو آنکھوں میں سجا کر رکھ نہیں لیتے
تم اس بے کار دنیا کو اٹھا کر کیسے پھینکو گے
لہو میں غرق ہمارے بدن کو سہل نہ جان
یہ آفتاب ہے اور ڈوب کر نکلتا ہے
یہ فصلِ گل جو بہت مہربان ہے اس بار
عجب نہیں ہے کہ جائے تو لوٹ کر نہیں آئے

مجید امجد

اک عمر دل کی گھات سے تجھ پر نگاہ کی
تجھ پر تری نگاہ سے چھپ کر نگاہ کی
باگیں کھنچیں، مسافتیں کڑکیں، فرس رکے
ماضی کی رتھ سے کس نے پلٹ کر نگاہ کی

مصطفی زیدی

میں خود کو ڈھونڈنے کے لیے در بہ در گیا
شام وطن کچھ اپنے شہیدوں کا ذکر کر
وہ جن کے در ناز پہ جھکتا تھا زمانہ
آتے تھے بڑی دور سے چل کر اسی گھر میں

الطاف حسین حالی

ہو عزم دیر شاید کعبہ سے پھر کر اپنا
آتا ہے دور ہی سے ہم کو نظر گھر اپنا
سنیں گے نہ حالیؔ کی کب تک صدا
یہی ایک دن کام کر جائے گی

جمال احسانی

وہ جس منڈیر پہ چھوڑ آیا اپنی آنکھیں میں
چراغ ہوتا تو لو بھول کر چلا جاتا
میں جمالؔ اپنی جگہ سے اس لیے ہٹتا نہیں
وہ گھڑی آ جائے شاید لوٹ کر اپنی جگہ
اس بار طول کھینچ گئی جنگ اگر تو کیا
اس بار شرط بھی تو ہے بڑھ کر لگی ہوئی

رئیس فروغؔ

شہروں کے چہرہ گر جنہیں مرنا تھا مر گئے
پیڑوں کو کاٹنے کی وبا عام کر گئے
ذرہ بن کر آیا تھا
صحرا بن کر جاؤں گا

احسان دانش

جینے کے لیے جو مر رہے ہیں
آغاز حیات کر رہے ہیں

اکبر معصوم

وہ ایک بار نہیں ہے ہزار بار ہے وہ
سو ہم اسی سے بچھڑ کر اسی سے ملتے ہیں

بشیر بدر

آنکھوں میں رہا دل میں اتر کر نہیں دیکھا
کشتی کے مسافر نے سمندر نہیں دیکھا
محبوب کا گھر ہو کہ بزرگوں کی زمینیں
جو چھوڑ دیا پھر اسے مڑ کر نہیں دیکھا
پتھر مجھے کہتا ہے مرا چاہنے والا
میں موم ہوں اس نے مجھے چھو کر نہیں دیکھا

بیخود بدایونی

ساتھ ساتھ اہل تمنا کا وہ مضطر جانا
اللہ اللہ ترا بزم سے اٹھ کر جانا

سدرشن فاکر

پتھر کے خدا پتھر کے صنم پتھر کے ہی انساں پائے ہیں
تم شہرِ محبت کہتے ہو ہم جان بچا کر آئے ہیں

ضیا جالندھری

یہ برف زار خیال جس میں نہ صوت گل ہے نہ عکس نغمہ
تری توجہ سے آتش شوق اسی کو گل زار کر گئی ہے

عالم تاب تشنہ

گزرا ہوا لمحہ تھا کہ بہتا ہوا دریا
پھر میری طرف اس نے پلٹ کر نہیں دیکھا
تھے سنگ تو بیتاب بہت نقش گری کو
ہم نے ہی انہیں آنکھ اٹھا کر نہیں دیکھا
سفر میں راہ کے آشوب سے نہ ڈر جانا
پڑے جو آگ کا دریا تو پار کر جانا
یہ اک اشارہ ہے آفات ناگہانی کا
کسی مقام سے چڑیوں کا کوچ کر جانا

عبید اللہ علیم

کوئی اور تو نہیں ہے پس خنجر آزمائی
ہمیں قتل ہو رہے ہیں ہمیں قتل کر رہے ہیں

غلام محمد قاصر

نمائش ہزاروں نگاہوں نے دیکھی
مگر پھول پہلے سے بڑھ کر اکیلے
کوئی منہ پھیر لیتا ہے تو قاصرؔ اب شکایت کیا
تجھے کس نے کہا تھا آئنے کو توڑ کر لے جا

فارغ بخاری

یہاں بس ایک نیا تجربہ ہوا فارغؔ
کہ لمحے لمحے کو محسوس کر رہا ہوں میں

احمد راہی

جس راہ سے بھی گزر گئے ہم
ہر دل کو گداز کر گئے ہم
بے مہریٔ دوست تلخی زیست
کس کس سے نباہ کر گئے ہم

ماجد صدیقی

میں ابھی موت سے بچ کر نکلا
موت کیسی؟ یہ مرا ڈر نکلا
اشک تھے سو تو چھپائے میں نے
پھول کالر پہ سجا کر نکلا
یہ کیسا خنجر سا میرے پہلو میں لحظہ لحظہ اتر رہا ہے
کہ دل بھی چنگیزی غمِ جاں کو جیسے تسلیم کر رہا ہے
لب پہ آئے، بکھر گئے نغمے
دل کو بے چین کر گئے نغمے

تلوک چند محروم

زندگی یا تو ہے وبال کوئی
یا مجھی کو یہ کر نہیں آتی
دام غمِ حیات میں الجھا گئی امید
ہم یہ سمجھ رہے تھے کہ احسان کر گئی

جلیل مانک پوری

جو ترے عشق میں تباہ ہوا
کوئی اس کو تباہ کر نہ سکا
مار ڈالا مسکرا کر ناز سے
ہاں مری جاں پھر اسی انداز سے

ثروت حسین

مرے ساتھ بود و نبود میں جو دھڑک رہا ہے وجود میں
اسی دل نے ایک جہان کا مجھے روشناس تو کر دیا
بہتی ہوئی آگ سے پرندہ
بانہوں میں سمیٹ کر بناؤں

جوش ملیح آبادی

تبسم ہے وہ ہونٹوں پر جو دل کا کام کر جائے
انہیں اس کی نہیں پروا کوئی مرتا ہے مر جائے
دعا ہے میری اے دل تجھ سے دنیا کوچ کر جائے
اور ایسی کچھ بنے تجھ پر کہ ارمانوں سے ڈر جائے

حسرت موہانی

حقیقت کھل گئی حسرتؔ ترے ترکِ محبت کی
تجھے تو اب وہ پہلے سے بھی بڑھ کر یاد آتے ہیں

حفیظ ہوشیارپوری

عجیب منزلِ دل کش عدم کی منزل ہے
مسافرانِ عدم لوٹ کر نہیں آئے
آج انہیں کچھ اس طرح جی کھول کر دیکھا کیے
ایک ہی لمحے میں جیسے عمر بھر دیکھا کیے
کچھ اس طرح سے نظر سے گزر گیا کوئی
کہ دل کو غم کا سزاوار کر گیا کوئی
یہ کہہ کے یاد کریں گے حفیظؔ دوست مجھے
وفا کی رسم کو پایندہ کر گیا کوئی

رسا چغتائی

مر رہے ہیں فراق میں تیرے
تو ہمیں مار کر رہے گا کیا
ڈوبنا تھا جسے وہ ڈوب گیا
تو بھی اب ڈوب کر رہے گا کیا
آنکھیں زخمی ہو سکتی ہیں
ذرہ اڑ کر آ سکتا ہے
کالا جادو کرنے والا
مشعل لے کر آ سکتا ہے
مٹی ہجرت کر سکتی ہے
دریا چل کر آ سکتا ہے

خاطر غزنوی

تیری انا نیاز کی کرنیں بجھا گئی
جذبے جو دل میں ابھرے تھے شرمندہ کر گئے

سید ضمیر جعفری

مدت کے بعد اس نے سرِ انجمن ضمیرؔ
دیکھا نگاہ عام سے اور خاص کر مجھے

سیماب اکبر آبادی

نظر آتا نہ تھا جو گرد افکار و حوادث میں
وہ ساحل آنکھ نے طوفانِ غم میں ڈوب کر دیکھا

شاد عظیم آبادی

کس بری ساعت سے خط لے کر گیا
نامہ بر اب تک نہ آیا مر گیا
جاتے ہی دل اس گلی میں مر گیا
مرنے والا بے وفائی کر گیا
دل تو جانے کو گیا لیکن مجھے
اس بھری محفل میں رسوا کر گیا
مرنے والے دل تجھے اب کیا کہوں
خیر بخشا میں نے جو کچھ کر گیا
منہ سے نکلا تھا کہ پہنچا عرش پر
نالۂ دل نام اونچا کر گیا
مے کشو ماتم کرو اب شادؔ کا
ہائے کیا مے خوار رحلت کر گیا

فانی بدایونی

دل کا علاج کیجیے اب یا نہ کیجیے
اپنا جو کام تھا وہ غمِ یار کر گیا
دل میں تیرا دھیان اک مدت رہا بیگانہ وار
کھلتے ہی کھلتے کھلا اور کیا ہی شرما کر کھلا
اک فسانہ سن گئے اک کہہ گئے
میں جو رویا مسکرا کر رہ گئے

اختر ہوشیارپوری

میرے لہو میں اس نے نیا رنگ بھر دیا
سورج کی روشنی نے بڑا کام کر دیا
وہ حرف آشنا ہے مجھے یہ گماں نہ تھا
اس نے تو سب کو نقش بہ دیوار کر دیا
کھڑکیوں کی اوٹ سے اندازہ ہو سکتا نہیں
شہر کا احوال تم گھر سے نکل کر دیکھتے
عجیب سرگوشیوں کا عالم تھا انجمن میں
میں سن رہا تھا زمانہ تنقید کر رہا تھا

افضل منہاس

کرب کے شہر سے نکلے تو یہ منظر دیکھا
ہم کو لوگوں نے بلایا ہمیں چھو کر دیکھا
گر پڑا تو آخری زینے کو چھو کر کس لیے
آ گیا پھر آسمانوں سے زمیں پر کس لیے

اکبر حمیدی

وہ جب نظریں ملا کر بولتے ہیں
تو بت اللہ اکبر بولتے ہیں
کبھی خاموش جو ہونے لگا ہوں
تو وہ خوابوں میں آ کر بولتے ہیں

احمد فراز

جان پہچان سے بھی کیا ہو گا
پھر بھی اے دوست غور کر شاید
جو بھی بچھڑے وہ کب ملے ہیں فرازؔ
پھر بھی تو انتظار کر شاید
سنا ہے ربط ہے اس کو خراب حالوں سے
سو اپنے آپ کو برباد کر کے دیکھتے ہیں
سنا ہے بولے تو باتوں سے پھول جھڑتے ہیں
یہ بات ہے تو چلو بات کر کے دیکھتے ہیں
کہانیاں ہی سہی سب مبالغے ہی سہی
اگر وہ خواب ہے تعبیر کر کے دیکھتے ہیں
کسے خبر وہ محبت تھی یا رقابت تھی
بہت سے لوگ تجھے دیکھ کر ہمارے ہوئے
قربت بھی نہیں دل سے اتر بھی نہیں جاتا
وہ شخص کوئی فیصلہ کر بھی نہیں جاتا
آنکھ میں آنسو جڑے تھے پر صدا تجھ کو نہ دی
اس توقع پر کہ شاید تو پلٹ کر دیکھتا
زندگی پھیلی ہوئی تھی شامِ ہجراں کی طرح
کس کو اتنا حوصلہ تھا، کون جی کر دیکھتا
ڈوبنے والا تھا اور ساحل پہ چہروں کا ہجوم
پل کی مہلت تھی میں کس کو آنکھ بھر کر دیکھتا
اب کے بچھڑ کے اس کو ندامت تھی اس قدر
جی چاہتا بھی ہو تو پلٹ کر نہ آئے گا
جہاں بھی جانا تو آنکھوں میں خواب بھر لانا
یہ کیا کہ دل کو ہمیشہ اداس کر لانا
یہ میں بھی کیا ہوں اسے بھول کر اسی کا رہا
کہ جس کے ساتھ نہ تھا ہم سفر اسی کا رہا
قامت کو تیرے سرو صنوبر نہیں کہا
جیسا بھی تو تھا اس سے تو بڑھ کر نہیں کہا
اب احتیاط کی دیوار کیا اٹھاتے ہو
جو چور دل میں چھپا تھا وہ کام کر بھی گیا

اقبال ساجد

دیوار تو ہے راہ میں سالم کھڑی ہوئی
سایہ ہے درمیان سے کٹ کر پڑا ہوا

امیر مینائی

مر چلے ہم مر کے اس پر مر چلے
کام اپنا، نام اس کا کر چلے
شیخ نے میخانے میں پی یا نہ پی
دخترِ رز کو تو رسوا کر چلے

شاذ تمکنت

مانا کہ میرے ظرف سے بڑھ کر مجھے نہ دو
شبنم ہی مانگتا ہوں سمندر مجھے نہ دو
لو دے رہی ہے سوچ کے وقفہ کی خامشی
ہر بات کا جواب سنبھل کر مجھے نہ دو
جانے والے تجھے کب دیکھ سکوں بارِ دگر
روشنی آنکھ کی بہہ جائے گی آنسو بن کر
سنبھلا نہیں دل تجھ سے بچھڑ کر کئی دن تک
میں آئینہ تھا بن گیا پتھر کئی دن تک
ہم نے بھی بہت اس کو بھلانے کی دعا کی
ہم نے بھی بہت دیکھا ہے رو کر کئی دن تک

قتیل شفائی

اتنا تو ہوا فائدہ بارش کی کمی کا
اس شہر میں اب کوئی پھسل کر نہیں گرتا

کلیم عاجز

کوئے قاتل ہے مگر جانے کو جی چاہے ہے
اب تو کچھ فیصلہ کر جانے کو جی چاہے ہے

محسن احسان

ایسے بھی لوگ ہیں اس شہر میں جو
دھوپ میں برف پہن کر نکلے
کس اعتماد سے الزام دھر گئے اپنے
ہمارے نام کو بدنام کر گئے اپنے
ہمیں عدو سے ہو محسنؔ گلہ تو کیوں کر ہو
ہمارے شہر کو ویران کر گئے اپنے

محسن نقوی

ہم سے مت پوچھ کہ کب چاند ابھرتا ہے یہاں
ہم نے سورج بھی ترے شہر میں آ کر دیکھا
اب یہ سوچا ہے کہ اوروں کا کہا مانیں گے
اپنی آنکھوں پہ بھروسا تو بہت کر دیکھا
شمار اس کی سخاوت کا کیا کریں کہ وہ شخص
چراغ بانٹتا پھرتا ہے چھین کر آنکھیں
وفا کی کون سی منزل پہ اس نے چھوڑا تھا
کہ وہ تو یاد ہمیں بھول کر بھی آتا ہے
پھر کون بھلا داد تبسم انہیں دے گا
روئیں گی بہت مجھ سے بچھڑ کر تری آنکھیں
بوجھل نظر آتی ہیں بظاہر مجھے لیکن
کھلتی ہیں بہت دل میں اتر کر تری آنکھیں
میں سنگ صفت ایک ہی رستے میں کھڑا ہوں
شاید مجھے دیکھیں گی پلٹ کر تری آنکھیں

ناصر کاظمی

بستی والوں سے چھپ کر
رو لیتے ہیں پچھلی رات
کسی کلی نے بھی دیکھا نہ آنکھ بھر کے مجھے
گزر گئی جرسِ گل اداس کر کے مجھے
تیری مجبوریاں درست مگر
تو نے وعدہ کیا تھا یاد تو کر
حسن کہتا ہے اک نظر دیکھو
دیکھو اور آنکھ کھول کر دیکھو
سن کے طاؤسِ رنگ کی جھنکار
ابر اٹھا ہے جھوم کر دیکھو
جلوۂرنگ بھی ہے اک آواز
شاخ سے پھول توڑ کر دیکھو
کہتے ہیں غزل قافیہ پیمائی ہے ناصر
یہ قافیہ پیمائی ذرا کر کے تو دیکھو
چڑھتے دریا کا ڈر نہیں یارو
میں ہوں ساحل کو دیکھ کر خاموش
چھپ جاتی ہیں آئینہ دکھا کر تری یادیں
سونے نہیں دیتیں مجھے شب بھر تری یادیں
گئے دنوں کا سراغ لے کر کدھر سے آیا کدھر گیا وہ
عجیب مانوس اجنبی تھا مجھے تو حیران کر گیا وہ

نوح ناروی

کب اہلِ عشق تمہارے تھے اس قدر گستاخ
انہیں تمہیں نے کیا چھیڑ چھیڑ کر گستاخ
کبھی کبھی جو تری شرمگیں نگاہ ملے
تو میں بناؤں اسے چھیڑ چھیڑ کر گستاخ